Санаи 5 марти соли равон дар толори донишкада китоби тозанашри Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон “Уфуқҳои Истиқлол” ба доираи васеи устодону донишҷӯён муаррифӣ гардид. Чорабиниро муовини директор оид ба тарбия Зариф Довудов ифтитоҳ намуд. Мудири кафедраи забони давлатӣ ва ҷомеашиносӣ, номзади илмҳои филологӣ Бобоева Таиба оид ба мазмуну муҳтавои китоб маълумоти муфассал дод. Мавсуф зимни суханронии хеш қайд намуд, ки дар китоби арзишманд - “Уфуқҳои Истиқлол” оид ба тамоми дастовардҳои даврони Истиқлолият, бурду бохт ва комёбиҳо, марҳилаи эҳё ва азнавбарқарорсозии давлати тоҷикон, сулҳу субот ва Ваҳдати миллӣ сухан меравад. Бобоева Т. панҷ боби китоби тозанашрро ба ҳозирин баён намуд. 5 бобҳои “Уфуқҳои Истиқлол” – “Истиқлолияти давлатӣ-марҳалаи эҳё ва барқарорсозии давлати миллии тоҷикон”, “Рушди иқтисодии Тоҷикистон ва дурнамои стратегии он”, “Сиёсати иҷтимоӣ ва натиҷаҳои умедбахши он”, “Ваҳдати миллӣ ва суботи иҷтимоӣ дар меҳвари сиёсати дохилии давлат”, “Манфиатҳои миллӣ ва сиёсати хориҷӣ: мақоми Тоҷикистон дар ҷаҳони муосир” мебошанд, ки ҳар яке масъалаҳои муҳими давлатдорӣ ва сиёсати хирадмандонаро фарогир ҳастанд. Ҳамчунин, дар китоб омадааст: “Муҳимтарин дастоварду комёбие, ки мо дар 25 соли Истиқлолияти давлатии Ҷумҳурии Тоҷикистон касб намудем, аз хатари нестӣ наҷот ёфтани давлатдории миллии тоҷикон мебошад. Мо ин нуктаро борҳо ёдрас кардаем, вале ин ҷо бори дигар таъкид месозем, ки бе ягон шакку шубҳа, наҷоти давлатдории миллӣ масъалаи меҳварии таърихи дирӯзу имрӯзи мо ба шумор меравад”.
Мудири шуъбаи кор бо сомона ва ВАО, нашрияи “Меҳвари дониш” Абдуваҳҳобов Абдусабур низ дар бораи пешрафти соҳаи маориф, рушди иқтисодӣ, сулҳу оромии кишвар суханронӣ намуд. Зимни баромади хеш зикр кард, ки китоб барои доираи васеи хонандагон пешбинӣ гардидааст.
“Уфуқҳои Истиқлол” дарвоқеъ арзишмандтарин роҳнамо барои ҳифзи сулҳу оромии фазои кишвар, муқаддас доштани Истиқлолият ва Ваҳдати миллӣ буда, барои тарбияи ватандӯстиву хештаншиносӣ мусоидате бузурге хоҳад намуд.
- Дида шуд: 1634 маротиба
Бахшида ба Рӯзи Модар санаҳои 01.03.2019-04.03.2019 барои ба даст овардани Ҷоми Кумитаи иҷроияи Ҳизби Халқии Демократии Тоҷикистон дар вилояти Суғд мусобиқаи волейбол баргузор гардид. Мусобиқаи волейбол дар ду давр, байни 8 дастаи бонувон - омӯзгорони муассисаҳои таҳсилоти касбии олӣ ва коллеҷҳои вилоят гузаронида шуд.
