Яке аз қисмҳои муҳимтарин ва ҷудонашавандаи тарзи ҳаёти солим, махсусан барои насли наврас ва ҷавонон  машғулиятҳои пайвастаи тарбияи ҷисмонӣ ҳисоб меравад. Аз ин рӯ, барои беҳбудии  саломатии аҳолӣ ва дар навбати аввал насли наврас Ҳукумати Ҷумҳурии Тоҷикистон ба соҳаи варзиш диққати махсус зоҳир менамояд.

Бо ибтикори Мақомоти иҷроияи ҳокимияти давлатии вилояти Суғд, Раёсати кор бо ҷавонон ва  варзиши вилояти Суғд бахшида ба Рӯзи Президенти Ҷумҳурии Тоҷикистон мусобиқаи вилоятӣ оид ба гӯштини дзюдо байни донишҷӯёни муассисаҳои таҳсилоти олии касбии вилоят баргузор гардид. Мусобиқа барои дарёфти Ҷоми Раиси вилояти Суғд доир гардид. Бо ифтихор метавон гуфт, ки донишҷӯи донишкадаи мо низ Давлатов Муҳаммадисо дар ин мусобиқаи вилоятӣ бо вазни 73кг қувваозмоӣ намуда, сазовори ҷойи 1 гардид ва Ҷоми раиси вилоятро ба даст овард.

Ғайр аз ин, Давлатов Муҳаммадисо дар мусобиқаи мазкур дар намуди варзиши гӯштини миллӣ низ қувваозмоӣ намуда, бо маҳорати баланди касбӣ сазовори ҷойи 2 гардид.

Ба Муҳаммадисо  дар ду намуди варзиш дипломҳои дараҷаи 1 ва 2, Ҷоми Раиси вилояти Суғд ва тӯҳфаи хотиравӣ дар вазъияти тантанавӣ супорида шуд.

Аз номи кулли донишкада Муҳаммадисоро бо ғолибияти дукарата табрик намуда, қуллаҳои баландро дар ҷодаи варзиш таманно дорем.

Бигзор чунин ғалабаҳо дар оянда бисёртар гардида, варзишгарони мо номбардори донишкада гарданд.  

 

Солҳои охир робитаи Донишкадаи политехникии Донишгоҳи техникии Тоҷикистон бо муассисаҳои олии хориҷи кишвар густариш меёбад. Бино бар иттилоии мудири шуъбаи робитаҳои хориҷии донишкада Шӯҳрат Мақсудов донишкада бо 234 муассисаҳои олии хориҷӣ шартномаи ҳамкорӣ дошта, айни замон 40 нафар донишҷӯёни донишкада дар асоси созишномаи ҳамкорӣ дар хориҷи кишвар таҳсил ва таҷрибаомӯзӣ доранд. Илова бар ин мунтазам устодони донишкада бо дастгирии директори донишкада, номзади илмҳои техникӣ Саидӣ Дилафрӯз Раббизода дар доираи барномаҳои сафарбаркунии академикӣ ва таҷрибаомӯзии байналмилалӣ, дар муассисаҳои беҳтарини хориҷи кишвар табодули таҷриба мекунанд ё бараъкс устодони донишгоҳҳои хориҷӣ барои ошноӣ бо фаъолияти таълиму тарбия ба донишкада ташриф меоранд.

Чунончи соли сеюм аст, ки дар доираи Барномаҳои GIZ (Ҷамъияти Олмон оид ба ҳамкориҳои байналмилалӣ) ва Ерасмус плюс устодони донишкада дар пешрафтатарин муассисаҳои олии Олмон, Испания Полша, Латвия, Литвия, Қазоқистон, Қирғизистон такмили дониш намуда, аз вазъи таълиму тарбия, пояи моддиву техникӣ дидан намуданд. Ҳамзамон донишҷӯёни донишкада низ барои тақвияти дарсҳои азхудкардаи худ муддате дар Донишгоҳҳои олии  Ҷумҳурии Қазоқистон ва Ҷумҳурии Қирғизистон таҳсил намуда, баръакс шогирдони ин донишгоҳҳо бо ҳамроҳии устодонашон моҳҳои апрел ва май дар Донишкадаи политехникӣ таҳсили илм намуданд.

 

Шурӯъ аз соли нави хониш дар доираи лоиҳаи «Таҳсилоти олӣ барои низоми озуқаворӣ ва стандартҳо дар Осиёи Марказӣ» -и Барномаи Ерасмус плюс 11 нафар устодон аз давлатҳои Латвия, Литва ва Полша барои донишҷӯёни донишкада, ки дар ихтисоси технологияи маҳсулоти хӯрока ва агротехнология таҳсил доранд, дарс мегӯянд. Айни замон устодон Хаваняк Масей, Марчин Ниемес ва Дегмара Зюзек аз Ҷумҳурии Полша бо истифода аз шароити хуби таълимӣ ва лабораторияҳои муҷаҳҳази факултети муҳандисӣ – технологӣ ба шогирдон дарс мегӯянд.

