- 09.03.2026
МОДАР ФАРИШТА БУД, ВА ЛЕКИН ХАБАР НАДОШТ...
МУЛОҚОТ БО НАМОЯНДАГОНИ КООПЕРАТИВИ ҒАЙРИТИҶОРАТИИ «САРОБ» ВА МАСЪУЛИНИ БАРНОМАИ ҶАҲОНИИ ОЗУҚА (WFP)
Дар Донишкадаи политехникии Донишгоҳи техникии Тоҷикистон ба номи академик М.С. Осимӣ дар шаҳри Хуҷанд мулоқоти роҳбарияти донишкада бо намояндагони Кооперативи ғайритиҷоратии «Сароб» ва масъулини Барномаи ҷаҳонии озуқа (WFP) баргузор гардид.
Директори донишкада Хурсанд Содиқзода меҳмононро хайрамақдам гуфта, доир ба имконот ва раванди таълиму тарбия маълумоти муфассал дод. Таъкид шуд, ки донишкада ҳавасманди ба роҳ мондани ҳамкориҳо дар самтҳои гуногуни таълиму муносибатҳои ҳамгироӣ аст.
Зикр шуд, ки самтҳои асосии ҳамкориро ҷорӣ намудани технологияҳои муосир бо таваҷҷуҳ ба иқтисоди сабз ва ҳалли экологӣ дар соҳаи кишоварзӣ, ҷалби бештари ҷавонон ба бахши аграрӣ ва рушди кишоварзии рақамӣ, таъсиси пойгоҳи муштараки таълимӣ барои омӯзиши амалӣ ва фароҳам овардани шароити мусоид барои таҷрибаомӯзӣ ва рушди касбии донишҷӯён ташкил медиҳад.
Директори Кооперативи «Сароб» Муҳаммадӣ Мӯъминов ва Наргис Набиева ҳамоҳангсози лоиҳаҳои Барномаи ҷаҳонии озуқа (WFP) зимни мулоқот масъалаҳои рушди ҳамкориҳои дуҷониба дар самтҳои маориф, таҷрибаомӯзии донишҷӯён, таҳқиқоти илмӣ ва пешбурди бахши аграриро баррасӣ намуда, андешаҳояшонро баҳри муайян намудани дурнамои фаъолият баён доштанд.
Дар рафти вохӯрӣ таъкид гардид, ки ҳамгироии илм ва тиҷорат барои омода намудани мутахассисони баландихтисос, рушди иқтидори кадрӣ ва татбиқи технологияҳои инноватсионӣ аҳамияти калидӣ дорад.
Сипас, ҷонибҳо меморандуми ҳамкориро ба имзо расониданд.
Таъкид шуд, ки имзои ин созишнома қадами муҳим дар таҳкими ҳамкории ҷомеаи академӣ бо бахши иҷтимоӣ ва истеҳсолӣ ба шумор рафта, барои татбиқи инноватсияҳои устувор ва рушди соҳаи кишоварзии Тоҷикистон заминаи мусоид фароҳам меорад.
Шуъбаи иттилоот ва кор бо ВАО
