Санаҳои 4-5 майи соли равон дар пойтахти кишвар - шаҳри Душанбе, дар Донишгоҳи молия ва иқтисоди Тоҷикистон Олимпиадаи ҷумҳуриявии донишҷӯёни муассисаҳои таҳсилоти олии касбии Ҷумҳурии Тоҷикистон доир гардид.
Дар олимпиадаи мазкур донишҷӯёни Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд низ иштирок намуда, сазовори ҷойҳои ифтихорӣ гардиданд.
Боиси ифтихори мост, ки донишҷӯи курси 4, ихтисоси 40.01.02тб Музафаров Манучеҳр бо 97 хол аз фанни технологияи иттилоотӣ сазовори ҷойи дуюм, Сангинов Саидиқбол, донишҷӯи курси 3, ихтисоси 40.01.02ра аз фанни иқтисодиёт соҳиби ҷойи дуюм ва аз фанни математика донишҷӯи курси 3, ихтисоси 69.01.01тб Толиббоев Шаҳзод мақоми сеюмро касб намуд. Ғолибият дар олимпиада байни муассисаҳои таҳсилоти олии касбии тамоми ҷумҳурӣ бори дигар собит сохт, ки имрӯз донишкадаи мо яке аз беҳтарин муассисаҳои таҳсилоти олии кишвар маҳсуб ёфта, сатҳу сифати дониши донишҷӯён дар дараҷаи зарурӣ қарор дорад.
Ба ғолибон дар вазъияти тантанавӣ аз ҷониби Вазири маориф ва илми Ҷумҳурии Тоҷикистон Нуриддин Саид диплом ва медалҳои дараҷавӣ супорида шуд. Китоби тозанашри Асосгузори сулҳу ваҳдати миллӣ, Пешвои миллат Эмомалӣ Раҳмон “Уфуқҳои Истиқлол” ба ҳамаи ғолибон туҳфа карда шуд.
Устодони донишкада Акрамова Заррина, Ғуломнабиев Сардор, Солиев Одилхӯҷа ва Иномов Беҳрӯз барои омодагии ҳамаҷонибаи иштирокчиён кӯшиш намуданд. Ғолибон ва устодони онҳо барои дастгирии ҳамаҷониба миннатдории хешро ба директори донишкада Саидӣ Дилафрӯз изҳор менамоянд.
Музафаров Манучеҳр, Сангинов Саидиқбол ва Толиббоев Шаҳзодро бо ғолибияте, ки обрӯю нуфузи донишкадаамонро боз ҳам баланд бардошт, аз номи кулли донишкада табрик менамоем. Бигзор номбардори донишкада гардида, дар раҳи илму дониш комгор гарданд.
- Дида шуд: 1422 маротиба
Санаи 26-уми апрели соли равон ҷаласаи ҷамъбастии Конференсияи илмӣ-амалии омӯзгорон, муҳаққиқони ҷавон, докторантони PhD, магистрантон ва донишҷӯён бахшида ба эълон гардидани солҳои 2019-2021 – Соли рушди деҳот, сайёҳӣ ва ҳунарҳои мардумӣ ва Рӯзи илми баргузор гардид. Муовини директор оид ба илм ва инноватсия Ахмедов Усмонҷон ҷаласаро шуруъ намуда, афзуд, ки мақсади асосии баргузории конфронс ҷалби бештари донишҷӯён, магистрантон, докторантон ва омӯзгорон ба корҳои илмӣ-тадқиқотӣ мебошад. Зикр гардид, ки конференсияи мазкур ҳамасола бахшида ба Рӯзи илми тоҷик барпо гардида, имсол низ чун анъана дар сатҳи баланд ташкил гардид. Ба конференсия 200 мақолаҳои илмӣ пешниҳод карда шуданд.
Конференсия аз рӯи 7 бахш фаъолият намуда, ҳамаи роҳбарони бахш оид ба натиҷаи он ҳисобот доданд. Роҳбари башхи “Фаъолияти иқтисодӣ, молиявӣ ва сайёҳӣ ҳамчун омили рушди устувории иқтисодиёт” дотсенти кафедраи иқтисодиёти соҳавӣ Ахмедова Малика оид ба кори бахш ҳисобот дода, қайд намуд, ки ҳамаи маърузаҳои пешниҳодгашта актуалӣ буданд. Маърузаҳо асосан аз тарафи магистрантон пешниҳод гардида, баландбардории самаранокии истифодаи захираҳо, самаранокии иқтисодӣ дар соҳаи истеҳсолӣ, рақобатпазирии корхонаҳоро дар бар гирифт. Роҳбари бахши “Ташаккули ҳунарҳои мардумӣ дар замони муосир” Умарова Зӯҳро низ оид ба рафти кори бахш баромад намуд. Дар бахши мазкур 13 мақолаҳои илмии донишҷӯён мавриди баррасӣ қарор гирифт. Оид ба натиҷаи бахши “Электроэнергетика дар рушди сайёҳӣ ва тараққиёти устувори иқтисодиёти Ҷумҳурии Тоҷикистон” номзади илмҳои техникӣ Тошхӯҷаева Муҳайё ҳисоботи худро пешкаши ҳозирин намуд. Зимни ҳисоботи худ қайд намуд, ки расидан ба истиқлолияти энергетикӣ аз ҳадафҳои стратегии кишварамон буд, ки имрӯз б он ноил гардидаем. Бинобар ин, зарур аст, ки ба ин соҳа боз диққати ҷиддӣ дода шуда, корҳои тадқиқотии