Бонувон-омӯзгорони фаъоли донишкада, ки маҳорати баланди варзишӣ ва бозии волейболро доранд, иштирокчии бевоситаи мусобиқаи мазкур гардиданд. Иштирокчиёни фаъол, ки бо маҳорати хоси касбӣ дастаро ба пеш бурданд, омӯзгорон Ашӯрова Ш., Усмонова М., Фозилова М., Дӯстматова Н., Комилова Д., Ғуломнабиева С. мебошанд. Омӯзгорони дигар – Шониязова Д., Рустамова Ш., Асимова М., Темурова М. низ барои ба даст овардани ғалаба саҳми худро гузоштанд. Даври аввал бо ғалабаи ДПДТТ бар Коллеҷи тиббии Б.Ғафуров ва ғалабаи ДИС ДТТТ бар ДПДТТ анҷом ёфт. Аз рӯи натиҷаи бозӣ ба даври нимниҳоӣ 4 даста роҳхат гирифт. Дар даври ниҳоӣ ДПДТТ бо ДДХ ба номи Б.Ғафуров ва Коллеҷи тиббии Хуҷанд бо Коллеҷи тибии Б.Ғафуров қувваозмоӣ намуданд. Ҳамин тавр, ҷойи аввал насиби Коллеҷи тиббии шаҳри Хуҷанд, ҷойи дуввум насиби Коллеҷи тиббии ноҳияи Б.Ғафуров гардид. Дастаи бонувони Донишкадаи политехникии Донишгоҳи техникии Тоҷикистон ба номи академик М.Осимӣ мақоми сеюмро касб кард. Мусобиқа дар толори “Ҷашнӣ” –и шаҳри Хуҷанд ҷамъбаст гардид. Ба ғолибон дар вазъияти тантанавӣ диплом ва медалҳои дараҷавӣ аз ҷониби Раиси КИҲХДТ Сатториён М.А. супорида шуд.
Аз фурсати муносиб истифода бурда, аз номи аҳли ҷомеаи меҳнатӣ иштирокчиёни мусобиқа – бонувони азизро бо ғолибият табрик намуда, орзуманди сарбаландиву комёбии шумоёнем!
- Дида шуд: 1486 маротиба
Бахшида ба Рӯзи ягонаи ахбори сиёсӣ бо қарори раиси вилояти Суғд дар қаламрави вилоят таҳти унвони “Ҳифзи Ватан қарзи шаҳрвандии мост!” чорабиниҳо баргузор гардид.Ба ин муносибат дар шаҳри Гулистон низ таҳти чунин унвон хонишҳои сиёсӣ барпо шуд. Чорабинии мазкур бо ҳамкории Шӯъбаи рушди иҷтимоӣ ва робита бо ҷомеаи Дастгоҳи Раиси шаҳри Гулистон, таҳти роҳбарии мудири шуъба Мадализода Илҳом Раҳим ва мутахассиси пешбари шуъба Ҷӯраева Мафтунахон баргузор гардид. Хониши сиёсӣ дар 43 муассисаҳои шаҳраку ҷамоатҳои Сирдарё, Адрасмон, Консой, Зарнисор, Исфисор доир гардид. Дар хониши сиёсии Коллеҷи тиббии шаҳри Гулистон, маркази саломатӣ, МТМУ №1, шаҳраки Сирдарё бо маводи ташвиқотӣ Абдуманнон Одинаев, номзади илмҳои филологӣ, устоди Донишгоҳи давлатии Хуҷанд ба номи академик Б.Ғафуров, Хуршед Назаров, номзади илмҳои иқтисодӣ, дотсенти кафедраи назарияи иқтисодии Донишгоҳи давлатии ҳуқуқ, бизнес ва сиёсати Тоҷикистон, намояндаи ДПДТТХ ба номи академик М.Осимӣ Қодирова Х. ширкат варзида, баромадҳо намуданд.
Баъди гузаронидани хониши сиёсӣ дар “Кохи Истиқлол”-и шаҳри Гулистон чорабинии фарҳангӣ бахшида ба 26-умин солгарди таъсисёбии Артиши миллии Ҷумҳурии Тоҷикистон барпо гашт, ки табъи ҳамагонро болида намуд. Сухани табрикотии Раиси вилояти Суғд муҳтарам Раҷаббой Аҳмадзода аз ҷониби намояндаи МИҲД-и вилоят Маҳмадӣ Давлатов ба самъи ҳозирин расонида шуд. Баъдан иҷрокунандаи вазифаи раиси шаҳри Гулистон Шарифзода Фирдавс ҳарбиёнро бо Иди Артиши миллӣ табрик намуд. Ба кормандони комиссариатҳои ҳарбӣ, кормандони ШВКД, собиқадорони меҳнати Вазорати мудофиа барои фаъолияти пурсамар ва хизмати шоиста сипоснома ва тӯҳфаҳои хотиравӣ супорида шуд.
Чорабинии идона, ки аз ҷониби Бахши фарҳанги шаҳр ташкил карда шуд, дар сатҳи баланд доир гардид. Сарояндагону ҳунармандони машҳури вилоят бо сурудҳои саршори ватандӯстиву худшиносӣ руҳияи ҳамагонро баланд бардоштанд. Рӯзи ахбори омма дар шаҳри Гулистон дар сатҳи баланд гузаронида шуда, хотима ёфт.
