1 ноябри соли 2025 дар Театри давлатии академии опера ва балети ба номи Садриддин Айнӣ маросими ҷамъбастӣ ва ҷоизасупории озмуни ҷумҳуриявии «Илм – фурӯғи маърифат» баргузор гардид, ки дар он муовини Сарвазири Ҷумҳурии Тоҷикистон, раиси Комиссияи ҷумҳуриявии озмун Дилрабо Мансурӣ, вазири маориф ва илми Ҷумҳурии Тоҷикистон, муовини раиси комиссияи озмун Раҳим Саидзода, муовини якуми вазир, муовинони вазири маориф ва илм, дигар намояндагони расмӣ, сардорони раёсату шуъбаҳои дастгоҳи марказии вазорат, олимону устодони донишгоҳ, довталабону иштирокчиёни озмун ва намояндагони воситаҳои ахбори умум ширкат доштанд.

Боиси ифтихор ва сарфарозист, ки дар ин озмуни умумиҷумҳуриявӣ 3 нафар донишҷӯёни донишкада мақомҳои ифтихориро ба даст оварда, соҳиби диплом ва маблағҳои пули гардиданд.

Ҳамин тавр, Билол Бобозода донишҷӯи соли чоруми ихтисоси таъминоти барномавии технологияи иттилоотӣ аз рӯйи номинатсияи зеҳни сунъӣ ва барномасозӣ-ҷойи 2-юм, Нозанин Ҳакимова донишҷӯйи курси 3, ихтисоси таъминоти барномавии технологияи иттилоотӣ дар номинатсияи Технологияи иттилоотӣ мақоми 2-юм, Самандар Самандаров, донишҷӯи курси 3, ихтисоси зеҳни сунъӣ дар номинатсияи зеҳни сунъӣ ва барномасозӣ зинаи дуюмро ба даст оварданд.

Муовини Сарвазири Ҷумҳурии Тоҷикистон, раиси Комиссияи ҷумҳуриявии озмун Дилрабо Мансурӣ зимни сухани ифтитоҳӣ иштирокчиёнро бо анҷоми бомуваффақияти Озмуни ҷумҳуриявии «Илм - фурӯғи маърифат», ки бо ташаббуси Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ гардидааст, табрик намуда, таъкид кард, ки ин иқдоми арзандаи Пешвои муаззами миллат ба мактаби воқеии ҳавасмандгардонии ҷавонон ба омӯзиш, ҷустуҷӯ, эҷод ва таҳқиқи илмҳои дақиқ табдил ёфтааст.

Қайд гардид, ки озмуни мазкур бо мақсади рушди тафаккури техникӣ, тарғиби ҷаҳонбинии илмӣ, дастрасӣ пайдо кардан ба техникаву технология, тавсеаи ихтироъкорӣ ва навоварӣ, пайвасти илм бо истеҳсолот, ҷалби бештари хонандагону донишҷӯён ва дигар қишрҳои ҷомеа ба омӯзиши фанҳои риёзӣ, дақиқ ва табиӣ, ҳамчунин дарёфт ва муаррифии истеъдодҳои нав дар ин самтҳо баргузор мегардад.

Раёсати донишкада донишҷӯёни ғолиб ва раҳбаронашонро бо ин дастоварди шоён самимона таҳният гуфта, дар фаъолияти минбаъдаашон комёбиҳои беназирро орзуманд аст.

Шуъбаи иттилоот ва кор бо ВАО