Фарҳанг ва маданият дар ҳама давру замон мақоми хосае дошта, маърифати шахсро баланд мебардорад. Ин аст, ки дар ДПДТТ ба номи академик М.С.Осимӣ чорабиниҳои фарҳангӣ дар сатҳи олӣ баргузор гардида, донишҷӯён бо дарки баланди масъулият дар онҳо ширкат меварзанд.

Соли 2018 барои ҷомеаи донишкада соли бобарор дар ҷодаи фарҳанг гардид. Устодону донишҷӯёни мо дар чорабиниҳои фарҳангии шаҳрӣ, вилоятиву ҷумҳуриявӣ дар сатҳи баланд иштирок намуда, муваффақиятҳои назаррасро соҳибӣ намуданд.

Донишҷӯён дар Фестивал-озмуни вилоятӣ таҳти унвони “Суруди Модар - Алла” байни ҷавондухтарон бахшида ба Рӯзи Модар ва “Соли рушди сайёҳӣ ва ҳунарҳои мардумӣ” иштирок намуданд. Донишҷӯи курси 1_740206 Абдуллоева К. маҳорати баланд нишон дода, байни 20 нафар иштирокчиён мақоми сеюмро сазовор гардид. 

Дар соли ҷорӣ 16 нафар донишҷӯён, магистрантон ва аспирантон соҳиби Стипендияи Раиси вилоят,  2 нафар соҳиби Стипендияи Раиси шаҳр, 5 нафар соҳиби идрорпулии яквақтаи ҲХДТ гардиданд.  7 нафар донишҷӯён дар ҳафтаи худидоракунии МИҲД-и в.Суғд иштирок карда, соҳиби гувоҳнома гардиданд. 

Дастаи ҳозирҷавобони донишкада дар озмуни «Маҳфили хушдилон ва ҳозирҷавобон», ки миёни муассисаҳои таҳсилоти олӣ ва миёнаи касбӣ баргузор гардид, фаъолона ширкат варзида, соҳиби ҷойи сеюм гардиданд. Дар арафаи Рӯзи Ҷавонони Тоҷикистон аз тарафи Раиси вилояти Суғд ба ғолибон Диплом ва мукофотпулиҳо тақдим шуд.

Донишкада дар  Фестивали шаҳрии “Атласу адраси Хуҷанд - 2018” низ фаъолона ширкат варзид. Донишҷӯи курси 3, ихтисоси 500102 Бобоҷонова Н дар озмун истеъдоди баланд нишон дода, соҳиби Шоҳҷоиза ва корманди Парки технологии донишкада Қосимова Р. дар номинатсияи  “Беҳтарин либосҳои кӯдакона” соҳиби ҷойи сеюм гардиданд. Инчунин, дар “Қасри маданияти Арбоб” ҷамъбасти Фестивал-озмуни вилоятии “Атласу адраси Суғд-2018” баргузор гардид, ки донишкадаи политехникӣ дар Фестивал-озмуни мазкур фаъолона ширкат варзида, соҳиби ҷойи аввал гардид.

Аз тарафи Раёсати хадамоти муҳоҷират дар в. Суғд, раёсати кор бо занон ва оилаи МИҲД-и в. Суғд ва бо ҳамкории ташкилотҳои ҷамъиятии “Чашмаи ҳаёт», «Умед» бахшида ба 18 декабр Рӯзи байналмиллалии муҳоҷират таҳти унвони «Муҳоҷирати бехатар» озмуни иншо ва расми беҳтарин байни донишҷӯдухтарони муассисаҳои таҳсилоти олии ш.Хуҷанд ташкил гардид. Дар озмуни иншои беҳтарин ҷойи дуюм насиби донишҷӯйи курси 3, ихтисоси 70.02.01тв Рӯзиева Моҳира ва дар озмуни расми беҳтарин ҷойи дуюм насиби Рахатқулова Сурайё – донишҷӯйи курси 4, ихтисоси 50.01та гардид.

