Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар эҳё ва пойдории давлати кунунии тоҷикон саҳми беандоза доранд. Таърихи ғанӣ ва куҳани тоҷикон воқеаҳои сиёсии бузургеро дар хотир дорад, ки ҳар кадоме аз онҳо дар замони худ накши арзандае доранд. Дар ин ҷода Ҷаноби Олӣ чунин менигоранд. «Таърих гувох аст, ки тўли ҳазорсолаҳо оини давлату давлатдории тоҷикон сахтиҳои хорошикани таназзулу эҳё шуданро борхо аз сар гузаронида, аз дунболи ҳар шикасту инқироз, боз эҳёшавӣ ва камолоти афзунтарро ноил гаштааст…» Марҳилаи кунунӣ маҳз бо шарофати Ҷаноби Олӣ марҳилаи еҳё ва камолоти навбатии давлати тоҷикон аст. Бояд тазаккур дод, ки имрӯзҳо низ чи дар ҳаёти сиёсӣ-иҷтимоӣ ва ташаккули иқтисодии кишвар, чи дар баҳамоии тамоми минтақаҳо ва табақаҳои гуногуни ҷамъиятӣ, маҳз Ҷаноби Олӣ бо сифатҳои шахсии волои худ роли ҳалкунандаро доранд. Пайваста дар байни халқ будан, бо забони шевои тоҷикӣ сехрангез суханронӣ кардан, ба ватандӯстию ватандорӣ, сулҳу ваҳдат даъват кардан далели ин гуфтаҳост. Инчунин, Ҷаноби Олӣ, дар эҳё ва пайдо кардани ғояҳои нав ба нав, ки дар такмилу ташаккули давлату миллат саҳми босазое гузошта истодаанд, сараввал таҳлил ва таҳия ва сониян бо шеваи ба худ хос ба халқ расондани онҳо ва ниҳоятан мавриди амал қарор додани онҳо низ хеле фаъол мебошанд. Мисоли оддитарини ин гуфтаҳо, аз тарафи Президенти Ҷумҳурии Тоҷикистон дар Паёми навбатӣ соли 2018-ро «Соли рушди сайёҳӣ ва ҳунарҳои мардумӣ» эълон намудан, мебошад. Зеро сайёҳӣ, аз як тараф, яке аз соҳаҳои муҳимми бо шуғл фаро гирифтани аҳолии қобили меҳнат, баланд бардоштани сатҳи зиндагии мардум, рушди дигар соҳаҳои хизматрасониву истеҳсолӣ бошад, аз тарафи дигар, муаррификунандаи таъриху фарҳанги бою ғанӣ, табиати зебо ва анъанаҳои миллӣ ба ҳисоб меравад.
Зиёда аз ин дар арсаи ҷаҳонӣ низ Ҷаноби олӣ ҳамчун шахсияти арзанда ва сиёсатмадори сатҳи ҷаҳонӣ шинохта шудаанд. Маҳз бо ташаббуси Эмомалӣ Раҳмон таҳи чанд соли охир таваҷҷӯҳи тамоми оламиён ба яке аз масъалаҳои муҳимтарини башарият «бо оби ошомиданӣ таъмин будани инсоният» чалб шуда истодааст.
Дар соли ҷорӣ бо ташаббуси навбатӣ Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар иҷлосияи 72-юми Маҷмаи Умумии Созмони Милали Муттаҳид, ки дар шаҳри Ню - Йорки Иёлоти Муттаҳидаи Америка баргузор гардид, баромад намуданд. Ин баромад ба муносибати оғози Даҳсолаи байналмилалии амал “Об барои рушди устувор, солҳои 2018-2028” бахшида шуда буд. Аз сомонаҳои интернетӣ дарёфт кардан мумкин аст, ки ин баромад дар шакли мақола дар Маҷаллаи “Нигориши СММ” таҳти унвони “Об барои рушди устувор” (Water for Sustainable Development) ба табъ расида, пешкаши доираи васеи хонандагон гардидааст.
Метавон гуфт, ки баромадҳои Ҷаноби Олӣ чи дар дохили кишвар ва чи берун аз он, аз ҷумла Паёмҳое. ки ҳамасола одатан дар охири сол ироа мегарданд, пеш аз ҳама суханҳои самимӣ ва самимонаи Асосгузори сулҳ ва ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ҳар як ҳамватан, ҳар як шаҳрванд ва ҳар як сокини Ҷумҳурӣ мебошанд.
Сониян, ин баромадҳо ва паемҳоро ҳамчун пайғоми пурифтихори насли имрўз ба наслҳои фардо метавон ба қалам дод, ки ҳарфҳои он аз муҳаббат ба Ватан лабрез буда, дар зери ҳар як калимаи он манфиати чи насли имрӯза ва чи насли оянда нуҳуфт кардааст.
Сеюм, баромадҳо ва паёмҳо садои баланду созандаи давлати Тоҷикистон, ки дар марҳилаи навбатии эҳё ва ташаккулёбӣ қарор дорад, миллати тоҷик ва тамоми Тоҷикистониен дар маҷмӯъ ба ҷомеаи ҷаҳонӣ мебошанд.
Чаҳорум, дар низоми сиёсии давлату давлатдорӣ бошад, ин баромадҳо ва паёмҳо бе шакку шубҳа ҳуҷҷатҳои расмӣ ва сарнавиштсозе мебошанд, ки дар ниҳодҳои гуногуни ҷамъиятӣ, колективҳои меҳнатӣ, донишгоҳу донишкадаҳо, макотибҳои таҳсилоти ҳамагонӣ мебоист, ки мавриди таҳлили дақиқ қарор бигиранд.
Ва ниҳоятан ин баромадҳо ва Паёмҳо дар маҷмӯъ барномаи мукаммали рушди давлату миллат, барномаи дурнамои рушди Тоҷикистони азиз дар ҳамаи самтҳо, иҷтимоиву иқтисодӣ, фарҳангиву сиёсӣ, қутбнамои ҳаракати устувор ба сӯйи ояндаи нек ва алгоритми пешбурди кор дар ҳамаи ниҳодҳои ҷамъиятӣ ва давлатӣ мебошанд.
Сардор Ғуломнабиев, устоди ДПДТТ
- Дида шуд: 1770 маротиба
Дар маҷлисгоҳи Донишкадаи политехникии Донишгоҳи техникии Тоҷикистон дар шаҳри Хуҷанд курси бозомӯзӣ барои раисони кумитаҳои иҷроияи ибтидоӣ, ташкилотҳои ибтидоӣ ва кормндони масъули ҲХДТ дар шаҳру ноҳияҳои Хуҷанд, Бӯстон ва Б. Ғафуров дар мавзӯи «Тақвият бахшидани фаъолияти ташкилотҳои ҳизбӣ дар минтақаҳо ва баланд бардоштани дониши сиёсии раисони ташкилотҳои ибтидоӣ» доир гардид.
