Майдончаи варзишии донишкада

Бо мақсади дар амал татбиқ намудани дастуру ҳидоятҳои Асосгузори сулҳу ваҳдати миллӣ- Пешвои миллат мӯҳтарам Эмомалӣ Раҳмон ҷиҳати оммавӣ гардонидани соҳаи варзиш бо иштироки шумораи зиёди устодону донишҷӯёни Донишкадаи политехникии Донишгоҳи техникии Тоҷикистон майдончаи футболи назди хобгоҳ ба истифода дода шуд. 

Дар расми ифтитоҳи майдончаи варзишӣ директори донишкада Саидӣ Дилафрӯз Раббизода суханронӣ намуда, таъкид дошт, ки варзиш - гарави саломатӣ ва саломатии миллат шарти муҳимтарини бақои имрӯзу фардои давлат мебошад. Бояд гуфт, ки ҳар чӣ қадар мо ба рушди соҳаи варзиш шароит фароҳам оварем, ҳамон қадар насли ҷавонро аз амалҳои номатлуб, ба монанди нашъамандиву нашъаҷаллобӣ, аъзо шудан ба гурӯҳҳои экстремистию ифротгаро ва ғайра наҷот мебахшем.

Дар донишкада ба хотири тарғиби тарзи ҳаёти солим рӯзҳои шанбе чорабинии оммавии варзиш гузаронида мешавад. Устодони донишкада ҳамасола бо баргузории чорабинӣ таҳти унвони «Бо ту мефахрам диёрам» меъёри варзиширо дар намуди давидан, сангбардорӣ, турниккашӣ, ҷаҳидан месупоранд. Донишҷӯёни донишкада пайваста дар спартакаидаҳо ғолибият ба даст меоранд. Раёсати донишкада бо мақсади рушди соҳаи варзиш толори варзишии факултети муҳандисӣ-иқтисодиро азнавсозӣ намуд.

Ба истифода додани майдончаи футболи назди хобгоҳ имконият фароҳам меорад, ки минбаъд донишҷӯён фориғ аз таҳсил ба варзиши футбол машғул шаванд.

Баъдан ба донишҷӯёни ғолиби мусобиқаи волейбол, ки чанде пеш бо иқдоми Раёсати кор бо ҷавонон, варзиш ва сайёҳии вилоят байни муассисаҳои олӣ доир гардид, диплом ва медалҳоро директори донишкада дар вазъияти тантанавӣ супорид.

Сипас дастаҳои факултетҳои донишкада вориди майдони нави футбол шуда, бо руҳияи болида ба бозии футбол шурӯъ карданд.

Ёдовар мешавем, ки майдончаи варзишии донишкада солҳои сол дар ҳолати табоҳ қарор дошта, он бо иқдоми раёсати донишкада дар муддати хеле кӯтоҳ азнавсозӣ карда шуда, майдонча бо панҷараҳои махсуси ҳифз карда шуда, худи майдони футбол бошад, бо алафи сунъии ба меъёри ҷаҳонӣ мувофик пӯшонда шудааст.

Итминони комил дорем, ки майдончаи футбол ҷои дӯстдоштатарини устодону донишҷӯёни донишкада мегардад.

 

Спартакиада: ғолибон аз донишкада

Чун ҳамасола дар арафаи таҷлили Рӯзи ҷавонон дар доираи нақша-чорабиниҳои Раёсати кор бо ҷавонон, варзиш ва саёҳии вилояти Суғд спартакиада байни донишҷӯён доир мегардад. Соли равон ин чорабинии варзишӣ бахшида ба 20-солагии Созишномаи истиқрори сулҳ ва ризоияти миллӣ ва эълон гардидани соли 2017- Соли ҷавонон бо шукуҳу шаҳомати хосса доир мегардад.

Шурӯъ аз санаи 15 апрел мусобиқаҳои варзишӣ аз қабили бокс, волейбол (байни мардон ва бонувон), гӯштини миллӣ, гӯштини дзюдо, варзиши сабук ва гӯштини тарзи озод дар толорҳои варзишии «Наврӯзгоҳ», коллеҷи тиббӣ, ба номи «Устопириён», Донишкадаи политехникии Донишгоҳи техникии Тоҷикистон ва варзишгоҳи деҳаи Хистеварзи ноҳияи Бобоҷон Ғафуров    гӯштин идома дорад.

 img

Донишҷӯёни Донишакади политехникии Донишгоҳи техникии Тоҷикистон ба номи академик М.С. Осимӣ дар шаҳри Хуҷанд аз рӯи ҳама намуди варзиш ширкат варзида истодаанд. Чунончӣ донишҷӯён Далер Мақсудов, гурӯҳи 25.01.03 тб-и факултети муҳандисӣ- иқтисодӣ ва  Шарифхӯҷа Мавлянов, гурӯҳи 4.430103 та-и факултети информатика ва энергетика дар риштаи гӯштини тарзи озод дар вазни худ бар ҳамаи рақибони худ пирӯз шуда, ғолиби спартакиада гардиданд. Ҳамзамон донишҷӯёни донишкада дар намуди бокс бо ба даст овардани се ҷои дуюм ва варзиши сабук  аз рӯи ҳама намуди он мақоми сеюмро ба даст оварданд.  

img

 

Мусобиқаи варзиши сабук

Дар пойтахти кишварамон мусобиқаи варзиши сабук байни донишҷӯёни муассисаҳои олии кишвар доир гардид. Дастаи вилояти Суғдро ғолибони спартакиадаи донишҷӯёни вилоят дар ин мусобиқаи пуршукӯҳ муаррифӣ намуданд.