- Хеле хушҳол ҳастам, ки дар доираи  лоиҳаи Таҳсилоти олӣ барои низоми озуқаворӣ ва стандартҳо дар Осиёи Марказӣ» ба Хуҷандшаҳр омадам. Банда устоди кафедраи Агротехнология ва Агроэкологияи Донишгоҳи аграрии шаҳри Кракови Ҷумҳурии Полша мебошам.  Ҳоло бо шавқи том ба донишҷӯёни Донишкадаи политехникии Донишгоҳи техникии Тоҷикистон дарс мегӯям. Донишҷӯёни донишкада завқи зиёд барои азхудкунии ихтисосашон дошта, мехоҳанд бештар самтҳои истеҳсоли органикӣ ва методҳои сертификатсия ва стандартизатсияи истеҳсолот дар хоҷагиҳои деҳқониро донанд. Фикр мекунам, ки лоиҳаи мазкур воқеан ҳам барои тараққиёти соҳаҳои маҳсулоти растанипарварӣ, боғу токпарварӣ ва дар маҷмӯъ сертификатсияи маҳсулотҳо заминаи хуб мегузорад. Тоҷикистон аз лиҳози мавқеи ҷуғрофиаш макони беҳтарин барои рушди хоҷагии деҳқонист. Зеро обу ҳаво имконият медиҳад, ки деҳқонон анвои гуногуни маҳсулоти кишоварзиро парвариш ва истеҳсол кунанд ва онро ба дигар давлатҳо фурӯшанд. Барои роҳандозии ин амал гумон мекунам лоиҳа кӯмаки бештар мекунад. Эълон шудани соли 2018 Соли рушди сайёҳӣ ва ҳунарҳои мардумӣ барои муаррифии шоистаи дастовардҳои соҳаи агротехнологияи кишвар заминаи хубе хоҳад буд.   Бояд гӯям, ки ҳамоҳангсози лоиҳа аз Латвия Ирина Кулитане аст ва ӯ мушкиливу муаммоҳои соҳаро хубтар медонад. Мо, устодон аз ҷумҳуриҳои Полша, Латвия ва Литвия  аз пазироии гарму ҷӯшони роҳбарияти донишкада хеле шодем ва боварии комил дорем, ки робитаи мо минбаъд низ қавӣ мегардад. Ифтихорманд аз он ҳастам, ки шарафи дидани чунин як шаҳри зебо ва ҷавонони ҳушёру доно насибам гардид- мегӯяд зимни сӯҳбат Хаваняк Масей.

Донишҷӯёни донишкада низ аз машғулияти устодони хориҷӣ барои худ донишҳои навро гирифта истодаанд.  Мо пайгири навовариҳои устодону шогирдонем.

 

 

 

 

Бо мақсади баландбардории сатҳи дониши донишҷӯён ва ивази таҷрибаи устодон, ҳамзамон, дар доираи барномаи “HECAFS” намояндагони Донишгоҳи Литва меҳмони донишкадаи мо гардидаанд.

Гражина Янушлявичене, доктори илмҳои байторӣ, профессори Донишгоҳи илм дар бораи ҳаёт, Алвидас Шарлакаус, доктори илмҳои технологӣ, Александр Новославский доктори илмҳои кишоварзӣ аз фанҳои гуногун дар факултети муҳандисӣ – технологӣ, кафедраи “Маҳсулоти хӯрока ва агротехнология”  ба донишҷӯён дарсҳо гузаронида истодаанд.

Дарсҳо ва тренингҳо дар донишкада  аз санаи 19 то 29 октябри соли равон  идома меёбад. Устодони Донишгоҳи илм дар бораи ҳаёти Литва аз фанҳои “Методҳои ташхис ва таҳлили маводи хӯрока”(Food quality and safety control systems), “Истеҳсоли маҳсулоти растанипарварӣ”  (Quality control systems), “Микробиологияи хӯрока” ба донишҷӯёни зинаи бакалаври 2.49.01.02 ва 2.74.02.06,   “Асосҳои илмии идораи сифати маҳсулоти хӯрока”( Quality management), “Микробиологияи хӯрока” ба магистрантони ихтисоси мазкур дасрҳои амаливу назариявӣ гузаронида истодаанд.  

Ғайр аз ин, намояндагони Донишгоҳи Литва бо устодони кафедраи “Маҳсулоти хӯрока ва агротехнология”  тренинг оид ба масъалаҳои стандарти байналхалқии бехатарии маҳсулоти хӯрока баргузор намуда, бо ҳамдигар ивази таҷриба менамоянд.

Зимни сӯҳбат бо устодони ин Донишгоҳ аён гардид, ки донишкадаву донишҷӯёни мо аз нигоҳи онҳо яке аз беҳтаринҳо буда, дарсҳо дар сатҳи баланд доир мегарданд.

