Бояд қайд намуд, ки озмун дар ду давра гузаронида шуд: факултетӣ ва донишкадавӣ. Дар умум, дар озмун зиёда аз 100 нафар донишҷӯён иштирок карданд, ки аз онҳо 7 нафар донишҷӯён аз чор факултети донишкада ба даври донишкадавӣ роҳхат гирифтанд. Озмун дар асоси саволҳои пешакӣ тартибдодашуда оид ба ҳаёту фаъолияти Асосгузори сулҳу ваҳдат, Пешвои миллат Президенти мамлакат Эмомалӣ Раҳмон ва асарҳояшон гузаронида шуд.

Дар натиҷаи санҷиш муқаррар гардид, ки донишҷӯи курси 2 ихтисоси технологияи нигаҳдорӣ ва коркарди маҳсулоти хоми ҳайвонот Билол Воҳидов дониши хуб нишон дода, соҳиби 9 хол, донишҷӯи курси 3 ихтисоси таъмини барномавии технологияи иттилоотӣ Абдураҳим Раупов соҳиби 8 хол ва донишҷӯи курси 2 ихтисоси таълими касбӣ (аз рӯи самтҳо) Ҷамшед Ғайбуллозода соҳиби 7 хол гашта, мутаносибан ҷойҳои якум, дуюм ва сеюмро ноил шуданд.

Ғолибони даври донишкадавӣ дар бораи ҳаёту фаъолияти Президенти мамлакат Эмомалӣ Раҳмон ва асарҳояшон дониши фасеҳ дошта, ҳисси масъулиятшиносию худогоҳии миллӣ ва дараҷаи маърифати сиёсии худро намоиш доданд. Дар тайёрӣ ва гузаронидани даври донишкадавии озмун кормандони кафедраи забони давлатӣ ва ҷомеашиносӣ ва кормандони китобхона саҳми фаъоли худро гузоштанд.

Ҷоиз ба зикр аст, ки ҳамасола Озмуни ҷумҳуриявии «Донандаи беҳтарини асарҳои Пешвои миллат» бо мақсади гиромидошти таърихи пуршарафи халқи тоҷик, омӯзиши амиқ ва ҳамаҷонибаи корҳои наҷиб ва фаъолияти шоистаи Президенти Ҷумҳурии Тоҷикистон муҳтарам Эмомалӣ Раҳмон дар роҳи наҷоти давлат ва таҳкими ваҳдати миллӣ, бунёди модели нави давлати демократӣ, ҳуқуқбунёд, дунявӣ ва ягонаи Тоҷикистон дар шароити нави таърихӣ, омӯзиши ҳамаҷонибаи мактаби давлатдории Пешвои миллат дар байни аҳолии ҷавони мамлакат, бахусус донишҷӯёни муассисаҳои таҳсилоти миёна ва олии касбӣ баргузор мегардад.

Шуъбаи кор бо ВАО