Дарси амалии устоди кафедраи меъмории факултети сохтмон ва нақлиёти Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд Фирӯз Шарипов бо донишҷӯёни соли 4-уми ихтисоси меъморӣ дар Муассисаи давлатии “Маҷмааи фарҳангию таърихии “Қалъаи Хуҷанд” баргузор шуд.

Дар ҷараёни машғулият донишҷӯён бо бинои бисертаъинотаи шакли бионика ва иншооти дигар “Қалъаи Хучанд”, ки бо конструксияҳои миллӣ бунёд шудаанд, аз назди шинос шуданд.

Иттилоъ дода шуд, ки биотехнология як услуби меъморӣ аст, ки бар асоси татбиқи принсипҳои бионӣ — илми амалии татбиқи принсипҳои ташкил, хосиятҳо, вазифаҳо ва сохторҳои табиати зинда ба дастгоҳҳо ва системаҳои техникӣ асос ёфтааст. Биотехнология дар илми меъморӣ, ҳамчун яке аз тамоюлҳо дар модернизми меъмории муосир истифода мешавад, ки диққати сайёҳон ба он бештар ҷалб мегардад.

Донишҷӯён ҳамчунин аз нозукиҳои сохтмони иншооти “Қалъаи Хуҷанд” бо шарҳи мутахассисони соҳа ва устоди донишкада Фирӯз Шарипов маълумот ба даст оварданд.

Бояд гуфт, ки Маҷмааи фарҳангиву таърихии «Қалъаи Хуҷанд» 11-уми апрели соли 2024 қабл бо иштироки Пешвои миллат муҳтарам Эмомалӣ Раҳмон ифтитоҳ гардид.

Қалъаи Хуҷанд ба ҳайси истеҳкоми боэътимод, ки таърихи сеҳазорсола дорад, бо маблағгузории Мақомоти иҷроияи ҳокимияти давлатии вилояти Суғд эҳё ва барқарор карда шудааст.

Дар асоси лоиҳа деворҳои атрофи қалъа, арку дарвозаҳои он барқарор гардида, бунёди бинои маъмурӣ, растаҳои ҳунармандон, ошхонаи миллӣ, намунаи хонаву ҳавлиҳои қадимии шаҳри Хуҷанд, меҳмонхонаву осорхона, чойхона, растаҳои болопӯшида барои омода намудани таомҳои миллии мардуми тоҷик, ҳаммому нуқтаҳои хизматрасонӣ ва дигар иншооти ёрирасон сохта шудаанд.

Дар қисмати ҷанубии Қалъаи Хуҷанд мутобиқ ба талаботи замони имрӯз 8 растаи барҳавои ҳунармандӣ ташкил гардида, дар онҳо маҳсули кори ҳунармандон, ба монанди навъу намудҳои зиёди маҳсулоти қаннодӣ, наққошӣ, кулолгарӣ, кундалнигорӣ, мусаввараҳо, кордҳои гуногун, қолинҳои дастӣ, либосҳои миллии мардонаю занона, адрасу атлас, маснуоти заргарӣ, армуғонҳо ва созҳои миллии мусиқӣ ба намоиш гузошта шудааст.

Шуъбаи иттилоот ва кор бо ВАО