Ҳангоми иштирок дар дарси донишҷӯёни ихтисоси 2.74.02.06 ва сӯҳбат бо донишҷӯён, ки омӯзгори он  доктори илмҳои технологӣ Алвидос Шарлакаус мебошад, аён гардид, ки аз рӯзҳои аввал донишҷӯён бо устодони Донишгоҳи Литва муносибати хуб ва ҳамдигарфаҳмӣ пайдо намуда, дар дарсҳо бо фаъолнокии баланд иштирок намуда истодаанд. Алвидос Шарлакаус оид ба бехатарии маҳсулоти хӯрока, индикатори сифати маҳсулот ба донишҷӯён маълумот дод, ки онҳо бо шавқи баланд ва диққати том аз худ намуданд. Александр Новославский, доктори илмҳои кишоварзӣ бошад ба донишҷӯёни курси 2.49.01.02 аз фанни “Микробиологияи хӯрока” таълим дода истодааст. Азбаски донишкада дорои сатҳи баланди пояи моддиву техникӣ буда, лабораторияҳои замонавӣ бо таҷҳизоти муосир таъмин мебошад, А.Новославский фанни таълими худро дар лабораторияи мазкур гузаронида истодааст. Ҳангоми сӯҳбат донишҷӯён ва худи устод қайд намуданд, ки дарсҳо хеле шавқовар мегузаранд. Донишҷӯён ҳамаи донишҳои назариявии худро  дар лаборатория амалан иҷро намуда, мавзӯи фанни таълимиро хубтар омӯхта истодаанд.

Чунин ҳамкориҳо дар ҳақиқат саривақт ва зарурӣ буда, нақши мусбии хешро дар сатҳу сифати таълим, баландбардории дониши донишҷӯён ва муносибатҳои дӯстонаи байналмиллаӣ хоҳад гузошт.

 

 

Тоҷикистон чун кишвари агросаноатӣ барои афзун намудани маҳсулоти кишоварзӣ аҳамияти хосса медиҳад. Зеро яке аз ҳадафҳои стратегии кишвар таъмини амнияти озуқаворӣ маҳсуб меёбад. Барои амалӣ шудани  ин ҳадафи созандаи давлат ва Ҳукумати Ҷумҳурии Тоҷикистон ташкили хоҷагиҳои деҳқониву инфиродӣ мусоидати бештар менамояд. Тибқи омори расмӣ ҳоло дар вилояти Суғд ҳудуди 5 ҳазор хоҷагиҳои дехқонӣ фаъолияти бомаром доранд. Солҳои охир бинобар замин соҳиби аслии худро ёфтан, кишоварзон роҳҳои баланд бардоштани самараноки меҳнатро ҷӯё мешавад. Коршиносони соҳа бар онанд, ки махсусан кишти пунбадона ва парвариши он барои кишоварзон нафъи бештар меоранд. Аз ин лиҳоз соли равон дар ҳудуди вилояти Суғд майдони кишти чигит зиёд гардида,  мувофиқи дурнамо бояд  150 ҳазор тонна ҳосили пахта ғундошта шавад. Айни замон чидани ҳосили бо ранҷ пухта расида вусъати тоза касб намуда, саҳмдорон бо кӯмаки ҳашарчиён баҳри беталаф ғунучини он кӯшиш мекунанд. Роҳбарияти мақомоти иҷроияи ҳокимияти давлатии вилоят баҳри ҳавасмандии чинакчиён анъанаи пешини ҷамъбасти даҳрӯзаро аз нав эҳё кард. Ба ғолибон дар ҷамъбасти ду даҳрӯза мукофотҳои пулӣ дар хаҷми калон дода шуд.

Худи Раиси вилоят муҳтарам Раҷаббой Аҳмадзода ташаббус нишон дода, чанд маротиба дар рӯзҳои истироҳат барои кӯмак барои ҳашарчиён рафтанд. Дар пайравӣ ба ин ташаббуси Раиси вилоят ташкилоту корхонаҳои шаҳри Хуҷанд ҳар ҳафта рӯзи истироҳат ба майдони пахтазор  мераванд ва паҳлӯ ба паҳлӯи саҳмдорон барои беталаф ғундоштани дурри гаронбаҳҳо кӯмак менамоянд.  Чунончи бо истифода аз ҳавои офтобӣ рӯзи шанбе устодону шогирдони донишкадаи ДПДТТ  бо ҳамроҳии дигар ҳашарчиёни шаҳр ба саҳроҳои хоҷагии ҳудуди Қотмаи ноҳияи Бобоҷон Ғафуров рафтанд. Онҳо бо ҳамроҳии ҳашарчиён ғайратмандона меҳнат намуда, дар маҷмӯъ беш аз 4 тонна ба хирмани хоҷагӣ рехтанд.  Ба чинакчиёни чобукдаст дар фарҷоми кори бобарор тӯҳфаҳои хотиравӣ супорида шуд.   

 

Санаҳои 10-13 октябри соли равон дар шаҳри Бишкеки Ҷумҳурии Қирғизистон Анҷумани V –уми омӯзгорон ва кормандони соҳаи маорифи давлатҳо-иштирокдорони ИДМ баргузор гардид.

