Дар Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд вобаста ба пешгирии падидаҳои номатлуб, аз ҷумла коррупсия, шомилшавӣ ба ҳизбу ҳаракатҳои ифротӣ ва тарғиби ахлоқу одоби ҳамида, ҷалби донишҷӯён ба омӯзиши фанҳои дақиқ, китобхонӣ ва баланд бардоштани эҳсоси худшиносию худогоҳӣ, ватандӯстӣ ва меҳанпарастӣ дар байни донишҷӯён бо иштироки Тӯйчизода Темур - мудири шуъбаи маъмурию ҳуқуқии дастгоҳи Раиси вилоят, Мирзоғуфрон Ғафуров - сармутахассиси шуъбаи рушди иҷтимоӣ ва робита бо ҷомеаи Дастгоҳи раиси вилояти Суғд, Турсунов Фаррух - устоди Донишкадаи иқтисод ва савдои Донишгоҳи тиҷорати Тоҷикистон дар шаҳри Хуҷанд вохӯрии судманд баргузор гардид.
Чорабиниро директори донишкада Дилафрӯз Саидӣ ҳусни ифтитоҳ намуда, зикр дошт, ки ба шарофати сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таваҷҷуҳ ба ҷавонон сол то сол зиёд гардида истодааст. Ҳадафи Роҳбари давлат ин пеш аз ҳама баланд бардоштани сатҳи саводу маърифатнокии мардум ва дар навбати аввал наврасону ҷавонон, тақвияти ҳисси миллӣ, ватандӯстиву ватанпарварӣ, ҳуввияти миллӣ, арҷгузорӣ ва омӯхтани забон, таърих фарҳанги бостонии тоҷикон, тавсеаи доираи донишу ҷаҳонбинии илмиву техникӣ ва рушди илмҳои дақиқу табиӣ дар кишвар мебошад.
Яке аз самтҳои муҳими фаъолияти донишкада ба тарбияи мутахассисони варзидаи дорои илму маърифати баланди фарҳангиву сиёсӣ нигаронида шудааст. Раёсати донишкада сиёсати пешгирифтаи Пешвои муаззами миллатро ҳамаҷониба дастгирӣ намуда, фаъолияти худро оид ба тайёр намудани мутахассисони ватанпарвар ва баландихтисоси дар бозори меҳнат рақобатпазир равона намуда аст.
Тӯйчизода Темур - мудири шуъбаи маъмурию ҳуқуқии дастгоҳи раиси вилоят дар баромади худ қайд намуд, ки терроризм ва экстремизм яке аз проблемаҳои асосии ҷомеа ҷаҳонӣ буда, ифротгароён махсусан ҷавононро бо ҳар гуна ваъдаҳои бардурӯғи диниву дунявӣ ҷалб намуда, онҳоро ба ҷараёнҳои террористӣ сафарбар менамоянд. Яке аз омилҳои асосии гумроҳии ҷавонон ва пайваст шуданашон ба ҳизбу ҳаракатҳои ғайриқонунӣ паст будани дониши сиёсӣ, бетарафии аҳли ҷомеа, огоҳ набудан аз шароити иқтисодиву ҳолати равонии ҷавонон мебошад. Аз ҷониби мавсуф барои бедор намудани ҳушёрии сиёсӣ ва боз ҳам қавитар намудани дониши сиёсии донишҷӯён даъват ба амал оварда шуд.
Дар баромади Мирзоғуфрон Ғафуров, сармутахассиси шуъбаи рушди иҷтимоӣ ва робита бо ҷомеаи Дастгоҳи раиси вилояти Суғд зикр шуд, ки ҳар яки мо – сокинони кишвар новобаста аз синну сол, фарқияти ҷинсиву вазъи иҷтимоиро зарур аст, ки алайҳи терроризму экстремизм муборизаи ҳамҷоя барем. Нагузорем, ки ҷавонони мо ба гурӯҳу ҳаракатҳои гуногун шомил шаванд. Зеро ватани моро ба ҷуз худи мо каси дигар обод намекунад. Якпорчагии Тоҷикистони азиз, фазои осудаву ором ва рушди иқтисодиёташ боиси ҳаёти хурраму обод ва дастархони пурнозу неъмат мебошад. Номбурда аз ҷавонон даъват ба амал овард, ки ҳушёрии сиёсиро аз даст надиҳанд.
Турсунов Фаррух, устоди Донишкадаи иқтисод ва савдои Донишгоҳи тиҷорати Тоҷикистон дар шаҳри Хуҷанд оид ба баланд бардоштани руҳияи худшиносию худогоҳӣ, маърифати ҳуқуқӣ, ширкати фаъолона дар ҳаёти сиёсӣ ва ҷамъиятӣ, пешгирии ҳуқуқвайронкунӣ ва ҷинояткорӣ, махсусан шомилшавӣ ба ҳизбу ҳаракатҳои ифротгаро, эҳтироми арзишҳои миллӣ сухан намуд. Илова бар ин нисбати дастовардҳои ҷумҳурӣ дар замони соҳибистиқлолӣ сухан карда шуда, қайд гардид, ки ҳар як донишҷӯ бояд пеш аз ҳама тамоми кушишу ғайрати худро барои ободӣ ва пешрафти ватан равона намояд.
Дар хотимаи чорабинӣ директори донишкада иброз дошт, ки ҷомеаи меҳнатии Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд минбаъд низ барои бедор намудани ҳушёрии сиёсӣ ва боз ҳам қавитар намудани дониши сиёсии донишҷӯён кӯшиш ба харҷ дода, дар ташвиқу тарғиби дастовардҳои даврони истиқлолият ва ҳадафҳои созандаи Асосгузори сулҳу Ваҳдати миллӣ, Пешвои миллат, Президенти ҶТ муҳтарам Эмомалӣ Раҳмон пайваста кӯшиш ба харҷ медиҳанд.
Мулоқоти мазкур аз ҷониби телевизиони вилоят сабт гардида, донишҷӯёни донишкада дар навбати худ фикру андешаҳои худро оид ба баланд бардоштани маърифати ҳуқуқӣ, аз даст надодани зиракии сиёсӣ иброз намуданд. Аз ҷониби онҳо қайд гардид, ки тамоми саъю талоши хешро ба донишандӯзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан, рушди илму техника, бунёдкорӣ ва созандагӣ равона намуда, барои шукуфоии кишвар, пойдории сулҳу субот ҳамвора кӯшиш хоҳанд кард.
