Муҳаррам Темурова раиси Шӯрои занон ва духтарони донишкада вохӯриро ифтитоҳ намуда, аҳли нишастро бо мазмуну муҳтавои вохӯрӣ шинос намуд. Мавсуф дар баромади худаз ҷумла иброз дошт, ки имрӯзҳо аз тарафи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо мақсади баланд бардоштани мақому манзалати зан дар ҷомеа, фаъолгардонии накши занон, фароҳам овардани шароит барои ташаккули донишу касб, маҳорату малака, тарбияи ахлоқӣ ва муҳаббат ба Ватан якчанд қарору фармонва барномаҳо роҳандозӣ карда шудаанд. Раёсати донишкада дар партави ин сиёсати созандаву бунёдкоронаи Пешвои муаззами миллат амал намуда, барои фаъолияти бомарому осудаи занону духтарон тамоми шароитро фароҳам намудааст.

Шуҷоат Ҳасанова, ходими сиёсиву ҷамъиятӣ, Шаҳрванди фахрии шаҳри Хуҷанд дар баромади худ иброз дошт, ки яке аз масъалаҳое, ки дар Паёми навбатии Президенти Ҷумҳурии Тоҷикистон муҳтарам Эмомалӣ Раҳмон мавриди таҳлилу баррасии амиқ қарор гирифт, баланд бардоштани мақоми зан дар ҷомеа ва андешидани тадбирҳои судманд дар ин самт мебошад. Дар баробари арҷгузорӣ ба Зан-Модар роҳбари хирадманду дурандеши Тоҷикистон фароҳам овардани шароити мусоид барои илму донишомӯзӣ ва соҳиби касбу ҳунар гардидани духтаронро вазифаи ҷонии аҳли ҷомеа унвон намуданд. Таҳлили нуктаҳои асосии Паёми Пешвои миллат дар масъалаи ташаббусҳои занон собит месозад, ки ин сиёсат дар оянда низ рушд ёфта, ба таъкиди Сарвари давлат, Ҳукумати мамлакат ташаббусҳои занону бонувони кишварро минбаъд низ дастгирӣ менамояд. Эътимоду боварие, ки Президенти мамлакат муҳтарам Эмомалӣ Раҳмон нисбат ба занону модарони тоҷик иброз карданд, бонувони кишварро боз ҳам руҳбаланд намуда, ба фатҳи қуллаҳои баланди пешрафт, фаъолияти пурсамар ва пайгирии иқдому ташаббусҳои наҷиб раҳнамун месозад. Дар партави гуфтаҳои Пешвои миллат мо бояд ҳамеша босабру таҳаммул бошем, ҳамдигарро ҳамеша дастгирӣ кунем, Ватанамонро сидқан дӯст дорем, фарзандонамонро дар ҳамин рӯҳия тарбия кунем, ба Ватан, миллат ва давлати худ ҳаргиз хиёнат накунем. Мо бояд аз соҳибдавлату соҳибватан буданамон доим шукрона кунем, ҳамеша ҳушёру зирак ва сарҷамъу муттаҳид бошем.

Муовини сартабиби беморхонаи клиникии №1 шаҳри Хуҷанд, номзади илмҳои тиб, Саодат Аминҷонова дар баромади худ оид ба тарғиби тарзи ҳаёти солим сухан намуда иброз дошт, ки саломатии ҳар инсон гарави асосии зиндагии хушбахтонаи ӯст. Мавсуф дар бораи пешгирии зӯроварӣ дар оила маълумот дода, илова намуд, ки оқибатҳои асосии зуҳуроти шаклҳои гуногуни зӯроварӣ нисбати занон ва духтарон пеш аз ҳама шиканҷа, паст будани сатҳи эътимод ба худ, осеби равонӣ, бад шудани вазъи солимии ҷисмонӣ ва равонӣ мебошанд. Дар ин маврид зарурияти муроҷиат ба марказҳои равоншиносӣ ба миён меояд. Муроҷиат ба чунин марказҳо метавонад роҳнамои хубе барои оилаҳои ҷавон бошад.

Дар хотимаи вохӯрӣ Муҳаррам Темурова, раиси Шӯрои занон ва духтарони донишкада ба меҳмонон барои ташриф оварданашон изҳори сипос намуда, қайд кард, ки донишҷӯдухтарони донишкада бо кирдору рафтори намунавӣ, дониши хубу аъло барои пешрафти кишвари азизамон саҳм мегузоранд. Имрӯз тамоми занону духтарони тоҷик шукр аз он мекунанд, ки ба шарофати сиёсати хирадмандонаву дурбинонаи Сарвари муаззами кишвар ба орзуву омоли худ расидаанд ва хушбахт аз онанд, ки дар Тоҷикистони соҳибистиқлол зиндагӣ ба сар мебаранд ва соҳиби Ватани худ бо тамоми урфу анъанаҳои миллии аҷдодӣ ҳастанд.

Раёсати донишкада бо дарназардошти воқеияти сиёсӣ, иқтисодӣ ва хусусиятҳои фарҳангиву анъанавӣ шаклҳои мухталифи сиёсати беҳгардонии шароити занонро ба назар гирифта, барои боз ҳам хубтару беҳтар гардонидани фаъолияти онҳо талош меварзад.

Шуъбаи кор бо ВАО