Дар кори семинар муовини Раиси ҲХДТ Раъно Маҳмудзода, раиси шаҳри Хуҷанд Маъруф Муҳаммадзода, роҳбари дастгоҳи КИМ ҲХДТ Абдураҳмон Хонов, раиси кумиҷроияи вилоятии ҳизб Сарфароз Фаттоҳзода, раиси кумиҷроияи шаҳри ҳизб Маликисломӣ Наим Мунаввар ва роҳбарони ташкилотҳои ибтидоӣ ширкат варзиданд.
Раъно Маҳмудзода ҳадафи баргузории семинарро баён дошта, афзуд, ки ҲХДТ беш аз пеш дар ҳаёти сиёсии кишвар ҷойгоҳи махсусро соҳиб гардида истодааст. Зарур аст, ки масъулияти ҳизбии ҳар як аъзои ҳизб бобати тақвияти дониши сиёсӣ баланд бардошта шавад. Зеро ҳизбиён тӯдакаши ҷомеа ҳастанд ва бояд онҳо ҷомеро ба самти дурусти зиндагӣ раҳнамун кунанд.
Маъруф Муҳаммадзода аз ҳамкории мутақобилаи мақомоти иҷроияи ҳокимияти давлатии шаҳр бо кумиҷроияи шаҳрӣ сухан карда, гуфт, ки Пешвои муаззами миллат муҳтарам Эмомалӣ Раҳмон дар маҷлиси кумитаи иҷроияи Ҳизби Халқии Демократии Тоҷикистон санаи 16 феврали равон самтҳои минбаъдаи фаъолияти хизбиёнро муайян намуда, ҳамчунин барои пешбурди кор дастуру ҳидоятҳо доданд. Аз ҷумла зимни вазифагузориҳо таъкид доштанд, ки раисони кумиҷроияҳои вилоятӣ, шаҳриву ноҳиявӣ, ташкилотҳои ибтидоӣ ва умуман, ҳамаи аъзо ва ҷонибдорони ҳизб бояд ҳамкориро бо роҳбарони мақомоти иҷроияи ҳокимияти давлатии вилоятҳо, шаҳру ноҳияҳо ва комиссияҳои корӣ вусъат бахшида, барои сафарбар кардани соҳибкорону шахсони эҳсонкор ва сокинони шаҳраку деҳот барои таъмиру азнавсозии муассисаҳои таълимӣ чораҷӯӣ намоянд.
Маҳз аз ҳамин вазифагузориҳои роҳбарияти олии ҳизб семинарии имрӯза доир мегардад ва боиси қаноатмандист, ки ҳамкории мақомоти иҷроияи ҳокимияти давлатии шаҳр ва кумиҷроияи шаҳрӣ дар сатҳи хеле баланд ба роҳ монда шудааст. Мо дар симои ҳар яке аз Шумоён роҳбарони ташкилотҳо пуштибон ва пешсафони соҳаро мебинем. Чорабиниҳои фарҳангӣ ва сиёсӣ бо дастгирии аъзоёни ҳизб дар сатҳи баланд доир мегардад. Мо огаҳем, ки кумиҷроияи шаҳрӣ ташаббускори иқдомҳои созанда ҳастанд, ки эътимоду боварии сокинонро нисбати давлат ва Ҳукумати кишвар қавитар месозад. Баргузории иди кӯча ба муносибати Рӯзи парчами миллӣ, аёдати сарбозон ва ташкили чорабиниҳои фарҳангӣ дар қисмҳои низомӣ, ширкати фаъолона дар ҳама гуна ҷашну маросимҳо, аз наздик ошоноӣ пайдо кардан аз рӯзгори кӯдакони ятиму бесаробонмонда, шахсони яккаву танҳо имкон фароҳам меорад, ки мардум бо диду назари тоза ба ояндаи кишвар нигоҳ кунад. Дар ҳамкорӣ бо мақомоти иҷроияи ҳокимияти давлатии шаҳр дар сатҳи баланд доир шудани конференсия вобаста ба Даҳсолаи «Об барои рушди устувор» ва баргузории даҳҳо семинару конфронсҳо вобаста ба хаёти рӯзмарраи сокинон бозгӯи он ҳастанд, ки ҳизб ҳамвора фаъолияташро пеш мебарад.
Дар вазъияти тантанавӣ ба раиси кумиҷроияи вилоятии ҳизб Сарфароз Фаттоҳзода нишони Аълочии маорифи Ҷумҳурии Тоҷикистон ва ба раиси кумитаи иҷроияи ибтидоиИ ҳизбии ба номи Муҳаммад Осимӣ Дилафрӯз Саидӣ медали ҷашнии ҳизб супорида шуд.
Баъдан дар мавзӯи «Усулҳо ва манбаҳои ташвиқоти пешазинтихоботӣ», «Ташаккули эҳсоси ватандӯстӣ ва рушди фарҳанги сиёсии аъзои ҳизб», роҳбари дастгоҳи КИМ ҲХДТ Абдураҳмон Хонов, «Татбиқи қарорҳои Маҷлиси Кумитаи иҷроияи Марказии ҳизб ва амалигардонии ҳадафҳои оинномавӣ ва барномавии ҲХДТ дар ташкилотҳои ибтидоӣ. Дастуру супоришҳои ПЕшвои миллат дар мулоқот бо намояндагони ҷомеаи кишвар» мудири бахши бақайдгир ва кор бо созмонҳои ҷамъиятии дастгоҳи КИМ ҲХДТ Абдураҳим Шоҳиён, «Истифодаи тарзу усулҳои замонавии ВАЩ ва маъракаҳои пешазинтихоботӣ» мудири шуъбаи кор бо ҷавонони дасгоҳи КИМ ҲХДТ Илҳомҷон Ҳомидов ва «Кадрҳо – меҳвари рушд ва устувори давлат» мудири шуъбат таблиғот ва таҳлилии дастгоҳи КИМ ҲХДТ гузоришҳо доданд.
Раъно Маҳмудзода дар фуроварди чорабинӣ барои пешрафтаи минбаъдаи фаъолият дастуру ҳидоятҳо дод.
Бо вазифагузорӣ курси бозомӯзӣ хотима ёфт.
- Дида шуд: 1822 маротиба
Дар Кохи фарҳанги «Суғдиён»-и шаҳри Хуҷанд бо иштироки Вазири маориф ва илми Ҷумҳурии Тоҷикистон Саид Нуриддин Саид, муовинони вазир, муовини Раиси вилоят Назир Ғаффорӣ, муовинони раисони шаҳру навоҳии вилоят, кормандону роҳбарони шуъбаҳои Раёсати маорифи вилоят, сардорони раёсат ва мудирони шуъбаҳои маорифи шаҳру ноҳияҳо, роҳбарони баъзе аз муассисаҳои таҳсилоти миёнаи умумӣ ҷаласаи ҳайати мушовараи сайёри Вазорати маориф ва илми Ҷумҳурии Тоҷикистон баргузор гардид.
