ОМӮЗИШ: РОҲҲОИ ДУРУСТ ТАҲИЯ НАМУДАНИ ДАРХОСТ ОИД БА ДАРЁФТИ ГРАНТ
Бо иқдоми Маркази байналмилалӣ ва идоракунии лоиҳаҳо-и донишкада машғулияти омӯзишӣ таҳти унвони «Роҳҳои дуруст таҳия намудани дархост барои дарёфти грант аз донорони хориҷӣ» баргузор гардид.
Машғулиятро Мадина Умарова, сармутахассиси Маркази байналмилалӣ ва идоракунии лоиҳаҳои донишкада роҳбарӣ намуд. Дар ҷараёни вохӯрӣ донишҷӯёни ризокор дониш ва малакаҳои амалӣ оид ба тарзи дурусти таҳия ва сохторбандии дархости лоиҳавӣ бо дарназардошти талабот ва меъёрҳои арзёбии донорон ба даст оварданд.
Таваҷҷуҳи махсус ба тартиб додани буҷети лоиҳа ва шарҳи ҷузъҳои асосии он — мубрамият, ҳадаф, вазифаҳо, фаъолиятҳо ва натиҷаҳои интизоршаванда ва ғайраҳо равона карда шуд. Иштирокчиён омӯхтанд, ки чӣ гуна бояд идеяи худро ба шакли воқеӣ, асоснок ва барои донор ҷолиб пешниҳод намоянд.
Тавре ки Мадина Умарова зикр намуд: «Дархости грантӣ танҳо як ҳуҷҷат нест, балки воситаест, ки метавонад роҳро ба имкониятҳои нав боз намояд. Муҳим он аст, ки на танҳо идея пешниҳод карда шавад, балки аҳамият, зарурат ва амалишавандагии он барои донор ба таври равшан нишон дода шавад».
Дар анҷоми машғулият ба иштирокчиён супориш дода шуд, ки намунаҳои ибтидоии лоиҳаҳои худро таҳия намоянд. Дар вохӯрии навбатӣ ин идеяҳо такмил дода шуда, ба дархостҳои мукаммал табдил хоҳанд ёфт ва минбаъд барои ҷойгирсозӣ дар платформаи онлайн омода мегарданд.
Бояд зикр намуд, ки чорабинӣ қадами муҳим дар самти рушди салоҳият ва малакаҳои донишҷӯёни донишкада дар соҳаи ҳамкориҳои байналмилалӣ арзёбӣ гардида, барои иштироки онҳо дар барномаҳои грантии донорони хориҷӣ заминаи мусоид фароҳам овард.
Шуъбаи иттилоот ва кор бо ВАО
