Дар асоси дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати рушди фарҳанги китобхонӣ, баланд бардоштани маърифати ҷавонон ва ҳавасманд намудани аҳолӣ ба омӯзиши илму дониш, дар вилояти Суғд даври вилоятии Озмуни ҷумҳуриявии «Илм – фурӯғи маърифат» оғоз гардид.

Маросими ифтитоҳӣ имрӯз дар шаҳри Хуҷанд, дар толори Китобхонаи оммавии вилоят ба номи Тошхоҷа Асирӣ баргузор шуда, бо тантана ва рӯҳияи баланди маърифатпарварӣ оғоз ёфт.

Бояд қайд намуд, ки дар ин даври вилоятии озмуни ҷумҳуриявӣ 21 нафар донишҷӯёну устодони Донишкадаи политехникии Донишгоҳи техникии Тоҷикистон ба номи академик Муҳаммад осимӣ дар шаҳри Хуҷанд, аз ҷумла донишҷӯён: Ҷовид Тошматов, ихтисоси таъминоти барномавии технологияи иттилоотӣ, дар номинаи “Математика (арифметика, алгебра, геометрия)” Бузургмеҳр Олимӣ, Абубакр Ахмедов, ихтисоси хизматрасонии автомобилӣ, Амонуллоҳ Абдурафиқзода, ихтисоси таъмини барқ дар номинаи “Физика ва астрономия”, Маҳина Нурматова, ихтисоси “Экологияи саноат ва истифодабарии оқилонаи захираҳои табиӣ” дар номинаи “Химия”, Меҳронахон Бузурукова, Маҳлиёхон Ҳошимова ва Фараҳнозхон Мирзохоҷаева ихтисоси Иқтисодиёт ва идора дар корхона аз руйи номинаи “География”, Искандархон Шарифов, ихтисоси технологияи иттилоотӣ ва идоракунӣ дар системаҳои техникӣ, Зафарҷон Махсудов, Нозанин Ҳакимова, Муҳаммадҷон Олимӣ ва Комронхон Шавкатзода ихтисоси таъминоти барномавии технологияи иттилоотӣ аз руи номинаи “Технологияи иттилоотӣ”, Билол Бобозода ихтисоси барномавии технологияи иттилоотӣ, Самандар Самандаров, Абдуллоҷон Сатторов, ихтисоси зеҳни сунъӣ, аз руи номинаи “Зеҳни сунъӣ ва барномасозӣ”, Тошхоҷа Олимов, ихтисоси меъморӣ, А. Солиев ва Фаридун Икромзода, ихтисоси технология ва низоми иттилоотӣ аз руйи номинаи “Ихтироъкорӣ ва навоварӣ”, омӯзгори калон Мавзуна Ахмедова ва доктранти технология ва лоиҳакашии маҳсулоти саноати сабук” Дилноза Тӯйчиева иштирок намуда истодаанд.

Боиси сарфарозист, ки 6 нафар устодони донишкада дар даври вилоятии Озмуни ҷумҳуриявии «Илм – фурӯғи маърифат» ба ҳайси ҳакамот пазируфта шудаанд.

Ёдовар мешавем, ки соли панҷум аст, ки дар Тоҷикистон Озмуни ҷумҳуриявии «Илм – фурӯғи маърифат» бо мақсади амалисозии «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» баргузор мешавад. 2 январи соли 2025 Амри Президенти Ҷумҳурии Тоҷикистон дар бораи баргузории озмун дар соли равон ба тасвиб расид.

Баргузории озмун давоми солҳои 2021-2024 нишон дод, ки таваҷҷуҳи насли наврасу ҷавон ба омӯзиши илмҳои дақиқ, табиӣ ва риёзӣ хеле зиёд гардида, барои дарёфт ва тарбия намудани мутахассисони баландихтисоси соҳаи муҳандисӣ ва барномасозӣ заминаи мусоид фароҳам оварда шудааст.

Соли 2025 барои ҳар ғолиби ҷойи сеюм 30 ҳазор сомонӣ, ҷойи дуюм 50 ҳазор сомонӣ, ҷойи якум 70 ҳазор сомонӣ ва барандаи Шоҳҷоиза 140 ҳазор сомонӣ муқаррар гардидааст.

Шуъбаи кор бо ВАО