Санаи 24 ноябр сокинони Тоҷикистони соҳибистиқлол Рӯзи Парчами давлатии кишварро таҷлил хоҳанд кард. Соли равон ин ҷашни умумимиллӣ шукӯҳу шаҳомати хоса дорад. Зеро ҳамагӣ чанд рӯз қабл, дар Рӯзи Президенти Ҷумҳурии Тоҷикистон чархаи аввалини Нерӯгоҳи барқи обии «Роғун» ба кор андохта шуд ва ин рӯйдоди муҳими таърихӣ  рӯҳияи идонаи аҳли ҷомеаро боз ҳам болотар бардошт.

 Бояд гуфт, ки дар радифи Рӯзи Президенти Ҷумҳурии Тоҷикистон таҷлили Рӯзи Парчами давлатии мамлакат дар таърихи давлатдории навини миллати мо падидаи тоза мебошад ва барои гиромидошти арзишҳо ва муқаддасоти миллӣ аҳамияти ҳаматарафа дорад.

 Ба қатори ҷашнвораҳои миллӣ ворид гардидани Рӯзи Парчами давлатии Ҷумҳурии Тоҷикистон зарурати таърихӣ ва тақозои замони соҳибистиқлолӣ буда,на танҳо нишонаи эҳтиром ба яке аз муқаддасоти миллист, балки гувоҳи садоқат ба халқу Ватани худ, худогоҳию худшиносии аҳли ҷомеа аст, ки дирӯз, имрӯз ва фардои моро бо ҳам мепайвандад.

Чуноне маълум аст, Парчами давлатӣ имрӯз чун рамзи давлатдории миллати мо дар пештоқи тамоми идораҳои давлатию маъмурӣ, корхонаву муассиса, таълимгоҳу майдонҳои варзишӣ, утоқҳои корӣ ва ҳатто манзилҳои истиқоматии шаҳрвандон мавҷуд мебошад. Муҳимтар аз ҳама дар саҳни бинои маъмурии Созмони Милали Муттаҳид бо парафшонии Худ Ватани моро чун давлати соҳибистиқлоли демократӣ, ҳуқуқбунёд ва дунявӣ ба ҷомеаи башарӣ муаррифӣ менамояд. Аз ин рӯ, ба ҷо овардани эҳтироми он қарзи шаҳрвандии ҳар кадом сокини Тоҷикистон, чих урду чи бузург мебошад.

 Парчамдории миллати куҳанбунёди мо таърихи тӯлонӣ дошта, аз замони пайдоиши қавмҳои ориёӣ ибтидо мегирад. Ба хонандаи тоҷик сифати дирафшҳои Рустаму Сиёвуш ва Коваи оҳангар аз рӯи «Шоҳнома»-и безаволи Фирдавсӣ маълум аст, ки аҳли ҷомеаро ба адлу дод, ватанпарастию хештаншиносу, мардонагиву далерӣ раҳнамун месохтанд.

 Моҳи ноябри соли 1992 дар Иҷлосияи таърихиву тақдирсози Шӯрои Олии Ҷумҳурии Тоҷикистон, ки дар он тақдири ояндаи миллат ва давлати соҳибистиқлоли мо тарҳрезӣ гардида, ба сӯи расидан ба ҳадафҳои умумимиллии сулҳу субот, ваҳдату якдилӣ гузошта шуданд, дар баробари андешидани чораҳои зарурӣ вобаста ба сарҷамъ сохтани мардум ва ҳифзи тамомияти арзии кишвар рамзҳои нахустини мамлакати озоду соҳибихтиёрамон, яъне Парчам ва андаке баъдтар Нишони давлатӣ қабул карда шуданд.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо нишони эҳтирому садоқат ба Парчами давлатиамон бо Фармони худ аз20 ноябри соли 2009 рӯзи 24 ноябрро Рӯзи Парчами давлатии Ҷумҳурии Тоҷикистон эълон намуданд. Ҳамин тавр Рӯзи Парчами давлатӣ ба рӯйхати ҷашнвораҳои миллии мо ворид гардид.

 Пешвои муаззами миллат баъдан ба хотири мақому манзалати Парчами давлатӣ дар рукни давлатдорӣ ғояи бунёди пояи баландтарини онро дар пойтахти Ватанамон пешниҳод карданд, ки аз ҷониби аҳли диёр ҷонибдории комил ёфт. Дар дуюмин солгарди Рӯзи Парчами давлатии Ҷумҳурии Тоҷикистон бунёди ин манорапоя оғоз ёфт ва дар давоми як сол ба итмом расид.

Санаи мубораки 30 августи соли 2011 дар маркази шаҳри Душанбе Парчами давлатии Ватанамон дар манораи 165-метра парафшон гардид, ки паҳнои он 60 метр ва бараш 30 метрро ташкил медиҳад. Ҷойи ифтихору сарфарозист, ки ин рӯйдоди муҳиму фараҳбахш ба Китоби рекордҳои Геннес ворид шуд.