- Дида шуд: 890 маротиба
Дар толори варзишии Донишкадаи политехникии Донишгоҳи техникии Тоҷикистон дар шаҳри Хуҷанд бахшида ба пешвози ҷашни 30 - солагии Истиқлолияти давлатии Ҷумҳурии Тоҷикистон ва 10 - солагии таъсисёбии Ташкилоти ҷамъиятии ҷавонон “Созандагони Ватан” бо иқдоми Кумитаи иҷроияи Ҳизби Халқии Демократии Тоҷикистон дар шаҳри Хуҷанд дар ҳамкорӣ бо ҶСП ТАКХ “Имон Интернешнал” байни донишҷӯдухтарони муассисаҳои олӣ, коллеҷҳо ва литсейҳои шаҳри Хуҷанд мусобиқаи варзишӣ аз рӯи намуди баскетбол доир намуд, ки дар он 9 даста иштирок карданд.
Мусобиқа давоми се рӯз идома ёфта, дар натиҷа дастаи Муассисаи давлатии таълимии Коллеҷи тиббии шаҳри Хуҷанд ба номи Ю.Б.Исҳоқӣ сазовори ҷойи аввал гардида, зинаҳои баъдиро Муассисаи давлатии таълимии Донишгоҳи давлатии Хуҷанд ба номи академик Бобоҷон Ғафуров ва дастаи Донишкадаи политехникии Донишгоҳи техникии Тоҷикистон соҳиб шуданд.
Дар маросими ҷамъбасти мусобиқа роҳбарияти муассисаҳои таҳсилоти олӣ ва миёнаи касбӣ, раиси кумиҷроияи шаҳрии ҲХДТ Маликисломӣ Наим Мунаввар ширкат варзида ба ғолибону ҷоизадорон дар вазъияти тантанавӣ Ҷом, Ифтихорнома ва тӯҳфаҳои хотиравӣ супориданд.
- Дида шуд: 909 маротиба
Имрӯз устодону донишҷӯёни Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд бо арзи муҳаббат ва самимият Паёми навбатии Президенти Ҷумҳурии Тоҷикистон муҳтарам Эмомалӣ Раҳмон, ки дар ҷаласаи панҷуми якҷояи Маҷлиси Миллӣ ва Маҷлиси намояндагон, даъвати шашум ироа гардид, тариқи оинаи нилгун тамошо намуданд.
Дар Паёми худ ба Маҷлиси Олии Ҷумҳурии Тоҷикистон Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон самтҳои асосии сиёсати дохилӣ ва хориҷӣ, таъмини рушди иқтисодӣ, саноат, энергетика, нақлиёт, алоқа, амният, тартиботи ҳуқуқӣ, тандурустӣ, фарҳанг, илм, маориф, ҳифзи иҷтимоӣ, ҷавонон, варзиш ва сайёҳиро муайян намуда, дар назди масъулин вазифаҳои мушаххас гузоштанд.
Вобаста ба соҳаи маориф Пешвои муаззами миллат муҳтарам Эмомалӣ Раҳмон таъкид доштанд, ки : “То замони истиқлол дар Тоҷикистон ҳамагӣ 13 муассисаи таҳсилоти олии касбӣ бо 69000 донишҷӯ фаъолият мекард. Имрӯз шумораи муассисаҳои таҳсилоти олии касбӣ ба 41, донишҷӯён ба 245 ҳазор ва бо иловаи донишҷӯёне, ки дар хориҷи кишвар таҳсил мекунанд, ба 285 ҳазор нафар расидааст. Бо вуҷуди ин, таъкид месозам, ки аз ҷониби роҳбарони Вазорати маориф ва илм, муассисаҳои таҳсилоти олии касбӣ дар масъалаи қабули довталабон ва тарбияи кадрҳо, пеш аз ҳама, ба сифат эътибори аввалиндараҷа дода шавад. Вазорати маориф ва илм, ҳамчунин, вазифадор карда мешавад, ки дар тамоми зинаҳои таҳсилот – аз муассисаҳои томактабӣ сар карда, то гимназияву литсейҳо ва зинаҳои дигари таҳсилот ба таври ҳатмӣ омӯхтани забонҳои хориҷӣ, махсусан, забонҳои русиву англисӣ ва технологияҳои иттилоотиро ташкил карда, назорати қатъии сифати таълимро дар ин самт ба роҳ монад”.
Таъкид гардид, ки таҳсили ҷавонон дар муассисаҳои таҳсилоти олии касбӣ ва илмии кишварҳои хориҷӣ яке аз ибтикороти муҳимми Ҳукумати мамлакат дар самти рушди илму маориф маҳсуб меёбад. Ҳоло дар хориҷи кишвар зиёда аз 40000 нафар донишҷӯ, магистр ва аспирантҳои мо ба таълим фаро гирифта шудаанд. Мо бояд тавассути стипендияи байналмилалии Президенти Ҷумҳурии Тоҷикистон «Дурахшандагон», барномаҳои байналмилалӣ ва дигар имконоти мавҷуда таҳсили ҷавонони боистеъдодро дар хориҷи мамлакат вусъат бахшем. Ба хотири ҳавасмандгардонии донишҷӯён ва муҳаққиқони ҷавон мо соли гузашта маблағ ва шумораи гирандагони стипендияи президентиро хеле зиёд кардем. Ҳамчунин, охири соли гузашта барои олимону омӯзгорони фанҳои риёзӣ, дақиқ ва табиӣ ҷоизаи махсуси давлатӣ таъсис дода шуд, ки ҳар сол 15 нафар беҳтаринҳо метавонанд соҳиби он гарданд.
Супориш дода шуд, ки бо мақсади дастгирии давлатӣ ва тақвияти вазъи иҷтимоии донишҷӯёну магистрҳо ва аспиранту докторантҳо стипендияи онҳо аз 1–уми сентябри соли 2021 ба андозаи 30 фоиз зиёд карда шавад.
Тибқи маълумот ҳар сол аз институтҳои Академияи миллии илмҳо, академияҳои соҳавӣ ва муассисаҳои таҳсилоти олии касбии кишвар то 500 нафар омӯзгорон ва олимону муҳаққиқон барои табодули таҷриба, бозомӯзӣ, таҳсил дар зинаҳои магистратура, аспирантура ва докторантура сафарбар карда мешаванд, вале ин ҳоло ҳам кам аст. Академияи миллии илмҳо, академияҳои соҳавӣ ва муассисаҳои таҳсилоти олии касбии кишварро зарур аст, ки ба ин масъала дар оянда низ диққати аввалиндараҷа диҳанд.
Вобаста ба ин, ба Вазорати маориф ва илм, Академияи миллии илмҳо ва Вазорати рушди иқтисод ва савдо супориш дода шуд, ки ҷиҳати ҳарчи бештар ба хориҷи кишвар фиристодани ҷавонони боистеъдоду лаёқатманд аз рӯи равияи илмҳои дақиқ, риёзӣ ва табиӣ «Барномаи тайёр кардани кадрҳои ҷавони илмӣ барои солҳои 2021 – 2030»–ро таҳия карда, дар муддати се моҳ ба Ҳукумати мамлакат пешниҳод намоянд.