- Дида шуд: 1717 маротиба
Бо иқдоми директори ДПДТТ ба номи академик М.Осимӣ дар шаҳри Хуҷанд Саидӣ Дилафрӯз Раббизода санаи 26 феврали соли ҷорӣ мулоқоти озоду шаффоф бо хатмкунандагон ва волонтёрони рӯзҳои ташвиқотию тарғиботӣ доир гардид.
Аввалан директори донишкада довталабонро хайрамақдам намуда, оид ба ихтисосҳои омодамекардаи донишкада маълумот дод. Номбурда аз вусъати робитаҳои хориҷӣ, имкониятҳо, бо кор таъминшавии ҳар як ихтисосҳо, таҳсилоти фосилавӣ ва дастовардҳо ба хатмкунандагон иттилоъ дод. Мавсуф зимни баромади хеш қайд намуд, ки донишкада яке аз беҳтарин муассисаҳои таҳсилоти олии кишвар маҳсуб ёфта, муҳандисони баландтаҷрибаи соҳаҳои энергетика, сохтмон, иқтисодӣ, барномарезӣ, агротехнологиро омода месозад. Зикр шуд, ки яке аз бартарӣ ва хусусияти фарқкунандаи донишкада ин гузаронидани дарсҳо ба таври сиклӣ ва Системаи иттилоотии идоракунии донишкада мебошад, ки дар қаламрави кишвар ягона мебошад. Чунин тарзи дарсазхудкунӣ имконият медиҳад, ки донишҷӯ комилан фанро омӯхта, соҳиби малакаи зарурӣ гардад. Системаи иттилоотии идоракунии донишкада раванди фаъолияти устоду донишҷӯро осон гардонида, имкониятҳои васеъро фароҳам меорад. Донишкада аз соли 2008 то инҷониб робита ва ҳамкории худро бо давлатҳои мутараққии ҷаҳон ба роҳ монда, то имрӯз садҳо нафар донишҷӯёну устодон ба давлатҳои хориҷӣ барои таҷрибаомӯзӣ сафарбар гаштаанд. Маврид ба зикр аст, ки дар донишкада коррупсия ва омилҳои ба он монанд тамоман дида намешавад, ки яке аз бартариҳои беҳтарини донишкада аст. 157 синфхонаи донишкада бо проектор таъмин буда, беш аз 2400 компютерро дорост. 27 лабораторияҳои замонавӣ барои дониши мукаммал гирифтани донишҷӯён мусоидат менамояд. Донишкада дорои стансияи таъмири автомобилӣ, стендҳои лаборатории барқӣ, паркҳои технологӣ мебошад. Давоми 6 сол инҷониб дар донишкада таҳсилоти фосилавӣ амал мекунад, ки барои донишҷӯёни имконияти таҳсил дар шуъбаи рӯзона надошта мусоидат менамояд. Сарвари донишкада хатмкунандагонро бо шароити хобгоҳ низ шинос намуд.
Зикр гардид, ки ҳар ҳафта рӯзи ҷумъа дарҳои кушод дар донишкада эълон гардидааст. Хоҳишмандон метавонанд аз раванди таълим, фаъолияти шуъбаҳо ва умуман донишкада аз наздик ошноӣ пайдо намоянд.
Дар вохӯрӣ хатмкунандагони литсейи ДПДТТХ, МТМУ №18-и шаҳри Хуҷанд, МТМУ№20-и ҷамоати Ғозиён, МТМУ№33, МТМУ№10 -и ҷамоати деҳоти Ёва, хатмкунандагони Коллеҷи техникии Зафаробод ва фаъолони ҳаракати волонтёрии донишкада ширкат доштанд.
Баъди муаррифии донишкада ва шиносоӣ бо ихтисосҳои он саволу ҷавоби довталабон бо роҳбарияти донишкада оғоз ёфт. Довталабон озодона саволҳои худро пешниҳод намуда, ҷавобҳои қаноатманд гирифтанд. Баъди анҷоми мулоқот довталабон аз лабораторияҳо, аудиторияҳои дарсӣ, майдончаи варзишӣ, стансияи автомобилӣ дидан намуданд. Онҳоро устодони донишкада, муовини директор оид ба тарбия Довудов Г., сардори шуъбаи таълим Бобокалонов Ф., сардори шуъбаи курсҳои кӯтоҳмуддат Зикриёходжаева Ф., муовини декан оид ба тарбияи факултети информатика ва энергетика Аминҷонова М. роҳнамоӣ намуданд.
