Дар маҷлисгоҳи Шӯрои иттифоқҳои касабаи вилояти Суғд бахшида ба Рӯзи Президент, солгарди навбатии Иҷлосияи 16-уми Шӯрои Олии Ҷумҳурии Тоҷикистон ва Рӯзи Парчами давлатӣ конференсияи илмию амалӣ таҳти унвони “Аз анҷумани иқбол то парчами истиқлол” баргузор гардид.

Дар конференсия Мӯсобек Самизода, раиси Иттифоқи касабаи кормандони маориф ва илми вилояти Суғд, Шарифулло Абдуллозода-раиси Шӯрои иттифоқҳои касабаи вилоят, Шавкат Шарипов - дотсенти факултети таърих ва ҳуқуқи ДДХ ба номи академик Б.Ғафуров, Рустам Юлдошев -директори осорхонаи ДДХ ба номи академик Б.Ғафуров, раисони Иттифоқи касабаи кормандони маорифи шаҳру ноҳияҳо, муассисаҳои таҳсилоти олӣ, донишҷӯён ва фаъолони соҳа иштирок намуданд.

Зикр гардид, ки пас аз пош хӯрдани иттиҳоди Шӯравӣ ва коста шудани ҳокимияти давлатӣ дар Ҷумҳурии Тоҷикистон дар як муддат ба кишвари мо вазъи нохуб ва низои дохилиро ба бор овард, ки ба қишрҳои ҷомеа хисороти зиёд расид. Дар таърихи миллати тоҷик ин фоҷиаи гарон чун саҳифаи фаромӯшнашаванда сабт шудааст, то дарси ибрати наслҳои имрӯзу оянда гардад.

Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳанӯз соли 1992 нақш ва мавқеи Иҷлосияро ба сифати рӯйдоди сарнавиштсози миллат муайян намуданд, зеро он дар кишвар гардиши куллиеро ба вуҷуд овард. Маҳз дар Иҷлосияи такдирсоз муҳтарам Эмомалӣ Раҳмон аз ҷониби намояндагони мардуми кишвар ба ҳайси Раиси Шӯрои Олии Ҷумҳурии Тоҷикистон интихоб гардида, ҳамзамон ваколати сардори давлат ба он кас дода шуд. Ба ӯҳдаи сардори давлат таъмини ҳуқуқ ва озодиҳои шаҳрвандон, Конститутсия ва қонунҳои Ҷумҳурии Тоҷикистон вогузор гардид. Сиёсати хирадмандонаи Пешвои муаззами миллат назми ҷомеаро ба вуҷуд оварда, мардумро ба ояндаи дурахшон бовар кунонид.

Пешвои тоҷикони ҷаҳон муҳтарам Эмомалӣ Раҳмон бар савганди худ содиқ монда, барои ба даст овардани сулҳи тоҷикон нахуст дасти мардонагии худро ба сӯи мухолифини ҳукумат дароз карда, сулҳи ҷовидонаи тоҷиконро ба даст оварданд.

Дар ин Конференсия аз хидматҳои Пешвои миллат баҳри ба эътидол овардани сулҳ ва шинохти кишвари ҷавони мо аз диди давлатҳои хориҷа низ ёдоварӣ карда шуд.

Дар охир аз тарафи Иттифоқи касабаи кормандони маориф ва илми вилояти Суғд ба 15 нафар донишҷӯёни муассисаҳои таҳсилоти олӣ ва миёнаи касбӣ стипендияҳои Иттифоқи касабаи маориф супорида шуд. Аз ҷумла донишҷӯи курси 2 ихтисоси таълими касбӣ (аз рӯи самтҳо)-и донишкада Фазилатхон Содиқова ва донишҷӯи курси 3 ихтисоси автоматонии ҳаракатоварҳои барқии донишкада Шодрӯз Ҳасанов ба стипендияи Иттифоқи касабаи кормандони маориф ва илми вилояти Суғд сазовор гардидаанд.

Шуъбаи иттилоот ва кор бо ВАО