Мо-устодони Донишкадаи политехникии Донишгоҳи техникии Тоҷикистон дар шаҳри Хуҷанд, ки дар фазои сулҳу оромӣ бо истифода аз шароитҳои мусоиди таълимӣ ба шогирдон дарс мегӯем, аз он изҳори ташвиш дорем, ки ҳоло низ дар ҷомеа мисли ҳизби террористиву экстремистии ҲНИТ ва гуруҳҳое ба ном «Озодандешон» мавҷуданд, ки мехоҳанд ба оромӣ ва пешрафти кишварамон халал ворид созанд. Он навиштаҳои бӯҳтонангез ва изҳороти бе сару нӯги дастандаркорони гурӯҳи «Анҷумани озодандешон» бо истифода аз минбарҳои моҷароҷӯй имрӯз наметавонад иродаи халқи ваҳдатшиори кишварамонро шиканад. 

«Муҳтарам Муҳиддин Кабирӣ», ин гурӯҳ «фидоиёни» ҳизби шумоянд ва воқеан ҳам  агар Шумо лидери як ҳизби «пурқувват» мебудеду дар ҷомеа, хоссатан миёни ҳамкешони худ мақом ва мартаба медоштед, имрӯз паноҳандагиро дар кишварҳои Аврупо намегирифтед ва чунин изҳоротҳои нобарҷоро паҳн наменамудед, балки бегуноҳии худро дар Ватан исбот менамудед. Он далелу рақамҳои малулхотир, ки солҳои охир нисбати ҳизби шумо ошкор шуд, пештар ҳам давлат ва ҳукумат медонист. Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба хотири сулҳи бебозгашт ва таъмини амнияти миллӣ борҳо аз гуноҳҳои ба қавле «кабираи» Шумо ва пайравонатон баромада буданд. Вале душманӣ, ки дар дилу тинататон ҷой буд, боз амалҳои ноҷавонмардонаи солҳои навдумро такрор кардан хостед.

Мо қатъиян аз Шумо ва ҳаммаслаконатон талаб дорем, ки таҳрибкориро бас кунед, обрӯи миллати тоҷдори моро дар арсаи ҷаҳонӣ нарезонед. Ба навиштаҳои муғризонаи худ хотима бахшед. Баръакс, нафарони ҳамсафу кӯрдили худро ҳушдор диҳед, ки халқи шарифи кишвар дигар гумроҳиро ба гӯшаи фаромӯшӣ бурдаанд. Мо якдил ва яктанем ва барои ободиву тинҷии мамлакатамон тифоқона кор мебарем. Ягон душман ҳақ надорад, ки бо қиммати ҷони ҳазорон-ҳазор ҷавонон, оҳу зори модарони дилфигор ва заҳматҳои шабонарӯзи Сарвари давлат  сулҳи ба дастовардаро ба норомӣ бадал кунад. 

Раҳмонов А, Акбаров А, Ғуломнабиев С, Раҷабов Ғ, Темирова Ҳ, Аминов Ф, Темирова М, Бобоҷонова Н, Холиқов М, Файзиева Ш, Абдуваҳобов А, Масаидов Ҷ, Раҳматова М, Ҷалилов Ф, Солиев З, Холматов Т, Тошхӯҷаев Н, Акрамова З, Исомаддинова Р , Бобоева Т, Хоҷаева Н, Довудов З, Ғозиева М      

Created: 16 March 2018

Hits: 2776

Терроризми     ва  экстремизми   байналмилалӣ   дар  ҷаҳони  муосир  аз  масъалаҳои  доғи  рӯз  ва  нигаронкунанда  ба  ҳисоб  меравад. Ин  хатари  даҳшатовару  марговар  мардуми  сулҳхоҳи  дунёро  ба  ташвиш  овардааст. Мо  бояд  дарк  кунем, ки  авзои  сиёсии  олам  дар  ибтидои  асри  21  ба  куллӣ   тағйир  ёфт. Экстремизми  динӣ   ва  терроризми  байналмилалӣ    аз  доираи  давлатҳои  алоҳида  баромада  ба  падидаи  ҳалоктовари  аҳли башар  табдил  ёфтааст.  Ҷумҳурии  мо  бошад  вобаста  ба  мавқеи  геполитикии  худ  фоҷеаи  экстремизми  динӣ   ва терроризимро  аз  сар  гузаронид. Солҳои  90-уми  асри  гузашта  ҳаракати  фундаментализми  исломӣ   қисмати  ҷанубии  Тоҷикистонро  пурра  фаро  гирифта  боиси  марги  ҳазорон  нафар  мардум  гардид. Беҳтарин   фарзандони   сарсупурдаи  миллат  ва  даҳҳо  дигар  симоҳои  варзида  қурбони  террор  гаштанд.

Ҳизбҳои  сиёсии  он  давр  зери  ниқоби  муборизаи  сиёсӣ   даст  ба  экстремизм  заданд.

Created: 09 March 2018

Hits: 2978

Соли дуюм аст, ки бо ибтикори Донишкадаи политехникии Донишгоҳи техникии Тоҷикистон дар шаҳри Хуҷанд конференсияи илмӣ- амалӣ дар мавзӯи «Таҳсилоти фосилавӣ» доир мегардад.