Мавзӯи Анҷумани мазкур “Инкишофи низомҳои таълимии давлатҳо-иштирокдорони ИДМ бо мақсади рушди устувор” (“Развитие образовательных систем государств – участников СНГ в контексте целей устойчивого развития”) буда, дар он намояндагони соҳаҳои маорифи Ҷумҳурии Арманистон, Ҷумҳурии Белорус, Ҷумҳурии Қазоқистон, Ҷумҳурии Тоҷикистон, Ҷумҳурии Қирғизистон, Федератсияи Русия, Ҷумҳурии Туркманистон, ҳамчунин, намояндагони Кумитаи иҷроияи ИДМ, Фонди байналхалқии ҳамкории гуманитарии ИДМ, Ассамблеяи байнипарламентии ИДМ, ЮНЕСКО ширкат варзиданд.

Сараввал иштирокчиёни Анҷуманро бо нишонаи ихлос ва эҳтиром Президенти Ҷумҳурии Қирғизистон  С.Ш. Жээнбеков ба Ҷумҳурии Қирғизистон, ба Анҷумани V –уми омӯзгорон ва кормандони соҳаи маорифи давлатҳо-иштирокдорони ИДМ хайрамақдам намуд. Иштирокчиёни Анҷуманро Раиси Кумитаи иҷроияи ИДМ – Котиб-иҷрочии  ИДМ Лебедев С.Н. низ пазироӣ намуд. 

Кори Анҷуман давоми ду рӯзи корӣ ба 9  қисмат ҷудо карда шуд, ки дар ҳар яки он муаммоҳои таълим мавриди баррасӣ қарор гирифт.

Ман дар бахши якуми кори Анҷуман оиди механизми баланд бардоштани масъулияти устодон тариқи ҳавасмандкунӣ, роҳҳои беҳтарнамоии такмили ихтисос ва худомӯзии устодон баромад намуда, қайд намудам, ки бояд омӯзгор аз муосиртарин таълимот огоҳии комиле дошта бошад. Зеро дониши донишҷӯён дар сурате такмил меёбад, ки худи устод ба он мусаллаҳ бошад. Дар ин ҷода беҳтар мебуд аз рӯи системаи мотиватсия- такмили ихтисос ва назорат корбарӣ шавад.  

Рӯзи аввали анҷуман дар  мавзӯи “Низомҳои таълими миллии давлатҳо-иштирокдорони ИДМ бо мақсади рушди устувор” вазирони маориф ва илми кишварҳои гуногун суханронӣ намуданд. Аз ҷумла, Муовини вазири маориф ва илми Ҷумҳурии Тоҷикистон Латофат Назирӣ Қаҳҳор низ баромад намуда, дастоварду муаммоҳои соҳаро ба риштаи таҳлил кашид. Ӯ аз ҷумла зикр дошт, ки роҳандозии як қатор барномаҳо имкон фароҳам овард, ки сифати таҳсил боло равад. Сохтмону азнавсозии садҳо мактабҳо, ҷиҳозонидани синфхонаҳо бо лабораторияҳои махсус барои баланд бардоштани завқи техникии хонандагон мусоидат намуд.

Дар доираи баргузории анҷуман 20 нафар кормандони соҳаи маориф, ки баҳри ташкили таълими умумӣ дар ИДМ саҳми босазо гузоштанд, бо нишони сарисинагии “Аълочии маорифи Иттиҳоди Давлатҳои Мустақил” қадрдонӣ шуданд.

Иштирокдорон аз намоишгоҳе, ки дар доираи Анчуман ташкил карда шуда буд, дидан намуданд.

Бо мақсади коркарди стратегияи умумӣ ва муайянкунии роҳҳои асосии рушди таълими ИДМ дар оянда иштирокдорони Анҷуман низоми миллии таҳсилотро мавриди баррасӣ қарор доданд.

Нақш ва вазифаи стандарт дар доираи методологии салоҳияти таълим, пешниҳоди таълими босифат дар давоми ҳаёт ва мувофиқати он бо талаботи бозори меҳнат, омоданамоӣ ва баландбардории дараҷаи маълумоти кормандон ва талаботи касбӣ, ки лозим аст, ташаккули  муҳити бехатари таълим, истифодаи роҳҳои муосир барои нигоҳдорӣ ва ташкили корҳои тарбиявӣ, механизми нави идораи таҳсили иловагии ҷавонон ва кӯдакон аз мавзуъҳои асосӣ ва баҳсталаби анҷуман маҳсуб ёфт.

Бо баҳодиҳии баланд ба дараҷаи  баргузории Анҷуман, иштирокдорони он моделҳои рушди устувори низоми таълимро дар давлатҳо-иштирокдорони ИДМ пешниҳод намуданд. 

Иштирокдорон аз кори  Анҷуман натиҷабардорӣ намуда, ҳамкории ИДМ-ро дар соҳаи маориф  ҳамчун роҳи амалии баландбардории рақобатпазирии низоми миллӣ, ҳамгироии онҳо дар низоми таълими ҷаҳонӣ хеле хуб пазируфтанд,  инчунин, ғояи амалии ҳамкориро дар доираи чорабиниҳои байналхалқӣ дастгирӣ намуданд.

Ин сафар барои густариши робитаи соҳаи маорифи кишварҳо мусоидати хубе хоҳад намуд. Мо аз ин сафар бардоштҳои хубе гирифтем. Табодули таҷриба, омӯхтани ҷанбаҳои пешрафти таълимӣ барои боз ҳам хубтар гардидани таълиму тарбия заминаи мусоид фароҳам хоҳад овард.