Қабл аз оғози чорабинӣ дар саҳни бинои кохи фарҳангӣ намоиши дастовардҳои илмии муассисаҳои таҳсилоти олӣ, миёнаи касбӣ ва муассисаҳои таҳсилоти миёнаи умумӣ ба маърази тамошо гузошта шуд. Вазири маориф ва ҳайати ҳамроҳони ӯ зимни азназаргузаронии намоиши мазкур ба фаъолияти илмӣ, вазъи пояи моддиву техникии донишгоҳу донишкадаҳо баҳои баланд доданд. Ҳамзамон аз ҷониби Вазир дастур дода шуд, ки донишҷӯёну омӯзгорон, муҳассилини муассисаҳои таҳсилоти миёнаи умумӣ дар рушди сайёҳӣ ва ҳунарҳои мардумӣ аз ҳар вақта дида бештар саҳм гиранд.
Ҷаласаи ҳайати мушовараи сайёри Вазорати маориф ва илми Ҷумҳурии Тоҷикистонро бо сухани ифтитоҳии Саид Нуриддин Саид оғоз гардида, мавсуф таъкид дошт, ки соҳаи маорифи вилоят дар ҳама самт пешравиҳои назаррас дорад. Нақши маорифчиёни вилоят дар пешбурди фаъолияти аҳли маорифи кишвар назаррас аст. Ғолибияти навбатии иштирокчиёни олимпиадаи ҷумҳуриявии фаннӣ аз вилоят ин мақоми маорифчиёни Суғдро дар кишвар боз ҳам баланд бардошт.
Ба таъкиди Вазир қаблан чунин ҷаласаҳои сайёр дар дигар минтақаҳои кишвар - шаҳру ноҳияҳои тобеи марказ, вилояти Хатлон ва водии Рашт баргузор гардида, ҳадаф аз наздик ошноӣ пайдо кардан бо ҷараёни таълиму тарбия ва ислоҳи камбудиҳои мавҷудаи соҳа мебошад.
Муовини Вазири маориф ва илми кишвар Латофат Назирӣ оид ба вазъи таълиму тарбия ва сатҳи дониши хонандагон дар муассисаҳои таҳсилоти умумии шаҳру ноҳияҳои вилояти Суғд гузориш дод. Мавсуф баробари зикри муваффақиятҳо аз натиҷаи санҷиши 252 муассисаҳои таълимӣ хулосабардорӣ кард. Қайд шуд, ки алҳол пешорӯи маорифчиёни вилоят мушкилоти ба пуррагӣ фарогир нашудани кӯдакон ба муассисаҳои томактабӣ ва ба кори мураббиягӣ ҷалб шудани мураббияҳои ғайриихтисос, ба таълим машғулшавии беш аз 93 нафар устодони синнашон аз 75 сола боло ҷой доранд. Ҳамчунин зикр шуд, ки 12 нафар хонандагони вилоят аз таҳсил дур мондаанд. Теъдоди омӯзгорони ғайриихтисоси омӯзгорӣ ва ғайриихтисоси фаннӣ дар вилоят ҳамагӣ 480 нафарро ташкил медиҳанд. Маърӯзачӣ иштироки фаъолонаи хонандагони вилоятро дар олимпиадаи ҷумҳуриявӣ махсус таъкид намуда, дастпарварони шаҳру навоҳи Хуҷанд, Исфара, Бобоҷон Ғафуровро намуна ба дигарон ҳисобид. Шогирдони ин шаҳру навоҳии вилоят бо ба даст овардани беш аз 164 зинаҳои ифтихорӣ дар 4 соли охир соҳиби дастоварди назаррас шуданд. Аммо, муассисаҳои таҳсилоти миёнаи умумии шаҳру ноҳияи Истиқлол ва Кӯҳистони Масчоҳ дар давоми чор сол дар ин самт ба ягон пешравӣ соҳиб нашудаанд.
Муовини аввали Вазири маориф ва илми кишвар Раҳматулло Мирбобоев зимни таҳлили вазъи таълиму тарбия дар муассисаҳои таҳсилот олиии вилоят зикр дошт, ки барои боз ҳам хубтару самараноктар гузаштани ҷараёни машғулиятҳо бояд дар муассисаҳои таҳсилоти олӣ воситаҳои аёниии муосир бештар истифода шаванд. Пурқувват будани пояи моддиву техникӣ, самаранок истифода бурдани озмоишгоҳҳо ва вусъати пажӯҳишу истеҳсолот дар паркҳои технологӣ барои омода намудани кадрҳои соҳибтахассуси соҳа заминаи мусоид фароҳам меорад. Аммо вазъи компютеркунонӣ, истифодаи проектору тахтаи электронӣ, дастрасӣ ба шабакаи байналмилалии интернет на дар ҳамаи муассисаҳои таҳсилоти олии касбӣ дар пояи хуб аст. Шумораи устодони ҷавони унвондор низ тақвият мехоҳад. Бояд бештар устодон ба корҳои илимиву пажӯҳишӣ даст зананд.
Вазири маориф ва илми кишвар Саид Нуриддин Саид дар заминаи баромади Раҳматулло Мирбобоев зикр дошт, ки дар қиёс ба дигар мактабҳои олии вилоят раванди компютеркунонӣ, ҷиҳозонидани синфхонаҳо бо проектору тахтаҳои электронӣ, дастрасӣ ба интернет ва тарбияи мутахассисони ҷавон дар самти риёзиву техникӣ дар Донишкадаи полиетехникии Донишгоҳи техникии Тоҷикистон дар шаҳри Хуҷанд хуб аст.
Муовини директори Маркази миллии тестии назди Президенти Ҷумҳурии Тоҷикистон Маҳмадалӣ Раҳмонов оид ба натиҷаҳои фаъолияти Марказ дар доираи имтиҳонҳои марказонидаи дохилшавӣ солҳои 2014-2017 мухтасар ҳисобот дод. Қайд шуд, ки агар дар соли нахустини фаъолият дар маҷмӯъ дар 14 шаҳру навоҳии кишвар нуқтаҳои марказ фаъолият дошта бошанд, пас ҳоло ин теъдод ба 29 адад расидааст. Мавсуф зимни баромад аз он изҳори таассуф намуд, ки на ҳамаи ҳуҷҷатсупоридагон аз сомонаи Марказ, хосса, кабинетҳои инфиродӣ самаранок истифода мебаранд. Масалан, дар соли 2017 аз кабинетҳои инфиродӣ ҳамагӣ 63590 нафар довталабон (55,47 % аз 114639 довталаб тибқи 3 озмуни тақсимот) ва 28737 нафар аз хизматрасонии “Худро бисанҷ” истифода кардаанд. Бинобар мувофиқи мақсад набудани таблиғот, бедор накардан шавқи хонандагон ба илмҳои дақиқу равияи техникӣ сол аз сол теъдоди довталабон ба гурӯҳҳои ихтисоси якуму дуюм кам мешавад. Мавсуф аз камтаваҷҷуҳии масъулони соҳа дар мавриди аз қайдгузарӣ тариқи Маркази миллии тестӣ дар шаҳру навоҳии Истаравшан, Деваштич, Айнӣ ва Кӯҳистони Мастчоҳ изҳори ташвиш кард. Масалан аз шумораи 3899 нафар хатмкунандагони шаҳри Истаравшан ҳамагӣ 1710 нафар аз қайд гузаштаннд, ки 43, 86 дарсадро ташкил медиҳаду халос. Дар маҷмӯъ дар қиёс ба дигар минтақаҳои кишвар холҳои миёнаи довталабони вилояти Суғд аз ҳама баланд аст.
