Мақсади конференсия табодули таҷриба, шиносоӣ бо натиҷаи корҳои илмиву тадқиқотии олимон дар ин соҳа, пешниҳоди тавсияҳо доир ба ҳалли мушкилоти мавҷуда иборат буда, дар кори конференсияи мазкур олимон, муҳаққиқон, омӯзгорон, аспирантону унвонҷӯён, мутахассисон аз идораву ташкилот, донишкадаҳои илмӣ-тадқиқотӣ ва муассисаҳои таҳсилоти олии касбӣ, аз ҷумла аз Сарраёсати кишоварзии вилояти Суғд, Институти боғу токпарвари ва сабзавоткории АИКТ дар вилояти Суғд, МДТ «ДДХ ба номи академик Б.Ғафуров», Донишгоҳи ҳуқуқ бизнес ва сиёсати Тоҷикистон ва устодон ва донишҷӯёни донишкада иштирок ва суханронӣ намуданд.

Нахуст, директори донишкада Шаҳриёр Саъдуллозода кори конференсияро ифтитоҳ бахшида, иброз доштанд, ки тағйирёбии иқлим яке аз мушкилоти сатҳи ҷаҳонӣ ба шумор рафта, таъсири он ба бахшҳои гуногуни иқтисоди кишвар, хусусан ба соҳаи кишоварзӣ хеле калон мебошад. Тағйирёбии иқлим дар навбати худ ба мушкилоти баландшавии ҳарорат, норасоии об, офатҳои табиӣ ва ҳодисаҳои ғайричашмдошти мавсимӣ оварда мерасонад, ки ба истеҳсолот ва коркарди маҳсулоти кишоварзӣ таъсири манфӣ мерасонад. Мушкилоти мазкур олимон ва мутахассисони соҳаро водор месозад, ки барои рушди устувори кишоварзӣ ва таъмини амнияти озуқаворӣ тадбирҳои муассир андешанд.

Сипас, дар рафти конференсия дар мавзуҳои “Ҳолати ҳозира ва рушди устувор дар КАС вилояти Суғд”, “Рушди комплекси агросаноатӣ дар шароити тағйирёбии иқлим вобаста ба минтақа”, “Табиати пиряхҳои Тоҷикистон ва дурнамои маҳдуднамоии раванди коҳишёбии онҳо”, “Таъсири тағйирёбии иқлим ба кишоварзӣ ва роҳҳои мутобиқшавӣ ба он” ва “Истифодаи технологияҳои каммасраф ва устувори обёрӣ дар парвариши зироатҳо” аз ҷониби иштирокдорони конференсия маърузаҳои илмӣ муаррифӣ карда шуданд.

Ҳамин тариқ, конференсия дар сатҳи баланди илмиву назариявӣ баргузор гардида, аз ҷониби олимон ҷиҳати мутобиқгардонии соҳаи кишоварзӣ ба гармшавии иқлим, истифодаи самараноки захираҳои обӣ, такмил додани технологияи истеҳсол ва коркарди маҳсулоти кишоварзӣ дар шароити тағйирёбии иқлим, пешгирии обшавии пиряхҳо тавсияҳои гуногун пешниҳод гардид.

Шуъбаи кор бо ВАО