Дар толори донишкада бо иқдоми кафедраи автомобилҳо ва идоракунӣ дар нақлиёт дар ҳамҷоягии маркази рушди касбияти донишкада бо намояндагони Раёсати Хадамоти давлатии назорат ва танзим дар соҳаи нақлиети вилояти Суғд бо мақсади шиносоии донишҷӯёни ихтисосҳои хизматрасонии автомобилӣ ва ташкили ҳамлу нақл ва идоракунӣ дар нақлиёти автомобилӣ ва шаҳрӣ мулоқот баргузор шуд.

Дар вохӯрии мазкур сармутахассиси шӯъбаи хадамоти давлатии назорат ва танзим дар соҳаи нақлиёти шаҳри Хуҷанд Шӯҳратҷон Қодиров, мудири кафедраи автомобилҳо ва идоракунӣ дар нақлиёт Икром Салимов ва омӯзгори калони кафедра Инъом Башиков баромад намуда, аз ҷумла таъкид доштанд, ки омодасозии мутахассисони баландихтисос дар соҳаи нақлиёт яке аз омилҳои калидии рушди устувори инфрасохтори кишвар ба шумор меравад. Зеро дар тӯли солҳои Истиқлолият инфрасохтори иқтисодиёти кишвар, аз ҷумла нақлиёт яке аз заминаҳои асосӣ ва муайянкунандаи рушди иқтисодӣ ба ҳисоб меравад. Инкишофи соҳаи нақлиёт дар навбати худ воситаи мусоидат ба савдои дохилӣ ва хориҷӣ буда, омили асосии рушди муносибатҳои иқтисодӣ, тиҷоратӣ ва транзитии байналмиллалии кишвар мансуб меёбад. Аз марҳилаи аввали соҳибистиқлолӣ роҳбарият ва Ҳукумати ҷумҳурӣ масъалаи ба кишвари транзитӣ табдил додани Тоҷикистонро яке аз авлавиятҳои рушд муайян намуд.

Иштирокчиёни вохӯрӣ зикр намуданд, ки соҳаи муосири нақлиёт на танҳо дониши мустаҳками назариявиро талаб мекунад, балки малакаҳои амалӣ, қобилияти зуд мутобиқ шудан ба тағйирот ва истифодаи технологияҳои инноватсиониро низ дар фаъолияти касбӣ зарур медонад.

Шуъбаи иттилоот ва кор бо ВАО