Бо иштироки муовини аввали Вазири маориф ва илми Ҷумҳурии Тоҷикистон Ҳомид Ҳошимзода дар Донишкадаи политехникии Донишгоҳи техникии Тоҷикистон дар шаҳри Хуҷанд ба номи академик Муҳаммад Осимӣ дар шаҳри Хуҷанд маросими муаррифии директори нави донишкада баргузор гардид.

Нахуст муовини аввали Вазири маориф ва илми Ҷумҳурии Тоҷикистон Ҳомид Ҳошимзода Қарори Ҳукумати Ҷумҳурии Тоҷикистонро ироа намуд, ки тибқи он аз 3-юми ноябри соли 2025 Саъдуллозода Шаҳриёр Саъдулло ректори Муассисаи давлатии таълимии «Донишгоҳи инноватсия ва технологияҳои рақамии Тоҷикистон» таъин карда шудааст. Ҳамчунин бо розигии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва фармоиши Вазири маориф ва илми Ҷумҳурии Тоҷикистон Раҳим Саидзода аз санаи 4-уми ноябри соли 2025 Содиқзода Хурсанд Сафар директори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд таъин карда шуд.

Ҳомид Ҳошимзода дар баромади худ аз фаъолияти самаранок ва бобарори директори собиқи Донишкада Шаҳриёр Саъдуллозодаро дар фосилаи 2 сол сухан намуда, зикр дошт, ки Донишкада баҳри иҷрои дастуру ҳидоятҳои Асосгузори сулҳу ваҳдати миллӣ - Пешвои муаззами миллат - Президенти Ҷумҳурии Тоҷикистон муҳтарам Эмомалӣ Раҳмон, Қарорҳои Ҳукумати Ҷумҳурии Тоҷикистон, стратегия ва барномаҳои давлатӣ дар самти илму маориф нақши муассир дошта, дар миқёси кишвар яке аз пешрафтатарин муассисаи таҳсилоти олии касбӣ мебошад. Ин боргоҳи илму маърифат дар фаъолият махсусан дар омоданамоии кадрҳои соҳибтахасссуси соҳаҳои барномарезӣ ва низомҳои иттилоотӣ, энергетика, нақлиёт, сохтмон, меъморӣ, технологияи маҳсулоти хӯрокворӣ, иқтисодиёт ва молия саҳми муносиб гузоштааст. Давоми 2 соли охир дар самти иҷрои нақшаи қабули донишҷӯён, таҳкими пойгоҳи илмию технологии донишкада, афзун намудани сафи олимон, ҳамкории судманд бо донишгоҳҳои дохилӣ, минтақавӣ ва байналмилалӣ, таҳияи лоиҳаҳои гуногуни илмӣ, ихтироот, дастовардҳои илмӣ, таъсиси марказу факултетҳои нав, ғолибият дар озмунҳои ҷумҳуриявӣ ва байналмилаӣ ва ғайра ба як қатор комёбиҳои беназир муваффақ шуд, ки аз саҳми шоиста ва муттаҳидии ҷомеаи меҳнатӣ шаҳодат медиҳад.

Саъдуллозода Шаҳриёр Саъдулло зимни суханронӣ барои эътимоду боварии Пешвои муаззами миллат муҳтарам Эмомалӣ Раҳмон ва роҳбарияти Вазорати маориф ва илми Ҷумҳурии Тоҷикистон изҳори сипос намуда, қайд кард, ки давоми 2 соли фаъолият дар ҳамбастагии ҷомеи меҳнатӣ ба як қатор муваффақиятҳо соҳиб шудем, ки дар он саҳми ҳар як устоди донишкада назаррас аст. Минбаъд низ дар такя бо ҷомеаи аҳлу тифоқи Донишгоҳи инноватсия ва технологияҳои рақамии Тоҷикистон барои пешрафти сатҳи таълиму тарбия аз тамоми нерӯву имкониятҳо истифода хоҳад кард.

Содиқзода Хурсанд Сафар низ барои дастгириҳои ҳамешагии Роҳбари давлат, Ҳукумати Ҷумҳурии Тоҷикистон, Вазорати маориф ва илми Ҷумҳурии Тоҷикистон, Донишгоҳи техникии Тоҷикистон ва аҳли коллективи донишкада миннатдорӣ баён намуда, ба ҳайати нави роҳбарияти донишкада барору комёбиҳо таманно намуд.

Бояд қайд намуд, ки Содиқзода Хурсанд аз соли 2020 имрӯз дар маснади муовини якуми директори Агентии назорат дар соҳаи маориф ва илми назди Президенти Ҷумҳурии Тоҷикистон фаъолияти пурсамар дошт.

Муовини дирекор оид ба корҳои таълими донишкада Мазбут Холиқзода аз номи ҷомеаи меҳнатии Донишкадаи политехникии Донишгоҳи техникии Тоҷикистон дар шаҳри Хуҷанд ба номи академик Муҳаммад Осимӣ дар шаҳри Хуҷанд баромад намуда, доир ба фаъолияти назарраси Шаҳриёр Саъдуллозода маълумот дод. Ҳамчунин ба Хурсанд Содиқзода барои фаъолияти минбаъдааш комёбиҳо таманно намуд.

Шуъбаи иттилоот ва кор бо ВАО