Тибқи Низомнома Парчами давлатӣ бар фарози биноҳои қароргоҳи расмии Президенти Ҷумҳурии Тоҷикистон, Маҷлиси Оливу Ҳукумати мамлакат, вазорату идораҳо, мақомоти иҷроияи ҳокимияти давлатии вилоят ва шаҳру ноҳияҳо,намояндагиҳои дипломатӣ ва консулгариҳои Тоҷикистон дар хориҷи мамлакат, гузаргоҳҳои марзиву гумрукӣ ва дигар ҷойҳо афрохта мешавад. Ҳангоми ғолибият ба даст овардани варзишгарони тоҷик дар мусобиқоти минтақавию баӣналмилалӣ низ Суруди миллии Ҷумҳурии Тоҷикистон садо дода, Парчами давлатии Ватани азизамон парафшон мегардад.

Меҳру садоқат ба арзишҳо ва муқаддасоти миллиро дар дили шаҳрвандон бояд дар синни кӯдакиву наврасӣ бояд ҷойгир кард. Бо назардошти ин, мо омӯзгорон дар рафти машғулиятҳои амаливу назариявӣ ин нуктаи муҳимро ҳамеша ба инобат мегирем ва барои худшиносу худогоҳ, ватандӯсту ватанпараст ба камол расидани шогирдонамон чораҳои қатъӣ меандешем.

 Рӯзи Парчами давлатиро ба кулли ҷомеаи меҳнатии донишкада муборакбод гуфта, барояшон саодату сарбаландӣ таманно менамоям. Бигзор Парчами давлатии Ҷумҳурии Тоҷикистон то абад парафшон бошад ва моро ба сӯи қуллаҳои баланди рушду ободӣ роҳнамоӣ кунад!

Нашр шуд: 23 ноябри 2018

Дида шуд: 1536 маротиба

Сокинони ваҳдатшиори кишварамон имрӯзҳо дар руҳияи худшиносиву ифтихори миллӣ ҷашни Рӯзи Президенти Ҷумҳурии Тоҷикистонро таҷлил мекунанд.

Воқеан ҳам он миллате саодатманд ва ғолиб  аст, ки сарвараш оқилу хирадманд ва тӯдакашу соҳибфазилат  бошад. Хушбахтона,  миллати тоҷик дар симои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамин хислати олиҳиматӣ ва накӯпешагиро мебинанд. Зеро тӯли 27 соли роҳбарӣ ин марди шариф як кишвари ҷангзадаро ба давлати ободу пешрафта ва муҳимтар аз ҳама тинҷу ором табдил доданд.

 Боиси ифтихор  мо аст, ки Пешвои муаззами кишвар дар сатҳи байналмилалӣ чун  шахсияти тавоно, ташабусскору дилсӯз мешиносанду эътироф менамоянд. Махсусан иқдомҳои беназири  роҳбари давлат  дар самти гиромидошти неъмати бебаҳои табиат – обро кулли сокинони сайёра бо саодатмандӣ қабул намуданд. Яъне, барои ин марди соҳибназар ва фазилатпеша тақдири натанҳо тоҷикон, балки кулли бошандагони сайёра бефарқ нест. Пас мо миллати хушбахтем, ки чунин Сарвари сатҳи ҷаҳонӣ дорем.

Дар идомаи корҳои созандагиву бунёдкории Пешвои муаззами миллат  дар саҳифаи таърихи  кишварамон  санаи 16 – ноябр чун рӯзи таърихӣ боқӣ хоҳад  монд.   Лозим ба зикр аст, ки барои миллати тоҷик соли 2018 чун соли таърихиву хотирмон хоҳад монд. Чунки баъди 27 соли соҳибистиқлолӣ риштаҳои дӯстии ду миллати бо ҳам ҳамсоя ва фарҳангу забони муштарак тоҷику ӯзбек боз баста шуд. Ва моро чанд рӯз дигар пайғоми хуши дигаре интизор аст.

Зеро пас аз 44 соли оғози сохтмони нерӯгоҳи азими «Роғун»  ба шарофати сиёсати дурбинона, далериву иродатмандӣ, мардумсолориву ҳушмандии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси ҲХДТ муҳтарам Эмомалӣ Раҳмон чархаи аввали Нерӯгоҳи барқии обии «Роғун» ба фаъолият шурӯъ мекунад. Ва ин имконият медиҳад, ки кишвари мо ба истиқлолияти воқеии энергетикӣ ноил шавад.

Гузашта аз ин иқтидори истеҳсоли нерӯгоҳ имконият фароҳам меоварад, ки  мо дар тамоми фаслҳои сол нерӯи барқи изофагиро ба хориҷа фурӯшем. Сарвари давлат ҳанӯз соли 2008 замони кишвар зимистони сахту сангинро паси сар намуд,дар як сухаронии хеш таъкид дошта буданд. «Мо вазифадорем, ки ин ҳадафи стратегиро дар солҳои наздиктарин бо истифода аз тамоми захираву имкониятҳо ва пеш аз ҳама бо дарки ин асл, ки таъмини истиқлолияти энергетикӣ масъалаи нангу номуси миллӣ мебошад, ҳатман амалӣ намоем».

Инак, бо гузашти 10- сол, ин тарҳи азим ба воқеият табдил хоҳад ёфт. Ҳарчанд дар тӯли беш аз 40 сол, ҳатто замони шӯравӣ низ роҳбарону масъулини сатҳи болоӣ бунёди ин иншооти бузургро афсонае беш намедонистанд, роҳбари давлат бо ҷиддияти том, масъулияти баланди давлатдорӣ новобаста аз мушкилоти молиявӣ ва дигар монеагузориҳо тавонистанд, орзуҳои чандинсолаи мардуми ваҳдатшиори кишварро дар ҷомеа амалӣ кунанд.