 

 Директори ДПДТТ             Саидӣ Дилафрӯз Раббизода

Бо мақсади аз наздик шиносоӣ пайдо намудан аз шароити таълиму тарбия санаи 27 октябри соли равон Раиси вилояти Суғд, муҳтарам Раҷаббой Аҳмадзода ба Литсейи Донишкадаи политехникии Донишгоҳи техникии Тоҷикистон ба номи академик М.Осимӣ дар шаҳри Хуҷанд ташриф оварданд. Раиси Вилояти Суғд муҳтарам Раҷаббой Аҳмадзода аз раванди таълиму тарбия, шароити омодагӣ ба зимистонгузаронӣ, ҷараёни дарсҳо бештар огоҳӣ пайдо намуда, бо директори ДПДТТ Саидӣ Дилафрӯз Раббизода, директори литсей Аминова Зебо бобати пешрафти таълиму тарбия ҳамсӯҳбат гардиданд.

Ба Раиси вилоят иттилоъ дода шуд, ки дар литсейи ДПДТТ 450 нафар хонандагон таҳсили илм доранд. Омӯзгорони пуртаҷрибаву кордон мекӯшанд, то ҳар як лаҳзаро самаранок истифода бурда, тамоми донишу таҷрибаашонро баҳри омӯзиши хонандагон сарф намоянд.

Зимни суҳбати Раиси вилоят бо хонандагон аён гардид, ки литсей дар ҳақиқат дорои шароитҳои хуби талимӣ буда, хонандагон донишу саводи баланд доранд. Раиси вилоят оид ба  сафари навбатии Асосгузори сулҳу ваҳдати миллӣ, Пешвои миллат, Президенти кишвар муҳтарам Эмомалӣ Раҳмон ба вилояти Суғд сухан ронда, бори дигар таъкид намуданд, ки хонандагон ба забонҳои хориҷӣ  бештар диққат дода, онҳоро хуб аз худ намоянд. Ҳамзамон қайд намуд, ки дар литсей кабинетҳои фаннӣ бо шароити хуб ба кор монда шуда, бо сифати баланд ҷиҳозонида шаванд. Раиси вилоят ба роҳбарияти донишкада дастур дод, ки дар ояндаи наздик тарҳи бинои нави литсей омода шавад. Мақомоти иҷроияи ҳокимияти давлатии вилояти Суғд омода аст, ки барои азнавсозии бинои литсей кӯмак намояд.

 

Ёдовар бояд шуд, ки литсей дастовардҳои бисёри илмӣ дорад. Аз ҷумла, 2 нафар ғолиби Олимпиадаи ҷумҳуриявӣ мебошанд. Дар Олимпиадаи ҷумҳуриявӣ Шерматов Азамат, хонандаи синфи 8 аз фанни химия сазовори ҷойи 1, Исроилов Олимҷон, хонандаи синфи  7 аз фанни химия сазовори ҷойи  3 гардидаанд.

Омӯзгори фанни физика Бобоҷонов Ҷумъабой дар озмуни “Мутахассиси ҷавон” – и шаҳрию вилоятӣ ширкат варзида, ғолибият ба даст овардааст.

Омӯзгори фанни химия  Иброҳимов Муъминҷон дар машварати августии омӯзгорон соҳиби Ҷоизаи Раиси вилоят, мукофотпулӣ ба маблағи 6000 сомонӣ гардидааст.

Дар охир Раиси вилояти Суғд, муҳтарам Раҷаббой Аҳмадзода ба Литсейи ДПДТТ 2 адад компютер тӯҳфа намуда, ба хонандагону омӯзгорон дар ҷодаи илму таҳсил барору комёбӣ таманно намуд.

Бо қарори Раиси вилояти Суғд муҳтарам Раҷаббой Аҳмадзода даври дуюми фестивал-озмуни атласу адраси Суғд дар сар то сари вилоят ҷараён дорад.

Дар партави қарори мазкур дар Театри мазҳака ва мусиқии ба номи Камоли Хуҷандӣ Фестивали шаҳрии “Адрасу атласи Хуҷанд - 2018” баргузор гардид. Боиси ифтихор аст, ки ғолибони даври аввали озмуни мазкур аз Донишкадаи политехникии Донишгоҳи техникии Тоҷикистон ба номи академик М.Осимӣ низ бо маҳорати баланд ҳунарнамоӣ карда, истеъдоди нотакрори хешро пешкаши ҳамагон гардониданд. Соҳибҳунарони факултети муҳандисӣ – технологӣ бо намудҳои гуногуни атласу адрас маҳсули дасти хешро ба намоиш гузоштанд, ки писанди ҳамагон гардид.

Аъзои ҳакамон ба ҳар як либос аз рӯи намуди атлас, тарзи дӯхт, тарзи ороиш ва мӯд баҳо дода, беҳтаринҳоро муайян намуданд.