Чунин вохӯриҳо минбаъд низ идома мекунанд.
- Дида шуд: 1418 маротиба
Бо мақсади аз наздик шинос намудани хатмкунандагон бо шарту шароити таълиму тарбия дар ДПДТТ санаҳои 18-19-уми феврали соли 2019 рӯзҳои ташвиқотию тарғиботӣ эълон гардидааст. Устодону донишҷӯёни донишкада бо хатмкунандагони мактабҳои вилояти Суғд вохӯриҳо гузаронида истодаанд.
Дар доираи нақша-чорабиниҳои МИҲД ва қарори Раиси вилояти Суғд оид ба вохӯрии хатмкунандагони муассисаҳои таълимии миёнаи умумӣ бо роҳбарони муассисаҳои таҳсилоти олии касбии вилоят санаи 19-уми феврали соли равон мулоқоти навбатӣ дар Гимназияи №1-и шаҳри Хуҷанд баргузор гардид. Дар мулоқот беш аз 400 нафар хатмкунандагони шаҳри Хуҷанд ширкат варзиданд. Вохӯриро муовини раиси шаҳри Хуҷанд Фирӯза Нуруллозода ҳусни ифтитоҳ бахшид. Ректори ДДХ ба номи академик Б.Ғафуров Ҷамшед Ҷӯразода суханронӣ намуда, бо шароитҳои таҳсил ҳозиринро шинос намуд. Баъдан ректори ДДҲБСТ Муъмин Шарифзода оид ба таҳсил дар донишгоҳ ва имкониятҳо баромад намуд. Сухани навбатӣ ба ректори ДКМТ Фозилзода Мухтор дода шуд, ки ӯ низ ҳамагонро бо шароитҳои донишгоҳ шинос намуд.
Зимни суханронии хеш директори ДПДТТ, номзади илмҳои техникӣ Саидӣ Дилафрӯз Раббизода зикр намуд, ки донишкада дорои тамоми имконият ва шароит барои донишандӯзӣ мебошад. Қайд карда шуд, ки робитаи хориҷии донишкада сол то сол вусъат ёфта истодааст. Саидӣ Дилафрӯз аз шароити хобгоҳ, лабораторияҳои замонавӣ, синфхонаҳои компютерӣ, раванди таълим ба ҳозирин иттилоъ дод. Аз ҷумла, қайд намуд, ки 50 нафар донишҷӯёни дар риштаи муҳандисӣ - технологӣ таҳсилдошта ба Олмон сафар намуда, дар самти технологияи маҳсулоти хӯрока, коркарди маҳсулот кишоварзӣ дар ин давлати мутараққӣ фаъолият бурданд. Донишкада бо 200 муассисаҳои олии хориҷӣ ҳамкорӣ дошта, дар ин самт ба натиҷаҳои назаррас дастёб шудааст. Маҳз вусъати ҳамкориҳои дуҷониба аст, ки баҳри баландбардории сатҳи дониш ва ивази таҷриба устодони донишгоҳҳои Латвия, Литва, Полша ва ғайраҳо ба донишҷӯёни ДПДТТ дарс гуфтаанд. Вохӯрӣ бо суханронии директори ДИС ДТТ Олимӣ Рауф хотима ёфт, ки номбурда низ хатмкунандагонро бо вазъи таълим шинос кард.
Хатмкунандагон ба саволҳои худ, ки вобаста ба раванди таълим дар муассисаҳои олӣ мебошад, ҷавобҳои қаноатманд гирифтанд.
Хатмкунандагони шаҳри Хуҷанд аз ин вохӯрӣ бо шароитҳои донишгоҳу донишкадаҳо маълумот пайдо намуданд. Боварӣ дорем, ки ҳар яке дар интихоби муассисаи олӣ ва касб устувор буда, ояндаи худ ва Ватанро обод мекунад.
- Дида шуд: 1491 маротиба
Бо мақсади ҷалби ҷавонон ба соҳаи варзиш, баланд бардоштани нерӯи зеҳнӣ ва ҳавасмандкунии онҳо ҳамасола дар миқёси донишкада мусобиқаи варзишӣ оид ба шоҳмоти донишкадавӣ баргузор мегардад.