Пешвои муаззами кишвар хуб медонистанд, ки иқтидори истеҳсолии нерӯи барқи кишварро бе нерӯгоҳи обии барқии “Роғун” тасаввур карда намешавад. Иншооти ҳаётан муҳим бо истифода аз технологияҳои беҳтарину навтарин ва мутобиқ ба талаботи стандартҳои байналмилалии сифату бехатарӣ аз ҷониби ширкати “Салини Импре — ҷило”-и Италия, ки дар соҳаи сохтмони иншооти гидротехникӣ дар арсаи байналмилалӣ яке аз ширкатҳои соҳибтаҷриба ба шумор меравад бунёд хоҳад шуд.

Мавриди баҳрабардорӣ қарор гирифтани агрегатҳои аввалини нерӯгоҳи мазкур давоми солҳои 2018-2019 имкон медиҳад, ки талаботи иқтисодиёти Тоҷикистон ба нерӯи барқ хеле хуб гардонида шуда, барои содироти он имконияти васеъ ба вуҷуд ояд. Он рӯз дур нест, ки Тоҷикистон аз мамлакати ба содиркунандаи нерӯи барқи арзон мубаддал хоҳад гашт ва на танҳо иқтисодиёти худи ҷумҳурӣ, балки минтақа ва давлатҳои ҳамсояи дуру наздикро таҳким хоҳад бахшид.

Аз ҷониби дигар, мавриди истифода қарор гирифтани ин нерӯгоҳи бузурги аср – «Роғун» барои ба фаъолият шурӯъ намудани корхонаҳои нави саноатӣ, бо ҷойи кори доимӣ таъмин гардидани шаҳрвандони бекор, коҳиш додани сафи муҳоҷирони меҳнатӣ, истифодаи қобили меҳнати корӣ ба рушди истеҳсолоти ватанӣ ва ниҳоят барои баланд бардоштани сатҳи некӯаҳволии мардум таъсири мусбӣ мерасонад. 

Иқдоми неки сарвари дурандеш, поягузори сулҳу ваҳдати миллӣ дар Тоҷикистон, Президенти мамлакат муҳтарам Эмомалӣ Раҳмон ба дили ҳар як шаҳрванди Тоҷикистон шодию фараҳ овард ва минбаъд ин тадбири муҳим ба рушди иқтисодиёту иҷтимоиёт, таъмини комили энергетикӣ дар кишвар таъсири мусбӣ расонида, ба ҳар як хонадони тоҷикистонӣ равшанӣ хоҳад бахшид.

Нашр шуд: 16 ноябри 2018

Дида шуд: 1460 маротиба

Давоми санаҳои 19-23 ноябри соли равон, дар муддати  5 рӯзи корӣ, дар ДПДТТ ба номи академик М.С.Осимӣ дар шаҳри Хуҷанд семинар дар мавзӯи “Технологияи пухтани маҳсулотҳои нонӣ” баргузор мегардад.

Санаи 19 ноябр, дар нахустин рӯзи кории семинар меҳмонони олиқадр, намояндагони ширкатҳои гуногуни истеҳсолкунандаи орд ва маҳсулотҳои нонӣ ширкат варзиданд. Намояндагони ширкатҳо меҳмони донишкада гашта, дар лабораторияе, ки маҳз барои пухтани маҳсулотҳои нонӣ пешбинӣ шудааст, таҷрибаҳо мегузаронанд. Ҳамчунин, мудири кафедраи “Агротехнология ва маҳсулоти хӯрока” Комилова Д., сардори лабороторияи кафедра  Раҳмонова Ҷ, донишҷӯёни курси 4-уми ихтисоси 49.01.01 Мираҳматова М. ва Назиров Ф. ширкат варзида истодааст.

Меҳмонон ва ширкаткунандагони семинарро кормандони Шуъбаи робитаҳои хориҷии донишкада Мақсудов Ш., Набиев Д., Ҳакимов Д. дар сатҳи баланди меҳмоннавозии тоҷикон пешвоз гирифта, кори семинарро оғоз намуданд. Баъди шиносоӣ бо ҳайати иштирокчиёни семинар таҷҳизотҳое, ки бо дастгирии барномаи GIZ лабораторияи маҳсулотҳои нонии донишкада ҷиҳозонида шудааст, намоиш дода шуд.

Намояндаи лоиҳаи GIZ Франс Холраҳер доир ба таҷҳизотҳои муосири нонбарорӣ тариқи намоиши слайд баромад намуда, ҳозиринро ба 4 гурӯҳ барои кор бо 4 таҷҳизоти нав ҷудо намуд.

Баъдан иштирокчиёни семинар ба лабораторияи нави истеҳсоли маҳсулотҳои нонӣ сафарбар шуда, аз рӯи дастурамал таҷҳизотҳо, аз ҷумла тафдон барои пухтани маҳсулотҳои нонӣ, таҷҳизот барои нигоҳдории он, тарозуи сенсорӣ, осиёи лабораторӣ ва ченкунии намӣ, таҷҳизоти ченкунии миқдори афтишро насб карда, бо маҳсулотҳо таҳлил гузарониданд.