Зикр гардид, ки мо дар даврони соҳибистиқлолии кишвар пояҳои моддиву техникӣ, озмоишгоҳӣ ва кадрии муассисаҳои илмии Академияи миллии илмҳоро пайваста таҳким бахшида истодаем. Масалан, агар соли 1991 дар зинаи аспирантураи Академияи миллии илмҳо ҳамагӣ 148 нафар ҷавонон таҳсил карда бошанд, соли 2020 шумораи онҳо ба 1200 нафар расида, қариб 8 баробар зиёд шудааст. Шумораи аъзои Академияи миллии илмҳо низ ду баробар зиёд гардидааст. Олимонро зарур аст, ки корҳои илмиву таҳқиқотиро дар доираи самтҳое, ки Ҳукумати мамлакат муайян кардааст, вусъат бахшида, дар рушди иқтисоди миллии кишвар фаъолона саҳм гузоранд.
Баъди тамошои Паёми Президент муҳтарам Эмомалӣ Раҳмон ба Маҷлиси Олӣ роҳбарияти Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд тасмим гирифт, ки ҷиҳати амалӣ намудани дастуру супоришҳои ироагардида нақша-чорабиниҳо таҳия намуда, дар соли ҷорӣ онро сармашқи фаъолият қарор медиҳанд.
- Дида шуд: 988 маротиба
Тантанаҳои наврӯзӣ дар Донишкадаи политехникии Донишгоҳи техникии Тоҷикистон дар шаҳри Хуҷанд бо шукуҳу шаҳомати хосса доир гардид.
Саҳни сабздомани донишкада идона оро дода шуда, устодони факултетҳо бо оростани хаймаҳои наврӯзӣ ва дастовардҳои эҷодӣ ҳузури меҳмонон – вакили Маҷлиси намояндагони Маҷлиси Олии Ҷумҳурии Тоҷикистон Гулбаҳор Назирӣ ва раиси Кумитаи иҷроияи Ҳизби Халқии Демократии Тоҷикистон Наим Маликисломӣ хайрмақдам гуфтанд.
Директори донишкада, номзади илмҳои техникӣ Саидӣ Дилафрӯз Раббизода аз номи ҷомеаи меҳнатии донишкада кулли иштирокдоронро ба ифтихори ҷашни наврӯзӣ муборакбод намуда, зикр дошт, ки Наврӯзи оламафрӯз бо қадамҳои нек ва бахосияти худ боварӣ ва эътимодро ба ояндаи дурахшони ҷомеа қавитар мегардонад, ба қалбу рӯзгори мардум суруру ангезаи муҳаббат мебахшад. Ниёгони сарбаланди мо Наврӯзро бо шодиву хуррамӣ ва тантанаи бузург истиқбол намуда, беҳтарин орзую умед ва таманниёти хешро ба он вобаста мекарданд, баҳри ояндаи дурахшон ва созандагиву бунёдкорӣ нақшаҳо тарҳрезӣ менамуданд. Наврӯзи сабздомани имсола дар чунин айёме меҳмони азизи мост, ки мардуми сарбаланди кишвар ҷиҳати истиқболи сазовори ҷашни 30 – солагии Истиқлолияти давлатии Ҷумҳурии Тоҷикистон азму талоши зиёд доранд. Аз ҷумла, ҷомеаи меҳнатии Донишкада бо армуғонҳои наву тоза, бо таҷлили 10 – солагии таъсисёбии худ, ки бо қадами файзрези меҳмонони олиқадр-сарварони муассисаҳои таҳсилоти олии касии кишвар ин шодию нишоти мо рангу ҷилои дигар гирифт ин ҷашни миллиро пешвоз хоҳанд гирифт.
Гулбаҳор Назирӣ аз номи рощбарияти олии Маҷлиси намояндагони Маҷлиси олии кишвар, Маликисломӣ Наим Мунаввар аз номи Кумитаи иҷроияи марказии ҲХДТ аҳли нишастро ба ҷашни Наврӯз табрик гуфтанд.
Фаъолону пешқадамони соҳа аз ҷониби Раёсати донишкада бо Ифтихорнома ва тӯҳфаҳои хотиравӣ тақдиронида шуданд.
Ҳайати ҳакамон ба маҳорати ҳунарварӣ, оростани хони наврӯзӣ баҳои воқеӣ доданд. Ҳамин тавр факултети муҳандисӣ – иқтисодӣ мақоми аввал, факултети муҳандисӣ – технологӣ мақоми дуюм ва факултети информатика ва энергетика ҷойи сеюмро ишғол намуданд.
Дар қисмати фарҳангӣ аз ҷониби донишҷӯён барномаи рангини консертӣ пешкаши ҳозирин гардонида шуд.
Бо ҳамин чорабинӣ хотима ёфт.
- Дида шуд: 956 маротиба
Дар толори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд ҷаласаи навбатии Шӯрои ректорони муасссиаҳои таҳсилоти олии касбии Ҷумҳурии Тоҷикистон баргузор гардид, ки ба 10-солагии таъсисёбии Донишкадаи политехникии Донишгоҳи техникии Тоҷикистон ба номи академик М.С. Осимӣ дар шаҳри Хуҷанд иттифоқ афтод.
Нахуст меҳмонон аз дастовардҳои донишкада боздид намуда, бо ихтироот ва ташкили инфрасохтори муосири ин муассисаи таълимӣ аз наздик ошноӣ пайдо намуданд.
Директори Донишкадаи политехникии Донишгоҳи техникии Тоҷикистон ба номи академик М.С. Осимӣ дар шаҳри Хуҷанд Дилафрӯз Саидӣ чорабиниро оғоз бахшида, аз ҷумла таъкид намуд, ки таҳти роҳбарии хирадмандонаи Асосгузори сулҳу ваҳдати миллӣ-Пешвои миллат, Президенти мамлакат муҳтарам Эмомалӣ Раҳмон, рушди соҳаи маориф ҳамчун самти стратегӣ ва афзалиятноки сиёсати давлат қабул гашта, дар соҳа марҳила ба марҳила якқатор ислоҳоти муҳимми аҳамияти стратегидошта амалӣ шуда истодаанд. Иқдоми Пешвои муаззами миллат доир ба эълон намудани солҳои 2020-2040 “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илм ва маориф” аз зумраи чунин ислоҳот ба шумор рафта, ба татбиқи ҳадафҳои стратегии мамлакат ва омодасозии кадрҳои соҳибтахассус барои соҳаҳои иқтисоди миллӣ нигаронида шудааст. Дар вохӯрии хеш бо зиёиёну кормандони соҳаи илму маориф санаи 18 марти соли 2020 Президенти мамлакат таъкид намуданд «Мо дар доираи рушди илмҳои муосир саноатикунонии босуръати кишварро ҳадафи чоруми стратегии мамлакат эълон намудем. Дар ин раванд, мақсад дорем, ки истифодаи технологияҳои муосирро дар тамоми соҳаҳои иқтисоди миллӣ густариш дода, тафаккури техникии аҳолӣ, дар навбати аввал, ҷавононро тақвият бахшем, барои пешрафти илмҳои бунёдӣ ва техникиву технологӣ фазои мусоид фароҳам оварем». Дар амалӣ намудани ин ислоҳот, дар қатори дигар зинаҳои таҳсилот, МТОК мамлакат, аз ҷумла муассисаҳои олии касбии равияҳои муҳандисию техникӣ мавқеи хеле муҳимро касб менамояд.
