Санаи 30-уми октябри соли 2025 миёни раёсати Донишкадаи политехникии Донишгоҳи техникии Тоҷикистон ба номи академик М. Осимӣ дар шаҳри Хуҷанд ва мудирияти Коллеҷи касбии илм ва технологияи Заожуани вилояти Шандуни Ҷумҳурии Мардумии Чин мулоқоти маҷозӣ баргузор гардид.

Дар оғози мулоқот доир ба фаъолияти донишкада, самтҳои асосии таҳсилот, робитаҳои байналмилалӣ ва таҷрибаи ҳамкориҳои илмӣ - амалӣ маълумот дода шуд. Изҳор гардид, ки донишкада омода аст бо Коллеҷи касбии илм ва технологияи Заожуан дар самтҳои таҳияи барномаҳои таълимии муштарак, мубодилаи устодону донишҷӯён, омӯзиши забони чинӣ ва татбиқи технологияҳои муосири сохтмон ҳамкорӣ намояд. Таъкид шуд, ки рушди ҳамкориҳои байналмилалӣ яке аз афзалиятҳои стратегии донишкада буда, татбиқи лоиҳаи байналмилалӣ ба омодасозии мутахассисони баландихтисос, баланд бардоштани сатҳи таҳсилоти касбӣ ва таҳкими дӯстии байни Тоҷикистону Чин мусоидат хоҳад кард.

Аз ҷониби намояндагони Коллеҷи касбии илм ва технологияҳои Заожуан лоиҳаи коргоҳи касбии муҳандисии муштарак муаррифӣ гардид, ки барои татбиқи босамари он дар самтҳои таҷҳизонидани озмоишгоҳҳо, ташкили платформаи омӯзиши онлайн, таҳияи китобҳои дарсӣ бо ду забон ва таълими устодони тоҷик дар Чин саҳм мегузоранд.

Маврид ба зикр аст, ки иқдомоти мазкур дар асоси ташаббуси байналмилалии «Як камарбанд - як роҳ» роҳандозӣ шуда, он ба ҳамкорӣ дар самти технологияи сохтмон ва муҳандисии сохтмонӣ равона шудааст.

Ҷонибҳо мувофиқа карданд, ки то охири соли 2025 гурӯҳи кории муштарак таъсис ёфта, нақшаи амал ва ҷадвали марҳилавии иҷрои лоиҳа таҳия карда шавад.

Дар анҷом, ҷонибҳо изҳори умед карданд, ки татбиқи ин лоиҳа на танҳо ба рушди таҳсилоти касбӣ, балки ба мустаҳкам шудани робитаҳои илмӣ, фарҳангӣ ва иқтисодии Тоҷикистону Чин низ мусоидат хоҳад кард.

Шуъбаи иттилоот ва кор бо ВАО