Боиси хурсандист, ки донишҷӯи курси 3, ихтисоси 50.01.02 Бобоҷонова Нигора соҳиби шоҳҷоизаи фестивал-озмуни “Адрасу атласи Хуҷанд - 2018”  гардид.

Дар номинатсияи “Беҳтарин либоси кӯдакона” корманди Парки технологии донишкада Қосимова Рухшона соҳиби ҷойи сеюм гардид.  

Ба ғолибон дипломҳо ва тӯҳфаҳои хотиравии мақомоти иҷроияи ҳокимияти давлатии шаҳри Хуҷанд супорида шуд. Бо ҳамин даври дуюми фестивал – озмуни “Адрасу атласи Хуҷанд - 2018” ҳусни анҷом ёфт.

Аз номи кулли донишкада ғолибони озмуни "Атласу адраси Хуҷанд-2018"-ро табрику таҳният намуда, ба корҳои ояндаашон барору комёбӣ хоҳонем.

 

 

Чанде пеш дар толори Қасри варзиши шаҳри Хуҷанд Намоишгоҳи ҷумҳуриявии дастовардҳои соҳаи меъморӣ, шаҳрсозӣ, масолеҳи сохтмонии ватании воридотивазкунанда ва ҳунарҳои мардумӣ баргузор гардид. Дар чорабинӣ Раиси вилояти Суғд Раҷаббой Аҳмадзода, Раиси Кумитаи меъморӣ ва сохтмони назди Ҳукумати Ҷумҳурии Тоҷикистон Ҷамшед Аҳмадзода, Раиси шаҳри Хуҷанд Маъруф Муҳаммадзода ва доираҳои васеъи соҳибкорону ширкатҳои сохтмонӣ иштирок доштанд.

Раиси вилояти Суғд Раҷаббой Аҳмадзода зимни суханронии худ таъкид дошт, ки солҳои охир дар кишвар рушди сохтмон ва меъморӣ ба тадриҷ инкишоф ёфта, намояндагони ин касб бо тахаюли рангин ва эҷодиёти нав навъҳои гуногуни тарҳи биноҳоро бо махсусиятҳои миллӣ офарида истодаанд. Имрӯз бо шарофати ташаббусҳои созандагии Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон дар қаламрави кишвар ба пешвози 30 солгаии Истиқлолияти давлатии Ҷумҳурии Тоҷикистон беш аз 6300 иншооти таъиноташ бунёд шуда истодааст. Дар радиф дар қаламрави вилояти Суғд дар баробари корҳои бунёдӣ, рушди бемайлони соҳаи саноати кишвар ба мушоҳида мерасад, ки фақат давоми 9 моҳи охир маҷмуъи маҳсулоти саноатии вилоят ба беш аз 8, 1 миллиард сомонӣ баробар шуд.

Лозим ба зикр аст, ки дар Намоишгоҳи ҷумҳуриявии дастовардҳои соҳаи меъморӣ, шаҳрсозӣ, масолеҳи сохтмонии ватании воридотивазкунанда ва ҳунарҳои мардумӣ беш аз 60 ширкат ҳузур доштанд.  

Донишкадаи моро кафедраҳои сохтмон ва дизайн ва меъморӣ бо дастгирии директори донишкада Саидӣ Дилафрӯз Раббизода ба таври шоиста муаррифӣ намуданд. Устодони донишкада Амиртемур Ваҳҳобов,  Фирӯз Юсупов, Ваҳҳобов Исроилхӯҷа бо ҳамроҳии шогирдони донишкада тарҳ ва лоиҳаҳои иншоотҳои гуногунро пешкаши намоишгоҳ намуданд. Намунаи эҷоди онҳо, ки маҳсули заҳматҳои онҳо дар раванди машғулиятҳо маҳсуб меёбад, аз ҷониби коршиносон ва ҳайати меҳмонон баҳои баланд гирифт. Зикр шуд, ки робитаи донишкада бояд бо ширкатҳои сохтмонӣ қавитар гардад, то онҳо тавонанд дар ҳамҷоягӣ тарҳҳои биноҳои замонавиро бунёд созанд.

Дар қисмати ҷамъбасти намоишгоҳ Амиртемур Ваҳҳобов, декани факултети муҳандисӣ- технологӣ барои саҳми шоистаи худу шогирдонаш бо Сипосномаи Кумитаи меъморӣ ва сохтмони назди Ҳукумати Ҷумҳурии Тоҷикистон тақдиронида шуд.

Ёдовар мешавем, ки чорабинии мазкур дар доираи эълон шудани соли 2018 Соли рушди сайёҳӣ ва ҳунарҳои мардумӣ рӯи кор омад.

