Сардори маркази байналмилалӣ ва идораи лоиҳаҳои Донишкадаи политехникии ДТТ ба номи академик М.С. Осимӣ дар шаҳри Хуҷанд Фарҳод Бобокалонов ба Донишкадаи нассоҷӣ ва саноати сабуки Тошканд ташриф овард. Дар ҷараёни ташриф бо масъулини бахши ҳамкориҳои байналмилалии донишкадаи мазкур, таҳти роҳбарии муовини директор И. Буланов мулоқот сурат гирифт, ки дар он дурнамои рушди ҳамкориҳои дуҷониба баррасӣ гардиданд.

Муҳтавои асосии мулоқот доир ба таъсис додани ҳамкориҳои муштарак дар самти таълими ихтисосҳои саноати сабук, нассоҷӣ ва дӯзандагӣ вобаста буд, ки барои мубодилаи таҷриба ва донишҳои муосир имкониятҳои нав фароҳам меорад.

Ҳамзамон, намояндаи донишкада бо шароити таълимӣ, таҷҳизоти замонавӣ ва ҳалли инноватсионии татбиқшаванда дар озмоишгоҳҳои Донишкадаи нассоҷӣ ва саноати сабуки Тошканд ошно гардид. Сафари мазкур ба таҳкими робитаҳои илмӣ - тадқиқотӣ ва такмили барномаҳои таълимӣ дар самти саноати сабук замина мегузорад.