ПАЁМ - ҚУТБНАМОИ ҶОМЕАИ МО БА СӮИ ОЯНДАИ ДУРАХШОН
Дар низоми сиёсии давлатдорӣ Паёми Президенти Ҷумҳурии Тоҷикистон ба Маҷлиси Олӣ санади расмӣ ва муҳими барномавӣ буда, ойинаи равшани рушди иҷтимоию иқтисодӣ ва фарҳангиву сиёсии кишвар, барномаи мукаммали кории тамоми ниҳодҳо ва қутбнамои ҳаракати устувори ҷомеаи мо ба сӯйи ояндаи дурахшон мебошад. Ин аст, ки на танҳо кормандони давлатӣ, балки тамоми мардуми Тоҷикистон беш аз пеш ба ин санади муҳиму арзишманд рӯй оварда, мазмуну моҳияти онро сармашқи фаъолияти доимии худ қарор медиҳанд.
Чун ҳамасола Паёми ҷамъбастии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тавассути ҳамаи шабакаҳои телевизионӣ пахш гардид. Санаи 28 декабри соли 2024 Паёми Президенти кишварро кормандони ҳамаи сохторҳои давлатӣ, аз ҷумла, ҷомеаи устодону донишҷӯёни Донишкадаи политехникии Донишгоҳи техникии Тоҷикистон ба номи академик М.С.Осимӣ бо як руҳияи том тариқи телевизион ва шабакаҳои интернетӣ тамошо намуданд.
Дар толори асосии донишкада бо иштироки кормандони раёсати донишкада, омӯзгорони собиқадор ва донишҷӯёни фаъол Паёми Пешвои миллат ба Маҷлиси Олӣ мустақиман тамошо карда шуд.
Инчунин роҳандозии ин тадбир дар толорҳои лексионӣ, синфхонаҳо, китобхонаҳои донишкада бо донишҷӯёни факултети информатика ва энергетика, факултети сохтмон ва нақлиёт, донишҷӯёни факултети муҳандисӣ-технологӣ воқеъ дар бинои Ҳаким Карим ва донишҷӯёни факултети муҳандисӣ-иқтисодӣ воқеъ дар маҳаллаи 30-ум бо роҳбарии декани факултетҳо, ноибони декан ва омӯзгорони дарсдиҳанда амалӣ карда шуд.
Паёмҳои солонаи Пешвои миллат Эмомалӣ Раҳмон ба Маҷлиси Олӣ намунаи олӣ ва одилонаи ҳисоботи роҳбари як кишвар ба мардуми мамлакат вобаста ба фаъолияти солонаи Ҳукумат ба ҳисоб рафта, аз асли миллати куҳанбунёд ва таърихан давлатдори тоҷикон дарак медиҳад. Маҳз дилсӯзӣ ва миллатдӯстии Президенти Тоҷикистон муҳтарам Эмомалӣ Раҳмон, нишон аз эҳсоси баланди масъулият ва садоқат ба миллат мебошад, ки инъикоси худро дар Паёмҳои солона ёфтааст.
Аз ироаи Паёми навбатӣ устодону донишҷӯёни донишкада изҳори хушҳолӣ намуда, ин раҳнаморо сармашқи фаъолияти худ қарор медиҳанд. Дастгирӣ ва таваҷҷӯҳи ҳамешагии Сарвари давлат нисбати кормандони соҳаи илму маориф эҳсос мегардад ва рушди соҳаҳои дигари хоҷагии халқ аз ин соҳаи муҳим вобастагии амиқ дорад.
Ҷомеаи Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд бо таваҷҷуҳ ба ҳар нуктаи Паёми Президенти Ҷумҳурии Тоҷикистон ба Маҷлиси Олӣ тасмим гирифтанд, ки дар асоси ин ҳуҷҷати барномавӣ нақшаи кории худро таҳия намуда, ҷиҳати иҷрои дастуру нишондодҳои навбатии Пешвои миллат, ки моро ба ҳифзу таҳким бахшидани дастовардҳои Истиқлоли давлатӣ, сулҳу ваҳдат, суботи сиёсӣ, фатҳи уфуқҳои нави рушд ва саодати миллӣ ҳидоят мекунанд, саҳми шоиста гузоранд.