устодону донишҷӯён пурзӯр карда шавад. Роҳбари бахши “Нақши сохтмон ва нақлиёт дар рушди деҳот, сайёҳӣ ва тараққиёти устувори иқтисодиёти Ҷумҳурии Тоҷикистон”, декани факултети сохтмон ва нақлиёт Акрамов Абдуқодир дар ҳисоботи худ қайд намуд, ки аз 15 мақолаи пешниҳодгашта 12-тои он мавриди баррасӣ қарор гирифта шуд. Иштирокчиён бобати рушди соҳаи нақлиёт, нақши он дар пешравии иқтисодиёт ва деҳот маъруза намуданд. Оид ба бахши “Нақши соҳаи хӯрока ва кишоварзӣ дар таъмини амнияти озуқаворӣ” роҳбари он, мудири кафедраи “Агротехнология ва маҳсулоти хӯрока” Комилова Дилрабо баромад намуд. Зимни ҳисоботи худ зикр намуд, ки мақолаҳои иштирокчиён асосан ба ду самт равона шудааст: коркард ва истеҳсоли маҳсулот ва масъалаҳои мубрами соҳаи истеҳсоли хӯрока. Дар ин бахш масъалаҳои асосии обёрӣ, усулҳои обёрӣ, истеҳсоли нон ба таври ғайрианъанавӣ дида баромада шуд. “Масъалаҳои мубрами забон ва фанҳои ҷомеашиносӣ” бахши дигари конференсия буд, ки мудири кафедраи забони давлатӣ ва ҷомеашиносӣ Бобоева Таиба натиҷаи онро ба ҳамагон пешниҳод намуд. Усмонова Маҳина, роҳбари бахши “Технологияҳои иттилотӣ воситаи рушди устувори ҷамъият” зимни баромади худ қайд намуд, иштирокчиёни конференсия асосан магистрантони бахши 2-юми донишкада буданд. Зикр гардид, ки ҳамаи мақолаи пешниҳодгашта таҳлилу муҳокима карда шуда, асосан соҳаи лингвистикаи компютерӣ, системаи тарҷумони матнии компютерӣ хуб тадқиқ гардидааст. Маърӯза оид ба беҳтар намудани раванди таълим дар мактабҳо, коркарди ҳуҷҷатҳо дар ҳукумати электронӣ аз мавзӯҳои актуалии бахши мазкур маҳсуб ёфт. Сардори шуъбаи илм ва инноватсия Акрамова Заррина низ баромад намуда, қайд кард, ки барои иштирок дар конференсия 418 мактуби электронӣ ба қайд гирифта шудааст. Аз ҳисоботи роҳбарони бахшҳо кори конференсия қаноатбахш ҳисобида шуд.
- Дида шуд: 1362 маротиба
Баҳори некпай ва Наврӯзи оламафрӯз бо қадамҳои муборакаш диёри моро гулборону гуҳаррез мекунад. Аз файзу баракот ва ташрифи Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ин ҷашну сурури сокинони вилояти Суғд боз ҳам ҷилои дигар гирифта, шодию нишоти онҳоро ҳадду канор нест. Зеро ҳар як сафари Сарвари давлат ба ин ё он минтақа ободкориву созандагиро дар пай дорад. Чунончи дар доираи сафари кории Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ба вилояти Суғд санаи 30 – март дар маросими ифтитоҳи бинои Қасри ҷавонон, ки бо тарҳи хеле зебои миллӣ таъмиру таҷдид гардидааст, ширкат варзиданд.
Дар даромадгоҳи бино дастовардҳои илмию истеҳсоли муассисаҳои олӣ ва миёнаи махсус пешкаши ҳозирин гардонда шуд. Аснои шиносоӣ бо фаъолияти илмиву истеҳсолии Донишкадаи политехникии Донишгоҳи техникии Тоҷикистон номзади илмҳои физика ва математикаи донишкада Хуршед Худойбердиев ба Сарвари давлат иттилоъ дод, ки алҳол устодон ва шогирдони донишкада сари лоиҳаҳои пардохти ғайринақдӣ, назорати ҳозиршавии кормандон дар ташкилоту муассисаҳо, муаррифи забони тоҷикӣ дар барномаҳои компютерӣ, тафтиши имло, тарҷумон, ба таври автоматӣ муайянкунии муаллифи матн кор бурда истодаанд.
Пешвои муаззами миллат барои пажӯҳиш корбарии лоиҳавии устодону шогирдони донишкада баҳои баланд дода, барои боз ҳам хубтар ҷараён гирифтани фаъолияти тадқиқотӣ дастуру супоришҳо доданд.
Зимни вохӯрӣ бо ҷавонони фаъоли вилоят Пешвои муаззами миллат онҳоро ба меҳнатдӯстиву илмомӯзӣ ва аз самими қалб дӯст доштани обу хоки диёрро талқин намуданд. Таъкид шуд, ки дар шароити ҳассоси ҷаҳонишавӣ танҳо он миллат ҳифзу бехатар мемонад, ки сокинонаш, хосса ҷавонон огоҳ аз таъриху тамаддун ва сиёсат бошад. Донистани ду ё се забон ҷавонро ба сӯи муваффақияту пешравӣ ҳидоят мекунад.