Конференсия бо сухани муқаддимавии директори донишкада, номзади илмҳои техникӣ Саидӣ Дилафрӯз Раббизода оғоз ёфт. Номбурда дар баромадаш зикр сохт, ки мақсади асосии ташкил намудани тарзи фосилавии раванди таълим дар донишкада таъмини имконияти азхудкунии барномаи таълимӣ бевосита аз мавқеи ҷойгиршавии донишҷӯ ё вақти ҳозиршавии муваққатӣ, инкишоф ва татбиқи фазои ягонаи иттилоотии таълим, васеъ намудани доираи хизматрасонии таълимӣ, баланд бардоштани сифати таълим ва ҷолибияти таҳсил дар донишкада мебошад. Сарвари давлат ҷорӣ гардидани системаи таҳсилоти фосилавиро  дар шароити пешрафти иқтисодиву истеҳсолӣ амри зарурӣ шуморида, ба роҳбарони мактабҳои олӣ дастур дода буданд, ки ҳар чи тезтар ба ин усули таълимӣ гузаранд. Дар донишкада 5 сол инҷониб системаи таҳсилоти фосилавӣ фаъолият мебарад. Аллакай аввалин хатмкардаҳои он дар соҳаҳои гуногуни хоҷагии халқ фаъолияти шоиста доранд. Таъсиси сомонаи махсус (www.fosilavi.tj), ки аз ҷониби кормандони донишкада – хатмкунандагони ихтисосҳои компютерии донишкада сохта шудааст, дар соли 2017 боз беҳтар гардид. Дар сомона модулҳои нав сохта шуданд, ки гузаронидани вебинарҳоро осон карда, механизми назорати давомоти донишҷӯён дар дарсҳои виртуалӣ ва бартарафкунии бархатии қарзҳои академӣ амалӣ мегардад.

Хуршед Мақсудов, муовини директор оид ба таълими донишкада, номзади илмҳои физика ва математика  дар мавзуи “Таҳсилоти фосилавӣ ва масъалаҳои амалигардонии он” баромад намуда, таъкид дошт, ки имрӯзҳо низоми таҳсилоти фосилавӣ дар дунё хеле маъмул гаштааст. Зеро ин намуди таҳсилот барои шахсоне, ки ҷои кории худро тарк карда наметавонанд, бо доштани мушкилиҳои ҳаррӯзаи зиндагӣ имконияти таҳсили шакли рӯзона надоранд, шароит медиҳад, ки соҳиби маълумоти олии касбӣ гарданд. Бартарии дигари таҳсилоти фосилавӣ дар он аст, ки вақт самаранок истифода шуда, камшавии хароҷот аз ҳисоби маблағи хониш ва воситаи нақлиёт дида мешавад. Дар навбати худ  камбудии асосии ин навъи таълим он аст, ки набудан ё камии мотиватсияи беруна ва норасоии назорат дар муқоиса бо таҳсили рӯзона аст .

“Таҳлили хусусиятҳои тадбиқи низоми таҳсилоти фосилавӣ дар ДПДТТ ба номи академик М.Осимӣ дар шаҳри Хуҷанд” чунин унвон дошт баромади Раъно Исомаддинова, сардори маркази таҳсилоти фосилавӣ, номзади илмҳои физика ва математика. Номбурда зимни маърӯза  баён дошт, ки бо воситаи сомонаи махсус барномаи кории фан (силлабус), қисми назариявӣ, қисми амалӣ: намунаи иҷрошудаи санҷишҳои ҷорӣ, маводи имтиҳонӣ, санҷишҳои марҳилавӣ, наворҳои дарсӣ, презентатсияи овознокшуда, супоришҳо ба донишҷӯён фиристода мешавад. Омӯзиши синхронӣ ва асинхронӣ, вебинар барои донишҷӯ имконият фароҳам меорад, ки дар вақти ба худаш мувофиқ ба саҳифаи интернетии худ даромада, аз машғулиятҳо огоҳ бошад. Пешрафт, давомот ва макони донишҷӯ пайваста дар мадди назари масъулин қарор мегирад. Дар сурати камфаъолиятӣ оиди иштирок дар сесияи таълимӣ, гузариш аз саныиши дониши бархаттӣ, супоридани қарзи академӣ ба онҳо мактуб-огоҳнома фиристода мешавад.

Назирҷон Муллоҷонов, мутахассис-барномасози маркази таҳсилоти фосилавии ДПДТ оиди  коркарди низоми иттилоотии таҳсилоти фосилавӣ гузориш дода, баён дошт, ки барои саривақт дастрас намудани супоришҳо нақши вебинар ва технологияи интиқоли маълумотҳои аудиоӣ ва  видеоӣ хеле калон аст.  Номбурда дар асоси таҷрибаи андӯхтааш дар ин самт бо мисолҳои возеҳ ба ҳозирин афзалиятҳои вебинарро фаҳмонд.

Дар идомаи конференсия мутахассиси маркази таҳсилоти фосилавии Донишгоҳи давлатии шаҳри Кӯлоб Уроқов Мирзомурод дар мавзӯи  “Низоми таҳсилоти фосилавӣ дар донишгоҳ”, Парвиз Солиев, сардори маркази технологияҳои компютерӣ ва таъмини фаъолияти системаи иттилоотии ДПДТТ дар мавзӯи  “Системаи идоракунии захираҳои таълимӣ дар формати SCORM“, Заррина Акрамова, сардори шуъбаи илм ва инноватсия, оиди  мавзӯи “Самаранокии дарсҳои  онлайн дар таҳсилоти фосилавӣ“, Маҳина Усмонов, устоди кафедраи “Барномарезӣ ва низомҳои иттилоотӣ”  дар мавзӯи  “Программные средства внекальной работы со студентами” ва Абдуллаев А.- сармутахассиси шуъбаи таълими фосилавии ДДХ ба номи академик Б. Ғафуров дар мавзӯи  “Ташаккули низоми таҳсилоти фосилавӣ дар ДДХ ба номи Б. Ғафуров: вазъи кунунӣ ва дурнамо” гузоришҳои ҷолиб намуданд.