Иттилоъ дода шуд, ки бо назардошти рушди соҳаҳои иқтисодиёти кишвар ва таъмини онҳо бо муҳандисони соҳибкасб ҳануз дар соли 2010 бо Қарори Ҳукумати ҶТ №58 Донишкадаи политехникии Донишгоҳи техникии Тоҷикистон ба номи академик М.С. Осимӣ дар шаҳри Хуҷанд таъсис дода шуда буд. Таъсисёбии донишкада яке аз дастовардҳои даврони истиқлолият дар соҳаи маорифи кишвар маҳсуб ёфта, ҳадафи асосии он таъмини бозори меҳнат бо кадрҳои ба талаботи замони муосир ҷавобгӯ арзёбӣ карда шудааст. Раёсат ва ҳайати омӯзгорони донишкада баҳри амалӣ намудани ин ҳадаф тавассути баланд бардоштани сифати таълим, тарбияи ахлоқӣ, азхудкунонии технологияҳои муосири иттилоотиву муҳандисӣ, такмили сатҳи забондонии донишҷӯён мудом кӯшиш ба харҷ медиҳанд. Дар амалӣ гаштани ҳадаф ва вазифаҳои донишкада дастгирии Вазорати маориф ва илми ҶТ мудом эҳсос карда мешавад.
Сипас, муовини вазири маориф ва илми Ҷумҳурии Тоҷикистон Диловар Қодирзода, муовини Раиси вилояти Суғд Зайнура Азимӣ, ректори Донишгоҳи техникии Тоҷикистон Қудрат Давлатзода, муовини Раиси шаҳри Хуҷанд Фируза Нуруллозода баромад намуда, номаи табрикотии Вазири маориф ва илми Ҷумҳурии Тоҷикистон, Раиси вилояти Суғд ва Раиси шаҳри Хуҷандро ба самъи ҳозирин расонида, ҳамзамон аз роҳи тайкардаи донишкада ва дастовардҳои он андешаронӣ намуданд.
Зикр гардид, ки воқеан, Донишкадаи политехникии Донишгоҳи техникии Тоҷикистон ба номи академик М.С.Осимӣ дар руши иқтисодиёти вилояти Суғд ҳиссагузор буда, корхонаҳои истеҳсолӣ ва муассисаҳоро бо мутахассисони соҳаи энергетика ва нақлиёт, саноати сабук ва хӯрока, сохтмон ва меъморӣ, барномарезӣ таъмин менамояд. Дар донишкада дар тӯли 10 соли охир зиёда аз 9000 мутахассисони соҳибкасб омода карда шуда, онҳо дар соҳаҳои гуногуни иқтисодиёти вилоят ва берун аз он фаъолият мебаранд.
Иттилоъ дода шуд, ки Бешубҳа, Донишкадаи политехникии Донишгоҳи техникии Тоҷикистон дар шаҳри Хуҷанд дар тӯли беш аз 10 соли фаъолияти хеш дар омодасозии кадрҳои соҳибтахассуси риштаҳои барномарезӣ, телекоммуникатсия, энергетика, нақлиёт, сохтмон, меъморӣ, агротехнология, технологияи маҳсулоти хӯрока, иқтисодиёт ва молия ба мувафаққиятҳои беназир соҳиб гардида, чун донишкадаи навовар ва пешоҳанг дар ҷомеаи навини соҳибистиқлол шинохта шудааст.
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми хеш ба Маҷлиси Олии Ҷумҳурии Тоҷикистон вобаста ба рушди илмҳои техникӣ, тақвияти навоварию ҷорӣ кардани технология дар раванди таълим таъкид дошта буданд: “Таҳким бахшидани иқтидори илмии кишвар, ҷорӣ кардани ихтироот дар истеҳсолот, устувор гардонидани пояҳои моддиву техникии муассисаҳои таълимӣ, баланд бардоштани сифати таълим дар ҳамаи зинаҳои таҳсилот, ҷалби боз ҳам васеи истеъдодҳои ҷавон ба омӯзиши технологияҳои муосир ва корҳои эҷодиву техникӣ вазифаи муҳимтарини соҳаҳои илму маориф мебошад”.
Сарвари давлат зимни ифтитоҳи Маркази байналмилалии тиҷоратии “Сомон-Плаза” дар шаҳри Хуҷанд ҳангоми муарррифии Стратегияи рушди иқтисодии вилояти Суғд барои солҳои 2020-2030 аз натиҷаҳои дастуру ҳидоятҳои худ вобаста ба рушди илмҳои техникӣ, ҷорӣ намудани технологияҳои рақамӣ дар коргоҳҳо пурсон гардида, ба дастовардҳои илмиву техникии Донишкадаи политехникиии Донишгоҳи техникии Тоҷикистон дар шаҳри Хуҷанд баҳои баланд доданд.
Маврид ба зикр аст, ки дар ҳошияи дастуру вазифагузориҳои Пешвои муаззами миллат бо мақсади таҳрик бахшидан ба раванди беҳсозии таълиму тарбия Раиси вилоят муҳтарам Раҷаббой Аҳмадзода ду сол қабл дар доираи таҷлили моҳвораи ҷавонон бо устодону шогирдони ҳамаи муассисаҳои таҳсилоти олии вилоят мулоқоти озоду самимӣ ороста, аз вазъи пойгоҳҳои озмоишгоҳҳо ва марказҳо, дастовардҳои илму техника аз наздик ошноӣ пайдо карда, илова, бар ин дар кохи муҳташами ба номи Рӯдакӣ бо роҳбарони муассисаҳои таҳсилоти олӣ вохӯрда, дастовардҳои илмиву истеҳсолии муассисаҳои таҳсилоти олии касбиро мавриди таҳлил қарор дода буданд. Дар ин вохӯриҳо ба раванди таълиму тарбия, дастовардҳои донишкада дар ҷодаи ихтироот ва навоварӣ, ташаккули тафаккури техникӣ ба донишкада баҳои баланд дода, ҳамзамон дастур дода буданд, ки илмро пайваста дар амалия татбиқ намоянд.