Боиси хушнудист, ки се нафар фиристодаи Донишкадаи политехникии Донишгоҳи техникии Тоҷикистон – Файзуллозода Амир, Далер Мақсудов ва Насрулло Сулаймонов дар ин мусобиқа маҳорати баланди варзишӣ нишон дода, Файзуллозода Амир дар намуди партофтани пуд ва партофтани гулӯла ҷойҳои аввал ва сеюмро ишғол намуд.

Далер Мақсудов бошад, дар мусобиқаи гӯштини тарзи озод ҳамаи рақибонашро шикаст дода, ғолиб омад.  Насрулло Сулаймонов бо партофтани найза ба масоҳати 41 метру 60 см сазовори ҷойи сеюм гардид. Ҳамин тавр, дар ин мусобиқа се нафар донишҷӯёни мо бо ба даст овардани ду ҷойи аввал ва ду ҷойи сеюм шарафи варзишии вилоят ва донишкадаро боло бардоштанд. 

Дастхобонӣ: ғолибияти Аббос Одилматов

Дар толори варзишии Коллеҷи тиббии шаҳри Хуҷанд мусобиқаи шаҳрӣ оид ба дастхобонӣ байни ҷавонписарони донишгоҳҳои олӣ ва коллеҷҳои шаҳри Хуҷанд баргузор гардид.

Мақсади чорабинии мазкур тарғиби мусобиқаи дастхобонӣ байни донишҷӯён, тарзи ҳаёти солим ва пайдо намудани варзишгарони болаёқат ба дастаи мунтахаби донишгоҳҳо мебошад. Дар мусобиқаи мазкур 64 нафар ҷавонписарони донишгоҳҳои олӣ ва коллеҷҳои шаҳри Хуҷанд иштирок намуданд. Донишҷӯи курси 2, факултети информатика ва энергетикаи донишкада Одилматов Аббос дар вазни 75 килограмм бар ҳамаи рақибонаш пирӯз шуда соҳиби ҷойи аввал ва Ифтихорнома гардид. Тӯҳфаҳоро мудири бахши кор бо ҷавонон, варзиш ва сайҳӣ Бахтиёр Исматҷонов ва мудири бахши фарҳанги шаҳр Бахтиёр Қосимов ба ғолиб дар вазъияти тантанавӣ супориданд.

 Ғалабаи Меҳроб Давлатов

Бо ташаббуси Раёсати кор бо ҷавонон ва варзиши вилоят даври вилоятии мусобиқа оид ба гӯштини миллӣ байни наврасону ҷавонони солҳои таваллудашон 1999- 2002 муассисаҳои варзишии шаҳру ноҳияҳои вилоят доир гардид.

Меҳроб Давлатов, донишҷӯи курси 2-и факултети информатика ва энергетикаи донишкада дар вазни 80 килограмм бар ҳамаи рақибон пирӯз шуда, бо дипломи ҷойи якум сарфароз гардонда шуд.

Ёдовар мешавем, ки Меҳроб Давлатов соли гузашта низ дар мусобиқаи кушоди «Федератсияи дзюдо»-и вилоят ғолиб гардида буд.

Ин дастовардро ба Меҳроб Давлатов шодбош гуфта, барояш таҳсили бобарор таманно дорем.

 

 Вазири варзиши Доғистон меҳмони донишкада

Дар доираи сафари кории Президенти Ҷумҳурии Доғистон Рамазон Абдулатипов ба вилояти Суғд, ҳамзамон як қатор ҳамроҳонаш аз фаъолияти хоҷагии халқи вилоят дидан намуданд. Чунончи Вазири варзиши ин кишвар Муҳаммад Муҳаммадов аз рафти таълиму тарбия, пойгоҳи моддию техникии муассисаҳои олии шаҳри Хуҷанд ошно гардид.

Вазири варзиш ва ҳамроҳони ӯ, ҳамзамон муовини Раиси вилоят Назира Ғаффориро ҷомеаи меҳнатии Донишкадаи политехникии Донишгоҳи техникии Тоҷикистон бо нону намак ва гулу гудастаҳо пешвоз гирифтанд.

 

Муҳаммад Муҳаммадзода зимни шинос шудан аз фаъолияти лабораторияҳои донишкада ба шароити таълим баҳои баланд дода, афзуд, ки дар Донишкадаи политехникӣ таҳсил кардан кори саҳлу осон нест, аз ин рӯ фикр мекунам, ин ҷо беҳтарин донишҷӯён таҳсили илм менамоянд.

Зимни мулоқоти озод роҳбари варзиши Ҷумҳурии Доғистон гуфт, ки Тоҷикистон ва пешрафти он барои ман бефарқ нест, зеро ман ин ҷо таваллуд ёфта, ба воя расидаам. Ва имрӯз ободию пешрафти Тоҷикистонро дида ба роҳбари он-Пешвои муаззами тамоми тоҷикони олам Эмомалӣ Раҳмон аҳсант мехонам. Ин ҷо хонаи дуюми ман аст.

Директори донишкада Саидӣ Дилафрӯз Раббизода чун рамзи эҳтиром ба меҳмонони олиқадр  тӯҳфаҳои хотиравӣ супорида, таъкид дошт, ки донишкада барои эҳёи ҳунарҳои мардумӣ кӯшишу ҷаҳд дорад.

Сипас меҳмонон аз майдончаи футболи назди хобгоҳи донишкада дидан намуданд, ки бо тарҳи замонавӣ чанде пеш мавриди баҳрабардорӣ қарор гирифтааст.

Бо ҳамин боздиди вазири варзиши Ҷумҳурии Доғистони Федератсияи Россия Муҳаммад Муҳаммадов аз Донишкадаи политехникии Донишгоҳи техникии Тоҷикистон анҷом пазируфт.