- 04.12.2025
МУБОРИЗА АЛАЙҲИ ХУШУНАТ НИСБАТ БА ЗАН
ТАҲКИМИ ПОЙГОҲИ ТЕХНИКӢ: ТАҶҲИЗОТИ МУОСИРИ ЛАБОРАТОРӢ БА ДОНИШКАДА
Субҳи имрӯз бо дастгирии Вазорати маориф ва илми Ҷумҳурии Тоҷикистон ба донишкада таҷҳизоти муосири лабораторӣ ворид карда шуданд.
Ин иқдом бо мақсади амалӣ намудани ҳадафҳои дар доираи солҳои 2020 -2040 – “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” ҷиҳати таҳкими пойгоҳи техникӣ, сифатнок намудани таълим ва такмили имкониятҳои гузаронидани таҷрибаҳои амалӣ ва азхуд намудани малакаҳои касбии донишҷӯён роҳандозӣ карда шуд.
Бояд қайд намуд, ки маҷмуаи таҷҳизоти воридгардида аз се бастаи муҳим иборат аст:
1. Стенд барои омӯзиши васли таҷҳизоти барқӣ: Он ба донишҷӯён имкон медиҳад, ки усулҳои муосири васлкунии таҷҳизот, ташхис ва хизматрасонии шабакаҳо ва дастгоҳҳои барқии маишӣ ва саноатиро амалан аз худ намоянд.
2. Стенд барои омӯзиши фотоэлементҳо: Он имконияти амиқи таҳқиқ намудани принсипҳои кори батареяҳои офтобӣ ва системаҳои фотоэлектриро фароҳам меорад, ки дар шароити рушди фаъоли энергетикаи барқароршаванда дар ҷумҳурӣ ниҳоят муҳим аст.
3. Стенд барои омӯзиши дастгоҳи хунуккунанда ва кондитсионерӣ: Он барои омӯзиши давраҳои термодинамикӣ, сохтор ва хизматрасонии системаҳои иқлимӣ ва яхдонӣ, ки ҷузъи ҷудонашавандаи инфрасохтори муосир мебошанд, пешбинӣ шудааст.
Ҷоиз ба зикр аст, ки истифодаи таҷҳизоти муосири таҷрибавӣ имконияти омӯзиши фанҳои тахассусиро васеъ гардонида саҳми мустақим дар баланд бардоштани сифати таҳсилот ва омодасозии мутахассисони соҳаи муҳандисии кишвар мебошад.
Устодон ва донишҷӯёни донишкада ба Вазорати маориф ва илми Ҷумҳурии Тоҷикистон барои таваҷҷӯҳи доимӣ ва дастгирии назаррас дар такмили заминаи моддӣ-техникии донишкада миннатдории амиқ баён менамоянд.
Шуъбаи иттилоот ва кор бо ВАО