Барои иҷрои ин ҳидоятҳои Пешвои муаззами миллат ва Раиси вилоят роҳбарияти донишкада кӯшишҳои зиёд ба самар медиҳанд. Махсусан дастовардҳои донишкада дар ҷодаи тарбияи кадрҳои соҳаи барномарезӣ шоистаи зикр аст. Устодон ва шогирдони донишкада бо ташкилоту муассисаҳои вилоят дар ин ҷода алоқаи зич доранд. Ба ғайр аз таъсиси сомонаҳо ва татбиқи ҳукумати электронӣ онҳо дар амалишавии Қонуни Ҷумҳурии Тоҷикистон “Дар бораи забони давлатӣ” дар шабакаи байналмилалии интернет саҳми калон дорад ва бо ширкати бонуфузи Майкрософт ҳамкории зич доранд. Натиҷаи тадқиқоти илмии олимони ҷавони донишкада дар истеҳсолот ва ҳаёти рӯзмарраи шаҳрвандон васеъ истифода мешавад. Масалан, системаи қабули пардохтҳо тавассути терминали худхизматрасон (Express Pay), системаҳои автоматишудаи хизматрасониҳои коммуналӣ ва пардохти ғайринақдӣ дар нақлиёти мусофиркашони шаҳри Душанбе ҳосили заҳматҳои барномасозони донишкада мебошад. Илова бар ин устодон ва донишҷӯёни донишкада роҳҳои нави истеҳсоли нерӯи барқро ихтироъ кардаанд, ки айни ҳол ин навовариҳо дар ҳоли коркард қарор доранд. Умуман дар ду соли охир донишкада соҳиби 50 патент ва шаҳодатномаи зеҳнӣ гардида, зиёда аз 350 мақолаи сатҳи байналхалқӣ, аз ҷумла 12 мақола дар нашрияҳои бонуфуз ба нашр расидаанд.
Дар ҳамкорӣ бо муассисаҳои таълимии касбии пешрафтаи хориҷӣ ба ғайр аз 27 лабораторияҳои амалмекарда ҳамзамон 9 лабораторияҳои махсуси соҳаи технологияи хӯрока бунёд шуда, сехи маҳсулоти омодасозии маҳсулоти хамирӣ ба фаъолият шурӯъ кард, ки бешубҳа дар татбиқи амалии яке аз ҳадафҳои стратегии мамлакат таъмини амнияти озуқаворӣ ин омил саҳмгир аст.
Боиси хушнудист, ки дар донишкада солҳои охир дар баробари пурқувват гардидани базаи моддиву техникӣ, пурра аз таъмири кулли баромадани ҳамаи биноҳои таълимӣ, хобгоҳ ва китобхонаҳои донишкада ҳамзамон сатҳ ва сифати таълим боло меравад. Гувоҳи гуфтаҳои болоӣ он аст, ки новобаста завқи ҷавонон ба илмҳои дақиқ ва техникӣ дар қиёс ба илмҳои гуманитарӣ камтар аст, дохилшавӣ ба ин муассисаи таълимӣ ҳамасола пурра иҷро мешавад. Маҳз эҷодкорию навоварӣ, аз худ қаноатманд набудани устодон, татбиқи амалии системаи идоракунии электронӣ, таҷрибаи мувафаққонаи Марказҳои тестӣ, бақайдгирӣ ва мартаба мақоми донишкадаро боз ҳам боло бардошт. Бесабаб нест, ки ҳамасола аз рӯи хулосабарории рейтингии Вазорати маориф ва илми кишвар донишкада миёни муассисаҳои олии кишвар ҷойҳои баландро соҳиб мешавад.
Сипас аз ҷониби муовини вазири маориф ва илми ҶТ Диловар Қодирзода ба роҳбарият ва устодони донишкада Сипоснома, Ифтихорнома ва унвонҳои “Аълочии маориф ва илми Ҷумҳурии Тоҷикистон”-ро тақдим намуд.
Дар қисмати фарҳангии чорабинӣ донишҷӯён бо барномаи рангин табъи ҳозиринро болида намуданд.
- Дида шуд: 1107 маротиба
Ҳамасола дар Тоҷикистон бо мақсади ташвиқу тарғиби анъана ва суннатҳои ниёгон бо иқдоми бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон симпозиум, фестивал ва озмунҳои ҷумҳуриявию байналмилалӣ баргузор мегардад. Дар доираи онҳо аз ҷониби қишрҳои гуногуни ҷомеа расму оин, анъанаҳои гузаштагон ва маҳсули дастии ҳунармандон ба маърази тамошо гузошта мешаванд. Яке аз чорабиниҳое, ки миёни омма ҳамовозии гарму ҷӯшон пайдо намуд, ин баргузории фестивал – озмуни “Чакомаи гесӯ” мебошад.
Дар партави дастуру ҳидоятҳои созандаи Пешвои муаззами миллат, бо мақсади татбиқи амалии қарори Раиси вилояти Суғд муҳтарам Раҷаббой Аҳмадзода нимаи дуюми имрӯз бо мақсади тарғибу ташвиқи зебоипарастӣ миёни духтарону бонувон, ашъори баландмазмун бахшида ба ҳусну таровати рӯй, ҷозибаи гесӯ, сару либос ва ороишоти миллӣ, истифодаи маҳсулоти табиии ватанӣ дар парваришу нигоҳубини рӯй, мӯй, муҳофизати пӯсти дасту рӯй озмуни “Чакомаи гесу” байни донишҷӯёни чор факултет баргузор гардид.
Дар он донишҷӯён аз рӯи шартҳои “Намоиши гесӯи дароз” ва “Ороиш ва мӯйбофии замони муосир” бо ҳам вориди рақобат шуданд. Бо хулосабардории ҳайати ҳакамон дар бахши “Намоиши гесӯи дароз” Рисолатбону Маҳмудова, донишҷӯи курси якуми факултети информатика ва энергетика ҷойи аввалро соҳиб гардид. Зинаҳои баъдиро Мижгона Комилова, донишҷӯи курси якуми факултети информатика ва энергетика ва Навбаҳор Худойназарова, донишҷӯи курси сеюми факултети информатика ва энергетика ишғол намуданд.
Дар бахши “Ороиш ва мӯйбофии замони муосир” ҷои аввалро Севара Қодирова, донишҷӯи курси якуми факултети информатика ва энергетика, мақоми дуюму сеюмро Фарзона Фазлиддинзода, донишҷӯи курси якуми факултети муҳандисӣ – иқтисодӣ ва Зӯҳро Муротова, донишҷӯи курси якуми факултети информатика ва энергетика ишғол намуданд.