Имсол низ ин мусобиқа бахшида ба 26-солагии таъсисёбии Қувваҳои Мусаллаҳи Ҷумҳурии Тоҷикистон бо ташаббуси директори донишкада Саидӣ Дилафрӯз ташкил карда шуд. Дар даври аввал, ки байни факултетҳо доир гашт, факултети сохтмон ва нақлиёт соҳиби ҷойи 1, факултети муҳандисӣ-иқтисодӣ ҷойи 2, факултети информатика ва энергетика ҷойи 3 ва факултети муҳандисӣ-технологӣ ҷойи 4-умро ишғол намуданд. Бояд гуфт, ки барои таъмини шаффофият, интихоби ғолиби мутлақ сардоварии мусобиқаро худи сарвари донишкада ба зимма доштанд.
Дар даври дуюм донишҷӯёни 4 факултет байни ҳам қувваозмоӣ намуданд. Тибқи холгузории ҳайати ҳакамон Туйчиев Б, донишҷӯи гуруҳи 1_37.01.07тв бо 10 хол сазовори ҷойи аввал гардид. Зинаҳои баъдиро донишҷӯи курси 1_25.01.04 бо 6 хол ва Намозов Ҷ. аз гуруҳи 1_440101тб бо 4,6 хол касб намуданд. Барои ташкил ва гузаронидани мусобиқа устоди ФСН Бӯриев Қ., деканони факултетҳо Солиев О., Ваҳобов А., Акрамов А., Юсупова Г. саҳмгузор гардиданд.
Ба ғолибон дар вазъи тантанавӣ ифтихорнома ва туҳфаҳо аз ҷониби директори донишкада супорида шуд.
Абдуев А., омӯзгори тарбияи ҷисмонӣ
- Дида шуд: 1370 маротиба
Мулоқоти анъанавии роҳбарони муассисаҳои олии вилоят бо хатмкунандагони муассисаҳои таҳсилоти миёнаи умумӣ идома дорад. Ин навбат мулоқоти мазкур дар шаҳри Конибодом баргузор гардид. Дар он қариб 400 нафар хатмкунандагони мактабҳои шаҳри Конибодом ширкат варзиданд. ДПДТТ ба номи академик М.Осимиро сардори шуъбаи идораи сифат ва банақшагирии стратегӣ Тошхӯҷаев Насимҷон ва сардори шуъбаи кор бо сомона ва ВАО, нашрияи “Меҳвари дониш” Абдусабури Абдуваҳҳоб муаррифӣ намуданд. Тошхӯҷаев Н. оид ба дастовардҳои донишкада, вазъи моддиву техникӣ ба хонандагон маълумот дод. Қайд карда шуд, ки шаш сол инҷониб дар донишкада таҳсилоти фосилавӣ ба роҳ монда шудааст. Ҷиҳати дигари фарқкунандаи донишкада ин раванди таълим бо усули сиклӣ аст. Ин имконият медиҳад, ки донишҷӯ як фанро пурра аз худ намуда, донишҳои бадастовардаро дар амал тадбиқ намояд. Донишкада низоми кредитиро ба роҳ мондааст, ки мутобиқ ба стандарҳои ҷаҳонӣ мебошад. Номбурда зимни суханрониаш қайд кард, ки касби инсон бояд дар оянда ифтихори ӯ гардаду манфиатбахши халқ бошад.
Вохӯрӣ бо саволу ҷавоби муҳассилин ҳусни анҷом ёфт. Ба ҳамаи хатмкунандагон нашрияи донишкадавии ДПДТТ "Меҳвари дониш" супорида шуд. Чунин вохӯриҳо дар қаламрави вилоят идома дорад. Аз рафти гузаронидани ташвиқот боз маълумот хоҳем дод.