Дар пешравии равобити донишкада бо лоиҳаҳои гуногуни хориҷӣ саҳми Шуъбаи робитаҳои хориҷӣ бисёр назаррас аст, зеро ҳамкориҳои дуҷонибаи хориҷӣ вусъат ёфта, самараҳои он хеле хуб арзёбӣ гардида истодааст.

Бояд гуфт, ки таҳлил, муқоиса ва хулосабарории таҷрибаҳо дар лаборатория санаи 20 ноябр баргузор гардида, боз навгониҳои дигар дар пеш аст. Аз рафти семинар ва навгониҳои он давоми ҳафта маълумоти бештар хоҳем дод.

Нашр шуд: 20 ноябри 2018

Дида шуд: 1493 маротиба

Таҳти чунин унвон конференсияи илмӣ-амалии вилоятӣ бо ташаббуси Раиси вилояти Суғд муҳтарам Раҷаббой Аҳмадзода ва Раёсати кор бо ҷавонон ва варзиши вилоят дар Донишкадаи политехникии Донишгоҳи техникии Тоҷикистон ба номи академик М.Осимӣ баргузор гардид. Конференсия мазкур ба маросими ба истифода додани чархи аввали НОБ-и Роғун бахшида шуд.

Дар конференсия устодон ва донишҷӯёни фаъол, намояндагони Раёсати ҷавонон ва донишҷӯён аз ДДХ ба номи академик Б.Ғафуров, ДДҲБСТ, ДИСДДТТ, ДКМТ, ДПДТТ, Коллеҷи тиббии шаҳри Хуҷанд ва Коллеҷи омӯзгорӣ, Раёсати ҷавонон  ширкат варзиданд.

Конференсияро муовини директори ДПДТТ оид ба илм Холматов Т.Ё ҳусни ифтитоҳ бахшида, ҳамагонро бо ҷашнҳои бузурги дар пешистода аз номи директори донишкада Саидӣ Дилафрӯз Раббизода табрик намуда, бо барномаи конференсия ва меҳмонони олиқадр шинос гардонд.

Сараввал маърузаи сардори Раёсати кор бо ҷавонон ва варзиши вилоят Суғд Каримов М. оид ба мавзӯи “Бунёди НОБ-и Роғун аз ибтикороти кори Пешвои миллат сарчашма мегирад” шунида шуд. Зимни маърузаи хеш Каримов М. қайд намуданд, ки дар ҳақиқат бунёди Роғун иншооти бузурги аср маҳсуб ёфта, аҳамияти таърихӣ дорад. Ҳамчунин қайд карда шуд, ки  Роғун ҳамагӣ 17 миллирад Квт қувваи барқ истеҳсол менамояд, ки аз НОБ-и Норак 1,5 баробар зиёд мебошад.

Баъдан Раиси олимони ҷавони вилояти Суғд Саидзода Ш. таҳти унвони “Роғун – заминаи амалигардонии ҳадафи стратегии кишвар” баромад намуда, оид ба бадастории истиқлолияти энергетикии кишвар суханронӣ намуд.

Номзади илмҳои таърих, дотсент, устоди ДПДТТ Ғозиева М. оид ба саҳми Эмомалӣ Раҳмон дар омӯзиши фанни таърих баромад намуда, оид ба асарҳои Пешвои миллат маълумот доданд.

Раиси Раёсати ҷавонони ДПДТТ Масаидов Ҷамшед бо маърузаи “Роғун-равшангари имрӯзу фардо” баромад намуда, қайд намуд: “Бо ибтикори Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мо қаҳрамонон ва фарзанди фарзонаи миллатамонро хубтару беҳтар шинохтем. Ҳоло шароит фароҳам овардааст, ки шеваи худшиносӣ дар ҷомеа торафт баланд мегардад. Вақте як миллат ба худшиносӣ мерасад, ин маънии онро дорад, ки он миллатро аҳли башар мешиносад. Ҷомеаи ҷаҳонӣ Тоҷикистонро ҳамчун як давлати соҳибтамаддуну сулҳофар мешиносанд ва эътироф мекунанд. Имрӯз бошад, мо бо меҳнату заҳмати худ НОБ-и Роғунро бунёд намуда истода, чархи аввали онро ба истифода хоҳем дод.” Ҳакимов Н. – раиси волонтёрони вилояти Суғд ба мавзӯи “Конститутсия-бахтномаи миллат” баромад намуд.

Дар анҷоми конференсия ба ҷавонони фаъоли вилоят Сипоснома ва Ифтихорномаҳо бо туҳфаи хотиравӣ дар вазъияти тантанавӣ супорида шуд. Бо ҳамин кори конференсия бахшида ба фаоългардонии чархи аввали НОБ-и Роғун ҳусни анҷом ёфт.  

Нашр шуд: 14 ноябри 2018

Дида шуд: 1509 маротиба

Санаи 19 ноябри соли равон дар толори ДПДТТ ба номи академик М.С.Осимӣ даври дуввуми озмуни донишкадавии “Донишҷӯи сол” баргузор гардид.

Бояд қайд кард, ки даври аввали озмуни мазкур моҳи октябри соли равон бо гирифтани иншо ва супоридани имтиҳон (дар шакли тестӣ)аз фанҳои  адабиёт, забони русӣ, забони англисӣ, таърих, ҳуқуқ баргузор гардида буд.  Иншоҳо дар мавзуъҳои  “Ҷавонон  - пайрави Пешвои миллат”, “Дастовардҳои даврони Истиқлол”, “Об – неъмати бебаҳо”, “Иҷлосия ва нақши он дар раванди сулҳи тоҷикон” пешниҳод карда шуда буд, ки донишҷӯён интихобан ба яке аз онҳо иншои худро навиштанд.