Дар посух ба ин ғамхориҳои Сарвари давлат ҷавонони соҳибиқболи соҳибистиқлоли вилоят роҳбарияти олии кишварро бовар кунонданд, ки барои рушди такомули зеҳнӣ, амалисозии накшаву ҳадафҳо кӯшиш ба харҷ дода, Ватанро аз сидқи дил дӯст медоранд ва барои пешрафт ва шукуфоии он саҳм мегузоранд.
- Дида шуд: 1781 маротиба
Бахшида ба эълон гардидани солҳои 2019-2021 – Соли рушди деҳот, сайёҳӣ ва ҳунарҳои мардумӣ ва Рӯзи илми тоҷик санаҳои 25-26-уми апрели соли равон дар донишкада Конференсияи илмӣ-амалии омӯзгорон, муҳаққиқони ҷавон, докторантони PhD, магистрантон ва донишҷӯён баргузор мегардад.
Рӯзи аввал конференсия аз рӯи 7 бахш кори худро оғоз намуд. Бахши аввал “Фаъолияти иқтисодӣ, молиявӣ ва сайёҳӣ ҳамчун омили рушди устувории иқтисодиёт” бо роҳбарии дотсенти кафедраи иқтисодиёти соҳавӣ Ахмедова Малика амал намуд. Дар бахши мазкур 5 нафар донишҷӯён, магистрантон ва докторантон бо маърӯзаҳои худ баромад намуданд. Дар баромадҳои иштирокчиён масъалаҳои асосии рушди устувори иқтисодӣ, омилҳои пешбарандаи иқтисодиёт зикр карда шуд. Бахши дигар ин “Ташаккули ҳунарҳои мардумӣ дар замони муосир” мебошад, ки таҳти роҳбарии Умарова Зӯҳро фаъолияташро идома дод. Мудири кафедраи “Дизайн ва меъморӣ” Раҳимова Ҳамрохон низ ба маърӯзаи иштирокчиён баҳо дода, фикру ақидаашро нисбати маърӯзаҳо баён намуд. Дар ин бахш 10 нафар магистрантони донишкада бо намоиши либосҳои ҳозиразамон тариқи слайд баромад намуданд. Дар бахши мазкур масъалаҳои тарҳи либос дар замони муосир мавриди баррасӣ қарор гирифт. Бахши сеюм “Электроэнергетика дар рушди сайёҳӣ ва тараққиёти устувори иқтисодиёти Ҷумҳурии Тоҷикистон” бо роҳбарии дотсенти кафедраи Таъмини барқ Хоҷиев Анвар ва устоди ҳамин кафедра, номзади илмҳои техникӣ Тошхӯҷаева М. идома ёфт. Рӯзи аввал дар он докторанти донишкада Мирзоев Дабир оид ба масъалаи истифодаи қувваи барқ дар деҳот баромад намуд. Бахши чорум “Нақши сохтмон ва нақлиёт дар рушди деҳот, сайёҳӣ ва тараққиёти устувори иқтисодиёти Ҷумҳурии Тоҷикистон” сурат гирифт. Он таҳти роҳбарии декани факултети сохтмон ва нақлиёт Акрамов Абдуқодир фаъолият бурда, ҳамзамон устод Кенҷаев А. низ ширкат дошт.
Дар бахши мазкур 7 нафар иштирокчиён бобати рушди соҳаи нақлиёт, нақши он дар пешравии иқтисодиёт ва деҳот маъруза намуданд. “Нақши соҳаи хӯрока ва кишоварзӣ дар таъмини амнияти озуқаворӣ” бахши 5-уми конференсияро ташкил дод, ки бо роҳбарии мудири кафедраи “Агротехнология ва маҳсулоти хӯрока” Комилова Дилрабо ба кори худ оғоз намуд. Дар он 11 нафар устодон, магистрантон ва докторантон оид ба сифати маҳсулоти хӯрока, маҳсулотҳои истеҳсоли ватанӣ, рушди амнияти озуқаворӣ баромад намуданд. Таҳти унвони “Масъалаҳои мубрами забон ва фанҳои ҷомеашиносӣ” низ устодони кафедраи Забони давлатӣ ва ҷомеашиносӣ кори худро оғоз намуданд. Бахши мазкур бо роҳбарии мудири кафедраи забони давлатӣ ва ҷомеашиносӣ Бобоева Таиба ба роҳ монда шуда, устодони кафедра Темирова Х., Ғозиева М., Норов И., Муллоусмонова Г., Мирзоева М., бобати масъалаҳои забони тоҷикӣ, сатҳи дониши донишҷӯёни донишкада оид ба забономӯзӣ, китоби тозанашри Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон “Уфуқҳои Истиқлол” баромад намуданд. Дар бахши “Технологияҳои иттилотӣ воситаи рушди устувори ҷамъият” 8 нафар магистрантону докторантон баромад намуданд. Роҳбари бахш Усмонова Маҳина ва котиб Зулфиқорова Парвина баромадҳои иштирокчиёнро мавриди баррасӣ қарор дода, саволу ҷавоб намуданд.
Зимни кори конференсия ва баромади иштирокчиён мақолаҳои илмии ҳар як иштирокчӣ таҳлил ва баррасӣ карда шуд. Конференсияи мазкур дар замони ҳозира аҳамияти калон дошта, қадаме барои рушди устувори иқтисодиёти кишвар гардид.