 Дар баромадҳо таъкид шуд, ки бояд моҳият ва аҳамияти ин навъи таълим ҳар чи бештару тезтар то ба довталаб расонида шавад, то ӯ имкон пайдо кунад, ки ҳам таҳсил намояду ҳам зиндагиашро пеш барад. Зеро Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ин маврид қайд кардаанд, ки “... Ин тарзи таҳсил имкон медиҳад, ки бо нигоҳ доштани сифати таълим хароҷоти зиёдатӣ барои як донишҷӯ то 2-3 баробар кам карда шавад ва шахс аз истеҳсолот ҷудо нагардида, аз тариқи интернет соҳиби дониш ва ихтисоси зарурӣ гардад”.

Конференсияи мазкур роҳи наверо дар самти вусъат бахшидани тарзи таҳсилоти фосилавӣ кушод. 

Created: 15 March 2018

Hits: 3379

Ташаккули хатарҳои ҷиддӣ мисли терроризм ва экстремизм  ба маъмулии ин мафҳумҳо диққати хосаи ҷомеаро асос гузоштааст. Агар қаблан унсури ғасби ҳокимият тавассути силоҳ ва тиру туфанг буд, имрӯз баробари дигаргуншавии ҷаҳонӣ ин омил таъғири шакл намудааст. Расидан ба аҳдофи муғризона бо истифода аз мафкураи имрӯз осонтарин ва дастрастарин ҷодаи мубориза гардидааст.

Created: 09 March 2018

Hits: 3079

Бахши кор бо ҷавонон ва варзиши шаҳри Хуҷанд тибқи    нақшаи муштарак бо шуъбаи кор бо занон ва оилаи мақомоти иҷроияи ҳокимияти давлати шаҳри Хуҷанд бо мақсади баланд бардоштани малакаи варзишии донишҷӯдухтарон, ҷалби онҳо ба варзиш ва тарзи ҳаёти солим ва  дар ин замина пешгирии ҳаргуна ҳодисаҳои номатлуб Спартикиадаи байни донишҷӯдухтарони донишгоҳҳои олӣ ва коллеҷҳои шаҳри Хуҷандро баргузор намуд. Ин чорабинӣ  бахшида ба Рӯзи модар ва эълон гардидани  соли 2018 чун Соли рушди сайёҳӣ ва ҳунарҳои мардумӣ доир гардида, он дар толорҳои варзишии коллеҷи омӯзгорӣ, тиббӣ ва маҷмаи варзишии 20-солагии Истиқлолият аз рӯи панҷ намуди варзиш- волейбол, шашка, шоҳмот, тенниси рӯи миз, варзиши сабук мусобиқа баргузор шуданд.

Дирӯз дар толори варзишии факултети муҳандисӣ- иқтисодии  донишкадаамон маросими ҷамъбасти ин мусобиқаи бонуфуз доир шуд. Дар расми ифтитоҳи ҷоизасупорӣ мудири бахши ҷавонон ва варзиши шаҳри Хуҷанд Баҳтиёр Исматҷонов ва мудири шӯъбаи кор бо занон ва оилаи  мақомоти иҷроияи ҳокимияти давлати шаҳри Хуҷанд Муяссара Сангинова ба ғолибон ва ҷоизадорон ифтихорнома медал ва ба дастаҳои ғолиб ҷом ва сипосномаҳо супориданд. Дастаи донишҷӯдухтарони Донишкадаи политехникии Донишгоҳи техникии Тоҷикистон дар ҷамъбаст  сазовори ҷойи дуюм гардиданд. Онҳо бо Сипоснома ва тӯҳфаҳои хотиравӣ сарфароз гардиданд. Махсусан ҳунару малакаи  донишҷӯдухтари бахши дуюми ихтисоси2-50.01.02.та Отаназарова Мафтуна (ғолиби мусобиқа дар намуди шашка ва тенниси рӯи миз) Дадобоева Машҳура (ғолиби мусобиқа дар намуди шоҳмот) арзандаи ситоиш аст.

Ҳамаи иштирокчиёни мусобиқа барои дастгирӣ ба раёсати донишкада, шахсан ба директор Саидӣ Дилафрӯз Раббизода изҳори миннатдорӣ менамоянд.

Created: 12 March 2018

Hits: 2488

Бо мақсади густариши робитаҳои корхонаву ташкилотҳо бо иқдоми Раёсати Донишкадаи политехникии Донишгоҳи техникии Тоҷиикистон дар факултети муҳандисӣ- технологӣ мулоқоти судманд доир гардид. Дар чорабинӣ намояндагони наздики 20 ташкилоту корхонаҳо ширкат варзиданд.

Директори донишкада, номзади илмҳои техникӣ Саидӣ Дилафрӯз Раббизода зимни ифтитоҳи чорабинӣ таъкид дошт, ки донишкада ба хотири ҳар чи бештар фарогир шудани хатмкунандагон бо ҷойи кори мувофиқ чор сол пеш дар назди донишкада Маркази мартабаро таъсис дод. Бо таъсиси ин марказ робитаи корхонаҳою ташкилотҳо бо донишкада густариш ёфта, дар ярмаркаи «Интихоби мутахассисони арзанда», ки ду сол ин ҷониб баргузор мегардад, наздики 60 корхонаву ташкилотҳо иштирок намуда, зимни мулоқотҳо мутахассисонро ба кор ҷалб месозанд. Ин тадбир имкон дод, ки беҳтаринҳо соҳиби ҷойи кори мувофиқ гарданд.

