Дар семинар намояндагони марказҳои таҳсилоти фосилавии мактабҳои олии Ҷумҳурии Тоҷикистон, аз ҷумла Донишгоҳи давлатии Бохтар ба номи Носири Хусрав, Донишгоҳи технологии Тоҷикистон, Донишкадаи куҳию металлургии Тоҷикистон, Донишгоҳи Давлатии Хуҷанд ба номи академик Б.Ғафуров, Донишгоҳи давлатии ҳуқуқ, бизнес ва сиёсати Тоҷикистон, Донишкадаи саноат ва хизматрасонӣ дар шаҳри Хуҷанд ва устодони таҳсилоти фосилавии донишкада иштирок карданд.

Зикр шуд, ки мақсади асосии баргузории семинар ин шинос кардани мактабҳои олии Ҷумҳурии Тоҷикистон бо таҷрибаи истифодабари сомонаи таълимӣ дар таҳсилоти фосилавии ДПДТТ ба номи академик М. Осимӣ дар шаҳр Хуҷанд; мубодилаи таҷрибаҳои мактабҳои олии Ҷумҳурии Тоҷикистон доир ба таҳсилоти фосилавӣ; омӯзиши таҷрибаҳои педагогии пешрафта дар раванди таҳсилоти фосилавӣ ва пешниҳоди ҳалли мушкилот дар соҳаи истифодаи технологияи таҳсилоти фосилавӣ дар раванди таълим мебошад.

Дар семинар як зумра масъалаҳо, аз ҷумла: таҷрибаи ДПДТТ ба номи академик М. Осимӣ дар шаҳри Хуҷанд доир ба татбиқи таҳсилоти фосилавӣ, таҷрибаи шуъбаи таҳсилоти фосилавии Донишгоҳи давлатии Хуҷанд ба номи академик Б.Ғафуров, истифодаи тахтаи электронӣ дар дарси амалии фанни макроиқтисодиёти гурӯҳҳои фосилавӣ, коркарди маводи таълимӣ барои гурӯҳҳои таҳсилоти фосилавӣ, масъалаҳои ҷорикунии элементҳои таҳсилоти дуалӣ дар машғулиятҳои таҷрибаомузии гуруҳҳои фосилавӣ ва ғайраҳо баррасӣ гардиданд.

Таъкид бояд намуд, ки Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд дар мавриди татбтиқи босамари низоми таҳсилоти фосилавӣ миёни донишгоҳҳои вилоят мавқеи пешсафӣ дошта, ин системаи таҳсилот беш аз 11 сол аст, ки дар раванди таълим ҷорӣ гардидааст. Мақсади асосии ташкил намудани тарзи фосилавии раванди таълим дар донишкада таъмини имконияти азхудкунии барномаи таълимӣ бевосита аз мавқеи ҷойгиршавии донишҷӯ ё вақти ҳозиршавии муваққатӣ, инкишоф ва татбиқи фазои ягонаи иттилоотии таълим, васеъ намудани доираи хизматрасонии таълимӣ, баланд бардоштани сифати таълим ва ҷолибияти таҳсил дар донишкада мебошад.

Шуъбаи кор бо ВАО