Имрӯз, санаи 2-юми январи соли 2025 бо ташаббуси Кумитаи иҷроияи Ҳаракати ваҳдати миллӣ ва эҳёи Тоҷикистон дар доираи барномаи таҳлилии «Назаре ба оина»-и телевизиони вилояти Суғд омӯзиши Паёми Президенти Ҷумҳурии Тоҷикистон муҳтарам Эмомалӣ Раҳмон «Дар бораи самтҳои асосии сиёсати дохилӣ ва хориҷии ҷумҳурӣ» ба Маҷлиси Олии Ҷумҳурии Тоҷикистон баргузор гардид.

Дар барномаи мазкурдар қатори дигар фаъолони ҷомеаи шаҳрвандӣ, омӯзгорон, коршиносон, варзишгарон ва ҷавонон намояндагони Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд низ ширкат варзида, доир ба фаъолияти касбии худ дар бобати мавзӯъҳои Паёми Президенти Ҷумҳурии Тоҷикистон муҳтарам Эмомалӣ Раҳмон андешаҳо иброз намуданд.

Чуноне, ки ба ҳамагон маълум аст, аз ҷониби Асосгузори сулҳу ваҳдати миллӣ – Пешвои миллат, президенти Ҷумҳурии Тоҷикистон муҳтарам Эмомалӣ Раҳмон солҳои 2025 - 2030 солҳои рушди иқтисоди рақамӣ ва инноватсияҳо эълон гардидааст. Дар ин росто, мудири кафедраи иқтисоди рақамии Донишкада Моҳина Усмонова чунин ибрози назар намуданд: «Иқтисоди рақамӣ ва инноватсия асоси рушди устувор ва рақобатпазирии ҳар як давлат мебошанд. Муваффақияти ин ташаббус ба иштироки ҳар як шаҳрванд - аз мактаббачагону донишҷӯён то олимону соҳибкорон вобаста аст. Маҳз ҷидду ҷаҳди якҷоя ба мо ёрӣ мерасонад, ки ба мақсадҳои худ ноил гардем.»

Ҳамзамон зарурати тайёр намудани мутахассисони баландихтисос, ҷорикунии технологияҳои рақамӣ дар раванди таълим, ҷалби ҷавонон, махсусан духтарон ба омӯзиши соҳаи технологияҳои иттилоотӣ таъкид гардид.

Зикр карда шуд, ки таваҷҷуҳи махсус бояд ба эҷоди инфрасохтор ва платформаҳое, ки барои татбиқи лоиҳаҳои бузург, пешбурди стартапҳо ва таҳкими иқтидори рақамии кишвар имкон медиҳанд, зоҳир карда шавад.

Итминон дорем, ки солҳои рушди иқтисоди рақамӣ ва инноватсия давраи дигаргуниҳои ҷиддӣ хоҳад буд ва барои кишвари азиз мо дурнамои нав мекушояд.