Бо мақсади баланд бардоштани рисолати худшиносии миллӣ байни занон, нақши онҳо дар таҳкими оила, пешгирии шиддати пошхӯрии оила, тамоюли афзоиши бегонапарастӣ дар байни бонувон, баланд бардоштани ҳисси худшиносию худогоҳӣ, ватандӯстиву ватанпарастӣ бо донишҷӯдухтарони факултети муҳандисӣ-технологии Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд мулоқот доир гардид.

Насиба Дадобоева, муовини декан оид ба корҳои тарбиявии факултети муҳандисӣ-технологии донишкада мулоқот ҳусни ифтитоҳ намуда, иброз дошт, ки сиёсати созандаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имкон додааст, ки мақому манзалати зан дар ҷомеа боз ҳам баланд бардошта шавад. Имрӯзҳо аз ҷониби Ҳукумати Ҷумҳурии Тоҷикистон, хоса аз тарафи Сарвари кишвар нисбат ба баланд бардоштани мақоми зан дар ҳама самтҳои хоҷагии халқ, як қатор барнома ва стратегияҳои давлатӣ таҳия ва тасдиқ гардиданд, ки ҷанбаҳои гуногуни фаъолияти бонувонро фаро гирифта, татбиқи амалӣ ва ҳаёту фаъолияти бонувони тоҷикро боз ҳам рангину раванди тоза мебахшанд.

Темурова Муҳаррам раиси занон ва духтарони донишкада дар баромади худ зикр намуд, ки дар Тоҷикистони соҳибистиқлол ба маърифатии занон таваҷҷуҳи зиёд зоҳир карда мешавад. Зани соҳибмаърифат метавонад ба заковату ҳушмандӣ, на танҳо мавқеи пешоҳангӣ дошта бошад, балки ҷомеаро тарбия намояд. Зан дар оила ҳамеша нақши муҳимро дошта, иффату зебоӣ, хоксориву маърифатнокӣ хусусияти хоси зан буда, ба зиндагии аҳли хонадон таровату покизагӣ мебахшад. Бо таъсири зани соҳибмаълумоту соҳибмаърифат, фарзандонашон ҳам бомаърифат ва китобхон мешаванд. Хислатҳои неки модарашонро дар худ парвариш медиҳанд ва ба модарашон пайравӣ мекунанд. Маҳз ҳамин таҷрибаҳоро ба инобат гирифта, Асосгузори сулҳу ваҳдати миллӣ - Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон дар баромадҳо ва Паёмҳои ҳарсолаашон ба масъалаи баланд бардоштани мақоми зан дар ҷомеа диққати ҳамагонро ҷалб месозанд.

Аз ҷониби омӯзгорони калони донишкада Ҳ. Раҳимова ва М. Оқилова бо мисолҳои воқеӣ оқибатҳои шомилшавии занон ба гурӯҳҳои ифротгаро, рӯ овардани занону ҷавондухтарони мо ба фарҳанг ва либоспӯшии бегона, ҷой доштани зӯроварӣ ва хушунат дар оилаҳо, маданияти рафтор дар ҷойҳои ҷамъиятӣ шарҳ дода шуд.

Дар интиҳои вохӯрӣ аз ҳамаи духтарон даъват ба амал оварда шуд, то нисбати ояндаи худ ва насли тоҷик бетараф набошанду барои соҳибилм шудан доимо кӯшиш намоянд.

Бояд зикр намуд, ки бо назардошти мақом ва рисолати ҷавондухтарон роҳбарияти донишкада пайваста ба ҷавондухтарон ғамхорӣ зоҳир намуда, барои фароҳам овардани шароити таҳсил ва зиндагии шоистаи онҳо тадбирҳои мушаххасро амалӣ месозад.

Шуъбаи кор бо ВАО