Ҳамзамон, дар доираи нақша-чорабиниҳо бо мақсади баландбардории сатҳи тарбия номгӯи зиёди вохӯриву суҳбатҳо гузаронида шуд. Вохӯриҳо бо намояндагони ҳифзи ҳуқуқ, вохӯрӣ бо ҷанговарон ва собиқадорон, суҳбатҳо бо намояндагони кумитаи кор бо занон ва оила, мулоқотҳои судманд бо шахсиятҳои барҷаста аз зумраи ононанд.

Маҳз кӯшиш ва ҷидду ҷаҳди устодону донишҷӯён буд, ки донишкада ба чунин дастовардҳо ноил гардид. Аҳли кормандон, ҷомеаи устодон ва донишҷӯён дар оянда низ кӯшиш менамоянд, то дар чорабиниҳои фарҳангӣ фаъолона ширкат варзида, нуфузи донишкадаро байни дигар муассисаҳои олӣ баландтар бардоранд.

Нашр шуд: 21 декабри 2018

Дида шуд: 1458 маротиба

Мувофиқи фармони Раиси вилоят ҳамасола дар арафаи соли нави мелодӣ вохӯрии раисони шаҳру ноҳияҳои вилояти Суғд бо донишҷӯёни дар маркази вилоят – шаҳри Хуҷанд таҳсилкунанда баргузор мегардад. Имсол низ чун анъана бахшида ба Соли нави мелодӣ вохӯрии донишҷӯёни муассисаҳои олӣ ва касбии миёнаи шаҳри Хуҷанд бо раисони шаҳру ноҳияҳои вилояти Суғд барпо гардида истодааст. Мақсад аз ин вохӯриҳо шиносоӣ аз раванди таҳсили донишҷӯён, таълиму тарбия ва шарту шароити зисти донишҷӯёни  вилоят  дар шаҳри Хуҷанд арзёбӣ гардидааст. Аз санаи 5 декабри соли равон  то имрӯз вохӯрии раисони шаҳру ноҳияҳои Айнӣ, Кӯҳистони Мастчоҳ, Панҷакент, Шаҳристон, Бӯстон, Истиқлол, Исфара, Конибодом доир гардид.  Аз ҷумла, донишҷӯёни Донишкадаи политехникии Донишгоҳи техникии Тоҷикистон ба номи академик М.Осимӣ низ дар ин вохӯриҳо ширкат варзиданд. Зимни вохӯрӣ бо раисони шаҳру ноҳияҳо суҳбати озоду самимӣ ба миён омада, донишҷӯён аз рафти дарсазхудкунӣ, шароити хобгоҳ ва тарзи гузаронидани вақтҳои холигии худ маълумот доданд. Инчунин, миннатдории самимии хешро барои чунин шароити фароҳам ба Асосгузори сулҳу ваҳдати миллӣ, Пешвои миллат Эмомалӣ Раҳмон, раисони шаҳру ноҳияҳо ва директори донишкада Саидӣ Дилафрӯз баён намуданд.

Силсилаи вохӯриҳо дар бинои “Кохи фарҳанги ба номи А.Рӯдакӣ” ва Театри мазҳака ва мусиқии ба номи Камоли Хуҷандӣ баргузор гашта истодааст. Ёдовар бояд шуд, ки вохӯрии раисони шаҳру ноҳияҳои Деваштич, Гулистон, Мастчоҳ, Ҷ.Расулов, Спитамен, Истаравшан, Б.Ғафуров ва Хуҷанд рӯзҳои наздик баргузор мегардад.

Нашр шуд: 11 декабри 2018

Дида шуд: 1603 маротиба

Яке аз қисмҳои муҳимтарин ва ҷудонашавандаи тарзи ҳаёти солим, махсусан барои насли наврас ва ҷавонон  машғулиятҳои пайвастаи тарбияи ҷисмонӣ ҳисоб меравад. Аз ин рӯ, барои беҳбудии  саломатии аҳолӣ ва дар навбати аввал насли наврас Ҳукумати Ҷумҳурии Тоҷикистон ба соҳаи варзиш диққати махсус зоҳир менамояд. Ҷалби донишҷӯён ба варзиш ва бурдани тарзи ҳаёти солим яке аз сиёсатҳои пешгирифтаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон мебошад. Бо ифтихор метавон гуфт, ки дар ДПДТТ ба номи академик М.Осимӣ ба варзиш таваҷҷуҳи махсус зоҳир намуда, сафи донишҷӯёни варзишгар зиёд гардида истодаанд.