 Вохӯрии имрӯза низ аз ҳамин иқдом сарчашма гирифта, қадаме бар пеш барои рушди ҳамкорӣ хоҳад буд. Зеро то ҷое иттилоъ дорам, имрӯз теъдоди корхонаҳои истеҳсолии хурду миёна зиёд гардида, ба он мутахассисони касбӣ лозиманд. Зарур аст, ки дар ҳамкорӣ дар назди коргоҳҳо кафедраҳо таъсис диҳем, то таҷрибаомӯзон бевосита аз ҷараёни истеҳсолӣ ошноии наздик пайдо намоянд. Донишкада имкон дорад, кормандонеро, ки бевосита ба таҷрибаомӯзон роҳнамоӣ мекунад, тариқи шартнома маблағгузорӣ намояд. Ҳамкории муштарак имкон медиҳад, ки мо дар назди коргоҳҳо бо ҷалби мутахассисони ҷавон сехҳои хурди истеҳсолӣ таъсис намоем. Чун аксар соҳиби хоҷагиҳои деҳқонӣ ҳастем, ба мутахассисони касбии соҳавӣ низ эҳтиёҷи бештар дорем.

 Мо минбаъд имкон дорем, ки вобаста ба талаботи бозори меҳнат мутахассисонро омода созем.  Барои донишандӯзӣ ва тақвияти маҳорату малакаи донишҷӯён дар донишкада шароит фароҳам буда, танҳо дар як соли охир  донишкада фаъолияти худро нисбати 2 гранти аврупоӣ аз рӯйи лоиҳаи “Таҳсилоти олӣ барои низоми озуқаворӣ ва стандартҳо дар Осиёи Марказӣ” – и барномаи Эрасмус+ - и Иттиҳоди Аврупо ва лоиҳаи барномаи “Таҳсилоти касбӣ дар Осиёи Марказӣ-III” (GIZ - Ҷамъияти Олмон оид ба ҳамкориҳои байналмилалӣ) бевосита оғоз карда, дар давоми як сол аллакай дар такмили ихтисоси кормандону омӯзгорон ва таҷҳизонии озмоишгоҳҳо ба дастовардҳои назаррас соҳиб шуд. Танҳо дар як соли охир аз ҳисоби лоиҳаҳо ба маблағи 1 миллиону 833 ҳазору 200 сомонӣ таҷҳизотҳо ворид карда шуданд.

Чанде аз роҳбарону ташкилотҳо барои тақвияти ҳамкорӣ таклифҳои судманд дода, аз ҷумла пешниҳод намуданд, ки минбаъд моҳе як маротиба ҷамъ шуда, нақшаҳои минбаъдаро тарҳ резӣ намоем.

Меҳмонон аз лабораториҳои муосири ташхиси маводҳои хӯрока, микробиология ва биохимия, технологияҳои коркард ва истеҳсоли маводҳои хӯрокаи донишкада дидан намуда, ба шароиту имконоти муассиса баҳои баланд доданд.

Created: 06 March 2018

Hits: 2868

Бахши кор бо ҷавонон ва варзиши шаҳри Хуҷанд тибқи    нақшаи муштарак бо шуъбаи кор бо занон ва оилаи мақомоти иҷроияи ҳокимияти давлати шаҳри Хуҷанд бо мақсади баланд бардоштани малакаи варзишии донишҷӯдухтарон, ҷалби онҳо ба варзиш ва тарзи ҳаёти солим ва  дар ин замина пешгирии ҳаргуна ҳодисаҳои номатлуб Спартикиадаи байни донишҷӯдухтарони донишгоҳҳои олӣ ва коллеҷҳои шаҳри Хуҷандро баргузор намуд. Ин чорабинӣ  бахшида ба Рӯзи модар ва эълон гардидани  соли 2018 чун Соли рушди сайёҳӣ ва ҳунарҳои мардумӣ доир гардида, он дар толорҳои варзишии коллеҷи омӯзгорӣ, тиббӣ ва маҷмаи варзишии 20-солагии Истиқлолият аз рӯи панҷ намуди варзиш- волейбол, шашка, шоҳмот, тенниси рӯи миз, варзиши сабук мусобиқа баргузор шуданд.

Дирӯз дар толори варзишии факултети муҳандисӣ- иқтисодии  донишкадаамон маросими ҷамъбасти ин мусобиқаи бонуфуз доир шуд. Дар расми ифтитоҳи ҷоизасупорӣ мудири бахши ҷавонон ва варзиши шаҳри Хуҷанд Баҳтиёр Исматҷонов ва мудири шӯъбаи кор бо занон ва оилаи  мақомоти иҷроияи ҳокимияти давлати шаҳри Хуҷанд Муяссара Сангинова ба ғолибон ва ҷоизадорон ифтихорнома медал ва ба дастаҳои ғолиб ҷом ва сипосномаҳо супориданд. Дастаи донишҷӯдухтарони Донишкадаи политехникии Донишгоҳи техникии Тоҷикистон дар ҷамъбаст  сазовори ҷойи дуюм гардиданд. Онҳо бо Сипоснома ва тӯҳфаҳои хотиравӣ сарфароз гардиданд. Махсусан ҳунару малакаи  донишҷӯдухтари бахши дуюми ихтисоси2-50.01.02.та Отаназарова Мафтуна (ғолиби мусобиқа дар намуди шашка ва тенниси рӯи миз) Дадобоева Машҳура (ғолиби мусобиқа дар намуди шоҳмот) арзандаи ситоиш аст.

Ҳамаи иштирокчиёни мусобиқа барои дастгирӣ ба раёсати донишкада, шахсан ба директор Саидӣ Дилафрӯз Раббизода изҳори миннатдорӣ менамоянд.