Рӯзи аввали кори конференсия бо фаъолияти бахшҳо анҷом ёфт. Оид ба ҷамъбасти Конференсияи илмӣ-амалии омӯзгорон, муҳаққиқони ҷавон, докторантони PhD, магистрантон ва донишҷӯён боз маълумот хоҳем дод.
- Дида шуд: 1418 маротиба
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии худ ба Маҷлиси Олии Ҷумҳурии Тоҷикистон аз 26-уми декабри соли 2018 қайд намуданд, …“Таҳким бахшидани иқтидори илмии кишвар, ҷорӣ кардани ихтироот дар истеҳсолот, устувор гардонидани пояҳои моддиву техникии муассисаҳои таълимӣ, баланд бардоштани сифати таълим дар ҳамаи зинаҳои таҳсилот, ҷалби боз ҳам васеи истеъдодҳои ҷавон ба омӯзиши технологияҳои муосир ва корҳои эҷодиву техникӣ вазифаи муҳимтарини соҳаҳои илму маориф мебошад”.
Бо мақсади дар амал татбиқ намудани ин нуктаи муҳими Паёми Сарвари давлат дар шаҳри Хуҷанд дар рӯзҳои ҷашни Иди Наврӯз бо иштироки муовини аввали сарвазири мамлакат Давлаталӣ Саид, Раиси вилояти Суғд Раҷаббой Аҳмадзода, муовини Вазири маориф ва илми кишвар Латофат Назирӣ ва Раиси шаҳри Хуҷанд Маъруф Муҳаммадзода бинои нави озмоишгоҳии Донишкадаи политехникии Донишгоҳи техникии Тоҷикистон ба номи академик М.С.Осимӣ ифтитоҳ гардид. Дар расми ифтитоҳи бинои нави озмоишгоҳ директори донишкада, номзади илмҳои техникӣ Саидӣ Дилафрӯз Раббизода иттилоъ дод, ки бо дастгирии Ҳукумати Ҷумҳурии Тоҷикистон ва мусоидати Мақомоти иҷроияи ҳокимияти давлатии вилояти Суғд бинои нави таълимиро, ки дар он маҷмааи озмоишгоҳҳои таълимӣ ва илмӣ – тадқиқотӣ ҷойгир мешаванд, бунёд намуд. Истифодаи ин бино имконият медиҳад, ки дар он 9 озмоишгоҳи нав барои донишҷӯёни ихтисосҳои технологияҳои нигоҳдорӣ ва коркарди маҳсулоти хӯрока, экологияи саноат ва истифодабарии оқилонаи захираҳои табиӣ, меъморӣ амал кунад. Таҷҳизоти озмоишгоҳҳо дар натиҷаи ҳамкорӣ бо барномаи Эрасмус+-и Иттиҳоди Аврупо (лоиҳаи “Таҳсилоти олӣ барои низоми озуқаворӣ ва стандартҳо дар Осиёи Марказӣ”), барномаи Ҷамъияти Олмон оид ба ҳамкориҳои байналмилалӣ – GIZ (лоиҳаи “Таҳсилоти касбӣ ва такмили ихтисос дар Осиёи Марказӣ”), Донишгоҳи технологии шаҳри Гуилини Ҷумҳурии Халқии Чин дар давоми 3 соли охир ва инчунин бевосита аз ҳисоби буҷети донишкада таъмин шуда истодааст. Дар доираи ин лоиҳаҳои ҳамкорӣ омӯзгорону кормандони донишкада бевосита корро бо ин таҷҳизот азхуд кардаанд ва инчунин дар донишгоҳу корхонаҳои Олмон, Латвия, Литва, Полша, Хитой, Қазоқистон, Қирғистон 54 нафар такмили ихтисос гузаштанд. Ибтикори донишкада оид ба ҷалби маблағҳои грантӣ барои пурра ва мустаҳкам кардани пояи озмоишгоҳӣ боиси ибрату омӯзиш аст.
Муовини аввали сарвазири мамлакат Давлаталӣ Саид ва Раиси вилояти Суғд Раҷаббой Аҳмадзода таъкид доштанд, ки чунин озмоишгоҳ дар Тоҷикистон назир надорад ва омӯзгорону кормандони донишкада дар заминаи технологияҳои муосир бо тайёр кардани кадрҳои рақобатпазир дар бозори меҳнат ҳиссаи худро дар татбиқи ҳадафҳои стратегии кишварамон - ҳифзи амнияти озуқаворӣ ва дастрасии аҳолии мамлакат ба ғизои хушсифат, саноатикунонии босуръат, инчунин, вусъатдиҳии шуғли пурмаҳсул боз бештар намоянд.
Таъкид шуд, ки таҳсилоти муҳандисӣ аз донишҷӯ талаб мекунад, ки на танҳо ҳаҷми муайяни донишро азхуд кунад, балки малакаи корфармоии ин донишро дар амал соҳиб шавад. Дигар хусусияти фарқкунанда ин тез – тез навшавии мазмуну мундариҷаи фанҳои тахассусӣ вобаста ба рушди соҳа мебошад.
Ҷоиз ба зикр аст, ки дар Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд аз 20 ихтисосҳои зинаи бакалавриат 17 ихтисос ихтисосҳои муҳандисиву технологӣ мебошанд.