Соли 2018 дар соҳаи варзиши донишкада соли фаромӯшношуданӣ аст. Зеро дар соҳаи варзиш дастовардҳои зиёде ба назар мерасад. Донишҷӯёни донишкада дар намудҳои гуногуни варзиш, дар мусобиқаҳои шаҳрӣ, вилоятӣ ва ҷумҳуриявӣ ширкат варзида, ғолибият ба даст оварданд.

Аз ҷумла, дар мусобиқаҳои гуногуни варзишии вилоятӣ бахшида ба моҳвораи Рӯзи ҷавонон фаъолона ширкат варзида,  ғолибият ба даст оварданд:

• дар риштаи гӯштини тарзи озод - ҷойи дуюм; 
• дар риштаи варзиши сабук дар ду намуд- давидан ба масофаи 100 метр ва 400 метр ва дар роҳгардии варзишӣ ба масофаи 5 км - ҷойи як;
• дар риштаи давидан ба масофаи 5км - ҷойи 2.

Умаров Саидвоҳид, донишҷӯи курси 1-и ихтисоси 40.01.01.тА аз факултети информатика ва энергетика дар «Бозиҳои варзишии вилояти Суғд оид ба варзиши сабук» дар партофтани диск ва гурз қувваозмоӣ намуда, дар ҳар ду намуд сазовори ҷойи аввал гардид. Варзишгар Умаров Саидвохид дар ҳар ду намуди варзиш  қувваозмоӣ намуда, маҳорат ва таҷрибаи баланди варзишӣ нишон дод. Дар партофтани диск ба масофаи 35,12м  ва гурзпартоӣ 47,03мсазовори ҷойи аввал гардид. Ғолибони «Бозиҳои варзишии вилояти Суғд оид ба варзиши сабук» бо диплом, медал ва тӯҳфаҳои хотиравии Мақомоти иҷроияи ҳокимияти давлатии вилояти Суғд ва Раёсати кор бо ҷавонон ва варзиши вилоят қадрдонӣ карда шуданд. Аз ҷумла, Умаров Саидвоҳид соҳиби ду медал ва дипломҳои дараҷаи якум гардид. Дар ин мусобиқаҳо донишҷӯёни донишкада фаъолона ширкат варзиданд. Донишҷӯи курси 4, гурӯҳи 70.02.01 тб Алимов Иброҳим дар риштаи гӯштини тарзи озод сазовори ҷойи дуюм гардид.  Хоналиева Зулола, донишҷӯи курси 1, ихтисоси 50.01.01 дар риштаи варзиши сабук дар ду намуд- давидан ба масофаи 100 метр ва 400 метр ва дар роҳгардии варзишӣ ба масофаи 5 км сазовори ҷойи якум гардид. Донишҷӯйи курси 3 ихтисоси 37.01.07 та Ҳусейнҷон Худойназаров дар риштаи давидан ба масофаи  5 км сазовори ҷойи 2 гардид. Хурсандиовар он аст, ки Ҳусейнҷон дар пойтахти кишвар дар мусобиқаи ниммарафонии байналмиллалӣ барои дарёфти мукофоти Президенти Ҷумҳурии Тоҷикистон, ки дар он аз кишварҳои мухталифи ҷаҳон ширкат варзиданд, мақоми 208- умро соҳиб шуд.

Дар Дави миллӣ бахшида ба таҷлили Рӯзи ҷавонони Тоҷикистон дар назди КВД Маҷмааи ҳавзҳои шиноварии “20-солагии Истиқлолияти Тоҷикистон” 1000 нафар устодону донишҷӯёни донишкада ширкат варзида, бо туҳфа ва сипосномаи Раиси вилоят Раҷаббой Аҳмадзода қадрдонӣ гардиданд.

