Санаи 21-уми октябри соли ҷорӣ дар толори донишкада маҳфили навбатии омӯзишии “Пайравони Пешвои миллат” баргузор гардид, ки дар он Илҳом Ҷамолиён, раиси бахши вилоятии Иттифоқи журналистони Тоҷикистон дар мавзӯи “Ҳифзи иттилоот ва таъмини амнияти иттилоотӣ дар азмони муосир” сухан намуд.

Таъкид шуд, ки асри XXI дар таърихи башарият бо таҳавуллоти бузурги илмию техникӣ оғоз гардид ва ин раванд бо суръати баланд идома дорад. Ҳамарӯз аз кашф ва ихтирооти тозаи илмию фановарӣ, дар ҷомеаи ҷаҳонӣ маълумот пахш мешавад ва дастрасии мардум ба технологияи муосири иттилоотӣ боз ҳам бештар мегардад. Аз ин ҷост, ки асри XXI-ро асри иттилоот унвон кардаанд. Ин омил сабаб гардидааст, ки иттилоот ва расонаҳои иттилоърасон ба мафкураи ҷомеа бисёр амиқ ва нишонрас ба мушоҳида бирасад. Ҳатто расонаҳои иттилоотӣ ба майдони мубоҳисаҳои гуногун табдил ёфтаанд. Аз ин хотир таъмини амнияти иттилоотӣ дар замони муосир ба масъалаи асосии таъмини амнияти миллии давлатҳо мубаддал гардидааст.

Дар ҷараёни маҳфил суолу ҷавоб бо иштирокдорони он сурат гирифт.

Мавриди зикр аст, ки соли ҷорӣ аз Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд ба курси мазкур 5 нафар донишҷӯёни фаъоли донишкада сафарбар гардидаанд. Итминон дорем, ки пас аз хатми курс онҳо ҳамчун кадрҳои омодашуда ба хизмати давлатӣ ҷалб гардида, дар соҳаҳои гуногун ҳамчун мутахассисони баландихтисос фаъолият менамоянд.

Бояд қайд намуд, ки ибтидо аз соли 2019 то инҷониб бо мақсади ҷалби ҷавонони соҳибистеъдоду соҳибмалака, омода намудани онҳо ҳамчун кадрҳои ҷавон ва содиқ ба Ватану миллат, омӯзонидани мактаби давлатдории Пешвои муаззами миллат муҳтарам Эмомалӣ Раҳмон, ҷалби онҳо ба фаъолияти волонтёриву корҳои ҷамъиятӣ ва расонидани хизматрасониҳои алоқаманд дар чорабиниҳои сатҳи ҷумҳуриявию байналмилалӣ ва ба ин васила ташаккул додани афкори сиёсиву баланд бардоштани маърифати ҳуқуқии шунавандагони аз ҷониби Раёсати кор бо ҷавонон ва варзиши вилояти Суғд курси омӯзишии “Пайравони Пешвои миллат!” ба роҳ монда шудааст.

Мақсад аз роҳандозии маҳфили омӯзишии «Ҷавонон- пайрави Пешвои миллат», пеш аз ҳама, омӯзиши мактаби бузурги Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир ба сулҳу ваҳдат, корҳои бунёдкорӣ, созандагӣ, тақвият бахшидани эҳсоси ватандӯстӣ ва баланд бардоштани ҳувияти миллии ҷавонон мебошад.

Шуъбаи иттилоот ва кор бо ВАО