Боиси хурсандист, ки омӯзгорону кормандон ва раёсати донишкадаи политехникӣ ҳаракат мекунад, ки хатмкардаҳояш дар бозори меҳнати ҳам дохилӣ ва ҳам минтақавиву байналхалқӣ рақобатпазир бошанд. Ин танҳо ҳамон вақт имконпазир аст, ки салоҳиятҳои хатмкунанда бо салоҳиятҳои ҷои кори ояндааш ҳамоҳанг бошад ва пояи озмоишгоҳии барномаи таҳсилот ба ин мусоидат намояд.
- Дида шуд: 1466 маротиба
Давоми ду рӯз машқи мукаммали зернизоми Низоми ягонаи давлатӣ оид ба пешгирӣ ва рафъи оқибатҳои ҳолатҳои фавқулоддаи сатҳи вилоятӣ дар шаҳри Хуҷанд дар сатҳи баланд гузаронида шуд.
Субҳи санаи 15 апрел бо эълони «Бонги хатар» дар майдони назди Мақомоти иҷроияи ҳокимияти давлатии шаҳри Хуҷанд маросими машқи мукаммали зернизоми Низоми ягонаи давлатӣ оид ба пешгирӣ ва рафъи оқибатҳои ҳолатҳои фавқулоддаи сатҳи вилоятӣ дар шаҳри Хуҷанд оғоз карда шуд.
Нахуст, Раиси шаҳри Хуҷанд, Раиси Комиссияи ҳолатҳои фавқуллодаи шаҳри Хуҷанд Маъруф Муҳаммадзода баъди гузориши сардори Кумитаи ҳолатҳои фавқулоддаи шаҳр аз вазъи омодагии иштирокдорони машқ ва техникаи сафарбаршуда ошноӣ пайдо намуда, доир ба оғози машқ ба муовини Раиси вилояти Суғд Баҳоваддин Баҳодурзода гузориш дод.
Сипас, иштирокдорони машқи мукаммал ба сӯйи баргузории чорабинӣ - маҳаллаи Чашмаи Арзана ҳаракат намуданд.
Дар бинои таълимии факултети муҳандисӣ - иқтисодии Донишкадаи политехникии Донишгоҳи техникии Тоҷикистон ба номи академик Муҳаммад Осимӣ «Бонки хатари рамзӣ» оиди заминларзаи 6- 7 балла зада шуд. Гурӯҳи роҳнамоӣ, ёрии аввали тиббӣ, кӯмакрасонҳо аз ҳисоби устодон донишҷӯёну кормандонро аз ошёнаҳои якуму дуюм ва сеюм баровардан. Ба кӯмаки онҳо дастаи таъиноти махсуси кормандони мудофиаи шаҳрвандӣ, ёрии аввали тиббӣ шитофта, нафарони зери осебдидаи ошёнаи 3- юмро тавассути арғамчини махсус поён фароварда, ба онҳо кӯмаки аввали тиббӣ расониданд.
Машқҳои мукаммали оқибати рафъи заминларзаро муовини Раиси вилояти Суғд Баҳоваддин Баҳодурзода, Раиси Комиссияи ҳолатҳои фавқуллодаи шаҳри Хуҷанд Маъруф Муҳаммадзода ва дигар масъулони чорабинӣ мушоҳида намуданд. Онҳо ба сатҳи омодагии ҷомеаи меҳнатии донишкада баҳои баланд дода, ба директори донишкада, Раиси Комиссияи ҳолатҳои фавқуллода ДПДТТ Саидӣ Дилафрӯз Раббизода изҳори миннатдорӣ намуданд.
Машқҳои мукаммал дар бозори «Деҳқон»-и шаҳри Хуҷанд идома ёфта, дар фарҷоми чорабинӣ ба фаъолон Ифтихорнома ва туҳфаҳои хотиравии Кумитаҳои ҳолатҳои фавқулоддаи Ҷумҳурии Тоҷикистон ва Мақомоти иҷроияи ҳокимияти давлатии шаҳри Хуҷанд тақдим карда шуд.
- Дида шуд: 1423 маротиба
Бо мақсади баланд бардоштани шавқу завқи донишҷӯёни муассисаҳои таҳсилоти олии касбӣ ба омӯзиши илмҳои муосир, ташаккули тафаккури илмию техникӣ, бедор намудани шавқу завқи онҳо доир ба ҳалли масъалаҳои мураккаби илмӣ, озодона баён намудани фикр, инкишофи қобилияти эҷодӣ, истифодаи комёбиҳои соҳаҳои гуногуни илму техникаи муосир. Инчунин, муайян намудани донишҷӯёни лаёқатманд, бо мақсади дар оянда ҷалби онҳо ба соҳаҳои мухталифи илм ва гузаронидани тадқиқотҳои илмӣ соли ҳафтум аст, ки бо иқдоми Академияи илмҳои Ҷумҳурии Тоҷикистон олимпиадаи донишҷӯёни муассисаҳои таҳсилоти олии касбии Ҷумҳурии Тоҷикистон барои дарёфти «Ҷоми Академияи илмҳои Ҷумҳурии Тоҷикистон» доир мегардад.
Имсол низ ин олимпиада дар сатҳи баланд доир гардида, дар он наздик ба 300 нафар ғолибони даври донишгоҳу донишкадавӣ аз рӯи 13 соҳаи илм (математика, физика, астрономия, химия, геология, биология, иқтисодиёт, технологияҳои иттилоотӣ, забон ва адабиёти тоҷик, таърих, фалсафа, ҳуқуқ ва сиёсатшиносӣ) бо ҳам вориди рақобат шуданд.