Давлатов Муҳаммадисо дар  мусобиқаи вилоятӣ барои дарёфти Ҷоми Раиси вилояти Суғд бо вазни 73 кг қувваозмоӣ намуда, сазовори ҷойи 1 гардид ва Ҷоми раиси вилоятро ба даст овард. Ғайр аз ин, Давлатов Муҳаммадисо дар мусобиқаи мазкур дар намуди варзиши гӯштини миллӣ низ ҷувваозмоӣ намуда, бо маҳорати баланди касбӣ сазовори ҷойи 2 гардид. Ба Муҳаммадисо  дар ду намуди варзиш дипломҳои дараҷаи 1 ва 2, Ҷоми Раиси вилояти Суғд ва тӯҳфаи хотиравӣ дар вазъияти тантанавӣ супорида шуд. Дар шаҳри Конибодом мусобиқаи кушоди  шаҳрӣ оид ба самбои муҳорибавӣ, ки соли равон 80-солагии ин намуди варзишро ҷашн мегиранд, баргузор гардид. Давлатов Муҳамадисо дар вазни 74 кг қувваозмоӣ намуда, соҳиби медали тилло гардид.

Донишҷӯи курси 1 – и ихтисоси 43.01.03тБ  Алимов Ҳасанҷон дар мусобиқаи вилоятӣ оид ба гӯштини самбо байни наврасон ва дастпарварони солҳои таваллудашон 2001-2004 – и муассисаҳои варзишии шаҳру ноҳияҳои вилоят ширкат варзид.  Ҳасанҷон бо маҳорати баланди касбӣ ҳарифро мағлуб намуда, сазовори ҷойи сеюм гардид. Соли ҷорӣ мусобиқа дар намуди варзиши “гӯштини камарбандӣ, тарзи классикӣ ва озод” сурат гирифт, ки дар он наврасони соли таваллудашон 1998-2001 байни ҳам қувваозмоӣ намуданд. Бобоев Хуррамшо бо вазни 75кг ҳарифи худро мағлуб намуда, соҳиби ҷойи аввал гардид. Донишҷӯи дигар Саидов Ёрмаҳмад дар вазни 62кг сазовори ҷойи сеюм гардид. 

Дар Спартакиада байни донишҷӯдухтарони донишгоҳҳои олӣ ва коллеҷҳои ш. Хуҷанд бо мақсади баланд бардоштани малакаи варзишии донишҷӯдухтарон, ҷалби онҳо ба варзиш ва тарзи ҳаёти солим ва дар ин замина пешгирии ҳаргуна ҳодисаҳои номатлуб донишҷӯдухтарони донишкада аз рӯи панҷ намуди варзиш волейбол, шашка, шоҳмот,  тенниси рӯи миз, варзиши сабук ширкат варзида, ҷойи дуюм ишғол намуда,  бо Ҷом ва сипоснома қадрдонӣ гардиданд.

Донишҷӯён дар мусобиқаҳои варзишии в. Суғд бахшида ба Рӯзи Президенти Ҷумҳурии Тоҷикистон ва ба истифода додани чархи аввалини НБО Роғун байни донишҷӯёни муассисаҳои таҳсилоти олии касбии вилоят фаъолона ширкат варзида, соҳиби ҷойҳои фахрӣ гардиданд:

• гӯштини дзюдо – ҷойи 1;
• гӯштини миллӣ – ҷойи 2;
• бокс – якто ҷойи 1; якто ҷойи 2;  шашто ҷойи 3;
• варзиши сабук -  дуто ҷойи 1; панҷто ҷойи 2; сето ҷойи 3.

Ин дастовардҳо ва ғалабаҳои назаррас дар соҳаи варзиш дар соли 2018 руҳияи тамоми донишкадаро баланд бардошт. Барои машқу тамрин ба донишҷӯён тамоми шароитҳо муҳайё мебошад. Бигзор чунин ғалабаҳо дар солҳои оянда бисёртар гардида, варзишгарони мо номбардори донишкада гарданд.

Нашр шуд: 20 декабри 2018

Дида шуд: 1482 маротиба

Санаи 30 ноябри соли 2018 дар доираи «16 рӯзи мубориза алайҳи зӯроварӣ дар оила» вохӯрии донишҷӯдухтарони ДПДТТ ба номи академик М.Осимӣ таҳти унвони “Зиндагӣ ранги дигар дорад!” дар толори донишкада барпо гардид.