Created: 12 March 2018

Hits: 2777

Асосгузори сулҳу Ваҳдати миллӣ, Пешвои миллат, Президенти ҶТ муҳтарам Эмомалӣ Раҳмон дар ҳар Паёми хеш худ доир ба зуҳуроти ниҳоят хатарноки асри нав – терроризм ва экстремизм, ки дар шароити торафт мураккаб гардидани вазъи ҷаҳони муосир густариш пайдо карда истодааст, таваҷҷӯҳи алоҳида зоҳир менамоянд. Пешвои миллат қайд менамоянд, ки дар самти мубориза бар зидди терроризм, ифротгароӣ, муомилоти ғайриқонунии воситаҳои нашъадор, таъмини амнияти давлат ва ҷомеа, боэътимоди сарҳади давлатӣ инчун омодабошии ҷанги Қувваҳои мусаллаҳ тадбирҳои иловагӣ бояд андешида шаванд.  Терроризм ва экстремизм чун вабои аср хатари глобалии ҷиддӣ дошта, террорист ватан, миллат  ва дину мазҳаб надорад, балки як таҳдиде ба ҷомеаи ҷаҳонӣ ва ҷони ҳар як сокини сайёра ба ҳисоб меравад.

Дар мақолаи зерин хусусиятҳои истифодабарии сомонаҳои иҷтимоӣ аз ҷониби гурӯҳҳои террористӣ тасвир ёфта, дар асоси омӯзиши қонунҳо ва амалияи татбиқи онҳо таҳлилҳо гузаронида шудаанд. Дар асоси таҳқиқоте, ки мутахассисон анҷом медиҳанд, хусусияти самараноки тадбирҳое, ки дар соҳаи мубориза бар зидди терроризм дар шабакаҳои иҷтимоӣ дохил шудаанд, дода мешаванд.

 Дар даҳсолаҳои охир, терроризм ва экстремизм ҳамчун вабои аср  ба амнияти ҷаҳон ва ҳар як сокини сайёра таҳдид карда, барои башарият хатари накамтар аз силоҳи ядроиро ба миён овардааст. Ба даст овардани ин мақом, ин  таъсири як ҷаҳиши сифатӣ дар рушди шабакаҳои коммуникатсионӣ (ба монанди Одноклассники, FaceBook, Twitter…)мебошад.

Гурӯҳҳои ифротгароӣ аз ҳаводиси охирон таҳаввулотҳо дар соҳаи иртиботи оммавӣ аз воситаҳои ҷустуҷӯи ахборот, ҳамкорӣ, захираҳои нигоҳдорӣ истифода бурда, ба содир намудани ҳамлаҳо ба захираҳои расмии давлатҳову созмонҳо ҳаракат менамоянд. Аз ҷониби чунин гурӯҳҳо бо мақсадҳои ғаразноки худ васеъ истифода бурдани шабакаҳои иҷтимоӣ, ба як мавзӯи гузориши махсусе, ки соли 2002 аз ҷониби Раёсати СММ оид ба маводи муходир ва ҷиноякорӣ бахшида шуда буд, табдил ёфт.

Аҳамияти сомонаҳои иҷтимоӣ аз ҷиҳати мубориза бо терроризм ва экстремизм борҳо ба мавзӯъҳои тадқиқотӣ ҳам дар давлатҳои хориҷӣ ва ватанӣ табдил ёфтааст. Вале дар ин бора, дар таҳқиқи ҷиддии чунин соҳаи босуръат инкишофёфта сӯҳбат кардан душвор мебошад. Пеш аз ҳама, ин ҳукм метавонад ба масъалаҳое, ки бо назаррас ба даст овардани шӯҳрати шабакаҳои иҷтимоӣ мебошад,ба монанди “ВКонтакте”, “Одноклассники”, “Facebook”, “Twitter” , алоқаманд бошад.

Ҳадафи тадқиқоти зерин, ин муайян намудани тамоюли истифодаи шабакаҳои иҷтимоӣ аз ҷониби ҷомеаи террористӣ дар Ҷумҳурии Тоҷикистон, таъсиси равандҳои чунин фаъолият ва таҳлили муқовиматҳои пешбинишуда мебошад.

Вариантҳои асосии истифодабарии шабакаҳои иҷтимоӣ дар фаъолияти ташкилотҳои зиддиқонуние, ки дар Ҷумҳурии Тоҷикистон манъ гардидаанд, ба мисоли “Ҳизби наҳзати ислом”, “Давлати исломӣ”, “Ҳизб-ут-Таҳрир” зоҳир мешаванд. Вақтҳои охир зиёд шудани тарафдорони ташкилоти зиддиқонунии “Давлати исломӣ” зиёд гардида, дар айни замон якчанд сомонаҳо дар бораи амалҳои охирини ингуна ташкилотҳо иттилоъ дода истодаанд, ба назар мерасанд. Тарафдорони ин гурӯҳи ифротгароён бо ёрии сомонаҳои иҷтимоӣ мақсадҳои ғаразноки худро фаҳмонида, шахсони гумроҳро ба сафи худ ҷалб менамоянд. Дар ҳамаи шабакаҳои иҷтимоӣ аз тарафи гурӯҳҳои ифротгароӣ-террористӣ васеъ истифода бурда мешаванд, ки ин яке аз масъалаҳои ҷалби ҷавонон ба сафи ҷунбишу ҳаракатҳои ифротӣ ва гурӯҳҳои террористӣ, инчунин иштироки онҳо дар ҷангу муноқишаҳои давлатҳои хориҷӣ, ба яке аз масъалаҳои доғи ҷомеа табдил ёфтааст. Барои он, ки дар замони ҳозира аксарияти ҷавонон аз ҳаргуна шабакаҳои иҷтимоӣ васеъ истифода мебранд, ки ин яке аз сабаби ҷалб шудани онҳо мебошад. Бо гузашта аз ин гуфтан ҷоиз аст, ки он ҷавононе, ки ба чунин гурӯҳҳои ифротӣ шомил мешаванд, аксарияташон саводи зарурии дунявӣ ва маърифати ибтидоии динӣ надоранд. Ин гурӯҳҳо бо истифода аз ин омил ҷавононро ба доми худ кашида, ба коми марг мебаранд. Аз ин лиҳоз бар меояд, ки аз ҷониби ҳар нафари истифодабарандаи шабакаҳои иҷтимоӣ зарур мебояд, ки истифодаи дурусти онҳоро ба роҳ монда, барои худ ва аҳли пайвандону ҷомеа хатарро вогузор нанамоянд.