Боиси хушнудист, ки донишҷӯёни Донишкадаи полтехникии Донишгоҳи техникии Тоҷикистон низ дар ин олимпиада ширкати фаъолона доштанд. Чунончи донишҷӯён Саидиқбол Сангинов, курси 3, гурӯҳи 40.01.02.ра аз фанни иқтисодиёт, Абдуллоҷон Ахмедов, донишҷӯи курси 2, гурӯҳи 43.01.03.тв аз фанни физика ба гирифтани мақоми дуюму сеюм мушарраф гардида, донишҷӯи курси 4, гурӯҳи 70.02.01.тв Шоҳбоз Худойқулов аз фанни забон ва адабиёти тоҷик ҷои чорумро ишғол намуд.
Ба ғолибон ва ҷоизадорон диплом ва Ифтихорномаҳоро дар вазъияти тантанавӣ Президенти Академияи илмҳои Ҷумҳурии Тоҷикистон Фарҳод Раҳимӣ супориданд. Ҳамчунин аз ҷониби роҳбарияти Академияи илмҳои Ҷумҳурии Тоҷикистон ба ғолибони Олимпиада имтиёз дар намуди дохил шудан ба зинаҳои магистратура ва докторантура PhD дода шуд.
Бояд гуфт, ки сири муваффақияти донишҷӯён ин пеш аз ҳама шароити хуби таҳсил, таваҷҷуҳи доимии роҳбарияти донишкада бо сарварии Саидӣ Дилафрӯз Раббизода ва масъулиятпешагии устодоне, ки донишҷӯёнро ба ин озмуни бонуфуз омода кардан мебошад.
Раёсати донишкада ба ҳамаи устодон ва шогирдоне, ки дар ин озмун шарафи донишкадаро ҳифз намуданд, хосса ба ғолибон ва устодони онҳо Заррина Акрамова, Хуршед Бобоҷонов ва Тайиба Бобоева изҳори миннатдорӣ баён менамоянд.
- Дида шуд: 1454 маротиба
Санаи 16 апрели соли равон дар Донишгоҳи давлатии технологии Қирғизистон ба номи И.Раззоқов Олимпиадаи байналхалқии технологӣ баргузор гардид. Дар олимпиада донишҷӯёни муассисаҳои олии Қирғизистон, Қазоқистон ва Тоҷикистон, ки дар равияи “Технологияи гӯшт ва маҳсулоти гӯштӣ” таҳсил доранд, ширкат варзиданд. Боиси ифтихору сарфарозии мост, ки дар олимпиадаи байналхалқии мазкур донишҷӯёни донишкадаи мо Тоҷикистонро намояндагӣ намуда, номбардори Ватану донишкадаи азизи хеш гардиданд. Олимпиадаи мазкур бо ташаббуси кафедраи “Технологияи истеҳсоли маҳсулоти хӯрока”-и ДДТҚ ба номи И.Раззоқов, барномаи "Таҳсилоти олӣ барои низоми озуқаворӣ ва стандартҳо дар Осиёи Марказӣ" ташкил карда шуда, дар сатҳи баланд гузаронида шуд.
Олимпиада дар ду марҳила гузаронида шуда, аз қисми назариявӣ ва амалӣ иборат буд. Қисмати сеюм бошад, дар сехи маҳсулотҳои гӯштии “Технолог” баргузор гашт, ки шарти асосӣ дар муддати муайяншуда аз рӯи тартибот омода сохтани 5кг маҳсулоти гӯштиро дар бар гирифт.
Ҷалилов Равнақ, донишҷӯи курси 3_49.01.02, Мамадҷонов Равшан, донишҷӯи курси 4_49.01.02, Атабекова Ҳафиза магистранти ихтисоси 49.01.02mta иштирокчии Олимпидаи байналхалқии технологӣ гардида, бо донишу маҳорати баланди худ дар ҳисоби даставӣ сазовори ҷойи дуюм гардиданд. Донишҷӯёнро дар Ҷумҳурии Қазоқистон профессори донишкада Муҳиддинов Анвариддин ҳамроҳӣ намуданд.
Ҷалилов Равнақ, Мамадҷонов Равшан ва Атабекова Ҳафизаро аз номи кулли донишкада бо ғолибият дар олимпиадаи байналхалқӣ табрик намуда, дар кору таҳсил муваффақиятҳои беназирро орзумандем.
Устод Муҳиддинов Анвариддин ва иштирокчиёни олимпиада барои дастгирии ҳамаҷониба миннатдории хешро ба директори донишкада Саидӣ Дилафрӯз мерасонанд. Бигзор сафи чунин донишҷӯёни ғолиб, номбардорони донишкада ва фаъол зиёд гардад.
- Дида шуд: 1526 маротиба
Тибқи нақша-чорабиниҳои МИҲД-и вилояти Суғд оид ба баргузории вохӯриҳои намояндагони МИҲД-и вилоят, сардорони Шӯъба ва Хадамотҳои дастгоҳи Раёсат, сардор ва муовинони Шуъбаҳои ВКД Ҷумҳурии Тоҷикистон дар шаҳру ноҳияҳои вилояти Суғд бо устодону донишҷӯёни муассисаҳои таҳсилоти олӣ ва миёнаи касбӣ мулоқотҳо дар ДПДТТ ба номи академик М.Осимӣ низ баргузор гардида истодааст.
