ИФТИХОРИ МО: ҒОЛИБИЯТИ ДОНИШҶӮИ ДОНИШКАДА ДАР ОЗМУНИ ҶУМҲУРИЯВИИ “МЕЪМОР-2024”
Бо дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи баргузории ҷашну солгард, фестивалу намоиш, иду озмунҳои фарҳангию маърифатӣ ва анъанаю ҳунарҳои мардумӣ бо ташаббуси Кумитаи меъморӣ ва сохтмони назди Ҳукумати Ҷумҳурии Тоҷикистон намоиш – озмуни ҷумҳурявии беҳтарин лоиҳаи меъморӣ ва шаҳрсозӣ “Меъмор-2024” баргузор гардид.
Дар озмун беш аз 300 нафар меъморони варзидаи Ҷумҳурии Тоҷикистон бо лоиҳаи биною иншоотҳои худ иштирок доштанд.
Донишҷӯёни ихтисоси меъмории ДПДТТ ба номи академик М.С. Осимӣ дар шаҳри Хуҷанд Абдуллоҷон Абдуллоҷонов ва Шоҳрӯз Ахмедов низ бо лоиҳаҳои худ дар намоиш – озмуни мазкур иштирок намуданд.
Боиси фахр аст, ки лоиҳаи Абдуллоҷон Абдуллоҷонов дар мавзӯъи «Лоиҳаи маҳаллаи аҳолинишини “Дилоро” барои 3000 нафар аҳолӣ дар шаҳри Хуҷанд» сазовори дипломи номинант дар номинатсияи «Асари меъмории донишҷӯён» гардид.
Мавриди зикр аст, ки А.Абдуллоҷонов донишҷӯи соҳибтахассус, сермаҳсул ва дорои завқи баланди эҷодӣ буда, соли 2023 дар форуми ҷавонони экофестивали байналхалқии санъати ландшафтӣ, ки дар шаҳри Тошканди Ҷумҳурии Ӯзбекистон баргузор гардида буд, иштирок намуда, бо пешниҳоди лоиҳаи меҳмонхона сертификат гирифтааст. Соли 2024 ӯ ғолиби озмуни дохилидонишкадавии «Меъмор - эҷодкор» гардидааст.
Бо Сипосномаи Мақомоти иҷроияи Ҳокимияти давлатии вилояти Суғд, раёсати кор бо ҷавонон ва варзиши вилояти Суғд ва муассисаи давлатии «Маҷмааи фарҳангию таърихии Қалъаи Хуҷанд» сарфароз гардонида шудааст.