- Дида шуд: 2605 маротиба
Иҷлосияи ХVI Шўрои Олӣ, ки дар шаҳри Хуҷанди бостонӣ баргузор шуда буд, ба бунёди Артиши миллии ҶТ асос гузошт. 26 сол муқаддам Қувваҳои Мусаллаҳи Ҷумҳурии Тоҷикистон таъсис ёфт. Таъсиси Артиши Милли кишвар дар сиёсати Тоҷикистон дигаргуниро ворид сохт. Саҳм ва хизмати Қувваҳои Мусаллаҳи кишвар хосатан дар солҳои вазнини 1993-1997 басо назаррас аст. Бахшида ба ин ҷашни давлатӣ - 26-солагии таъсисёбии Артиши миллии Ҷумҳурии Тоҷикистон дар толори ДПДТТ чорабинии фарҳангӣ доир гашт. Чорабиниро устоди донишкада Файзиева Ш. бо шеъри тараннуми Ватан кушода гуфта эълон кард. Директори донишкада, номзади илмҳои техникӣ Саидӣ Дилафрӯз ҳозиринро бо Иди Артиши Миллӣ табрик намуда, ба онҳо бурдборию комёбиҳоро таманно намуд. Аз зумра, зимни суханронии хеш қайд намуд, ки Артиши миллӣ яке аз сохторҳои асосии амнияти кишвар мебошад. Давоми даврони истиқлолият Қувваҳои Мусаллаҳ мустаҳкам гардида, имрӯз қувваи бузурги ҳифзи кишварро ташкил медиҳад. Маҳз абармардони шуҷоъву далер ва хизмати шарафмандонаи онҳост, ки имрӯз амнияти мамлакат пурра таъмин гардида, ба сохтори пурқудрат мубаддал гаштааст.
Дар чорабинӣ намояндагони Вазорати маориф ва илми Ҷумҳурии Тоҷикистон ширкат варзиданд. Ибодуллозода А. сардори Раёсати илм ва инноватсияи ВМИҶТ, Зокиров А. сардори Раёсати идоракунии сифати таҳсилоти ДМТ ва Мирзозода Н. ҷомеаи мардони донишкадаро аз номи Вазорати маориф ва илм табрику таҳниятҳо намуданд. Барои фаъолияти пурсамар, саҳми бузург дар таълиму тарбияи ҷавонон, дастовардҳои назаррас аз ҷониби Раёсати донишкада ба устодон Ифтихорнома ва туҳфаҳои хотиравӣ – либос бо рамзи донишкада супорида шуд. Қайд карда шуд, ки дар се моҳи охир 6 нафар устодони донишкада рисолаи номзадии худро ҳимоя карданд, ки аз онҳо 2 нафар соҳибони унвони докторӣ мебошанд. Ба Аминҷонова М., Қосимов А., Тошхӯҷаева С., Соҳибназаров М. барои унвони номзади илмӣ ва Ғаниев И., Ӯрунова барои ҳимояи рисолаи докторӣ туҳфаҳои хотиравӣ супорида шуд.
Қисмати дуввум барномаи фарҳангиро фаро гирифт. Бонувони донишкада баҳри табрики муҳофизони Ватан бо шеъру сурудҳо, наворҳои ҷолиби видеоӣ, рақсу саҳнаҳо, ки худ омода намуданд, ҳунарнамоӣ карданд. Барномаи фарҳангӣ дар сатҳи хеле баланд гузаронида шуда, писанди ҳамагон гардид. Чорабинӣ бо рақсу суруд ҳусни анҷом ёфт.
- Дида шуд: 1726 маротиба
Дар партави Амри Президенти Ҷумҳурии Тоҷикистон аз 15 сентябри соли 2011 таҳти №АП – 1729 ва тибқи нақшаи тасдиқгардидаи Раиси вилояти Суғд бо иштироки беш аз 18 намояндагони васоити ахбори оммаи дохилӣ ва хориҷӣ санаи 11 феврал нишасти матбуотии директори ДПДДТ дар шаҳри Хуҷанд Саидӣ Дилафрӯз Раббизода доир гардид. Мавсуф доир ба фаъолияти донишкада дар соли 2018 назди ҳозирин гузориш дода, таъкид дошт, ки ташрифи Вазири маориф ва илми Ҷумҳурии Тоҷикистон Саид Нуриддин Саид ва дастуру ҳидоятҳои Раиси вилоят муҳтарам Раҷаббой Аҳмадзода барои баланд гардидани вазъи таълиму тарбия мусоидат намуд. Маврид ба зикр аст, ки шурӯъ аз соли нави таҳсил дар доираи лоиҳаи “Таҳсилоти олӣ барои низоми озуқаворӣ ва стандартҳо дар Осиёи Марказӣ” – и барномаи Erasmus+ 11 нафар устодон аз давлатҳои Латвия, Литва ва Полша барои донишҷӯёни донишкада, ки дар ихтисоси технологияи маҳсулоти хӯрока ва агротехнологияи таҳсил доранд, дарс мегӯянд. Ҳамчунин намояндагони Донишгоҳи технологии Гуйилини Ҷумҳурии мардумии Чин ба донишкада ташриф оварда, аз ҷараёни таълиму тарбия, пояи моддиву техникӣ наздиктар шиносоӣ пайдо намуданд. Меҳмонон ба шароити таълиму тарбия, истифодаи технологияи муосир дар раванди таълим баҳои баланд дода, изҳори боварӣ намуданд, ки робитаи мустаҳками ду муассисаи олӣ барои боз ҳам баланд шудани мавқеъ ва мақоми донишкада мусоидат мекунад. Дар назар аст, ки донишкада бо Донишгоҳи технологии Гуйилини Ҷумҳурии мардумии Чин се самт шартнома - ташкили факултети муҳити зист дар донишкада, ташкили лабораторияҳо, таҳсил ва таҷрибаомӯзии донишҷӯён, ивази таҷрибаи устодон ба таври муштарак мебандад. Рӯзҳои наздик се устоди донишкада барои таҷрибаомӯзӣ ба ин донишгоҳ мераванд.