Директори Маркази таҳия, нашр ва муомилоти китобҳои дарсӣ, илмию методии Вазорати маориф ва илми кишвар Комил Исоев дар бораи вазъи таъминоти муассисаҳои таълимии вилоят бо китобҳои дарсӣ гузориш дода, таъкид дошт, ки барои беҳтар шудани сифати таълим аз Вазорати маориф ва илми кишвар дар соли хониши 2017-2018 2285311 адад дастрас гардид.. Аммо маблағи бақияи қарзи китоби истифодашуда то кунун 1 миллиону 923 ҳазору 101,77 сомониро ташкил медиҳад. Ба андешаи Комилшоҳ Исоев яке аз мушкилаҳои соҳа аз ҷониби муассисаҳои таълимӣ ба таври воқеӣ пешниҳод накардани эҳтиёҷот ба китобҳои дарсӣ аст. Мутаассифона, номгӯйи пешниҳодкардаи масъулони таълимгоҳҳо ва шуъбаву раёсатҳои маорифи шаҳру ноҳияҳо ба теъдоди мавҷудаи китобҳои дарсӣ, ки хонандагони мактабҳо ба онҳо ниёз доранд, мувофиқат намекунанд. Аз ин рӯ, норасоии китобҳои дарсӣ дар муассисаҳои таълимӣ ба миён омадааст. Яке аз сабабҳои дигари танқисӣ дар чопи китобҳои дарсӣ сари вақт пардохт нашудани маблағи иҷораи китобҳои дарсӣ аз ҷониби шуъбаҳои маориф мебошад. Мушкилоти дигари фаъолияти китобдорӣ дар муассисаҳои таҳсилоти миёнаи умумӣ ихтисосманд набудани мудирони китобхона ва китобдорон аст.
Директори муассисаи давлатии «Маркази ҷумҳуриявии технологияи информатсионӣ ва коммуникатсионӣ» Киромиддин Назаров таъкид дошт, ки дар вилояти Суғд 19 Марказ ва бахшҳои технологияи информатсионӣ ва коммуникатсия таъсис дода шуда, бо 75 воҳиди корӣ фаъолият менамоянд. Махсусан фаъолияти марказҳои вилоятӣ ва шаҳри Исфара қобили омӯзиш аст. Дар шаҳри Исфара 7 утоқи корӣ мавҷуд аст, ки барои боз ҳам хубтар ҷараён гирифтани таълими технологӣ мусоидат мекунад. Аммо на дар ҳамаи шаҳру ноҳияҳои вилоят Марказҳо бинои алоҳидаи худро доранд. Хуб мешуд, ки дар ин бобат роҳбарони шаҳру ноҳияҳо ба фаъолияти Марказҳои шаҳрҳои Исфара, Панҷакент, Конибодом, Б. Ғафуров, Ашт, Зафаробод ва Спитамен пайравӣ менамуданд.
Сармутахассиси раёсати таҳсилоти ибтидоӣ ва миёнаи касбии Вазорати маориф ва илми Ҷумҳурии Тоҷикистон Ҷалолиддин Амиров дар бораи фаъолияти муассисаҳои таҳсилоти ибтидоӣ ва миёнаи касбии шаҳру ноҳияҳои вилояти Суғд гузориши муфассал ироа дошт. Қайд шуд, ки дар вилоят 22 муассисаи таҳсилоти ибтидоии касбӣ (литсейи касбии техникӣ) фаъолият менамоянд, ки аз рӯйи 30 ихтисос касбҳои коргарӣ мутахассис омода намуда, дар онҳо 6983 нафар хонандагон таҳсил менамоянд.
Ҳамзамон, дар вилоят 21 муассисаи таҳсилоти миёнаи касбӣ фаъолият доранд, ки аз рӯйи равияҳои омӯзгорӣ, тиббӣ, техникӣ-технологӣ, варзиш, иқтисодӣ, кишоварзӣ фарҳангӣ дар доираи 57 ихтисос мутахассисонро омода месозанд ва дорои 19738 нафар донишҷӯ мебошанд. Рафти санҷиш нишон дод, ки биноҳои литсейҳои касбии техникии шаҳру ноҳияҳои Мастчоҳ, саноати дӯзандагии шаҳри Конибодом, литсейи политехникии шаҳри Хуҷанд ва коллеҷҳои омӯзгории ноҳияи Мастчоҳ, коллеҷи тиббии шаҳри Конибодом, коллеҷи тиббии шаҳри Исфара ва санъати шаҳри Хуҷанд, омӯзгории Донишгоҳи давлатии Хуҷанд ба номи академик Б.Ғафуров кӯҳнабуёнд буда, аксарияти биноҳо то ин ҷониб аз таъмири асосӣ бароварда нашудаанд, овезаҳо, расмҳои зиёд истифодашуда, ҷадвали дарсӣ , гӯшаи назоратии муассисҳо ба талабот ҷавобгӯ намебошанд. Ба андешаи Ҷалолиддин Амиров яке аз проблемаи асосии муассисаҳои таълимии мазкур нарасидани китобҳои дарсии фанҳои умумитаълимӣ буда, муассисаҳои таълимии литсейҳои касбии техникии шаҳру ноҳияҳои Истиқлол, политехникии шаҳри Хуҷанд ва коллеҷҳои омӯзгории ДДХ ба номи академик Б.афуров, омӯзгории ноҳияи Мастчоҳ, техникии ғайридавлатии шаҳри Хуҷанд нисбати дастрасии адабиётҳои фанҳои умумитаълимӣ ба Вазорати маориф ва илм муроҷиат накардаанд.
Дар соли таҳсили 2017-2018 аз 22 муассисаи таҳсилоти ибтидоии касбии вилоят танҳо 8 муассисаи таҳсилоти ибтидоии касбӣ ва аз 22 муассисаи таҳсилоти миёнаи касбии вилоят 9 муассисаи таълимӣ барои харидории китобҳои дарсӣ ба Вазорати маориф ва илм муроҷиат намудаанду халос.
Вазири маориф ва илми Ҷумҳурии Тоҷикистон Саид Нуриддин Саид дар рафти ҷаласа оид ба бартараф намудан камбудиҳои мавҷудаи соҳа андеша ва мулоҳизаҳои ҷолиб баён дошт. Бино ба таъкиди Вазир муассисаҳои таҳсилотии вилоят баробари дастовардҳои назаррас аз камбудиҳо орӣ нестанд ва ислоҳи саривақтии онҳо пешбурди фаъолиятро дар соҳа таъмин менамояд.
Муовини Раиси вилоят Назира Ғаффорӣ ба ҳайати гурӯҳҳои кории Вазорат барои таҳлили мӯшикофонаю муфид изҳори сипоси самимӣ намуда, таъкид дошт, ки камбудиҳои мавҷуда ислоҳшавандаанд ва дар муддати кӯтоҳ онҳо бартараф хоҳанд шуд.