 

Дар вохӯрӣ бо Раиси вилояти Суғд, муовини аввали Раиси Маҷлиси миллии Маҷлиси Олии Ҷумҳурии Тоҷикистон муҳтарам Раҷаббой Аҳмадзода санаи 3 майи соли равон донишҷӯёни Донишкадаи политехникии Донишгоҳи техникии Тоҷикистон аз Раиси вилоят хоҳиш намуда буданд, ки барои аз наздик ошноӣ пайдо кардан аз рафти сохтмони нерӯгоҳи бузурги обии «Роғун» мусоидат намоянд. Санаи 11 октябр бо дастгирии мақомоти иҷроияи ҳокимияти давлатии вилояти Суғд 16 нафар донишҷӯёни фаъоли дар риштаи таъмини барқ ва автоматика таҳсил дошта бо ҳамроҳии мудири кафедра номзади илмҳои техникӣ Ҳусейнҷон Қаландаров ба шаҳри Роғун сафар намуда, бо роҳнамоии ёрдамичии  директори генералии ҶСК “Нерӯгоҳи барқи обии Роғун” Сафарбек Валиев, муовини директор оид ба истеҳсолот Қурбонназар Давронов ва сардори Раёсати бехатарии нерӯгоҳ Тешабой Исломов аз ҷараёни сохтмон аз наздик шинос гардиданд. Дар рафти вохӯрӣ бо сохтмончиён итттилоъ дода шуд, ки айни ҳол дар ин нерӯгоҳи бузурги аср беш аз 21 ҳазор кормандон дар се баст фаъолият доранд. Ва ду агрегати нерӯгоҳ бо иқтидори 200 мегаватт рӯзҳои наздик бо иштироки Асосгузори сулҳу ваҳдати миллӣ- Пешвои миллат мавриди истифода қарор хоҳад гирифт. Кор дар дигар бахшҳо бо маром идома дошта, айни ҳол қувваи бештари сохтмончиён ба симбандиву бетонхобонӣ равона гардидааст.

Ба донишҷӯён аз ҷониби мутахассисони нерӯгоҳ тарҳи асосии нерӯгоҳ нишон дода шуд, ки дар сурати ба истифодадиҳии он бо технологияи муосири ҷиҳозонида шуда, беҳтарин ихтисосмандҳо ба кор даъват карда мешаванд.

Донишҷӯён бо таассуроти хеле олӣ аз ин нерӯгоҳ баргашта, ҳар яке дар дил хоҳиши дар  ин нерӯгоҳ кор карданро пайдо намуданд.

Ҷомеаи устодону шогирдони донишкада барои фароҳам овардани чунин сафари хотирмону омӯзишӣ ба Раиси вилоят муҳтарам Раҷаббой Аҳмадзода изҳори сипос менамоянд.     

 

 

Вазири маориф ва илми Ҷумҳурии Тоҷикистон Саид Нуриддин Саид  ҷиҳати ошноӣ аз раванди таълиму тарбия, вазъи пояи моддиву техникӣ ба Донишкадаи политехникии Донишгоҳи техникии Тоҷикистон ба номи академик Муҳаммад Осимӣ ташриф овард. Зимни азназаргузаронии дастовардҳои донишкада Вазири маориф ва илми кишвар ба роҳбарияти донишкада дастур дод, ки таҷрибаи раванди таълимии сиклӣ ва тарзи иҷроиши сарборие, ки дар донишкада роҳандозӣ шудааст, бояд дар дигар муассисаҳои олии кишвар ҷорӣ карда шавад. Зеро ин намуди таълим масъулият ва салоҳияти устодонро баланд бардошта, онҳоро ба навовариву навҷӯи талқин мекунад.

Нуриддин Саид дар идомаи вохӯрӣ зарурати тағйирот нисбати қабули довталабон ба магистратураро бо мисолҳои возеҳ фаҳмонид. Зикр шуд, ки шогирдони боистеъдоду навовар, ки зимни таҳсил худро фаъол нишон додаанд, бояд ба таҳқиқу пажӯҳиш бештар ҷалб карда шаванд.

Вазири маориф ба тадқиқоту раванди корҳои амалии устодону шогирдони кафедраи барномарезӣ ва низомҳои иттилоотӣ баҳои баланд дода, бори дигар аз устодон даъват ба амал оварданд, ки ҳамвора илмро бо амалия пайваст созанд. Махсусан ба устодоне, ки ба тадқиқоти тафтиши орфографии калима машғуланд, тавсия дода шуд, ки барои омоданамоии барномае, ки бевосита тафтиши автоматики ҷумларо назорат мебарад, машғул шаванд.

Ёдовар мешавем, ки шогирдони ин кафедра, устодони ҷавони донишкада Парвиз Солиев ва Абдунабӣ Қосимов соли гузашта дар озмуни «Беҳтарин барномасоз» дар миқёси шаҳри Хуҷанду вилоят мақоми аввалро соҳиб гардиданд.

Вазир ҳамчунин ба тадбиқи раванди таҳсилоти фосилавӣ баҳои баланд дода, пешниҳод намуд, ки минбаъд низ бо баргузори семинару конфронс бо иштироки устодони мактабҳои олии кишвар ин таҷрибаи андӯхтаро паҳн намоянд. Директори донишкада номзади илмҳои техникӣ Саидӣ Дилафрӯз Раббизода қайд намуд, ки соли шашум аст, ки ин раванди таълим дар донишкада ҷараён дошта, аввалин хатмкунадагон бо дониши баланд пайи кору истеҳсолот ҳастанд. Иттилоъ дода шуд, ки устодон бо вебинарҳо ба шогирдон дарс гузашта, бо мақсади санҷиши воқеии дониши шогирдон соле як маротиба донишҷӯ даъват карда мешавад.

