Дар доираи Нақшаи муштараки Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Вазорати мудофиа ва Вазорати маориф ва илми Ҷумҳурии Тоҷикистон, бо мақсади баланд бардоштани ҳисси ватандӯстӣ, худшиносиву худогоҳии миллӣ, ифтихор аз давлату давлатдорӣ, арҷгузорӣ ба арзишҳои миллӣ, таҳкими дӯстӣ миёни ҷавонон, шиносоӣ бо шароити хизматии сарбозону афсарон ва ҷалби ҷавонон ба хизмати Модар–Ватан, дар дидбонгоҳи сарҳадии Хистеварзи ноҳияи Бобоҷон Ғафуров Рӯзи дарҳои кушод ва шиносоии донишҷӯёни курсҳои 3 ва 4-и Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд бахшида ба 35-солагии Истиқлоли давлатӣ чорабинӣ таҳти унвони “Хизмати Модар–Ватанро аз дилу ҷон мекунем” баргузор гардид.

Дар чорабинӣ масъулини раёсати донишкада, ҳайати устодон, донишҷӯён ва роҳбарияти дидбонгоҳи сарҳадӣ иштирок ва суханронӣ намуданд.

Таъкид шуд, ки хизмат дар сафи Қувваҳои Мусаллаҳ барои ҷавонон мактаби ҷавонмардӣ маҳсуб шуда, дар руҳияи ватандӯстиву ватанпарварӣ, худшиносиву худогоҳӣ тарбия намудани хизматчиёни ҳарбӣ ва барои онҳо муҳайё намудани шароити хуби хизмат, инчунин риояи талаботи ойинномаҳои ҳарбӣ муҳимтарин самти сиёсати мудофиавии мамлакат мебошад

Баъди анҷоми мулоқот аз ҷониби аҳли фарҳанги Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд чорабинии фарҳангӣ–фароғатӣ пешкаши сарбозону афсарон ва донишҷӯён гардид.

Шуъбаи иттилоот ва кор бо ВАО