Абдусабури Абдуваҳҳоб
- Дида шуд: 1763 маротиба
Соли сеюм аст, ки бо мақсади дар амал татбиқ намудани дастуру ҳидоятҳои Асосгузори сулҳу Ваҳдати миллӣ-Пешвои миллат, муҳтарам Эмомалӣ Раҳмон бобати фароҳам овардани ҷойҳои нави корӣ бо иқдоми Раёсати Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд ярмарка таҳти унвони «Интихоби мутахассисони арзанда» доир мегардад.
Ҳадаф аз баргузории чорабинии мазкур нишон додани самараи фаъолияти маркази мартабаи донишкада ва робитаи онҳо бо корхонаву ташкилотҳо, ҳамчунин таъмин намудани корхонаҳо бо мутахассисони арзанда аз ҳисоби хатмкунандагони донишкада маҳсуб меёбад.
Барои дарёфти мутахассисони арзанда зиёда аз 45 коргоҳу ширкатҳо аз ҷумла, ширкатҳои сохтмонии «Тиниал», «Кедр», «Суғдшаҳрофар», «Равзана пласт», «Еврострой», «ПМК-15» коргоҳҳои истеҳсолии «Дӯсти Амирхон», «САТН», «Хлебокомбинат», «Фаровон», «Файзи Расул», «Зерновая компания», «Зода», «Яхмоси 33» «Ҷавонӣ», «САТН», «Рохи абрешим» Ҷамъияти саҳомии «Сорбон», «Барқи тоҷик», «НБО Қайроққум» бонкҳои «Эсхата», «Матин», «Имон-интернешнл», «Арванд», «Спитаменбонк», ширкат доштанд.
Дар ярмарка ҳамаи кафедраҳои донишкада дастовардҳои илмию истеҳсолии худ, фаъолияти пойгоҳу озмоишгоҳо, мувафаққиятҳои собиқ хатмкунандагони худро пешкаши ҳозирин намуданд.
Дар расми ифтитоҳи чорабинии мазкур муовини директори донишкада, номзади илмҳои физика ва математика Хуршед Мақсудов аз номи Раёсати донишкада шахсан аз номи сарвари он Саидӣ Дилафрӯз Раббизода аҳли иштирокдоронро хайрамақдам гуфта, аз ҷумла таъкид дошт, ки бо ҷойи кори доимӣ таъмин намудани шаҳрвандон яке аз масъалаи муҳим ва омили пешравии иқтисод ва беҳбудии зиндагии аҳолӣ ба ҳисоб меравад. Ва ин нукта пайваста дар суханронии Асосгузори сулҳу ваҳдати миллӣ, Пешвои миллат, мӯҳтарам Эмомалӣ Раҳмон зикр мегардад. Соли гузашта донишкадаро 918 нафар хатм карда, тибқи маълумотҳои оморӣ зиёда аз 95 фоизи хатмкунандагон сохиби ҷойи кори доимӣ гардиданд. Аз он ҷумла тариқи ярмакаи “Интихоби мутахассисони арзанда” зиёда аз 70 хатмкунандагон соҳиби ҷойи корӣ шуданд.
Донишкада имсол тасмим гирифт, ки бо роҳбарони ташкилоту корхонаҳо силсиламулоқотҳо доир намуда, барои пешравии кор, робитаҳоро мустаҳкам намоем.
Зимни вохӯриҳо бо роҳбарони соҳаҳои кишоварзӣ, роҳу нақлиёт, маҳсулоти хӯрока, энергетика, сохтмон ва меъморӣ мушкиливу муаммоҳо гуфта шуд. Таъкид гардид, ки ҷараёни таҷрибаомӯзиҳо тақвият мехоҳад.
Бояд дар назди коргоҳу муассисаҳо кафедраҳои наздидонишкадавӣ таъсис ёбанд, то дониши назариявӣ дар амалия санҷида шавад.
Гулчеҳра Наҷмиддинзода - сардори шуъбаи Агентии меҳнат ва шуғли аҳолии шаҳри Хуҷанд, Ҷумъабой Воҳидов- муовини сармуҳандиси шабакаҳои барқии шаҳри Хуҷанд, Ахмедов Насимҷон-раиси кумитаи иттифоқи касабаи соҳаи сохтмон иқдоми пешгирифтаи донишкадаро дар самти бо ҷойи кор таъмин намудан нек арзёбӣ намуда, аз хатмкунандагон даъват ба амал оварданд, ки ба ҳамаи саволҳои худ аз ташкилотҳои кордеҳ посухҳои мушаххас гирифта, имкониятро хуб истифода баранд.
Сипас мулоқоти озоду шаффофи роҳбарони корхонаҳо бо хатмкунандаи донишкада дар аудитрияҳо сурат гирифт. Кордиҳанда, яъне ташкилоту корхонаҳо фаъолияти худро бо назардошти имкониятҳо ва афзалиятҳо тариқи видероликҳо нишон доданд, ва барои ишғоли вазифаҳои муайяншуда мутахассисони варзидаро интихоб намуданд.
Дар натиҷа зиёда аз 50 нафар хатмкунандагон худи ҳамин рӯз тариқи сӯҳбат тавонистанд пешаки худро чун корманд номнавис кунанд. Қарор шуд, ки хатмкунандагон рӯзҳои наздик бевосита аз ҷараёни фаъолияти корхонаву муассисаҳо ошно шуда, роҳи ояндаи худро муайян мекунанд.
- Дида шуд: 1899 маротиба
Дар доираи таҷлили 21 – солагии Созишномаи Истиқрори сулҳ ва ризоияти миллӣ ва Рӯзи ҷавонони Тоҷикистон субҳи имрӯз дар толори маҷлисгоҳи Донишкадаи политехникии Донишгоҳи техникии Тоҷикистон ҷамъомад доир гардид.
Чорабиниро муовини директор оид ба тарбия Фаррух Аминов ҳусни оғоз бахшида, қайд кард, ки роҳи расидан ба сулҳу суботи сартосари душвор буд. Ба имзо расидани Созишномаи истиқрори сулҳ ва ризояти миллӣ дар Тоҷикистон санаи 27 июни соли 1997 ба таври қатъӣ ба ин ҷанги бародаркуш хотима дод. Хирад ва рушноӣ бар ҷаҳолат ва торикӣ ғолиб омад. Созишномаи Москва дар таърихи халқу кишвари мо чун санаи муқаддас ва сарнавиштсоз бо хатти зарин сабт гардид.
Устоди Донишгоҳи ҳуқуқ, бизнес ва сиёсати Тоҷикистон, аъзои фаъоли Ҳаракати ваҳдати миллӣ ва эҳёи Тоҷикистон Саъдихон Муртазоев дар баромадаш гуфт, ки сад шукр, ки Созишномаи истиқрори сулҳ кинаҳоро дур кард, захмҳоро шифо бахшид, мардуми тоҷикро ба гирди дастурхони ваҳдат ва якдигарфаҳмӣ ҷамъ овард.
Ҳамроҳ Атаева, собиқадори меҳнат ин ҳама ободкориҳоро аз самараи ваҳдату ҳамдилӣ дониста баён дошт, ки маҳз ҳамин оромии ҷомеа роҳи васеъ барои рушд ва такомули ҷавонон кушод. Аз 13 муассисаи замони иттиҳоди шӯравӣ то ба 39 адад расидани шумораи муассисаҳои олӣ худ ҳақиқати бебаҳси гуфтаҳои болоиянд.
