Донишҷӯёни гиромӣ,

Ҷавонони соҳибиродаи Донишкадаи политехникии Донишгоҳи техникии Тоҷикистон!

Фарорасии Рӯзи Ҷавонони Тоҷикистонро дар  остонаи  солгарди ҷашн Рӯзи ваҳдати миллӣ табрику муборакбод гуфта, бароятон дар раҳи илмомӯзӣ ва маърифат муваффақиятҳо таманно дорамю

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ҷавонон ҳамчун нерӯи созанда ва фардосози миллат аз рӯзҳои аввали соҳибистиқлолӣ эътимоди қавӣ дошта, дар яке аз баромадҳояшон таъкид дошта буданд: “Мо бо ҷавонони созандаи худ ифтихор мекунем, чунки ҷавонони даврони соҳибистиқлолии Ватанамон имрӯз бо нангу номуси миллӣ, ташаббусҳои шоиста ва эҳсоси баланди ватандорӣ дар рушди Тоҷикистони азиз ҳиссаи арзишманд мегузоранд ва ба Модар-Ватани худ содиқона хизмат мекунанд”.”.

Боиси ифтихор аст, ки Сарвари давлат дар сиёсати ҷавонпарваронаи хеш барои фароҳам овардани шароити мусоиди таълиму тарбия, тақвияти дониш ва малака майдони фарохро боз намуданд. 

Таъсиси квотаҳо барои ҷавонони дурдаст барои дохил шудан ба муассисаҳои таҳсилоти олии касбӣ, стипендияҳои президентӣ, ҷоизаҳои ба номи “Исмоили Сомонӣ”, “Дурахшандагон” ба номи “Султон Умаров”,  роҳандозӣ шудани Барномаву стратегияҳои давлатӣ ва даҳҳо дигар бозгӯи таваҷҷуҳи рӯзафзуни Сарвари давлат нисбати ҷавонон мебошад. Дар ин росто бо мақсади тақвияти дониш ва маънавиёт, бедор намудани завқи зебоипарастӣ ва ҷалби ҷавонон ба илмҳои риёзӣ, техникаву технологияи муосир бо ташаббус ва ҳидоятҳои созандаи Пешвои муаззами миллат озмунҳои “Фуруғи субҳи доноӣ китоб аст”, “Тоҷикистон Ватани азизи ман”, “Илм фурӯғи маърифат” ва “Тоҷикони оинаи таърихи миллат” таъсис ёфтанд, ки соҳибистеъдодҳоро ба ҳам овард.  Ин иқдом дар қатори ҳазорон – ҳазор ҷавонони бедордил ва навовар ҷомеаи меҳнатии моро барои боз ҳам рушд бахшидани илму муосири миллӣ, татбиқи амалии лоиҳаҳо бештар водор кард. Чанде пеш дар донишкада озмунҳои  “Фуруғи субҳи доноӣ китоб аст”, “Илм фурӯғи маърифат” ва “Беҳтарин ихтироъкорон”, “Тоҷикистон Ватани азизи ман”  дар сатҳи баланд доир шуда, иштирокчиёни фаъол бо Ифтихорномаю тӯҳфаҳои арзишманд қадрдонӣ шуданд. Ҳамзамон донишҷӯёни донишкада дар чандин озмуну олимпиадаҳо, мусобиқаҳои варзишӣ шарафи донишкадаро ҳимоя намуданд, ки ин  бешубҳа ифтихори мост ва роҳбарияти донишкада онҳоро сазовор қадршиносӣ мекунад.

Аз фурсати муносиб истифода бурда ба ҷавонони саодатёри донишкада муроҷиатан таъкид менамоям, ки бештар аз илмҳои муосир огоҳии комил дошта бошанд, аз маҳорат ва корбарии  устодони соҳибзавқ истифода баранд, вақтро беҳтарин дӯсти худ шуморанд. Зеро роҳбарияти донишкада донишҷӯёни соҳибистеъдод, навовар, донишманду варзишкорро ҳамеша дастгирӣ хоҳад кард.

Ин амали шумо барои роҳ надодан барои шомилшавӣ ба ҳизбу ҳаракатҳои ғайриқонунӣ ва бекорӣ сипари боэътимод ҳоҳад шуд. Ҳар он амалҳои нангини террористиву экстремистие, ки имрӯз дар гӯшаву канори олам рух медиҳанд, аксаран дасти ҷавонон аст, ки аз бедонишиву гумроҳӣ ба ин роҳ рафтаанд. Мо бояд ба қадри сулҳ ва оромиву осоиштагӣ расем ва ба қавли Сарвари давлат миллатамонро соҳибӣ намоем ва шароити мусоиди таълимро самаранок истифода барем.

Ин рӯзи саид ва муборакро бори дигар ба донишҷӯёни гиромӣ шодбош мегӯям. Бигзор ҳар он орзую омоле, ки дар дил мепарваред, ҷомаи амал пӯшад.

Рӯзи Ҷавонони Тоҷикистон муборак!