Санаи 13 марти соли равон дар толори донишкада бо мақсади баррасии муҳтавои Паёми Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз 26.12.2018, инчунин талаботҳои Қонунҳои Ҷумҳурии Тоҷикистон “Дар бораи масъулияти падару модар дар таълиму тарбияи фарзанд”, “Дар бораи танзими анъана ва ҷашну маросим дар Ҷумҳурии Тоҷикистон” чунин вохӯрӣ доир гардид. Дар вохӯрии мазкур Сардори МИ Раёсат Шомирсаидзода А., устодон ва донишҷӯёни факултети сохтмон ва нақлиёт ширкат доштанд. Мулоқоти мазкур доираи мавзӯҳои пешгирии ҳодисаҳои номатлуб, шомилшавӣ ба ҳизбу ҳаракатҳои ифротгароӣ, ҳуқуқвайронкунӣ ва ҷинояткорӣ дар байни ҷавонон, тарбияи онҳо дар рӯҳияи ватандӯстӣ, ифтихори ватандорӣ, эҳтироми арзишҳои миллӣ, инчунин ҳифзи ҳуқуқу манфиатҳои онҳо ва одоби ҳамидаи инсониро фаро гирифт.
Шомирсаидзода А. доир ба ҷиноят содир кардани ҷавонон, ҳодисаҳои номатлуб аз ҷониби ноболиғон сухан ронда, даъват ба амал овард, ки ҷавонон фирефтаи ҳар гуна гурӯҳҳо нагашта, аз пайи илмомӯзӣ гарданд.
Баргузории чунин мулоқотҳои судманд бо намояндагони ҳифзи ҳуқуқ хеле бамаврид буда, баҳри баландбардории дониши ҳуқуқии донишҷӯён мусоидат хоҳад кард. Тибқи нақша-чорабиниҳои МИҲД-и вилояти Суғд ва донишкада вохӯриҳои мазкур идома доранд.
- Дида шуд: 1507 маротиба
Фароҳам овардани ташкили ҷойҳои нави корӣ, дастгирии бозори меҳнат ва ба он ҷалб намудани шумораи ҳар чи зиёдтари бекорон аз ҳадафҳои асосии давлат ва Ҳукумати кишвар ба шумор меравад. Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон борҳо дар баромадҳояшон зикр медоранд, ки барои пешрафти тамоми соҳаҳои хоҷагии халқ бояд мутахассисони сатҳи касбияташон баланд омода карда шаванд. Таваҷҷӯҳи Пешвои муаззами миллат ба сатҳи омодасозии мутахассисони соҳаи муҳандисӣ, техникаву технология бештар аст. Зеро иқтидори истеҳсолии кишвар дар сурате пеш меравад, ки ин соҳаҳо рушд ёбанд.
Ҳамасола бо мақсади амалӣ намудани ин дастуру нишондодҳои Сарвари давлат дар Донишкадаи политехникии Донишгоҳи техникии Тоҷикистон ярмаркаи ҷойҳои кории холии «Интихоби мутахассиси арзанда» доир мегардад. Ин чорабинии муҳим ин дафъа низ дар сатҳи хуби ташкилӣ баргузор гардид. Дар саҳни донишкада намоиши дастоварду ихтирооти устодону донишҷӯёни донишкада, ҳамчунин имкониятҳо ва афзалиятҳои 60 коргоҳҳои вилоят тавасстути видеролик, варақаҳо ба маъраз гузошта шуданд.
Дар расми ифтитоҳи чорабинӣ муовини директор оид ба таълим Хуршед Мақсудов баён дошт, ки роҳбарияти донишкада дастуру ҳидоятҳои Пешвои муаззами миллатро сармашқи кори худ қарор дода, сол аз сол вазъи пояи моддиву техникии худро беҳтар менамояд. Ҳамчунин дар омода сохтани мутахассисони воқеан ҳам арзандаи соҳаҳо ва саҳм гузоштан ба чор ҳадафи стратегии мамлакат саъю талош меварзад. Дар ин ҷода таъсиси озмоишгоҳҳои замонавӣ барои тақвияти дониши устодону донишҷӯён заминаи мусоид фароҳам меорад. Бо мақсади тақвияти ҳамкорӣ бо ташкилоту муассисаҳо роҳбарияти донишкада тасмим гирифтааст, ки бо роҳбарони ташкилоту корхонаҳо силсиламулоқотҳо доир намуда, барои пешравии кор, робитаҳоро мустаҳкам намояд.
Зимни вохӯриҳо бо роҳбарони соҳаҳои кишоварзӣ, роҳу нақлиёт, маҳсулоти хӯрока, энергетика, сохтмон ва меъморӣ мушкиливу муаммоҳо гуфта шуд. Таъкид гардид, ки ҷараёни таҷрибаомӯзиҳо тақвият мехоҳад. Натиҷаи ҳамин ҳамкориҳо буд, ки донишкада дар назди ташкилоту муассисаҳои корхонаи муштараки “Ҷавонӣ”, коргоҳҳои “САТН”, “Тиниал”, “Суғдшаҳрофар-М” бонкҳои “Арванд”, “Эсхата”, шабакаҳои барқии вилояти Суғд, филиали Суғдии Институти боғпарварию сабзавоткории Академияи илмҳои кишоварзии Тоҷикистон, ҷамъияти саҳҳомии “АРЗ -4” ва “Асотсиатсияи АББАТ” кафедраҳои сайёри худ таъсис дод. Ва чорабинии имрӯза имконият медиҳад, ки хатмкунандагон тавассути интихоби коргоҳ роҳи худро дар зиндагӣ ҷӯё шаванд.
