МАЪРАКАИ НИҲОЛШИНОНӢ ВА ҲАШАРҲОИ ДАСТҶАМЪОНА ДАР ДОНИШКАДА
Субҳи дирӯз бо иштироки роҳбарияти донишкада ва устодону донишҷӯён дар факултети технологияҳои рақамӣ бо мақсади истиқболи сазовори ҷашни Наврўзи байналмилал ва ҷиҳати тақвияти корҳои кабудизоркунию хуррамгардонӣ маъракаи ниҳолшинонӣ ва ҳашарҳои дастҷамъонаи ободонӣ сурат гирифт.
Дар ин рӯз дар майдон ва ҳудуди факултети технологияҳои рақамӣ ниҳолҳои ҳамешасабз ва гулҳои ороишӣ шинонида шуданд. Ҷӯйборҳо тоза карда шуда, хазон ва партовҳо аз майдон бароварда шуданд.
Аз ҷониби роҳбарияти донишкада масъулин вазифадор гардиданд, ки корҳои ободонию ниҳолшинониро тақвият бахшида, парваришу нигоҳубини минбаъдаи ниҳолҳои шинонидашуда зери назорати доимӣ қарор диҳанд.
Таъкид шуд, ки ин иқдом бо ҳисси баланди зебоипарастӣ ва баланд бардоштани маърифати экологӣ сурат гирифта, минбаъд дигар биноҳои таълимии донишкада низ хурраму муаттар гардонида мешаванд. Зеро ҳамагон медонанд, ки анҷом додани корҳои ободонӣ ба манфиати умум буда, зиндагии эшонро рангину шоиста мегардонад.
Чунин ҳашарҳои дастҷамъона дар тамоми биноҳои донишкада сурат гирифт.
Шуъбаи иттилоот ва кор бо ВАО
