Мулоқоти мазкур бо иштироку суханронии нозирони Шуъбачаи огоҳонӣ ва пешгирии ҳуқуқвайронкунии ноболиғону ҷавонони Шуъбаи Вазорати корҳои дохилии Ҷумҳурии Тоҷикистон дар шаҳри Хуҷанд, лейтенанти калони милитсия Ҷаҳонгир Ҳидоятов, намояндагони гурӯҳи ҷавонони "Авангард" ва масъулини Раёсати Донишкада ҷиҳати бедор намудани ҳисси баланди ватандӯстиву ватанпарастии миёни насили ҷавон, дӯст доштани Давлату миллат, пешгирии ҳуқуқвайронкунӣ, қонуншиканӣ ва пешгирии шомилшавӣ аз ҳар гуна ҳизбу ҳаракатҳои мамнуъ доир гардид.

Дар кори он ба масъалаҳои дигари қобили диққат аз ҷумла рӯ овардан ба китобу китобхонӣ, истифода набурдани маводҳои психотропӣ ва сахтаъсир, омӯзиши забонҳои хориҷӣ, хизмат дар сафи Қувваҳои Мусаллаҳи кишвар таваҷҷӯҳ зоҳир гардида, қайд гардид, ки дар Паёми навбатии хеш ба Маҷлиси Олии Ҷумҳурии Тоҷикистон Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид намуданд, ки ҷавонон бояд дорои дониш ва маърифати баланд бошанд, зиракии сиёсиро аз даст надиҳанд ва дар ҳифзи манфиатҳои миллӣ фаъолона саҳмгузор бошанд.

Дар рафти мулоқот нозири Шуъбачаи огоҳонӣ ва пешгирии ҳуқуқвайронкунии ноболиғону ҷавонон, лейтенанти калони милитсия Ҷаҳонгир Ҳидоятов доир ба паҳлуҳои гуногуни пешгирии ҷинояткорӣ дар байни ҷавонон суханронӣ намуда, таъкид кард, ки масъулияти ҳар як ҷавон на танҳо дар таҳсил ва касбомӯзӣ, балки дар риояи қонун ва эҳтироми арзишҳои давлатдории миллӣ низ зоҳир мешавад.

Ҳамзамон, иштирокдорони мулоқот оид ба хизмат дар сафи Қувваҳои Мусаллаҳи кишвар, ки мактаби мардонагӣ ва ҷасорат мебошад, ибрози назар намуда, аз ҷавонон даъват ба амал оварданд, ки бо ҳисси баланди масъулиятшиносӣ баҳри ҳифзи марзу буми кишвар талош варзанд.

Шуъбаи кор бо ВАО