Дар баромадҳои Тӯра Муродович Атамов, директори шабакаҳои барқии Суғд, Нарзулло Дадобоев, муовини раиси раёсати Ассотсиатсияи сохтмончиён ва коркардчиёни “Кедр”, Зафар Охунов, директори генералии ширкати сохтмонии “Тиниал” зикр шуд, ки маҳз ҳамасола баргузории чунин чорабинӣ имконият медиҳад, ки ташкилоту коргоҳҳо мутахассисони ояндаро интихоб намоянд.
Дар қисмати дуввум намояндагони корхонаҳо дар алоҳидагӣ аз рӯи самти ихтисосҳо бо хатмкунандагон вохӯрӣ намуда, оид ба ташкилоти худ, талаботҳо ба кор маълумот дода, ба саволҳои пайдогардида посухҳои мушаххас доданд.
Маврид ба зикр аст, ки аксари коргоҳу ширкатҳое, ки дар чорабинии мазкур ширкат варзиданд, дар пешрафти соҳаҳои гуногуни хоҷагии халқ муваффақанд.
Боварии комил дорем, ки ярмаркаи “Интихоби мутахассиси арзанда” барои вусъати робитаи донишкада бо ташкилотҳо мусоидат намуда, ба хатмкунандагон қадами устуворе барои ояндаи дурахшон мегардад.
- Дида шуд: 1546 маротиба
Зан – модар! Олиҳаи ҳусн, кони меҳр, сарчашмаи лутфу садоқат ва меҳру муҳаббат, ибтидои ҳаёти инсонӣ ва идомаи ҳаёти баором. Зан – модар монанди офтобу замин танҳо ва ягона, ки ҳамеша нур мепошаду қалбаш пур аз меҳри пок саршор аст. Ба шарофати модар зиндагӣ идома дорад, меҳри модар то абад фарзандро раҳнамоӣ намуда, болу пари тоза мебахшад. Мегӯянд, ки бузургии модар чунон аст, ки ҳатто метавонад бо як даст гаҳвораву бо дигаре дунёро биҷунбонад. Дар аввали баҳор ҷашн гирифтани Иди занон ва модарон басо рамзист. Зеро зан-модар шабеҳи баҳори нозанин аст, ки бо дидораш қалби инсон пур аз фараҳ мегардад. Асосгузори сулҳу ваҳдати миллӣ, Пешвоми миллат, Президенти Ҷумҳурии Тоҷикистон Эмомалӣ Раҳмон гуфтаанд: “Занону модарони мо бо дастони пурмеҳри худ ниҳоли ишқу муҳаббат, меҳру садоқат, саховату асолат ва илму маърифатро парвариш мекунанд ва қалби поки онҳо ҳамеша барои орому осуда ва пояндаву устувор нигоҳ доштани оила, ҷомеа ва давлат метапад”.
Бахшида ба Иди байналимилалии занон дар толори донишкада чорабинии фарҳангӣ-фароғатӣ дар сатҳи баланд баргузор гашт. Сараввал муовини декан оид ба тарбияи факултети сохтмон ва нақлиёт Холиқов Мазбуд дар васфи зан-модар шеърҳо қироат намуда, ҷомеаи бонувони донишкадаро табрик намуд. Сухани табрикотӣ аз ҷониби муовини директор оид ба таълим Мақсудов Хуршед пешкаши ҳозирин гардид. Аз ҷониби Раёсати донишкада ба устодон барои саҳми арзанда дар таълиму тарбияи донишҷӯён, иштироки фаъолона дар корҳои ҷамъиятӣ Ифтихорномаи директори донишкада дар вазъияти тантанавӣ супорида шуд. Ба дастаи бонувони волейболбозони донишкада, ки соҳиби Ҷоми КИ ҲХДТ гардиданд, медалҳо ва Ифтихорномаҳо тақдим карда шуд.
Суруди “Модар”-и Фараҳманд Каримов ба қисмати фарҳангии чорабинӣ ҳусни оғоз бахшид. Навори ҷолиби ҳаҷвӣ, ки аз ҷониби устодон баҳри болидахотирии бонувон омода карда шуд, ба чорибииро боз ҳам хотирмон намуд. Аз номи кафедраи барномарезӣ ва низомҳои иттилоотӣ бо барномаи ҷолиб, ки бо слайдҳо намоиш дода шуд, Левандовский И. бонувонро табрик намуд. Саҳнаи ҳаҷвӣ, ки дар сатҳи баланд намоиш дода шуда, бо маҳорати баланди актёрӣ ва нигоҳи хос пешкаши ҳозирин гардид, то дергоҳ ба хотири ҳозирин нақш баст. Аз ҷониби ҳофизони шинохта Шуҳрати Расул ва Фараҳманд Каримов баҳри болидахотирии устодон сурудҳо сароида шуд.
Бо ҳамин чорабинӣ бахшида ба 8-уми март Иди бонувон анҷом ёфт.
- Дида шуд: 1427 маротиба