Дар ҷамъбасти чорабинӣ директори донишкада, номзади илмҳои техникӣ Саидӣ Дилафрӯз Раббизода барои иштироки фаъолонаи донишҷӯён изҳори сипос намуда, зикр дошт, ки фестивали «Чакомаи гесӯ» аз ҷумлаи ин барномаҳост, ки бо мақсади бедор кардани ҳисси зебоипарастӣ дар замири занон дар мамлакат баргузор мегардад. Яъне, ҳадафи асосии он на танҳо доштани гесӯвони дароз, балки баланд бардоштани завқи бонувон нисбат ба фарҳанги либоспӯшӣ, дур будан аз бегонапарстиву хурофот ва пос доштани арзишҳои миллӣ мебошад.
Директори Маркази ташаккули тарзи ҳаёти солими вилоят Зуфнуна Хоҷаева ба ҳунару маҳорати донишҷӯдухтарон баҳои баланд дода, қайд кард, ки озмун барои сарҷамъӣ, талқини зебоипарастӣ ва худшиносии миллӣ заминаи мустаҳакам мегузорад.
Чорабинии фарҳангӣ фестивалро рангу мазмуни дигар бахшид.
- Дида шуд: 1213 маротиба
Дар маҷлисгоҳи Донишкадаи политехникии Донишгоҳи техникии Тоҷикистон ба номи академик Муҳаммад Осимӣ бо ташаббуси кумитаи иҷроияи ҲХДТ дар шаҳри Хуҷанд конференсияи илмӣ таҳти унвони ““Нақш ва мақоми ҲХДТ дар таъмини зиндагии шоистаи мардум” доир гардид.
Раиси Шӯрои собиқадорони Кумитаи иҷроияи Ҳизби Халқии Демократии Тоҷикистон дар вилояти Суғд Саидбой Зокиров номаи муборакбодии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Раиси муаззами Ҳизби Халқии Демократии Тоҷикистон муҳтарам Эмомалӣ Раҳмонро ба ифтихори ин санаи муборак ба самъи ҳозирин расонид.
Раиси кумитаи иҷроияи ҲХДТ дар шаҳри Хуҷанд Наим Маликисломӣ зимни баромади худ зикр дошт, ки Ҳизби Халқии Демократии Тоҷикистон, ки зодаи даврони Истиқлолият аст, дар давоми мавҷудияташ ҳамеша барои муттаҳидию ҳамбастагии мардум кӯшиш ба харҷ дода, дар ин самт ба комёбиҳои назаррас ноил гардид. Ин ҳизби воқеaн мардумӣ бо тaлош вa ҳидоятҳои созaндaи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон aрзи ҳaстӣ нaмудa, тaвонист чун ҳизби нуфузпайдокарда ва татбиқкунандаи идеяи миллӣ бaрои пешрaфт вa шукуфоии кишвaри aзизaмон хизмaти шоиста кунaд. Мақому манзалат ва шуҳрати намоёни ҲХДТ қаблан аз барномаҳои созанда, тадбирҳои судманди кулли аъзо ва ибтикороти роҳбарияти он маншаъ гирифта, беҳбудии сатҳу сифати зиндагии сокинони мамлакатро рисолати худ донист.
Фирӯза Нуруллозода, муовини Раиси шаҳри Хуҷанд зимни баромади худ изҳор дошт, ки Кумитаи иҷроияи Ҳизби Халқии Демократии Тоҷикистон дар шаҳри Хуҷанд яке аз калонтарин ташкилоти ҳизбӣ дар миқёси кишвар маҳсуб шуда, дар баланд бардоштани маънавиёт, эҳсоси худшиносии миллӣ, нақш ва мақоми бонувон ва ҷавонон дар ҷомеа, тарғиби тарзи ҳаёти солим саҳми шоиста дорад. Ин қувваи бузург, ки сиёсати давлатии кишвар ва Барномаи амалии ҳизбро дар соҳаҳои мухталифи хоҷагии халқ муаррифӣ мекунад, дар ҳама чорабиниҳои шаҳр фаъол аст. Махсусан, аёдати собиқадорони меҳнат, шахсони яккаву барҷомонда, ятимону бесаробмондагон дар якҷоягӣ хуб ба роҳ монда шуда, ҳамчунин ҳамагуна ҷашну маросимҳо дар ҳамбастагӣ доир карда мешавад.
Раиси шӯрои собиқадорони кумитаи иҷроияи ҲХДТ дар шаҳри Хуҷанд, номзади илмҳои педагогӣ, дотсент Абдуҳаким Шарипов ва устоди ДДҲБСТ профессор Мубина Хоҷаева дар баромадҳояшон баён доштанд, ки Ҳизби Халқии Демократии Тоҷикистон ҳамчун ташкилоти ҷамъиятии сиёсӣ дар ҷомеа нуфузи махсусро соҳиб гардида, аз оғози таъсисёбии худ то имрӯз дар рушди кишвари азизамон нақши сазовор гузошта истодааст. Ҳизби Халқии Демократии Тоҷикистон бо рисолати созандаву бунёдкорона ва ватандӯстонаву ватанпарварона миёни мардум ба таври шоиста муаррифӣ гардида, аз як гурӯҳи хурд ба ҳизби муосири зиёда аз 494 – ҳазорнафара, ба нерӯи пешсаф, ташаббускору созанда табдил ёфтааст.
Дар идомаи кори конфронс озмуни иншои беҳтарин байни хонандагони муассисаҳои таҳсилоти миёнаи умумии таълимии таҳти унвони «Тоҷикистони озоду соҳибистиқлол – Ватани маҳбуби ҳамаи мо!» , ки ба ифтихори Рӯзи таъсисёбии Ҳизби Халқии Демократии Тоҷикистон бо ибтикори Кумитаи иҷроияи Марказии ҲХДТ роҳандозӣ гардида буд, ҷамъбаст гардида, ғолибон бо диплом ва тӯҳфаҳои арзанда сарфароз гардонида шуданд.
Ҳамчунин фаъолони ҳизб бо ифтихорнома ва тӯҳфаҳои хотиравӣ аз ҷониби Мақомоти иҷроияи ҳокимияти давлатии шаҳри Хуҷанд ва кумиҷроияи шаҳрии ҳизб қадрдонӣ гардиданд.
Ба якчанд нафар ҷавонони фаъол дар вазъияти тантанавӣ шаҳодатномаҳои ҳизбӣ супорида шуд.