Дар чорабинӣ Раиси кумитаи занони МИҲД-и шаҳри Хуҷанд Атаева Ҳ., мудири шуъбаи кор бо занон ва оилаи МИҲД-и шаҳри Хуҷанд Сангинова М., намояндаи ташкилоти ҷамъиятии маркази занон “Гулрухсор” Ишанова М., намояндаи ташкилоти ҷамъиятии “Сарчашма” Болтаева М., намоянда аз Хазинаи авруосиёӣ дар Тоҷикистон Каримова М. ширкат варзиданд. Инчунин,  аз донишкада номзади илмҳои педагогӣ, устоди кафедраи забони давлатӣ ва ҷомеашиносӣ Темирова Х., Раиси Шӯрои занони ФИЭ Усмонова М., муовини раиси Шӯрои занон ва духтарони донишкада Темирова М. иштирок намуданд.

Сангинова М. чорабиниро оғоз намуда, оид ба муносибатҳо дар оила суханронӣ намуданд. Аз таҷрибаи фаъолияти шуъбаи кор бо занон ва оила мисолҳои ҳаётӣ оварда, духтаронро дар руҳияи маърифати оиладорӣ тарбият намуданд. Зимни баромади хеш мавсуф зикр доштанд, ки зан пойдевори асосии оила буда, ҳама хушбахтиву хушиҳо ва баръакс бадбахтиҳо аз зан вобаста аст. Хушбахтии оила асосан дар дасти зан мебошад, бинобар ин  бояд ҳаматарафа кӯшиш намояд, то оилааш мустаҳкам гардад.

Баъдан Атаева Ҳ. суханро идома дода, таъкид намуданд, ки нақши зан дар ҷомеа баланд гардида истодааст. Бинобар ин духтарон тамоми кӯшиши худро барои гирифтани дониши мукаммал равона созанд.

Устод дар бораи “Кодекси оилаи Ҷумҳурии Тоҷикистон”, доштан ва баланд бардоштани маърифати ҳуқуқӣ маълумот доданд. Зикр доштанд, ки асоси хушбахтии оила дар муносибати хуши байниҳамдигарӣ асос меёбад.

Намояндаи маркази занон “Гулрухсор” Ишонова Ш. оид ба фаъолияти марказ маълумот доданд.

Барои иштирокчиёни вохӯрӣ маводҳо аз ҷониби Хазинаи авруосиёӣ дар Тоҷикистон тақсим карда шуд.

Аз ҷониби маркази занон “Гулрухсор” низ роҳнамоҳо барои ҳифзи ҳуқуқи занон, пешгирии зӯроварӣ ва хушунат дар оила, ҳуқуқҳои занон дар доираи Қонунгузории Ҷумҳурии Тоҷикистон дастрас карда шуд. 

Дар фарҷом  видеоролики “Оилаи хушбахт бе зӯроварӣ” намоиш дода шуд. Аз ҷониби донишҷӯёни донишкада суруду рақсҳо пешкаши ҳозирин гардида, табъи ҳамагонро болида намуд.

Вохӯрӣ таҳти унвони “Зиндагӣ ранги дигар дорад!” маърифати ҳуқуқӣ, оиладории донишҷӯдухтаронро баланд бардошта, ҷиҳати тарбияи таҳаммул ва тоқатпазирӣ, ҳуқуқӣ таъсири амиқ гузошт.

Нашр шуд: 30 ноябри 2018

Дида шуд: 1616 маротиба

Донишкадаи политехникии Донишгоҳи техникии Тоҷикистон ба номи академик М.Осимӣ дар самти вусъатёбӣ ва рушди устувор доимо кӯшиш ба харҷ дода, ҳамеша аз пайи наовариҳои соҳаҳои мухталифи хоҷагии халқ мебошад. Дар соли 2018 донишкада робитаҳои худро бо ташкилоту донишгоҳҳои байналмиллалӣ қавитар гардонд, ки ин ҳамкориҳои тарафайн  самараи худро дод.