Аз ҳамаи иштирокчиёни озмун 15 нафар донишҷӯёне, ки холҳои баландро соҳиб гардида, дониш ва малакаи хуб нишон доданд, ба даври дуввум роҳхат гирифтанд. Донишҷӯёни курсҳо ва ихтисосҳои гуногун Толиббоев Шаҳзод Абдуқодирович, Абдуллоева Кароматхон Неъматҷоновна, Илҳомҷон Сулаймони, Ҳакимхоҷаев Низомиддин Сироҷидинович, Ҷӯраев Мӯҳсинҷон Мақсудҷонович, Сангинов Саидиқбол Исломҷонович, Алибоев Рауфҷон Толибович, Хуҷаев Нуралӣ Бегалиевич, Солиева Муқаддам Қаҳҳоровна, Мамадҷонова Мавлуда Илҳомҷоновна, Ахмедова Мастона Раҳматовна, Акрамов Ҷасурхон Ботурхонович, Шодмонов Шодмонбек Урунбекович, Қодиров Абдуқаюм Абдуносирович, Эргашев Акмалҷон Гавҳаралиевич ба даври ниҳоӣ роҳхат гирифта, иштирок намуданд.

Даври дуввуми озмун бошад аз 2 марҳила иборат аст: худмуаррифии иштирокчӣ (бо истифода аз слайд-презентатсия) ва саволу ҷавоб вобаста ба мавзуъҳои ихтисосӣ, дастовардҳои даврони соҳибистиқлолӣ.

Ҳайати комиссияи озмуни донишкадавии “Донишҷӯи сол”  Аминов Ф.А. – муовини директор оид ба тарбия, Холматов Т.Ё. – муовини директор оид ба илм ва инноватсия, Акрамова З.Б. – сардори шуъбаи илм ва инноватсия, Бобоева Т.Р.–мудири кафедраи забони давлатӣ ва ҷомеашиносӣ, Темурова М.Қ. – мудири шуъбаи тарбия, котиби комиссия ба сатҳи дониш ва маҳорати донишҷӯён аз рӯи меъёрҳои муайян холгузорӣ намуданд.

Ҳамин тавр, бо бадастории холи баландтарин  85,4 ва маҳорату малакаи баланди донишандӯзӣ донишҷӯи курси 2, ихтисоси 25.01.07тБ Солиева Муқаддам ғолиби озмуни донишкадавии “Донишҷӯи сол” гардид.

Нашр шуд: 20 ноябри 2018

Дида шуд: 1685 маротиба

Барномаҳои GIZ ва HECAFS, ки асосан бо факултети муҳандисӣ-технологӣ, кафедраи “Агротехнология ва маҳсулоти хӯрока” ҳамкорӣ ва робитаи қавӣ дорад, боз як иқдоми хуберо баҳри баландбардории сатҳи дониши донишҷӯён пеш гирифт.

Дар доираи ҳамкорӣ бо лоиҳаҳои мазкур ва робитаҳои дуҷониба  давоми 1 моҳи охир таҷҳизот ба лабораторияи таҳлили маҳсулоти хӯрокаи факултет ба маблағи 103 989 евро харидорӣ карда шуд.

Бояд қайд кард, ки якчанд таҷҳизотҳои лабораторияҳои таҳлили маҳсулоти хӯрокаи факултети муҳандисӣ-технологӣ, аз қабили лабораторияи сенсорӣ, маҳз бо дастгирӣ ва маблағгузории  лоиҳаи GIZ харидорӣ ва насб шудааст.

Маврид ба зикр аст, ки шурӯъ аз соли нави таҳсил дар доираи лоиҳаи “Таҳсилоти олӣ барои низоми озуқаворӣ ва стандартҳо дар Осиёи Марказӣ” – и барномаи Erasmus+ 11 нафар устодон аз давлатҳои Латвия, Литва ва Полша барои донишҷӯёни донишкада, ки дар ихтисоси технологияи маҳсулоти хӯрока ва агротехнологияи таҳсил доранд, дарс мегӯянд.

Нашр шуд: 13 ноябри 2018

Дида шуд: 1491 маротиба

Санаи 16 ноябр дар таърихи навини миллати тоҷик бо ҳарфҳои заррин сабт гардида, дар хотири миллати тоҷдораш абадан нақши устувор хоҳад гузошт. Барои мардуми заҳматқарини ин сарзамини соҳибихтиёр ид болои ид аст.

Яке аз чунин лаҳзаҳои  ҳасос, ки дар сарнавишти халқу миллат дурнамои нек аст, ин маросими ба корандозии аввалин агрегати НОБ-и Роғун мебошад.  Ин нерӯгоҳ бо заҳмату талошҳои бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва меҳнати софдилонаи мардуми қавииродаи Тоҷикистон бунёд шуда истодааст. Нерӯгоҳи обии барқии  Роғун барои Тоҷикистон иншооти ҳаётан муҳим маҳсуб ёфта, бо истифода аз технологияҳои беҳтарину навтарини мутобиқ ба талаботи стандартҳои байналмилалӣ сохта шуда истодааст.