Дар умум, вазъияти баамаломада талаб мекунад, ки зиракии сиёсиро аз даст надода, дар ҳамкорӣ баҳри пешгирӣ намудани шомилшавии шаҳрвандон ба иттиҳодияҳои ифротгаро, иштироки онҳо дар задухӯрдҳои мусаллаҳонаи дигар давлатҳо фаъолиятро боз ҳам ҷоннок намуда, баҳри таъмини сулҳу субот ва истиқлолияти Ватани азизамон, оромиву ободии кишвар ва рӯзгори босаодати шаҳрвандон тамоми имкониятҳоро ба харҷ диҳем.

Мудири кафедраи барномарезӣ

ва низомҳои иттилоотӣ, ДПДТТХ                        Худойбердиев Х.

Created: 26 February 2018

Hits: 3165

     Аксарияти аҳолии Тоҷикистонро ҷавонон ташкил медиҳанд, ки онҳо давомдиҳандаи кору фаъолияти насли калонсол, нерӯи созанда ва иқтидори воқеии пешрафти ҷомеа, ояндаи миллат ва давлат мебошанд. Тадбиқи босамари сиёсати давлатии ҷавонон аз рӯзҳои нахустини соҳибистиқлолӣ дар меҳвари фаъолияти Ҳукумати Тоҷикистон қарор дорад. Ҷавонон бояд аз ҳама қишрҳои ҷомеа фаъол бошанд, рамзҳои давлатӣ, муқаддасоти миллӣ, дастовардҳои Истиқлолиятро ҳифз кунанд, амнияти давлат, шарафу номуси ватандориро ҳимоя карда худро аз ҳама хафу хатарҳои номатлуби ҷаҳони муосир эмин нигоҳ доранд. Имрӯз терроризм ва экстремизм ҳамчун вабои аср ва амнияти ҷаҳон ба ҳар як сокини сайёра таҳдид карда, барои башарият хатари на камтар аз силоҳи ядроиро ба миён овардааст. Терроризм ва ифротгароӣ ин барангезандаи низои миллӣ, иҷтимоӣ ва динӣ мебошад, ки қурбони он дар ин ё он минтақа асосан ҷавонон мегарданд. Бинобар ҷавонон дар ҳар ҷое, ки бошанд, бояд ҳисси баланди миллӣ ба Ватан, миллат, давлати соҳибистиқлоли худ ва забону фарҳанги миллии хеш ифтихор намоянд ва барои ҳимояи онҳо ҳамеша омода ва ҳушёру зирак бошанд.

       Тарбияи шахсиятҳои донишвару ватандӯст, соҳибкасбу ҳунарманд ин вазифаи аввалиндараҷаи мактабу маориф мебошад. Ба насли ояндасози миллат пеш аз ҳама дарк кунондан лозим аст, ки терроризм ва террористиро ба худӣ ва бегона, ашшадӣ ва ислоҳгаро, хубу бад ҷудо кардан мумкин нест. Террорист Ватан, дин, мазҳаб ва миллат надорад. Аммо расидан ба ояндаи нек танҳо бо суханони шифоҳӣ, ифтихори забонӣ муяссар намешавад. Дар ин роҳ самимият, масъулиятшиносии дар дӯшдошта, нерӯи эҷодиву хиради инсониро дареѓ надоштан нисбат ба фаъолияти ҳамдигар бетараф набудан лозим аст. Бояд дар ҷавонон ва насли ояндасози миллат, завқи забономӯзӣ, хондани адабиётҳои бадеӣ, шунидани васояти ахбори омма, интихоби дурусти касб барои ояндаи дурахшон бедор намуд. Чихеле, ки мегӯянд: «Ҳамсуҳбатӣ омили ҳамзабонист, ки расидан ба ҳамдилиро метезонад». Барои бедор кардани завқи забономӯзии ҷавонон бояд фазои маърифат муҳассилин ѓанӣ гардонида шавад. Ҳар як омӯзгор дар соатҳои тарбиявӣ, дар суҳбатҳои инфиродӣ ба хонандагон, бо истифода аз ҳар роҳу восита (намоиши филмҳои тарбиявӣ, хондани китобҳои бадеӣ, иштирок дар чорабиниҳои беруназсинфӣ, маҳфилҳои фаннӣ ва варзишӣ, ташкили саёҳат ба хона – музейҳои таърихи кишваршиносӣ) дар дили хонандагон нисбати маҳалгароӣ, ифротгароӣ нафрат пайдо намуда, оқибати бади ин амалҳоро фаҳмонад. Ҷавонон бояд дар ҳар давру замон, дар ҳолатҳои гуногун зиракии сиёсиро аз даст надиҳанд, ба суханони душманони дохилию хориҷӣ фирефта нашаванд. Роҳҳои пешгирии ҷавонон аз шомилшавӣ ба ҳизбу ҳаракатҳо хеле зиёд аст. Мо метавонем бо воситаи фиттаҳо он ҷавонони гумроҳе, ки ба дасисаи душманон гирифтор шуда, ҳоло қисме дар ѓарибиҳо фавтидаву қисме сарсону саргардонанд, намоиш диҳем, то ҷавонон бохабар шаванд. Суҳбатҳо ташкил намуда, дар бораи моҳияти «Қуръон ва дини ислом» маълумот диҳем, то ки ҷавонон фаҳманд, Қуръон саропо панд аст ва покиро талаб мекунад. Қуръон дурӯѓ гуфтан, дуздӣ кардан, зино кардан, хун рехтанро манъ мекунад. Ҳоло он, ки ҷавонони гумроҳ дар зери ниқоби ислом хунрезӣ мекунанд, гӯё, ки дар роҳи ростиву имон ва дин меҷангида бошанд. Магар онҳо Модар, хоҳар, фарзанд ва Ватан надоранд?

