25 май дар варзишгоҳи “20-солагии Истиқлолияти Тоҷикистон” дар шаҳри Хуҷанд бахшида ба Рӯзи ҷаҳонии футбол Фестивали футбол баргузор гардид, ки дар он устодону донишҷӯёни Донишкадаи политехникии Донишгоҳи техникии Тоҷикистон ба номи академик М. Осимӣ дар шаҳри Хуҷанд фаъолона иштирок намуданд.

Дар чорабинӣ Раиси вилояти Суғд Раҷаб Аҳмадзода иштирок намуда, кулли футболбозон, мураббиён, доварон ва мухлисони футболро ба муносибати Рӯзи ҷаҳонии футбол табрик гуфт. Зикр гардид, ки варзиш яке аз роҳҳои беҳтарини беҳдошти саломатӣ, тарғиби тарзи ҳаёти солим ва мустаҳкам намудани дӯстиву рафоқат байни инсонҳо буда, ҳамчун воситаи муҳими муттаҳидсозии халқу миллатҳо нақши муассир дорад.

Таъкид карда шуд, ки варзиш аз қадимулайём ҳамқадами аҷдоди номвари мо буда, намудҳои гуногуни он байни мардум маҳбубияти зиёд доштанд.

Дар даврони соҳибистиқлолӣ ин анъанаҳо бо мазмуну муҳтавои нав эҳё гардида, рушди варзиш ба яке аз самтҳои муҳими сиёсати иҷтимоии давлат табдил ёфтааст.

Раиси вилоят иброз дошт, ки дар замони Истиқлоли давлатӣ таҳти сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба соҳаи тарбияи ҷисмонӣ ва варзиш, махсусан футбол таваҷҷуҳи хоса зоҳир мегардад. Зеро футбол имрӯз ҳамчун яке аз маъмултарин ва дӯстдоштатарин намудҳои варзиш барои рушди ҷисмониву маънавии наврасону ҷавонон аҳаммияти бузург дорад.

Ҳамзамон таъкид гардид, ки соли 2024 Созмони Милали Муттаҳид бо пешниҳоди Президенти Федератсияи футболи Тоҷикистон, Раиси шаҳри Душанбе, Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ қатъномаи махсусро оид ба Рӯзи ҷаҳонии футбол қабул намуд, ки ин ташаббуси таърихӣ мақому нуфузи Тоҷикистонро дар арсаи байналмилалӣ боз ҳам баланд бардошт.

Дар фестивал дастаҳои “Хуҷанд”, “Эсхата”, “Истаравшан”, “Парвоз” ва дигар ҳайатҳои ҷавонону наврасон барномаи омоданамудаи худро манзури ҳозирин гардониданд.

Раиси вилояти Суғд Раҷаб Аҳмадзода ба ҳамаи футболбозон, мураббиён, доварон ва дӯстдорони футбол саломатии бардавом, рӯҳияи баланд ва дастоварду пирӯзиҳои нав ба нав орзу карда, ба ғолибони мусобиқаҳо туҳфаву ҷоизаҳо ва ба беш аз 500 нафар наврасону иштирокчиёни фестивал тӯб тӯҳфа намуд.

Шуъбаи иттилоот ва кор бо ВАО