Шоира Гулноз бо қироати шеър дар васфи Ватан аз донишҷӯён даъват ба амал овард, ки ба қадри обу хоки диёр расанд, Ватанашонро дӯст дорад. То дӯстори аҳли ҷомеа бошанд.
Чанде аз донишҷӯён аз ғамхориҳои давлат ва Ҳукумат нисбати ҷавонон андешаҳои худро баён доштанд.
- Дида шуд: 1726 маротиба
Ба ифтихори Рӯзи умумиҷаҳонии муҳити зист, ки санаи 5 июн таҷлил карда мешавад, бо иқдоми Раёсати ҳифзи муҳити зисти вилояти Суғд дар толори калони маҷлисгоҳи донишкада чорабинии илмиву омӯзишӣ бо иштироки намояндаи ин ниҳоди давлатӣ Хуршед Саидов доир гардид.
Чорабиниро муовини директор оид ба таълим Хуршед Мақсудов ҳусни ифтитоҳ бахшида, таъкид дошт, ки ҳадаф аз баргузории чорабинии имрӯза баланд бардоштани маърифати экологии донишҷӯён мебошад.
Навори видеоӣ доир ба захираҳои оби Тоҷикистон, ҳифзу нигаҳдошти он дониши аҳли нишастро нисбати табиати биҳиштосои кишвар зиёд намуд.
Дар намоиши видеоӣ омадааст, ки Ҷумҳурии Тоҷикистон дорои чашмаҳои беҳамтои шифобахш ва обҳои минералӣ мебошад. Дарёҳои азими кишвар - Сирдарё, Амударё, Вахш, Панҷ, Зарафшон, натанҳо қисме аз заминҳои Тоҷикистонро шодоб мекунад, балки сарчашмаи асосии оби Осиёи Миёнаро ташаккул медиҳад. Тоҷикистон ҳамчунин дорои кӯлҳои зиёди оби мусафффои нӯшиданӣ буда, шумораи умумии онҳо 1300 адад мебошад. Калонтарини онҳо – Қарокул, Сарез, Ёшилкул ба ҳисоб мераванд. Дар асос кулҳо дар баландии 3500 метр аз сатҳи баҳр ҷойгир мебошанд. Дар баландкӯҳҳои Тоҷикистон захираҳои азими барфу ях ҷамъоварӣ шуда, сарҳади иқлими барфи доимӣ дар баландии 3500-3600 метр дар ҷониби ғарбӣ оғоз мегардад ва дар тарафи шарқӣ бошад, то ба баландии 5800 метр боло мебарояд. Масоҳати пиряхҳои Тоҷикистон зиёда аз 8476 метри мурабаъро ташкил менамояд. мебошад. Дар ин ҷой зиёда аз ҳазор пиряхҳо бо дарозии 1,5 километр ба қайд гирифта шудааст.
Дар гузориши Хуршед Саидов қайд шуд, ки ҷаҳони муосирро дар баробари хатарҳои сиёсӣ ҳамчунин хатарҳои экологӣ ба ташвиш оварда аст. Ҳамасола партовҳои азими коргоҳҳои саноатӣ ба дарёву баҳрҳо мерезанд, ки ин боиси ифлосшавии муҳити зист гардида истодааст. Гузашта аз ин ҷомеаи ҷаҳониро боз як хатари дигар – истифодаи бемайлони зарфҳои пластикӣ ба ташвиш овардааст. То кунун ҳудуди 6,3 миллиард партовҳои пластикӣ дар ҷаҳон ба қайд гирифта шудааст. Мо худ ҳар рӯз шоҳидем, ки дар ҷӯйборҳо, қади кӯчаҳо зарфҳои пластики зиёде хобидаанд. Азбаски зарфҳои пластикӣ зуднестшаванда нестанд, онҳо то дер маҳфуз мемонанд. Ҳоло ҳамасола 8 миллион тонна зарфҳои пластикӣ ба уқёнусҳо рафта мерезанд.
Аз ин хотир соли равон Рӯзи ҳифзи муҳити зист, ки дар кишвари Ҳиндустон доир мегардад, ба мавзӯи «Масъалаҳои мубориза бар зидди зарфҳои пластикӣ» унвон гирифтааст.
Номбурда аз устодон ва донишҷӯён даъват ба амал овард, ки барои тозаву озода нигоҳ доштани муҳити зист аз ҳар вақта дида иқдом варзанд.
Дар идомаи ҷаласа Хуршед Саидов ба фонди китобхонаи донишкада китоби тозанашри «Китоби сурхи Тоҷикистон»-ро кии борат аз ду ҷилд аст тақдим намуд.
- Дида шуд: 1834 маротиба
Бахшида ба эълон гардидани соли 2018- Соли рушди сайёҳӣ ва ҳунарҳои мардумӣ, инчунин бо мақсади фамонидани моҳияти мулоқоти Асосгузори сулҳу ваҳдати миллӣ- Пешвои миллат, Презеденти Ҷумҳурии Тоҷикистон, Раиси ҲХДТ муҳтарам Эмомалӣ Раҳмон бо намояндагони ҷомеаи кишвар ба муносибати фарорасии моҳи шарифи Рамазон дар доираи Рӯзи ҷавонони кишвар дар кумитаи иҷроияи ибтидоии Ҳизби Халқии Демократии Тоҷикистон ба номи «Муҳаммад Осимӣ» бо иштироки аъзоёни ҳизб ҷаласа баргузор гардид.
Чорабиниро аъзои фаъоли ҳизб, муовини директор оид ба таълими ДПДТТ дар шаҳри Хуҷанд Фаррух Аминов ҳусни оғоз бахшида, салому паёми раиси кумитаи иҷроияи ибтидоии ба номи «Муҳаммад Осимӣ» Дилафрӯз Саидиро ба аҳли иштирокдорон расонд.
Котиби кумитаи иҷроияи ибтидоии ба номи «Муҳаммад Осимӣ», номзади илмҳои педагогӣ Хайринисо Темирова зимни суханронии хеш таъкид дошт, ки эълон шудани соли 2018- Соли рушди сайёҳӣ ва ҳунарҳои мардумӣ барои рушди иқтисодиву иҷтимоии кишвар таккони ҷиддие бахшид. Имрӯз аксари мавзеъҳои истироҳатӣ таъмиру тармим шуда, гузашта аз ин, бо ибтикори Пешвои муаззами кишвар таваҷҷӯҳ ба обидаҳо, маконҳои таърихиву бостоншиносӣ зиёдтар гардид. Ҳунармандон бо дасту дили гарм ва руҳияи болида иқдоми Сарвари давлатро дар мавриди аз ҳама гуна андозҳо озод гардидани маҳсули эҷоди ҳунармандон истиқбол намуданд.
