КОНФЕРЕНСИЯИ БАЙНАЛМИЛАЛӢ «РАҚАМИКУНОНИИ СОҲАИ СОХТМОН ВА ИҚТИСОДИЁТИ САБЗ: РОҲ БА СӮИ РУШДИ УСТУВОР»

Дар партави дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир ба суръат бахшидани раванди рақамикунонии соҳаҳои иқтисоди миллӣ, истифодаи технологияҳои рақамӣ ва гузариш ба низоми пурраи пардохтҳои ғайринақдӣ дар фаъолияти мақомоти давлатӣ ва соҳаҳои мухталиф, бахшида ба эълон гардидидани солҳои 2025 - 2030 «Солҳои рушди иқтисоди рақамӣ ва инноватсия» бо ибтикори Донишкадаи иқтисод ва савдои Донишгоҳи давлатии тиҷорати Тоҷикистон ва Донишкадаи политехникии Донишгоҳи техникии Тоҷикистон ба номи академик М.С. Осимӣ санаи 7-уми апрели соли 2025 дар Кохи фарҳанги ба номи А.Рӯдакии шаҳри Хуҷанд конференсияи байналмилалии илмӣ-амалӣ дар мавзӯи «Рақамикунонии сохтмон ва иқтисодиёти сабз: роҳ ба сӯи рушди устувор» баргузор гардид.

Дар кори конференсия аз ҷониби муовини директори Агентии инноватсия ва технологияҳои рақамии назди Президенти Ҷумҳурии Тоҷикистон Яздонзода Исфандиёр, намояндаи МИҲД-и вилояти Суғд Суҳроб Рустамзода, академики Академияи илмҳои Ҷумҳурии Ӯзбекистон, корманди шоистаи илми Ҷумҳурии Ӯзбекистон, д.и.и., профессор Гулямов Саидахрор, ҳайати омӯзгорон аз Донишгоҳи давлатии техникии нафти Уфа, Донишкадаи политехникии Донишгоҳи техникии Тоҷикистон ба номи академик М.С. Осимӣ, Донишкадаи иқтисод ва савдои Донишгоҳи давлатии тиҷорати Тоҷикистон, Филиали Урганҷии Донишгоҳи технологияҳои иттилоотии Тошканд ва дигарон дар паҳлӯҳои гуногуни рақамикунонии соҳаи сохтмон ва иқтисодиёти сабз маърузаҳо муаррифӣ гардида, меҳмонон ва иштирокчиёни конференсия оид ба муҳиммияти мавзӯи конференсия, рушди иқтисоди миллӣ, рақамикунонии соҳаи сохтмон ва иқтисодиёти сабз андешаҳои ҷолиб баён намуданд.

Қисмати дуюми кори конференсия дар бахшҳои алоҳида идома ёфта, дар он маърузаҳои олимони машҳури кишварҳои Россия, Узбекистон ва Тоҷикистон шунида, мавриди муҳокима қарор гирифтанд. Аз натиҷаи конференсия маҷмӯи мақолаҳои илмӣ баъд аз таҳрир ва коркарди техникӣ ба нашр расонида мешавад.

Шуъбаи кор бо ВАО