Бахшида ба ин ҷашни бузург санаи 16 ноябри соли равон дар толори ДПДТТ ба номи М.С. Осимӣ барномаи фарҳангии бошукуҳ баргузор гардид. Сараввал устоди кафедраи “Таъминоти барқ”-и факултети информатика ва энергетика, дотсент Раҳимов О.С. оид ба НОБ-и Роғун ва тарзи сохти он маълумот доданд. Аз ҷониби донишҷӯён шеърҳо дар васфи Ватан ва Тоҷикистон қироат карда шуд.  

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати иштирок дар маросими ба кор даровардани агрегати якуми Неругоҳи барқи обии “Роғун” ба шаҳри Роғун ташриф оварданд, ки  тариқи пахши мустақим намоиш дода шуд. Ҷомеаи устодону донишҷӯён, аҳли кормандон бо як нигоҳи нек ва диққати том ин лаҳзаҳои таърихиро тамошо намуданд.

Дар ин маросими таърихӣ меҳмонони олиқадр дар шаҳри Роғун ҳузур доштанд. Барои иштирок дар ин рӯйдоди таърихӣ намояндагони воломақоми кишварҳои гуногуни олам, аз ҷумла Федератсияи Россия, Ҷумҳуриҳои Италия, Ҳиндустон, Покистон, Афғонистон, Белорус, Украина, Ӯзбекистон, Қазоқистон, Қирғизистон, дигар давлатҳо ва ташкилоту созмонҳои бонуфузи минтақавию байналмилалӣ ба Тоҷикистон ташриф овардаанд.

Пешвои миллат муҳтарам Эмомалӣ Раҳмон нахуст дар маҳалли сохтмони Неругоҳи барқи обии Роғун хатти баландшиддати интиқоли неруи барқи 500 кВ-и “Душанбе-Роғун”-ро бо пахши васлак ба истифода дода, орзуву омоли деринаи миллати тоҷикро ҷомаи амал пӯшониданд.

Ин иқдоми неки сарвари дурандеш, поягузори сулҳу ваҳдати миллӣ дар Тоҷикистон, Президенти кишвар муҳтарам Эмомалӣ Раҳмон ба дили ҳар як тоҷикистонӣ шодию фараҳ овард.

Нашр шуд: 19 ноябри 2018

Дида шуд: 1515 маротиба

Донишкадаи политехникии Донишгоҳи техникии Тоҷикистон ба номи академик М.Осимӣ дар самти вусъатёбӣ ва рушди устувор доимо кӯшиш ба харҷ дода, ҳамеша аз пайи наовариҳои соҳаҳои мухталифи хоҷагии халқ мебошад.

Ҳамагон огаҳ ҳастанд, ки робитаи донишкада бо донишгоҳҳои бурунмарзӣ хеле қавӣ буда, ҳамкориҳои тарафайн  самараи худро дода истодаанд.

Маҳз ба ҳамин хотир, намояндагони Донишгоҳи технологии Гуилини Ҷумҳурии мардумии Чин Хонгу Зенг, Ксияопенг Жанг, Хуа Лин, Хайксянг Ли ба донишкадаи мо ташриф оварда, аз ҷараёни таълиму тарбия, пояи моддиву техникӣ наздиктар шиносоӣ пайдо намуданд.

Ҳайати меҳмононро директори донишкада, номзади илмҳои техникӣ Саидӣ Дилафрӯз Раббизода ба ҳузур пазируфт.

Зимни суҳбати озоду самимӣ меҳмонон аз он изҳори хушнудӣ намуданд, ки дидани шаҳри зебою қадимаи Хуҷанд насибашон гашт. Меҳмонони олиқадр аз лабораторияҳои муосири факултетҳои информатика ва энергетика, сохтмон ва нақлиёт ва муҳандисӣ-технологӣ дидан намуда, бевосита бо донишҷӯён сӯҳбати гарму самимӣ намуданд. Меҳмонон ба шароити таълиму тарбия, истифодаи технологияи муосир дар раванди таълим баҳои баланд дода, изҳори боварӣ  намуданд, ки робитаи мустаҳками ду муассисаи олӣ барои боз ҳам баланд шудани мавқеъ ва мақоми донишкада мусоидат мекунад.  

Дар назар аст, ки донишкада бо Донишгоҳи технологии Гуилини Ҷумҳурии мардумии  Чин  се самт шартнома -  ташкили факултети муҳити зист дар донишкада, ташкили лабораторияҳо, таҳсил ва таҷрибаомӯзии донишҷӯён, ивази таҷрибаи устодон ба таври муштарак мебандад.

Директори донишкада Дилафрӯз Саидӣ зимни суҳбат қайд намуд, ки бо дастовардҳои Донишгоҳи Гуилини Ҷумҳурии мардумии Чин аз наздик ошоноӣ дорад  ва дар яке аз форумҳои он иштирок ва суханронӣ намуда буд. Алҳол як донишҷӯи донишкада дар ин донишгоҳ дар асоси шартнома таҳсил дорад. Ба меҳмонон иттилоъ дода шуд, ки донишкада аз рӯи 19 ихтисос кадрҳо омода мекунад. Соли равон дар пояи факултети муҳандисӣ-технологӣ барои 20 ҷойи ихтисоси ҳифз муҳтити зист иҷозатномаи Вазорати маориф ва илми Ҷумҳурии Тоҷикистон гирифта шудааст.