Абдусабури Абдуваҳҳоб, аъзои фаъоли кумитаи иҷроияи ибтидоӣ ва котиби масъули нашрияи «Шафақ»-и кумитаи иҷроияи ҲХДТ дар шаҳри Хуҷанд перомуни мулоқоти озоду шаффофи Асосгузори сулҳу ваҳдати миллӣ- Пешвои миллат, Презеденти Ҷумҳурии Тоҷикистон, Раиси ҲХДТ муҳтарам Эмомалӣ Раҳмон бо намояндагони ҷомеаи кишвар сухан ронда, зикр дошт, ки Сарвари давлат бо як дилсӯзӣ аз вазъи геополиткии ҷаҳон ёдовар шуда, ҷомеа, хосса ҷавононро ҳушдор доданд, ки ҳушёрии сиёсиро аз даст надиҳанд. Танҳо мафкураи баланди сиёсӣ, ифтихору ҳуввияти миллӣ, дӯст доштани обу хоки диёр, бетараф набудан аз тақдири ятимону бенавоён ва барҷомондагон миллати моро ба сӯи созандагиву бурдборӣ раҳнамун мекунад.
Фирдавс Саидов, роҳбари ташкилоти ҷамъиятии ҷавонони «Созандагони Ватан»-и назди кумиҷроияи шаҳрӣ дар баромадаш таъкид дошт, ки дар Тоҷикистони соҳибистиқлол бо ҳидояту роҳнамоиҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон масъалаҳои марбут ба ҷавонон яке аз омилҳои асосӣ ва афзалиятнок ба ҳисоб меравад. Зеро дар ҳамаи марҳалаҳо давлат кӯшиш намуда истодааст, ки дар маърифати зеҳниву ақлонии насли ҷавон тарбияи ғоявӣ, миллӣ, сиёсиву ҳуқуқӣ, ахлоқиву ватандӯстӣ, инсондӯстӣ, ташаккули тарзи ҳаёти солим, зебоипарастӣ, тарбияи меҳнатӣ, таҳаммул ва тоқатпазирӣ, масъулиятшиносӣ ва амсоли инҳо ҷой дошта бошад то ҷавонони мо мутобиқи талаби замон ва ҳамчун мутахассисони баландихтисос ба воя расида, ба ҳаёти осоишта роҳёб гарданд. Имрӯз дар сатҳи давлат ва Ҳукумати Ҷумҳурӣ барои рушди такомули зеҳнии ҷавонон корҳои муайяну мушаххас анҷом дода шудааст. Таъсиси квотаи президентӣ, ташкили ҷоизаи Исмоили Сомонӣ, ташкил ва баргузории озмунҳои мухталифи соҳавӣ бори дигар собит менамоянд, ки нерӯи ақлонии ҷавонон таҳрик ёбанд.
Маҳз чунин таваҷҷуҳу ғамхориҳои давлат боис шуданд, ки имрӯз ҷавонон дар ҳама ҷода ташаббускоранд.
Таҷлили Рӯзи ҷавонон ва дар партави ин санаи муборак барои ҷавонон баргузории чорабиниҳои мухталиф барои пешрафти нерӯи зеҳнии ҷавонон таккони ҷиддие ҳоҳад бахшид.
Дар вазъияти тантанавӣ ба чанд нафар донишҷӯёни фаъоли донишкада шаҳодатномаи ҳизбӣ тақдим карда шуд.
- Дида шуд: 1801 маротиба
Дар толори қабули расмии Мақомоти иҷроияи ҳокимияти давлатии вилоят маросими супоридани Гувоҳнома ба иштирокчиёни “Ҳафтаи иштироки донишҷӯёни муассисаҳои таҳсилоти олии касбии вилоят дар идоракунии мақомоти иҷроияи ҳокимияти давлатии вилояти Суғд” баргузор шуд.
Раиси вилояти Суғд Раҷаббой Аҳмадзода зимни суҳбат бо иштирокчиёни Ҳафтаи худидоракунӣ иброз дошт, ки ҷавонон нерӯи пешбаранда ва қишри фаъоли ҷомеа маҳсуб меёбанд. Бо назардошти мақом ва рисолати ҷавонон Ҳукумати Ҷумҳурии Тоҷикистон ва мақомоти иҷроияи ҳокимияти давлатии вилоят пайваста ба ҷавонон ғамхорӣ зоҳир менамоянд ва кӯшиш ба харҷ дода мешавад, ки шароити таҳсил ва зиндагии шоиста фароҳам оварда шавад. Муҳайё намудани шароити арзандаи таҳсил бо тамоми таҷҳизоти навини технологии муосир, сохтмони иншоотҳои таълимии замонавӣ, майдонҳои варзишии ба талабот ҷавобгӯ, муҷаҳҳаз намудани синфхонаҳо ва лабораторияҳои таълимӣ, таъсиси стипендияи Президенти Ҷумҳурии Тоҷикистон ва стипендияи Раиси вилоят барои донишҷуён, магистрантон ва аспирантони муассисаҳои таҳсилоти олӣ ва миёнаи касбӣ аз иқдомҳоест, ки ҷиҳати дастгирии ҷавонон равона гардидааст.
Раиси вилоят ҳамзамон донишҷӯёнро ба Рӯзи ҷавонон табрик гуфта, ба онҳо хониши аъло ва фаъолияти пурсамар таманно кард.
Сипас, дар вазъияти тантанавӣ ба 48 нафар иштирокчии Ҳафтаи худидоракунӣ аз ҷониби Раиси вилоят Гувоҳномаҳо супорида шуд.
Ҷоизи зикр аст, ки Ҳафтаи иштироки донишҷӯёни муассисаҳои таҳсилоти олии касбии вилоят дар идоракунии мақомоти иҷроияи ҳокимияти давлатии вилоят дар асоси қарори Раиси вилоят баргузор гардида, тавассути озмун аз байни зиёда аз 470 нафар 48 донишҷӯи фаъол барои иштирок дар Ҳафтаи худидоракунӣ роҳхат гирифта буданд. 7 майи соли равон донишҷӯён бевосита ба иҷрои вазифаҳо дар мақомоти иҷроияи ҳокимияти давлатии вилоят шурўъ карда, тӯли як ҳафта бо самтҳои фаъолияти воҳидҳои сохторӣ шиносоӣ пайдо намуданд.
Бояд гуфт, ки мақсад аз ҷалби донишҷӯён ба идоракунии давлатӣ пеш аз ҳама шинос намудани онҳо бо низоми роҳбарӣ ва андӯхтани донишу малака дар мақомоти иҷроияи ҳокимияти давлатии вилоят мебошад.
Дар ин рӯз инчунин ба ғолибони озмуни «Маҳфили хушдилон ва ҳозирҷавобон», ки миёни муассисаҳои таҳсилоти олӣ ва миёнаи касбӣ доир шуда буд, Диплом ва мукофотпулиҳо тақдим шуд. Дар озмуни мазкур дастаи Коллеҷи омӯзгории Донишгоҳи давлатии Хуҷанд ба номи академик Бобоҷон Ғафуров соҳиби ҷойи якум, дастаи Донишгоҳи давлатии ҳуқуқ, бизнес ва сиёсати Тоҷикистон соҳиби ҷойи дуюм ва дастаи Донишкадаи политехникии ДТТ соҳиби ҷойи сеюм гардиданд. Ба ғолибон маҷмӯан 18 ҳазор сомонӣ мукокофтпулӣ супорида шуд.