Маврид ба зикр аст, ки шуруъ аз соли нави таҳсил дар доираи лоиҳаи “Таҳсилоти олӣ барои низоми озуқаворӣ ва стандартҳо дар Осиёи Марказӣ” – и барномаи Erasmus+ 11 нафар устодон аз давлатҳои Латвия, Литва ва Полша барои донишҷӯёни донишкада, ки дар ихтисоси технологияи маҳсулоти хӯрока ва агротехнология таҳсил доранд, дарс гуфтанд.

Дар доираи ҳамкорӣ бо лоиҳаҳои GIZ ва “HECAFS”   таҷҳизот ба лабораторияи таҳлили маҳсулоти хӯрокаи факултет ба маблағи 103 989 евро харидорӣ карда шуд.

Бояд қайд кард, ки якчанд таҷҳизотҳои лабораторияҳои таҳлили маҳсулоти хӯрокаи факултети муҳандисӣ-технологӣ, аз қабили лаборатории сенсорӣ, маҳз бо дастгирӣ ва маблағгузории   лоиҳаи GIZ харидорӣ ва насб шудааст.

Бо мақсади баландбардории сатҳи дониши донишҷӯён ва ивази таҷрибаи устодон, ҳамзамон, дар доираи барномаи “HECAFS” намояндагони Донишгоҳи Литва меҳмони донишкадаи мо гардидаанд.

Гражина Янушлявичене, доктори илмҳои байторӣ, профессори Донишгоҳи илм дар бораи ҳаёт, Алвидас Шарлакаус, доктори илмҳои технологӣ, Александр Новославский доктори илмҳои кишоварзӣ аз фанҳои гуногун дар факултети муҳандисӣ – технологӣ, кафедраи “Маҳсулоти хӯрока ва агротехнология”  ба донишҷӯён дарсҳо гузарониданд. Устодони Донишгоҳи илм дар бораи ҳаёти Литва аз фанҳои “Методҳои ташхис ва таҳлили маводи хӯрока”(Food quality and safety control systems), “Истеҳсоли маҳсулоти растанипарварӣ”  (Quality control systems), “Микробиологияи хӯрока” ба донишҷӯёни зинаи бакалаври 2.49.01.02 ва 2.74.02.06,   “Асосҳои илмии идораи сифати маҳсулоти хӯрока”( Quality management), “Микробиологияи хӯрока” ба магистрантони ихтисоси мазкур дасрҳои амаливу назариявӣ гузарониданд. Ғайр аз ин, намояндагони Донишгоҳи Литва бо устодони кафедраи “Маҳсулоти хӯрока ва агротехнология”  тренинг оид ба масъалаҳои стандарти байналхалқии бехатарии маҳсулоти хӯрока баргузор намуда, бо ҳамдигар ивази таҷриба намуданд.

Намояндагони Донишгоҳи технологии Гуилини Ҷумҳурии мардумии Чин Хонгу Зенг, Сияопенг Занг, Хуа Лин, Хаиханг Ли ба донишкадаи мо ташриф оварда, аз ҷараёни таълиму тарбия, пояи моддиву техникӣ наздиктар шиносоӣ пайдо намуданд.

Ҳайати меҳмононро директори донишкада, номзади илмҳои техникӣ Саидӣ Дилафрӯз Раббизода ба ҳузур пазируфт. Зимни суҳбати озоду самимӣ меҳмонон аз он изҳори хушнудӣ намуданд, ки дидани шаҳри зебою қадимаи Хуҷанд насибашон гашт. Меҳмонони олиқадр аз лабораторияҳои муосири факултетҳои информатика ва энергетика, сохтмон ва нақлиёт ва муҳандисӣ-технологӣ дидан намуда, бевосита бо донишҷӯён сӯҳбати гарму самимӣ намуданд. Меҳмонон ба шароити таълиму тарбия, истифодаи технологияи муосир дар раванди таълим баҳои баланд дода, изҳори боварӣ  намуданд, ки робитаи мустаҳками ду муассисаи олӣ барои боз ҳам баланд шудани мавқеъ ва мақоми донишкада мусоидат мекунад. 