- Дида шуд: 1039 маротиба
Рӯзи гузашта дар маҷлисгоҳи Донишкадаи политехникии Донишгоҳи техникии Тоҷикистон дар шаҳри Хуҷанд вохӯрии Раиси федератсияи Иттифоқҳои касабаи мустақили Тоҷикистон Маликшоҳ Неъматзода, муовини Раиси федератсияи Иттифоқҳои касабаи Ҷумҳурии Тоҷикистон Файзизода Исмоили Нарзӣ, раиси Шӯрои иттифоқи касабаи вилоят Абдуллозода Шарифулло ва раиси кумитаи иттифоқи касабаи кормандони маориф ва илми вилояти Суғд Мусобек Мироватов вохӯрӣ бо собиқадорони соҳаи маориф ва ятимони кулл доир гардид.
Дар суханронии Маликшоҳ Неъматзода зикр шуд, ки Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистонро, ки санаи 26 январи соли равон тариқи расонаҳои ахбори умум ироа гардид, сокинони ваҳдатшиори мамлакат бо ифтихори бузург ва шукргузории афзун аз давлату давлатдории миллӣ истиқбол намуданд. Пешвои муаззами миллат дар баробари таҳлилу баррасии масъалаҳои мубрами соҳаи хоҷаги халқи мамлакат ба соҳаи маориф ба ҳайси самти афзалиятнок дар сиёсати маърифатпарваронаашон дар Паёми навбатӣ таваҷҷуҳ ва эътибори хосса зоҳир намуданд. Ҳамзамон дастгирии ятимону бесаробмондагон, шахсони имконияташон маҳдуд дар меҳвари фаъолияти Савари давлат қарор дорад. Ба андозаи 50 фисад баланд намудани ҳаҷми нафақаи маъюбони гурӯҳи якум бозгӯи гуфтаҳои болоӣ мебошад.
Дар фуроварди чорабинӣ ба 100 нафар ятимони кулл ва бепарастор аз ҷониби федератсияи Иттифоқҳои касабаи мустақили Тоҷикистон тӯҳфаҳои хотиравӣ тақдим карда шуд, ки аз миёни онҳо 14 нафарро донишҷӯёни Донишкадаи политехникии Донишгоҳи техникии Тоҷикистон дар шаҳри Хуҷанд мебошанд.
- Дида шуд: 1221 маротиба
Дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд конференсияи илмӣ-амалӣ таҳти унвони “Парчам - рамзи сарбаландӣ ва саодати халқ” бахшида ба Рӯзи Парчами давлатии Ҷумҳурии Тоҷикистон баргузор гардид.
Нахуст Раиси КИ ҲХДТ дар вилояти Суғд Зуфар Исмоилзода ҳамагонро ба Рўзи Парчами миллӣ табрику таҳният гуфта, аз ҷумла афзуд, ки барои мардуми сарбаланди кишвари мо, аз ҷумла, аъзову ҷонибдорони ҲХДТ соли фаромӯшнопазир маҳсуб меёбад. Зеро, дар маъракаи муҳиму тақдирсоз – интихоботи Президенти Ҷумҳурии Тоҷикистон ба пирӯзӣ расидани Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Раиси муаззами ҲХДТ муҳтарам Эмомалӣ Раҳмон ин солро барои кулли ҳамватанон соли накӯву хотирмон гардонид. Боиси ифтихор аст, ки тамоми чорабиниву ҷашнҳо зери парафшонии Парчами давлатӣ бо шукргузорӣ аз сулҳу ваҳдат, амну осоиштагии Ватан ва ободкориву бунёдкориҳо доир гардиданд. Бояд қайд намуд, ки Парчам барои мардуми тоҷик рамзи ватандорӣ, сарбаландӣ ва шуҷоату мардонагӣ буда, халқи мо аз замонҳои қадим ба он ҳамчун василаи муттаҳидкунанда арҷ мегузорад. Воқеан, аз ибтидои ҳастӣ муаррификунандаи давлату миллат дар арсаи ҷаҳонӣ Парчами миллӣ буда, барои болафшон будани он дар тӯли таърих миллатҳои рӯйи олам ҷонбозиҳои зиёд намудаанд.
Сипас директори ДПДТТ ба номи академик Муҳаммад Осимӣ дар шаҳри Хуҷанд Дилафрўз Саидӣ баромад намуда, аз ҷумла таъкид, ки таҷлили Рўзи Парчами давлатии Ҷумҳурии Тоҷикистон чун нишони садоқати имрўзиён ба анъанаҳои қаҳрамононаи авлоду аҷдоди сарбаланд, арҷгузорӣ ба арзишҳои умумимиллӣ арзёбӣ мешавад ва он барҳақ, таҷассумгари мақсаду мароми мо дар роҳи эъмори давлати демократии ҳуқуқбунёду дунявӣ мебошад. Парчами давлатӣ нишони ифтихор ва сарбаландии миллат аст. Ҷумҳурии Тоҷикистон чун давлати соҳибистиқлол дорои муқаддасоти миллӣ: Нишон, Суруди миллӣ, Парчам, Конститутсия, Забони давлатӣ ва пойтахти худ – шаҳри Душанбе аст, ки гиромидошту эҳтироми он қарзи ҳар як сокини ватандори кишвар аст. Тавре Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар яке аз суханрониҳои худ қайд намудаанд: «Қарзи шаҳрвандии мост, ки эҳтироми рамзҳои давлатӣ, аз ҷумла Парчамро ба ҷо орем, ҳамеша ва дар ҳама ҷой онро гиромӣ дорем, барои ҳимояи он ва поку муқаддас доштани он бо тамоми ҳастӣ омода бошем, зеро пос доштан ва ҳимоя кардани Парчами миллӣ бо ҳифзи Ватан, падару модар, аҳли хонавода ва пос доштани суннатҳои халқи худ баробар аст».
Дилафрўз Саидӣ афзуд, ки миллати соҳибфарҳанги мо соҳиби Парчами давлатӣ гардид, то имрўз дар ҳаёти сиёсиву иқтисодӣ ва иҷтимоиву маънавии кишвари азизамон дигаргуниҳои бунёдӣ ба амал омаданд. Қабули Парчам ба болоравии ҳисси миллӣ ва сатҳи худшиносии мардуми Тоҷикистон мусоидат намуд. Дар солҳои нахустини соҳибистиқлолӣ Парчами давлати тозаистиқлоламон барои шинохти асолати миллӣ, эҳёи суннатҳои давлатдорӣ ва сарҷамъу муттаҳид намудани кулли сокинони мамлакат нақши арзишманд бозид. Парчам ҳамчун рамзи нангу номуси ватандорӣ дар он шабу рўзҳои тақдирсоз тавонист, ки эҳсоси гарми ватандориро дар қалби ҳар як фарди кишвар бедор созад ва таҳти роҳбарии хирадмандонаи Пешвои муаззами мо миллатамонро ба сўи фардои ободу осуда раҳнамоӣ кунад. Боиси шарафмандии мост, ки имрўз Парчами давлатии Ҷумҳурии Тоҷикистон дар пештоқи биноҳои бонуфузтарин созмонҳои байналмилалию умумиҷаҳонӣ, ки кишвари мо ба онҳо узвият дорад, парафшонӣ мекунад. Ин амал шаҳодати он аст, кишвари мо рўз аз рўз дар миқёси ҷаҳон нуфузи бештар ёфта истодааст, ки боиси ифтихору рўҳбаландии тоҷикони дунё мебошад.