Ёдовар мешавем, ки Донишгоҳи Гуилини Ҷумҳурии мардумии Чин дар шаҳри зебою афсонавии Гуилин соли 1956 сохта шуда, яке аз муассисаҳои пешрафтаи ин кишвар буда, алҳол дар 17 факултети донишгоҳ наздики 19 ҳазор донишҷӯён таҳсили илм доранд. Донишҷӯёни  беш аз 30 давлати хориҷӣ инҷоро хонаи дуюми худ меҳисобанд. Зеро ин ҷо барои такмили дониш ҳамаи шароитҳо муҳайё мебошад.

Бо як ҷаҳон таассурот ҳайати меҳмонон аз донишкада рафтанд. 

Нашр шуд: 13 ноябри 2018

Дида шуд: 1553 маротиба

Ба ифтихори Рӯзи Президенти Ҷумҳурии Тоҷикистон, солгарди ҷашни Иҷлосияи 16- уми Шӯрои Олӣ ва ба фаъолият шуруъ намудани чархаи аввали нерӯгоҳи барқии обии Роғун  санаи 15 ноябри соли равон дар ДПДТТ ба номи академик М.С.Осимӣ конференсияи илмӣ-амалии ҷумҳуриявӣ таҳти унвони “Дурнамо ва омилҳои таъмини рушди устувори иқтисодиёт” доир гардид.

Дар кори  конференсия муовини Раиси вилояти Суғд Анвар Яъқубӣ, устодони муассисаҳои олии вилоят,  мутахассисону коршиносони  соҳа ва устодону донишҷӯёни  донишкада ширкат варзиданд.

Муовини директор оид ба илм ва инноатсия, номзади илмҳои иқтисодӣ Турсун Холматов паёми шодбошии  директори донишкада, номзади илмҳои техникӣ Саидӣ Дилафрӯз Раббизодаро ба самъи ҳозирин расонид. Зикр шуд, ки конференсияи илмӣ – амалии имрӯза дар рӯзҳое доир мешавад, ки сокинони ваҳдатшиори кишварамон дар руҳияи худшиносиву ифтихори миллӣ  ҷашни Рӯзи Президенти Ҷумҳурии Тоҷикистонро таҷлил мекунанд. Ноил гардидан ба рушди устувори иқтисодиёт – яке аз масъалаҳои муҳим мебошад, ки тамоми мамлакатҳои ҷаҳон барои таъмини он кӯшиш доранд. Мақсад аз ин, ҳимояи базаи захиравӣ ва муҳити атроф бо назардошти манфиати насли оянда мебошад. Таъмини рушди иқтисодӣ чунин ҳолати иқтисодиёт аст, ки дар он устувории параметрҳои ниҳоии нишондиҳандаҳои истеҳсолӣ, иҷтимоӣ ва иқтисодӣ нигоҳ дошта мешавад.”

Баъдан ҳозиринро бо барнома ва раванди кори конференсия шинос намуданд. Дар конференсияи мазкур 7 баромад оид ба мавзуъҳои гуногуни таъминоти рушди иқтисодӣ  дар назар дошта шуда буд.

Муовини Раиси вилояти Суғд Анвар Яъқубӣ оид ба се ҳадафи асосии стратегии кишвар – баромадан аз бунбасти коммуникатсионӣ, таъмини амнияти озуқаворӣ ва расидан ба истиқлолияти энергетикӣ сухан ронда, афзуд, ки  маросими ба истифода додани аввалин агрегати НОБ-и Роғун қадами қатъиест барои расидан ба ҳадафи сеюми давлат ва Ҳукумати Ҷумҳурии Тоҷикистон. Номбурда дар идомаи баромад зикр дошт, ки мақомоти иҷроияи ҳокимияти давлатии вилояти Суғд барои рушди иқтисодиёти кишвар тадбирҳои судманд андешида истодааст. Вилояти Суғд 26,9%-и маҳсулоти умумии кишварро таъмин мекунад.  Дар давоми 9 моҳи охир маҷмӯи маҳсулоти дохилии вилоят ба 107% баланд гардида, 12,7 миллиард сомониро ташкил дод. Аз ҷумла, нишондиҳандаи ҳиссаи саноат 32,1%, кишоварзӣ 29,5%, савдо ва хизматрасонӣ 20,6%, сохтмон 5% мебошад. Сектори реалии иқтисодиёт бошад ба 86,9% баробар гардидааст. Сатҳи таваррум дар бозори истеҳсолӣ бошад 3,8%-ро ташкил медиҳад. Инчунин, миқдори муҳоҷирони меҳнатӣ ба 50% кам гардидааст, ки нишонаи некӯаҳволӣ ва бо кор таъминшавии сокинон мебошад.

Баъдан маърӯзаи  доктори илмҳои иқтисодӣ, Арбоби хизматнишондодаи илм ва техника, профессор Назаров А.А. доир ба мавзӯи “Информационно-инновационное обеспечение как фактор устойчивого развития экономики” шунида шуд.

Доктори илмҳои иқтисод , профессор Авезов А.Ҳ. доир ба мавзӯи “Теоретико-методические аспекты устойчивого развития региональной экономики” баромад намуд.