       Ба хонандагон моҳияти рафтори некро фаҳмондан лозим. Онҳо бояд донанд, ки маънои «Кори савоб» ин ниҳоли сабзонидан, шогирде тарбия кардан, иморате сохтан, маконеро обод кардан аст. Роҳи дигар ин ҳамкорӣ бо волидайн аст. Мактабу оила бояд ҳамкории зич дошта бошанд. Ҳам волидайн ва ҳам омӯзгор бояд аз ҳар қадами ҷавонон бохабар бошанд. Волидайн имрӯз дар баробари мактаб вазифадор аст, ки дар тарбияи фарзандаш масъулиятшинос бошад, зеро тарбия аз оила сар шуда, дар муассиса сайқал меёбад. Аз таҷрибаи зиндагӣ ва фаъолияти корӣ ба хулосае омадам, ки оилаи солим, фарзандони солим ба камол мерасонад. Аксарияти он ҷиноятҳое, ки аз тарафи ҷавонон содир мешаванд, аз оилаҳои носолим буда, падару модари онҳо маърифати паст дошта, нисбати таѓдири кӯдаки худ бетарафанд. Вақте фарзанд дар оила танқисӣ мекашад, меҳру муҳаббатро ҳис намекунад, албатта ба корҳои ношоям даст мезанад. Имрӯз маориф ва мактабро зарур аст, моҳияти «Қонуни масъулияти падару модарро дар тарбияи фарзанд» дар ҷамъомадҳои умумимактабӣ, маҷлисҳои падару модарон, соатҳои тарбиявӣ ҳаллу фасл намоянд.

А Рашидов, устоди ДПДТТ дар шаҳри Хуҷанд

Created: 09 March 2018

Hits: 3219

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни суханронии худ дар маҷлиси васеи Кумитаи иҷроияи Ҳизби халқии Демократии Тоҷикистон иброз доштанд, ки терроризму экстремизм чун вабои аср миллату ватан ва дину мазҳаб надоранд ва танҳо барои расидан ба ҳадафҳои ғаразноки сиёсӣ истифода мешаванд.

Воқеан, дар Ҷумҳурии Тоҷикистон, аз он ҷумла дар вилояти Суғд, яке аз масъалаҳои муҳиму мубрам ва мушкилоти асосӣ, ки ба амнияти миллӣ хатари ҷиддӣ эҷод мекунад, ин идома ёфтани фаъолияти тахрибкоронаи ҳизбу ҳаракатҳои динӣ-экстремистӣ ва терористӣ ба шумор рафта, раванди мазкур ба оромии вазъи ҷамъиятию сиёсӣ, пойдории сохти конститутсионӣ ва якпорчагии Ҷумҳурии Тоҷикистон таъсири манфӣ мерасонад. Имрўз ҷаҳонро мавҷи нооромиҳо, бесарусомониҳо ва буҳрони сиёсиву молиявӣ фаро гирифта, ба истиқлолият, якпорчагии давлатҳо ва ҳаёти осоиштаи аҳолӣ таҳдид ба миён овардааст. Хусусан, айни ҳол зиёда аз 100 давлати дунё ҳадафи ҳамлаҳои терористиву ифротгароӣ қарор гирифтаанд. Аз ин рӯ, бешубҳа масъалаи таъмини баланди амнияти давлатӣ дар шароити имрӯза манфиати илмиву назариявӣ ва ҳам сиёсию амалӣ кашф намудааст. Гузашта аз ин, ҳузури ҷавонони тоҷик, минҷумла сокинони вилояти Суғд дар ҷангҳои Сурия ва таълимоти онҳо дар урдугоҳҳои ғайриқонунии Покистону Афғонистон имрўзҳо ба  мавзўи доғи ҷомеа мубаддал гардида, мўъҷиби нигаронии мардум ва мақомоти давлатии кишвар шудааст. Ширкати ҷавонони тоҷик дар амалиётҳои ҷангии кишварҳои хориҷӣ ва шомилшавии онҳо ба ҳизбу харакатҳои тундрави террористӣ, ки таҳдиду хатаре ба амнияти кишвар, минтақа ва тамоми ҷаҳон дорад, аз мавзӯи меҳварии фаъолияти на танҳо ниҳодҳои интизомии кишвар, балки тамоми аъзоёни ҷомеаи мамлакат ба ҳисоб меравад. Тавре ки ҳаёти рўзмарраи ҷомеа собит месозад, имрӯз гурӯҳе аз ҷавонони ғофилу гумроҳ ва бехабар аз дину оини милливу мазҳабӣ, ки аз асолати дини мубини ислом ва мазҳаби ваҳдатгаройи ҳанафӣ огаҳӣ надоранд, ба доми тазвири мубаллиғони созмонҳои террористӣ афтода, бо сипар кардани номи ислом алайҳи бародарону хоҳарон ва ҳамватанону ҳаммазҳабони худ теғ мекашанд ва бо усулҳои даҳшатбори гушношунид инсонҳои бегуноҳро қатл мекунанд. Онҳо бо ин кирдори нангинашон,ки хилоф ба арзишҳои башардӯстонаи дини мубини ислом дорад, ифтихори ҷоҳилона карда, бо паҳн намудани навори «корномаҳояшон» исломро дар чашми аҳли башар ҳамчун дини зиддиинсонӣ ҷилва медиҳанд.

