Парвиз Ёдгорзода зимни баромади худ иброз дошт, ки 25 сентябри соли 2006 Конвенсияи Созмони Милали Муттаҳид зидди коррупсия дар Ҷумҳурии Тоҷикистон қабул гардида, 16 апрели соли 2008 аз ҷониби Маҷлиси намояндагони Маҷлиси олии кишвар тасдиқ карда шуд, ки он дар таҳкими роҳи минбаъдаи сиёсати давлатии Ҷумҳурии Тоҷикистон дар самти мубориза бар зидди коррупсия хеле муҳим арзёбӣ карда мешавад. Баъди қабул ва тасдиқи Конвенсия санадҳои меъёрии ҳуқуқӣ ва барномаҳои давлатии Ҷумҳурии Тоҷикистон ба стандартҳои байналмилалӣ, ки аз Конвенсияи мазкур бармеоянд, давра ба давра мутобиқ гардонида шуда истодаанд. Бо Фармони Президенти Ҷумҳурии Тоҷикистон аз 10 январи соли 2007, №143 таъсис додани мақомоти махсусгардонидашудаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон, қабули Қонуни Ҷумҳурии Тоҷикистон “Дар бораи экспертизаи зиддикоррупсионии санадҳои меъёрии ҳуқуқӣ ва лоиҳаҳои санадҳои меъёрии ҳуқуқӣ” аз 28 декабри соли 2012, Қонуни Ҷумҳурии Тоҷикистон “Дар бораи муқовимат ба коррупсия” аз 7 августи соли 2020, се маротиба таҳия ва тасдиқ шудани Стратегия дар самти муқовимат ба коррупсия барои солҳои 2008-2012, 2013-2020 ва барои давраи то 2030, инчунин як қатори дигар санадҳои зериқонунӣ шаҳодати ин гуфтаҳост.

Аз ҷониби Парвиз Ёдгорзода ҳамзамон даъват ба амал оварда шуд, то ба хотири пешрафту инкишофи давлат атрофи масъалаи пешгирӣ ва муқовимат ба коррупсия боз ҳам муттаҳид гардида, баҳри ташаккули тафаккури зиддикоррупсионии ҳар як фарди ҷомеа кӯшиш ба харҷ диҳад ва баҳри паст намудани таъсири коррупсия саҳми худро гузорад.

Омӯзгори кафедраи иқтисоди муҳандисӣ ва менеҷменти донишкада Ш.Турсунова дар мавзӯи “Коррупсия - зарба ба иқтисоди миллӣ” баромад намуда иброз дошт, ки ҷиноятҳои коррупсионӣ асоси давлату давлатдорӣ, фаъолияти муътадили мақомоти давлатиро халалдор намуда, ба раванди рушди иҷтимоию иқтисодӣ, ахлоқу афкори ҷамъият ва дигар паҳлуҳои ҳаёти ҷомеа таъсири шадиди манфӣ мерасонад. Пешгирӣ ва мубориза бар зидди коррупсия кори дастаҷамъонаи аҳли ҷомеа буда, барои решакан намудани он ҷомеаи шаҳрвандӣ набояд бетараф бошад.

Бояд қайд намуд, ки ҳамоиши баргузоргардида барои боло бурдани маърифати ҳуқуқии донишҷӯён мусоидат менамояд ва донишҷӯён бори дигар дарк карданд, ки коррупсия дар қатори дигар омилҳои номатлуб барои ҷомеа ва давлат хатарнок дониста шуда, яке аз масъалаҳои доғи ҷомеаи ҷаҳонӣ ба ҳисоб меравад ва пешгирии он вазифаи тамоми қишри мамлакат мебошад.