Номбурда аз вазъи пояи моддиву техникӣ, густариши равобити хориҷӣ, сохтмони бинои нави лабораторӣ, таъмиру тармими хобгоҳ, бинои маркази бақайдгирӣ, кор бо хатмкунандагон, ғолибият дар олимпиадаву озмуни Ҷоми Академияи илмҳо ва «Enactus» сухан ронд.
Сипас рӯзноманигорон Ҷовиди Аштӣ, намояндаи расмии нашрияи «Ҷумҳурият» дар вилояти Суғд, Заррина Ҳоҷихалилова аз нашрияи «Согдийская правда», Робия Розиқова, намояндаи нашрияи «Нилуфар», Уғулой Раҷабова, телевизиони «Ҳафт ситора», Афзал Босолиев, намояндаи телевизиони «Азия» вобаста ба омодасозии мутахассисони соҳаи сохтмон ва меъморӣ, равобит бо муассисаҳои олии Ҷумҳурии Ӯзбекистон, имтиёз барои устодону донишҷӯён, чорабиниҳо ба ифтихори Соли рушди сайёҳӣ ва ҳунарҳои мардумӣ, омода кардани сомонаи махсуси сайёҳӣ бо се забон, бо ҷои кор таъмин гардидани хатмкунандагон саволҳо дода, посухҳои мушаххас гирифтанд.
Директори донишкада дар фарҷоми нишасти матбуотӣ аз нақшаҳои минбаъдаи ҷомеаи меҳнатии донишкада ҳозиринро ошно намуда, барои ҳамкории мутақобила ба рӯзноманигорон изҳори сипос намуда, дар ҷодаи қаламфарсоӣ ба онҳо барор хост.
- Дида шуд: 1373 маротиба
Бахшида ба 26-умин солгарди Артиши Миллии Ҷумҳурии Тоҷикистон ва 25-солагии Қӯшунҳои сарҳадии Кумитаи давлатии амнияти Вазорати мудофиаи Ҷумҳурии Тоҷикистон конференсияи илмӣ доир гардид. Конференсия дар ҳамкории кафедраи забони давлатӣ ва ҷомеашиносӣ бо гурӯҳҳои 1_69.01.01тб, 3_70.02.01тб, 3_44.01.01тб, 3_37.07.01тб, 3_40.01.02та доир гардид. Ҳамчунин, сардори шуъбаи таълим Бобокалонов Ф., муовини директор оид ба илм ва инноватсия Ахмедов У.Х, мудири кафедраи забони давлатӣ ва ҷомеашиносӣ Бобоева Т, устодон Ғозиева М., Норов И. ширкат доштанд.
