Шоми 5 октябр ба муносибати Рӯзи забони давлатии Ҷумҳурии Тоҷикистон дар Қалъаи Хуҷанд чорабинии бошукӯҳи идона баргузор гардид, ки дар устодону донишҷӯёни Донишкадаи политехникии Донишгоҳи техникии Тоҷикистон ба номи академик Муҳаммад Осимӣ бо арзи эҳтиром ба муқаддасоти миллӣ фаъолона иштирок намуданд.

Раиси вилояти Суғд Раҷаб Аҳмадзода Рӯзи забони давлатии Ҷумҳурии Тоҷикистонро, ки нишонаи ҳастии миллат ва рукни муҳими давлатдорӣ мебошад, ба сокинони сарбаланди вилоят табрик намуд.

Таъкид гардид, ки забони тоҷикӣ дар тӯли таърихи беш аз шашҳазорсолаи миллати куҳанбунёди тоҷик барои ҳифзи арзишҳои фарҳангӣ, инъикоси олами маънавӣ, худшиносию худогоҳӣ ва муаррифии миллат дар арсаи ҷаҳонӣ нақши бузург ва сазовор гузоштааст. Сокинони кишвари азизамон аз он ифтихорманданд, ки дар даврони соҳибистиқлолии Тоҷикистон маҳз бо сиёсати хирадмандона ва маънавиятбунёди Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон забони тоҷикӣ аз минбарҳои баланди созмонҳои бонуфузи байналмилалӣ садо дода, паёми миллати тоҷикро бо забони ширину шево ба оламиён расонидааст.

Бо ёдоварӣ аз суханони Пешвои миллат муҳтарам Эмомалӣ Раҳмон вобаста ба нақши забон илова карда шуд, ки «Мо ифтихор дорем, ки осори ҷовидонаи ба забони ноби тоҷикӣ таълифнамудаи гузаштагони мо ганҷинаи фарҳангу тамаддуни умумибашариро бо беҳтарин намунаҳои илмиву адабӣ ва ахлоқиву маънавӣ ғанӣ гардонидааст».

Воқеан, забони тоҷикӣ забони маърифат ва ҳикмат буда, тавассути он мутафаккирону олимон, шоирону донишмандоне чун Абӯабдуллоҳи Рӯдакӣ, Абулқосими Фирдавсӣ, Абӯалӣ ибни Сино, Мавлоно Ҷалолиддини Балхӣ, Закариёи Розӣ, Муҳаммади Ғаззолӣ, Саъдии Шерозӣ, Ҳофизи Шерозӣ, Абдураҳмони Ҷомӣ, Камоли Хуҷандӣ, Носири Хусрав, Аҳмади Дониш, Садриддин Айнӣ, Мирзо Турсунзода, Лоиқ Шералӣ ва садҳо чеҳраи дигари маъруфи илму адаб осори ҷовидона офаридаанд, ки ганҷинаи маънавии башарият ба шумор мераванд.

Дар даврони истиқлоли давлатӣ дар натиҷаи пайваста амалӣ намудани Сиёсати давлатии забон, таваҷҷуҳу ғамхории Пешвои миллат ва тасдиқи барномаҳои давлатӣ, ҷойгоҳи забони тоҷикӣ дар ҷомеаи навин устувор гардид.

Дар анҷоми чорабинӣ аз ҷониби аҳли фарҳанг ва ситораҳои мусиқӣ, инчунин гуруҳи машҳури операсароёни Италия барномаи рангини консертӣ манзур гардид.

Шуъбаи кор бо ВАО