Ба Вазири маориф ва илми кишвар намунаи корҳои эҷодиву истеҳсолии кафедраи химия ва агротехнология низ хеле писанд омад. Шогирдони ин кафедра дар баробари такмили дониши назариявӣ, ҳамчунин бо истифода аз лабораторияҳои муҷаҳҳаз, ки соли равон боз аз ҳисоби маблағҳои грантӣ такмил ёфтанд, таҷрибаашонро ғанӣ мегардонанд.

Сифати дӯхти либосҳои мактабӣ, ки дар назди парки технологии донишкада ба роҳ монда шудааст, писанди вазир гардида, номбурда барои боз ҳам васеътар гардидани доманаи фаъолият ва кушодани сехҳои дӯзандагӣ дар минтақа ҷануби кишвар ба роҳбарияти донишкада супориш дод.

Боздид аз лабораторияҳои таъмини барқ ва автоматика, самаранок истифода бурдани лабораторияҳо, ҷустани роҳҳои ҳамкорӣ бо коргоҳҳо ва ҷорӣ кардани истеҳсоллти барқи алтернативӣ аз масъалаҳое буданд, ки дар вохӯрӣ бо донишҷӯёни ин ихтисос зимни вохӯрӣ вазир таъкид дошт. Дар ин замина Саид Нуриддин ба роҳбарияти донишкада супориш дод, ки дастоварди донишкада бояд берун аз кишвар низ муаррифии шоиста шавад, то теъдоди донишҷӯёни хориҷӣ низ сол аз сол зиёдтар шавад.

Саид Нуриддин ҳамчунин аз майдончаи футбол дидан намуда, барои баргузории мусобиқаи футбол байни муассисаҳо  тавсияҳо дод.

Дар стансияи  таъмири автомашинаҳо бештари донишҷӯёни дар риштаи роҳу нақлиёт таҳсилдошта машғулиятҳои амалӣ мегузаронанд. Ҳамчунин ба масъулин вазири маориф ва илми кишвар дастур дод, ки чунин марази ташхисию таъмирӣ дар маркази шаҳр таъсис дода шавад.

Вазири маориф аз рафти омодагӣ ба зимистон, ҳолати воқеии дегҳои гармкунӣ, захираи ангишт дидан намуда, барои боз ҳам хубтар омодагӣ ба мавсими тирамоҳу зимистон дастурҳо дод.

Дар фарҷоми мулоқот Саид Нуриддин Саид аз устодони донишкада даъват ба амал овард, ки собитқадамона меҳнат намуда, ҷашни 30- солагии Истиқлолияти давлатиро бо дастовардҳои азими меҳнатӣ истиқбол намоянд. 

 

 

Санаи 11 октябр донишҷӯёни курси 1-уми факултети муҳандисӣ-иқтисодӣ Иди донишҷӯёнро дар толори   Донишкадаи политехникии Донишгоҳи техникии Тоҷикистон ба номи академик М.Осимӣ ҷашн гирифтанд.

Иштирокчиёни Иди донишҷӯён,  ки ҳамагон  донишҷӯёни курси якум мебошанд, бо истеъдоди беҳамто ва  маҳорати баланд ҳунарнамоӣ намуданд.

Сароғоз муовини директор оид ба таълим Мақсудов Х.Т донишҷӯёнро бо мушарраф гардидан ба номи баланди донишҷӯи Донишкадаи политехникии Донишгоҳи техникии Тоҷикистон ба номи академик М.Осимӣ табрик намуданд. Зимни суханронии хеш қайд намуданд, ки  донишҷӯён бояд бо баҳои хубу аъло таҳсил намуда, номбардори аллома Муҳаммад Осимӣ гарданд.  

Баъдан сухани табрикотӣ ба декани факултети муҳандисӣ – иқтисодӣ Ваҳҳобов А.  дода шуд. Декани факултет низ барои донишҷӯён барои таҳсил барору комёбӣ таманно намуда,  зикр намуданд, ки вақти худро самаранок истифода бурда, ҳар лаҳзаи донишҷӯиро бобарор истифода намоянд.

Донишҷӯёни курси 1-ум  қасами донишҷӯӣ ёд намуда, ваъда доданд, ки дар донишкада бо баҳои хубу аъло таҳсил намуда, ояндасози миллат мегарданд. 

Аз ҷониби донишҷӯён шеърҳо дар васфи модар ва Тоҷикистон ифоданок қироат карда шуд. Ҳунарнамоии дастаи маҳфили ҳозирҷавобони факултет, ки ҳама  донишҷӯёни курси якум ҳастанд, табъи ҳамагонро боз ҳам болидаву шод намуд. Рақсҳои мавзун ва бозиҳои шавқовар чорабиниро рангинтар намуд.

  Чорабинии идона  бо рақсу суруди донишҷӯён ҳусни анҷом ёфт. Ин рӯзи бошукӯҳ   дар хотири донишҷӯён абадан нақши хешро  гузошт.