Декани факултет Зӯҳро Умарова ироаи навбатии Паёми имсолаи Президенти мамлакат муҳтарам Эмомалӣ Раҳмон ба Маҷлиси Олии Ҷумҳурии Тоҷикистонро ба ҷомеа, аз ҷумла ба устодону донишҷӯён муҳим арзёбӣ намуда, иброз дошт, ки мо бояд баҳри амалӣ намудани ҳадафҳои стратегии кишвар нерӯи зеҳнии хешро равона созем, зеро таваҷҷуҳи роҳбарияти кишвар маҳз ба самти соҳаи техника ва рушди он бештар гардидааст.

Муовини директори донишкада оид ба тарбия Гулшан Довудов дар баромади худ иброз дошт, ки чун ҳамеша нуқтаи меҳварии паём ин таъмини зиндагии шоиста ба мардум аст, ки Президенти кишвар бо мисолҳои возеҳ онро таҳлилу баррасӣ намуданд. Мо бояд ҷавонон ва мутахассисони ҷавонро барои азхуд намудани фанҳои дақиқ роҳнамоӣ намуда, барои навовариҳо ва ихтироъкорӣ дар соҳаи техникаю технология онҳоро дастгирӣ намоем.

Омӯзгори калони кафедраи меъморӣ Р. Зокиров дар баромади худ қайд намуд, ки дар Паёми имсола ба Кумитаи меъморӣ ва сохтмон, роҳбарони вилоятҳо ва шаҳру ноҳияҳо дар ҳамкорӣ бо соҳибкорону сармоягузорон супориш дода шуд, ки ба сифати сохтмон ва санъати баланди меъмории иншооту биноҳои бунёдшаванда ба зебо гардидани симои шаҳру ноҳияҳо мусоидат намояд ва ба мардум садсолаҳо хизмат намоянд, аҳамияти аввалиндараҷа диҳанд. Вобаста ба ин, устодони кафедраи меъморӣ кӯшиш ба харҷ медиҳанд, ки ба тарбияи кадрҳои баландихтисоси соҳаи меъморӣ фаъолияти худро боз ҳам ҷоннок намоянд ва донишҳои муосири соҳаро омӯзонанд.

Омӯзгори калони кафедраи сохтмон Фаррух Аминов дар маърӯзаи худ иброз дошт, ки Президенти кишвар муҳтарам Эмомалӣ Раҳмон нисбати амалишавии ҳадафи чоруми стратегии кишвар, яъне рушди босуръати саноат қайд карданд, ки суръати рушди саноати кишвар дар соли сипаригашта 15% буд ва он бояд дар соли 2025 на кам аз 20% бошад. Устодони кафедра баҳри соҳиб шудан ба салоҳиятҳои касбии ба талаботи замон ҷавобгуйи донишҷуёни самти сохтмон пайваста кушиш ба харҷ диҳанд. Таҳлилҳо нишон медиҳанд, ки қариб 90% мутахассисони соҳаи сохтмони вилоят хатмкардагони донишкадаи мо мебошанд.

Омӯзгори калони кафедраи забони давлатӣ ва ҷомеашиносӣ М. Ғозиева гуфт, ки моро зарур аст, ки ҳифзи арзишҳои таърихиву фарҳангии миллати худ сайъ намоем ва муаррифии боз ҳам бештари онҳоро дар арсаи байналмилалӣ ҳадафмандона идома диҳем. Барои дар ниҳоди ҷавонон бедор намудани ҳуввияти миллӣ, гиромидошти арзишҳои миллӣ, таърихиву фарҳангӣ кӯшиш аз тамоми имконот истифода барем.

Омӯзгори калони кафедраи автомобилҳо ва идоракунӣ дар нақлиёт С. Ашӯров дар баромади худ қайд намуд, ки яке аз ҳадафҳои асосии рушди кишвар ба кишвари транзитӣ табдил додани Тоҷикистон ва истифодаи имкониятҳои транзитии он мебошад. Соли 2024-ум дар доираи лоиҳаи сармоягузории давлатӣ 155 км роҳҳои дорои аҳамияти байналмиллаливу ҷумҳуриявӣ, 20 пули бузург ва 3 нақб ба маблағи умумии 4,6 миллиард сомонӣ сохта ба истифода дода шуд. Дастур супоришҳои Сарвари кишвар нисбати тадбирандешиҳо дар соҳаи нақлиёти транзитӣ ва инфрасохторҳои он устодони кафедраро водор месозад, ки ҷиҳати тарбияи кадрҳои баландихтисоси соҳаи нақлиёт бештар кӯшиш ба харҷ диҳанд.

Ҳамоиш бо мубодилаи афкор ҳусни анҷом пазируфт.

Шуъбаи кор бо ВАО