Мутаассифона, имрўз зиёиёни кишвар, ба вижа, устодону донишмандони мамлакат дар мавриди интиқоди ҷиноятҳои фоҷеабори аъзоёни ҳизбу ҳаракатҳои ифротӣ, ба монанди «Салафия», Ҳаракати исломии Ўзбекистон, «Ансоруллоҳ», «Ҷундуллоҳ», Давлати бо ном исломӣ, «Ҳизбут-таҳрир» ва Ҳизби дар Тоҷикистон мамнуъи наҳзати Ислом  фаъол нестанд. Таҳлили маводи чопӣ ва электронии васоити ахбори оммаи кишвар нишон медиҳад, ки дар ин раванд дар баробари рўзноманигорон танҳо кормандони ниҳодҳои низомии Тоҷикистон фаъоланду халос. Ин дар ҳолест, ки ҷавонони мамлакат аз ҷумлаи донишҷўён, олимон ва мутахассисони ҷавон ба ҷузъ изҳороту баромадҳои расмӣ дигар ягон маводи муфидро дар ин мавзуъ ба дасти чоп намерасонанд, ки ин воқеан боиси нигаронӣ мегардад. Чунки дар ин раванд бояд, пеш аз ҳама, ҷавонон фаъол бошанд. Агар дар канори онҳо ҳамчунин фаъолияти аҳли уламои Тоҷикистон, ҷомеашиносон ва намояндагони бонуфузи илмҳои ҷамъиятии мамлакат бо гузоришу мақолаҳои судманд аз тариқи минбарҳои баланд ва васоити ахбори омма вокуниш нишон дода, дар кори мубориза алайҳи терроризм ва экстремизм пешоҳанг шаванд, пас мо метавонем дар маҳви ин хатари бамиёномада қадами устувор гузорем. Дар айни замон дар барорбари мақомоти олии роҳбарикунандаи Тоҷикистон инчунин роҳбарияти кишварҳои муштаракулманофеъ низ аз вазъияти ба амаломада изҳори нигаронӣ карда, барои муқобилияти шадид алайҳи терроризм ва экстремизм тадбирҳои мушаххас меандешанд. Аз ҷумла, президенти Ҷумҳурии Беларус Александр Лукашенко ахиран изҳор дошт, ки кишварҳои шомили Созмони паймони аҳдномаи дастаҷамъӣ ҳарчанд дар мубориза алайҳи терроризм ва экстремизм қадами устувор гузоштаанд, вале воқеияти имрўза собит месозад, ки ин ҳама тадбирҳои андешидашуда дар мубориза алайҳи ифротгароёну ситезаҷўён кофӣ нест. Маълумотҳои бадастомада далолат медиҳанд, ки боқимондаҳои ҷанговарони ДИИШ дар минтақаҳои мухталифи Афғонистон ҷамъ омада, дар оянда барои идома додани тахрибкориҳои худ бо кўмаки хоҷагони хориҷии худ таҳсилу тамрин мекунанд. Вазъияти мураккаби ҳарбию сиёсии дар сарҳади ҷанубии кишварҳои муштаракулманофеъ ба миёномада моро водор месозад, ки ин масъаларо ба таври ҷиддӣ баррасӣ намуда, тадбирҳои судманд биандешем.

Дар ин раванд, ба наздикӣ дар ҳузури иштирокчиёни маҷлиси васеи Кумитаи иҷроияи Ҳизби Халқии Демократии Тоҷикистон Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  бори дигар диққати сокинони мамлакатро ба ин масъалаи мубрами рўз ҷалб карда, аз онҳо даъват ба амал оварданд, ки дар мубориза алайҳи ифротгароиву тундравӣ ҳушёру муттаҳид бошанд.

Имрўзҳо ҳарчанд дар тамоми шаҳру навоҳӣ ва макотиби оливу мактабҳои таҳсилоти ҳамагонии қаламрави вилояти Суғд бо ҳузури намояндагони мақомоти ҳифзи ҳуқуқ ва мутахассисону коршиносон дар мавзуи хатари ҷараёнҳои ифротиву тундгаро сӯҳбату мулоқотҳо баргузор мегарданд, вале то кунун масъалаҳои марбут ба пешгирии қонуншиканиву ҷинояткорӣ, мубориза бо терроризму экстремизм, аз ҷумла шомилшавии ҷавонон ба ҳизбу ҳаракатҳои ғайриқонуниву тундгаро, сабаб ва ҳолатҳои пайвастани иддае аз ҷавонони Тоҷикистон ба гурӯҳи террористии бо ном «Давлати исломии Ироқу Шом» ҳанўз аз мавзӯъҳои доғи рўз боқӣ мемонад. Аз ин рў, минбаъд бояд дар чунин сўҳбату мулоқотҳо дар баробари кормандони ҳифзи ҳуқуқ бештар барқароркунандагони ҳокимияти конститутсионӣ дар Тоҷикистон баромад карда, бобати бадбахтиву харобиҳои ҷанги шаҳрвандӣ дар Тоҷикистон нақл кунанд. Чунки Тоҷикистон дар байни кишварҳои муштаракулманофеъ аввалин кишварест, ки дар солҳои аввали ба даст овардани истиқлолияти давлатӣ гирифтори фитнаву найрангҳои ифортгароён гардида, оқибатҳои ҳузнангези ҷанги шаҳрвандиро паси сар кардааст.

Албатта, имрўз мардуми кишвар бо роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба музаффариятҳои бузург ноил гардидааст. Вале мо бояд ҳеҷ гоҳ зиракии сиёсиро аз даст надода, барои ободии кишвар ва таъмини ҳаёти хуби мардуми Тоҷикистон дар ҳама ҷабҳа, аз ҷумла дар самти мубориза алайҳи терроризму экстремизм пирўзу дастболо бошем.

Холиқ Мирхолиқов, устоди ДПДТТ дар шаҳри Хуҷанд

Created: 26 February 2018

Hits: 3291