Дар охири чорабинӣ чанде аз донишҷӯён сухан гуфта, миннатдории ҷавонони вилоятро ба Пешвои миллат муҳтарам Эмомалӣ Раҳмон ҷиҳати дастгирии насли ҷавон баён намуданд.
- Дида шуд: 1648 маротиба
Ҳамасола дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд маҳфили ҳозирҷавобон байни факултетҳо гузаронида мешавад. Имсол низ чун анъана маҳфили ҳозирҷавобон байни факултетҳои донишкада дар толори Донишкадаи политехникии Донишгоҳи техникии Тоҷикистон ба номи академик М.Осимӣ дар сатҳи баланд баргузор гашт. Дар озмун намояндагони се факултет, чор даста “Нас не догонят” ва “Неловкий момент” аз факултети муҳандисӣ-иқтисодӣ, “Остров свободы” аз факултети сохтмон ва нақлиёт, “Сборная ФИЭ” аз факултети информатика ва энергетика барои ба дастории “Ҷоми донишкада” қувваозмоӣ намуданд.
Аъзоёни ҳакамон чун анъана Артиқов Толис, Валиев Баҳром, Қаюмов Далер ва устоди донишкада Мазбутов Субҳон буданд.
Маҳфили хушдилон аз руйи шартҳои зерин гузаронида шуд: саломнома, саволу ҷавоб, биатлон, озмуни сардорони даста ва озмуни мусиқавӣ.Ҳамаи дастаҳои маҳфили ҳозирҷавобон аз рӯи шартҳои додашуда дар сатҳи олӣ баромад намуданд. Бештари иштирокчиёни маҳфил гарчанде донишҷӯёни курси 1 бошанд ҳам, маҳорати баланди ҳунарвариро аз рӯи шартҳои озмун нишон доданд.
Бо соҳиб гардидани холҳои баландтарин ва ҳунарнамоии хуб дар ҳамаи шартҳои озмун дастаи « Нас не догонят» ғолиби озмун гардида, Ҷоми маҳфили зарифон ва унвони “Чемпиони донишкада” – ро ба даст овард.
Хиромон Пӯлодова
- Дида шуд: 2216 маротиба
Дар толори Донишкадаи политехникии Донишгоҳи техникии Тоҷикистон ба номи академик М.Осимӣ Конференсияи вилоятии олимон ва муҳаққиқони ҷавони вилояти Суғд дар мавзӯи “Ҷанбаҳои илмӣ, амалӣ ва назариявӣ, натиҷагирӣ аз соли 2017 ҳамчун соли ҷавонон: дастгириҳои Пешвои миллат ва дастоварҳо дар самти сиёсати давлатии ҷавонон дар давраи соҳибистилолӣ” доир гардид.
Дар конференсия беш аз 300 нафар олимон ва муҳаққиқони ҷавон аз муассисаҳои таҳсилоти олии вилоят иштирок намуданд
Зикр гардид, ки Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон сиёсати давлатии ҷавононро яке аз рукнҳои аввалиндараҷаи сиёсати Ҳукумати кишвар ҳисобида, ҳамеша таъкид медоранд, ки ҷавонон нерӯи фаъолу боғайрат, қувваи созандаи ҷомеаи моро ташкил медиҳанд. Онҳоро хуб тарбия кардан ва ба роҳи дурусти зиндагӣ ҳидоят кардан вазифаи муқаддаси ҳамаи аъзои ҷомеа аст. Зеро ҷавонон ободгарони Ватан, соҳибони ояндаи Тоҷикистони мустақилу демократӣ ва такягоҳи боэътимоди давлати соҳибистиқлол мебошанд.
Дар интиҳо иштирокчиён ба Сарвари давлат ҷиҳати дастгирию пуштибонии ҷавонон изҳори миннатдорӣ намуда, сипас аз тарафи Раёсати кор бо ҷавонон ва варзиши вилоят ба иштирокчиёни фаъол ифтихорнома супорида шуд.
- Дида шуд: 1950 маротиба
Санаи 3- май Раиси вилояти Суғд Раҷаббой Аҳмадзода дар доираи чорабиниҳои моҳи ҷавонӣ, ки ба ифтихори Рўзи ҷавонон ҷараён дорад, бо устодон ва донишҷӯёни Донишкадаи политехникии Донишгоҳи техникии Тоҷикистон ба номи академик Муҳаммад Осимӣ мулоқот намуд.
Раиси вилоят Раҷаббой Аҳмадзода сараввал аз намоиши дастовардҳои илмиву истеҳсолии донишкада, ки дар он китобҳои таълифнамудаи олимони донишкада, либосҳои миллии маҳсули дасти тарроҳон, мусаввараҳо, макети биноҳо, лоиҳаҳо ва ихтирооти барномасозон ва энергетикон ба маърази тамошо гузошта шуда буд, боздид намуда, ба дастовардҳои илмӣ-истеҳсолии устодону донишҷӯёни ин муассиса баҳои баланд дод.
Дар ҷараёни мулоқот бо устодону донишҷӯёни Донишкадаи политехникии ДТТ Раиси вилоят аз таваҷҷуҳи хосаи Ҳукумати Ҷумҳурии Тоҷикистон ба соҳаи маориф ва илм ёдовар шуда, иброз дошт, ки барои соҳиби ихтисос ва касбу ҳунар гардидани ҷавонон дар мамлакат шароитҳои зарурӣ фароҳам оварда шуда, муассисаҳои таҳсилоти олии ҷавобгӯ ба талаботи ҷаҳони муосир фаъолият мебаранд. Донишкадаи политехникии ДТТ аз ҷумлаи чунин муассисаҳои таҳсилоти олӣ буда, дорои пояи мустаҳками моддиву техникӣ мебошад ва донишҷӯёнро зарур аст, ки бо истифода аз шароитҳои мавҷуда бештар илмҳои техникиро омӯхта, забонҳои хориҷиро аз худ намоянд ва барои рушди мамлакат саҳми назарраси худро гузоранд.
Зимни мулоқот чанде аз донишҷӯён таклифу пешниҳодҳои худро ироа намуданд ва сохторҳои дахлдор ҷиҳати омӯзиши пешниҳодҳо вазифадор гардиданд.
Дар вазъияти тантанавӣ ба як қатор донишҷӯёни фаъол аз ҷониби Раиси вилоят мукофотпулиҳо тақдим карда шуд.
Дар қисмати фарҳангии чорабинӣ барномаи консертии донишҷӯёни донишкада пешниҳод гардида, либосҳои миллии минтақаҳои гуногуни Тоҷикистон намоиш дода шуд.
Раиси вилоят инчунин бо гуруҳи донишҷӯён ва профессори Донишгоҳи аграрии Қазоқистон, ки дар доираи барномаи GIZ дар Донишкадаи политехникӣ қарор доранд, суҳбат намуда, аз онҳо даъват намуд, ки барои густариши ҳамкориҳо миёни донишгоҳҳои кишварҳои дӯст - Тоҷикистону Қазоқистон саҳмгузор бошанд.
(Маводи муфассал нашр мегардад).
- Дида шуд: 1786 маротиба