Ахмедов У.Х конференсияро оғоз намуда, табрикоти Раёсати донишкадаро ба ҳамагон расонд. Мудири кафедраи забони давлатӣ ва ҷомеашиносӣ Бобоева Т. доири аз қадим пайдо шудани сипоҳу аслиҳа ва сипоҳсолорону лашкариёни тоҷик нақл кард. Зимни баромади хеш зикр намуд, ки тоҷикон аз қадимулайём ба сипоҳиён эҳтироми хоса доштанд. Лашкаркашони номдори тоҷик ҳамеша дар ҳифзу ҳимояи марзу буми Ватан кӯшиш ба харқ дода, ҳаргиз манфиати халқи дигарро халалдор накардаанд. Дотсенти кафедраи забони давлатӣ ва ҷомеашиносӣ Ғозиева М. бо маъруза таҳти унвони "Истиқлолият ва Артиши миллӣ" баромад намуд. Зимни маърузааш аз таърихи ташаккулёбии Қувваҳои Мусаллаҳ дар ҷумҳурӣ сухан ронд. Қайд карда шуд, ки дар таъсисёбии Артиши Миллӣ саҳми СММ, САҲА, Федератсияи Русия, Ҷумҳурии Қазоқистон назаррас аст. Ҷумҳурии Тоҷикистон имрӯз соҳиби яроқу аслиҳаҳои замонавӣ, машқгоҳу озмоишгоҳҳои ҳарбӣ мебошад. Навори видеоӣ аз фаъолияти Қӯшунҳои сарҳадии Ҷумҳурии Тоҷикистон намоиш дода шуд. Аз ҷониби устодон қайд карда шуд, ки хизмат ба сафи Қувваҳои Мусаллаҳ ин шаъну шарафи ҳар як ҷавони барӯманд аст.
Конференсияи мазкур тарбияи ватандӯстӣ ва хештаншиносии ҷавононро баланд бардошта, дар дили онҳо меҳри хизмат ба Ватанро дучанд намуд.
- Дида шуд: 1439 маротиба
Дар идомаи чорабиниҳои идона бахшида ба эълон гардидани солҳои 2019-2021 – Солҳои рушди деҳот, сайёҳӣ ва ҳунарҳои мардумӣ санаи тибқи нақша-чорабинии МИҲД-и вилоят дар толори ДПДТТ ба номи академик М.Осимӣ фестивал-озмуни донишкадавии “Чакомаи гесӯ” дар сатҳи баланд баргузор гардид.
Дар чорабинӣ меҳмонони олиқадр, намояндагони МИҲД шаҳри Хуҷанд ва вилояти Суғд - Дадобоева Мунаввара, директори маркази таълимии ш.Хуҷанд, Маҷидзода Муҳаббат, фаъолзани вилоят, Расулова Истамбону, мутахассиси шуъбаи кор занон ва оилаи МИҲД-и вилоят ширкат варзиданд.
Фестивал-озмун бо композитсияи адабӣ-мусиқӣ оғоз ёфт, ки аз ҷониби донишҷӯён бо истеъдоди нотакрор намоиш дода шуд.
Баъдан озмун дар ду бахш оғоз шуд. Иштирокчиёни озмун бо намоиши либоси миллии тоҷикона ва гесӯвони дароз ба чорабинӣ ҳусни дигар бахшиданд. Оид ба гесӯвон навор пешкаши ҳозирин гардонида шуд.
Суруд аз ҷониби донишҷӯ Мубинҷон Зоҳиров писанди ҳамагон гардид, ки тараннумгари зебоии гесӯвон мебошад. Суруди “Хосияти дукокула” аз ҷониби донишҷӯ Баракабоев Ю. ва рақси Ҷӯраева Мижгона бо маҳорати баланд пешкаш гардид.
Аъзои ҳакамон ба сатҳи баргузории фестивал-озмуни “Чакомаи гесӯ”-и донишкада баҳои баланд доданд.
Дар номинатсияи “Гесӯи дароз” чунин натиҷабардорӣ карда шуд: ҷойи 1 - Худойназарова Навбаҳор, донишҷӯи курси 1_40.01.01тБ, ҷойи 2 – Саидова Фараҳноз, донишҷӯи курси 1_50.01.02тБ, ҷойи 3 – Шодибоева Дилфуза, донишҷӯи курси 1_25.01.04тБ.
Дар номинатсияи “Ороиши мӯй”, ки ҳар як иштирокчӣ маҳорати оро додани мӯйи дарозро намоиш дод, бо ороиши беҳтарин Маҳмудова Нозанин, донишҷӯи 1_50.01.02 сазовори ҷойи аввал гардид. Ҷойи дуюм насиби Икромова Шаҳноза, донишҷӯи 1_50.01.02тА гашта, ҷойи сеюмро Ниёзова Фарангиз, донишҷӯи курси 1_50.01.02 касб намуд.
Фестивал-озмуни “Чакомаи гесӯ” баҳри баландбардории тарбияи маърифатӣ ва хештаншиносӣ мусоидат намуда, то абад дар хотири ҳозирин нақш хоҳад монд.
- Дида шуд: 1520 маротиба
