Дар Донишкадаи политехникии Донишгоҳи техникии Тоҷикистон ба номи академик М.С. Осимӣ дар шаҳри Хуҷанд мулоқоти онлайнӣ бо намояндаи Донишгоҳи миллии Ҷеҷу (Jeju National University) ҷумҳурии Кореяи Ҷанубӣ Шаҳзод Толиббоев баргузор гардид.

Бояд қайд намуд, ки Шаҳзод Толиббоев хатмкардаи Донишгоҳи техникии Тоҷикистон ба номи академик М.С. Осимӣ дар шаҳри Хуҷанд мебошад ва айни замон дар яке аз донишгоҳҳои бонуфузи Корея фаъолият менамояд.

Дар чорабинӣ устодон ва донишҷӯёни кафедраи меъморӣ ва сохтмони донишкада фаъолона иштирок намуданд. Мулоқот бо ҳузури зиёди иштирокчиён нишон дод, ки ҷавонон ба рушди ояндаи касбӣ, технологияҳои муосир ва идомаи таҳсил дар хориҷи кишвар таваҷҷуҳи зиёд доранд.

Дар маърузаи худ Шаҳзод Толиббоев ба як қатор масъалаҳои муҳими ҷараёни таълиму касбомӯзӣ, аз ҷумла, шиносоӣ бо технологияҳои BIM (Building Information Modeling) — нақши он дар соҳаи сохтмон, афзалиятҳо ва зарурати омӯзиши ин равиш дар Тоҷикистон, таҷрибаи ҷаҳонии Корея дар раванди сохтмону санъати меъмор, имкониятҳои таҳсил ва рушди касбӣ дар Кореяи Ҷанубӣ, барномаҳо, стипендияҳо ва роҳҳои муваффақ шудан ва ғайраҳо маълумоти муфассал дод.

Пас аз қисмати асосӣ, мулоқот ба шакли суҳбати озод идома ёфт. Донишҷӯён дар бораи таҳсил, технологияи BIM, имкониятҳои таҷрибаомӯзӣ ва ояндаи рушди соҳаи меъморӣ ва ғайраҳо пурсиш намуда, аз Шаҳзод Толиббоев ҷавобҳои қаноатбахш гирифтанд.

Таъкид шуд, ки баргузории чунин вохӯриҳо, на танҳо сатҳи донишу ҷавҳонбинии донишҷӯёнро боло мебардоранд, балки онҳоро ба истифодаи имконияту дастовардҳои мухталифи арсаи байналмилалӣ ҳидоят менамояд.

Шуъбаи иттилоот ва кор бо ВАО