Дар ҷараёни кори конфронс ҳамзамон мудири шуъбаи рушди иҷтимоӣ ва робита бо ҷомеаи дастгоҳи Раиси вилояти Суғд Тоҷибой Султонзода, сардори Раёсати маорифи вилояти Суғд Осим Каримзода, дотсенти ДДХ ба номи академик Б.Ғафуров Шавкат Шарипов аз таърихи парчамдории тоҷикон ва шукуҳи имрўзаи Парчами давлатӣ маърўзаҳои илмӣ намуданд.
Таъкид шуд, ки имрўз шукронаи давлати соҳибистиқлоламон аст, ки Парчам тавассути амалҳои созандаву ободгаронаи фарзандони ватандўсту бонанги мо дар қалби ҳар фарди ҷомеа ба вожаи воқеан муқаддас табдил ёфтааст.
Дар анҷоми конфронси илмӣ маросими супоридани сипоснома ва шаҳодатномаи шунавандагони мактаби захираи кадрҳо ва қадршиносии ғолибони озмуни “Ихтироъкорон ва навоварони ҷавони вилояти Суғд” баргузор гардид
- Дида шуд: 1285 маротиба
Санаи 30 январи соли 2021 дар донишкада ҷашни Сада дар сатҳи баланд таҷлил гардид. Қайд гардид, ки пойдорию нуфузи ҳар як миллат беш аз ҳама ба маҳфуз доштани забону фарҳанг ва расму оинҳояш марбут аст. Ба шарофати соҳибистиқлолии Тоҷикистони азиз ва маҳз зери сиёсати фарҳангпарваронаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷашну маросимҳои суннатии мардуми мо, ки мероси пурғановате аз ниёгонанд, умри дубора пайдо намуд. Сарвари муаззами миллат, муҳтарам Эмомалӣ Раҳмон қайд намудаанд: «Дар замони истиқлолият Сада баробари дигар маросиму суннатҳои миллии мо, аз ҷумла Наврӯзу Меҳргон умри дубора пайдо карда, таҷлили ҳарсолаи он ба ҳукми анъана даромад ва дар радифи ҷашнҳои миллиамон ба қонунгузории мамлакат ворид гардид».
Моҳияти ҷашни Садаро пирўзии рўшноӣ бар торикӣ, гармо бар сармо ва некӣ бар бадӣ ташкил дода, мардум онро бо афрўхтани гулханҳои бузург таҷлил мекарданд.
Дар табрикоти директори донишкада оварда шуд, ки эҳёву таҷлили ҷашни Сада ҳамчун рамзи истиқболи фасли нуру гармӣ, некиву саховатмандӣ, сарҷамъӣ ва ваҳдати кулли шаҳрвандон дар густариши корҳои ободониву созандагӣ ва хуррамиву пешрафти Тоҷикистон нақши муассир гузошта, дар оғози сол чун паёмовари Наврӯзи оламафрӯз ба зиндагии мардуми шарифи Тоҷикистон муждаи хуррамиву хушбахтӣ хоҳад овард.
Навор оид ба таърихи ҷашни Сада, шеъру суруд, рақсҳои ҷолиб, бадеҳасароӣ аз ҷониби донишҷӯёни боистеъдод пешкаши ҳозирин гардида, табъи ҳозиринро болида намуд.
- Дида шуд: 1069 маротиба
Бахшида ба Рӯзи Президенти Ҷумҳурии Тоҷикистон дар варзишгоҳи “Спартак” мусобиқаи шаҳри Хуҷанд оид ба футбол байни муассисаҳои олӣ ва миёна махсус ҷамъбаст гардида, ғолибон муайян шуданд.
Қабл аз қадршиносии ғолибон Фируза Нуруллозода, муовини Раиси шаҳри Хуҷанд ҳамагонро бо Рӯзи Президенти Ҷумҳурии Тоҷикистон табрику таҳният намуда , иттилоъ дод, ки ба хотири тарғиби тарзи ҳаёти солим дар пайравӣ ба иқдомҳои созандаи Пешвои миллат муҳтарам Эмомалӣ Раҳмон дар шаҳри Хуҷанд майдончаҳои варзишӣ бунёд ва ба ҷавонону наврасон барои тамрини ҷисмониашон шароити мусоид фароҳам оварда шудааст ва имконоти мазкурро самаранок истифода баранд ва вақтҳои холигии худро бештар бо машқу тамрин сипарӣ намуда истодаанд, зеро варзиш омили муҳимтарини солимист. Дар давраи соҳибистиқлолӣ бо дастгирии Ҳукумати Ҷумҳурии Тоҷикистон ва ғамхориҳои пайвастаи Пешвои миллат муҳтарам Эмомалӣ Раҳмон торафт мақоми ҷавонон дар ҷомеа боло бардошта шуда, онҳо вобаста ба имконоту шароити мавҷуда дар рушди ҳамаи соҳаҳои ҳаёти ҷомеа саҳми муносиб мегузоранд. Ҷавонон махсусан дар соҳаи варзиш ба дастовардҳои назаррас ноил гардиданд, ки бо ин роҳ дар сатҳи минтақа ва ҷаҳон Тоҷикистонро ба таври шоиста муаррифӣ намуданд. Эътибори Роҳбарияти давлату Ҳукумат ба рушди илму фарҳанг ва маънавиёти ҷомеа ба пешрафти соҳаҳои илму маориф, таълиму тарбия ва тайёр намудани мутахассисони соҳиби донишу малакаҳои баланди касбӣ дар заминаи муассисаҳои олӣ мусоидат намудааст.
Бозии ниҳоӣ ғолибонро муайян намуд. Ҳамин тавр, дастаи ДДХ ба номи академик Бобоҷон Ғафуров мақоми аввал, тими ДПДТТ ба номи академик Муҳаммад Осимӣ ҷойи дуюм ва гуруҳҳои Коллеҷи тиббӣ ва Коллеҷи омӯзгории шаҳри Хуҷанд сазовори ҷои сеюм гардиданд.
Ғолибон ва ҷоизадорон қадршиносӣ карда шуданд
- Дида шуд: 922 маротиба
