Дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд дар доираи нақша чорабинии донишкада бахшида ба 35 - солагии Истиқлолияти давлатии Ҷумҳурии Тоҷикистон, “Солҳои рушди иқтисоди рақамӣ ва инноватсия” ва ҳафтаи илм дар ҷумҳурӣ конференсияи ҷумҳуриявии илмӣ-амалӣ дар мавзӯи «МАСЪАЛАҲОИ ТАЪМИНИ СИФАТИ ТАҲСИЛОТ ДАР ШАРОИТИ РАҚАМИКУНОНӢ» баргузор гардид.

Дар кори конференсия Тоҷибой Султонзода мудири шуъбаи рушди иҷтимоӣ ва робита бо ҷомеаи дастгоҳи Раиси вилояти Суғд, Хурсанд Содиқзода, директори ДПДТТ ба номи академик М. Осимӣ дар шаҳри Хуҷанд, Шаҳриёр Саъдуллозода, ректори Донишгоҳи инноватсия ва технологияҳои рақамии Тоҷикистон, Фируз Қодиров, намояндаи Академияи миллии илмҳои Тоҷикистон, Хуршед Мақсудов, мушовири директори ДПДТТ ба номи академик М.С. Осимӣ., Маҳмадалӣ Бахтиёр Набӣ ректори Донишкадаи кӯҳи металургии Тоҷикистон., Равнақ Ҷалилов, муовини директор, сартехнологи ҶДММ ”Далерон”, Меҳрубон Мирзоева, номзади илмҳои иқтисод иштирок ва маърӯза намуданд.

Таъкид шуд, ки Ҷумҳурии Тоҷикистон, ки дар марҳалаи рушди босуръати иқтисодӣ қарор дорад, рушд ва ҷорӣ намудани технологияҳои рақамӣ метавонад омили калидии тағйирот гардад. Бо дар назардошти афзалиятҳои миллӣ ва зарурати ҳамгироӣ бо ҷаҳони муосир, омӯзиши имкониятҳо ва роҳҳои татбиқи самараноки ин равандҳо аҳаммияти махсус пайдо мекунад. Рақамикунонии таҳсилот дар Тоҷикистон на танҳо ба ҳар як шахс ё донишҷӯ имкон медиҳад, ки дар муҳити рақамӣ ва бо истифода аз технологияҳои муосир таҳсил кунад, балки барои баҳо додан ба сифати таҳсилот, баланд бардоштани сатҳи дониш, малакаву маҳорат ба ҳалли мушкилоти анъанавии соҳаи маориф низ имконият фароҳам меорад.

Стратегияи миллӣ арзёбии сифати таҳсилот то давраи 2044 бошад ба такмили раванди таълим равона шуда, ба таъмини сифати таҳсилот мусоидат мекунад ва барои иштирок дар арзёбии байналмилалии сифати таҳсилот замина мегузорад.

Зикр гардид, ки рақамикунонӣ дар таҳсилот на танҳо ба ҳифзи мероси илмӣ ва таълимӣ мусоидат мекунад, балки имкон фароҳам меорад, ки омӯзгорон ва донишҷӯён бо захираҳои таълимӣ, бо усулҳои нав ва самаранок кор кунанд. Китобхонаҳои электронӣ ҳамчун платформаҳои рақамӣ, дастрасии зуд ва осонро ба маводи таълимӣ, аз ҷумла, китобҳо, мақолаҳо, рисолаҳо ва дигар захираҳои омӯзишӣ таъмин менамоянд.

Бо истифода аз барномаҳои таълимии рақамӣ, китобҳои электронӣ, видеороликҳо, аниматсияҳо ва дигар воситаҳои визуалӣ донишҷӯён метавонанд маводи таълимиро азхуд намуда, ҳангоми таҷрибаомӯзӣ ва баъди хатми донишгоҳ дар фаъолияти касбӣ истифода баранд. Аз ин рӯ, рақамикунонии таҳсилот на танҳо як талаботи замон аст, балки имконияти бузург барои таҳсил ва таҳаввулоти иҷтимоии ҷомеа низ ба шумор меравад.

Конфронс бо мубодилаи афкор анҷом пазируфт.

Шуъбаи иттилоот ва кор бо ВАО