Таҳти унвони “Роғун-асоси рушди устувори иқтисодиёт” маърӯзаи номзади илмҳои техникӣ, дотсент Раҳимов О.С. ба саҳми ҳозирин расонида шуд. Баъди он навор аз рафти корҳои сохтмонии НОБ-и Роғун намоиш дода шуд.

Мудири кафедраи “Назарияи иқтисодиёт ва идора”, номзади илмҳои иқтисодӣ Баҳодурова С.А. бо маърӯзаи худ “Макроэкономические условия устойчивого развития региональной экономики” баромад намуд.

Сухан ба меҳмони олиқадр, дотсент Абдуллоев М. дода шуд, ки фикру ақидаи хешро оид ба кори конференсия баён намуд.

Бо ҳамин қисмати ифтитоҳии конференсия хотима ёфт.

Дар назар аст, ки дар  қисмати дуввуми кори конференсия 80 мақолаҳои илмӣ дар се бахш, аз рӯи 7 самти таъминоти рушди устувор таҳлил ва баррасӣ мегардад. Роҳбарони бахшҳо доктори илмҳои иқтисод, профессор Авезов А.Ҳ, доктори илмҳои иқтисод, профессор Назаров А.А. ва мудири кафедраи “Иқтисодиёти ҷаҳонӣ” Бақоев М. мебошанд.

Бояд гуфт, ки конференсия давоми ду рӯз баргузор мегардад. Аз рафти кори конференсия боз маълумоти бештар хоҳем дод.

Нашр шуд: 16 ноябри 2018

Дида шуд: 1556 маротиба

Санаи 9 ноябри соли равон дар Донишкадаи политехникии Донишгоҳи техникии Тоҷикистон ба номи академик М.Осимӣ, дар факултети муҳандисӣ-технологӣ вохӯрии донишҷӯдухтарон бо сиёсатмадор, фаъолзан, собиқадори меҳнат, депутати халқии Иттифоқи Шӯравӣ ва Тоҷикистон Бихоҷал Раҳимова баргузор гардид.

Дар вохӯрӣ директори ДПДТТ, Раиси Шӯрои занони донишкада Саидӣ Дилафрӯз Раббизода, муовини Раиси Шӯрои занони донишкада Темурова М, раиси занони ФМТ Раҳимова А.Р.,  декани ФМТ Ваҳҳобов А. ва устодону донишҷӯён ширкат варзиданд. 

Сараввал устод Ваҳҳобов А. меҳмони олиқадрро ба ҳамагон муаррифӣ намуда, ба  донишкада хайрамақдам намуданд. Қайд карда шуд, ки чунин вохӯриҳои духтарон бо фаъолону собиқадорон ва шахсони рӯзгордида хеле саривақтӣ буда, нақши мусбии хешро  ҷиҳати фаъолгардонии духтарон мерасонад. 

Ҳангоми баромади хеш Бихоҷал Раҳимова ба духтарон муроҷиат намуда, зикр карданд, ки оила аз ҳама чизи муқаддас ва беназир маҳсуб меёбад. Он кас аз рӯзгор ва кору фаъолияти хеш ба ҳозирин қиссаҳои ҷолиб нақл карданд. Ба духтарон таъкид намуданд, ки ҳамеша фаъол бошанд, дар корҳои ҷамъиятии донишкада ва берун аз он ширкат варзанд, сатҳи дониш ва ҷаҳонбинии хешро васеъ намуда, касби хуберо аз худ намоянд. Зеро имрӯзҳо аз тарафи Асосгузори сулҳу ваҳдати миллӣ, Пешвои муаззами миллат муҳтарам Эмомалӣ Раҳмон мақому манзалати зан дар ҷомеа баланд гардида, шароити мусоид барои ташаккули маҳорату малака, донишомӯзӣ, соҳибкасб шудан фароҳам оварда шудааст. 

Муовини Раиси Шӯрои занони донишкада Темурова М. зимни баромади хеш қайд намуданд, ки дар донишкадаи политехникӣ Шӯрои занону духтарон фаъолият дорад ва тибқи нақшаи шӯро бо мақсади баланд бардоштани сатҳи дониши ҳуқуқию маърифатии духтарон, омода намудани онҳо ба ҳаёти оиладорӣ, пешгирӣ намудан аз ҳар гуна ҳодисаҳои номатлуб ҳар гуна чорабиниву вохӯриҳо ташкил карда мешавад.

Донишкада бо роҳбарии директори донишкада Саидӣ Дилафрӯз Раббизода, ки ҳамзамон вазифаи Раиси Шӯрои занону духтарони донишкадаро бар зимма доранд, бо мақсади фаъолгардонии духтарон дар ҷамъият, омода намудани духтарони сарвар, тарбияи кадри болаёқат, дарёфти истеъдодҳои ҷавон аз байни духтарон ва омода намудани онҳо ба ояндаи дурахшон ҳаматарафа кӯшиш ба харҷ медиҳад. 

Донишҷӯдухтарон ва устодони ФМТ аз сӯҳбати меҳмони олиқадр Бихоҷал Раҳимова як ҷаҳон маънӣ бардоштанд. Онҳо зикр намуданд, ки тамому саъю талоши хешро ба илмомӯзӣ ва омӯзиши касбу ҳунари муосир, ободиву пешрафт ва рушди Ватани азизамон Тоҷикистон равона хоҳанд кард. 

Нашр шуд: 10 ноябри 2018

Дида шуд: 1575 маротиба