Дар назар аст, ки донишкада бо Донишгоҳи технологии Гуилини Ҷумҳурии мардумии  Чин  се самт шартнома -  ташкили факултети муҳити зист дар донишкада, ташкили лабораторияҳо, таҳсил ва таҷрибаомӯзии донишҷӯён, ивази таҷрибаи устодон ба таври муштарак мебандад. Ба меҳмонон иттилоъ дода шуд, ки донишкада аз рӯи 19 ихтисос кадрҳо омода мекунад. Соли равон дар пояи факултети муҳандисӣ-технологӣ барои 20 ҷойи ихтисоси ҳифз муҳтити зист иҷозатномаи Вазорати маориф ва илми Ҷумҳурии Тоҷикистон гирифта шудааст.

Дар асоси дастуру супоришҳои Асосгузори сулҳу ваҳдати миллӣ, Пешвои миллат, Президенти кишвар муҳтарам Эмомалӣ Раҳмон ҷиҳати баландбардории иқтисодиёти кишвар ва ба роҳ мондани истеҳсоли маҳсулоти босифат, самаранокии фаъолияти Парки технологӣ дар ДПДТТ ба номи академик М.Осимӣ боз як коргоҳи нави истеҳсоли  маҳсулоти нонӣ дарҳои худро боз намуд.

Давоми моҳи  ноябри соли равон бошад, дар донишкада  семинар дар мавзӯи “Технологияи пухтани маҳсулотҳои нонӣ” баргузор гардид.

Дар семинар намояндагони ширкатҳои ордбарорӣ, истеҳсоли маҳсулотҳои нонӣ, намояндаи лоиҳаи байналхалқии GIZ Франс Холрахер ширкат варзиданд. Франс Холрахер доир ба таҷҳизотҳои муосири нонбарорӣ тариқи намоиши слайд баромад намуда, ҳозиринро бо кори 4 таҷҳизоти нав шинос намуд. Лабораторияи истеҳсоли маҳсулотҳои нонӣ фаъолияти худро дар ДПДТТ, дар доираи Парки технологии донишкада аллакай оғоз намудааст. Ин иқдоми нек барои донишҷӯёни факултети муҳандисӣ-технологӣ шароити хуби кории мусоид фароҳам оварда, маҳсулоти босифати ватаниро кафолат медиҳад.

Бояд қайд намуд, ки барои ин муваффақиятҳои беназир саҳми Шуъбаи робитаҳои хориҷӣ хеле бузург мебошад. Чунин ҳамкориҳо дар ҳақиқат саривақт ва зарурӣ буда, нақши мусбии хешро дар сатҳу сифати таълим, баландбардории дониши донишҷӯён ва муносибатҳои дӯстонаи байналмиллаӣ хоҳад гузошт.

Нашр шуд: 20 декабри 2018

Дида шуд: 1580 маротиба

Бо ташаббуси Мақомоти иҷроияи ҳокимияти давлатии вилояти Суғд силсиламулоқотҳои  сокинони вилоят бо намояндагони МИҲД доир ба пешгирии шомилшавӣ ба ҳизбу ҳаракатҳои ғайриқонунӣ идома дорад.

Мувофиқи нақша-чорабиниҳо чунин мулоқоти озод  санаи 29 ноябри соли равон дар ДПДТТ ба номи академик М.Осимӣ баргузор гардид.

Муовини директор оид ба корҳои тарбия Аминов Ф.А. суханронӣ намуда, аз ҷумла, зикр дошт, ки аcри 21 дар баробари пешравиҳои илму техника, ҳамчунин асри ҷаҳонишавии тамаддунҳо, торафт доман паҳн кардани хатарҳои экстремистию террористӣ ба ҷомеаи ҷаҳонӣ маҳсуб мегардад.

Бо дарки муҳимияти масъала Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии худ қайд карда буданд: «Бо дарназардошти воқеияти кунунӣ ва бо мақсади таъмини амнияти устувор ҷиҳати пешгирӣ аз хатарҳои афзояндаи терроризму ифротгароӣ ва дигар таҳдидҳои замони муосир мо омодаем ҳамкориҳои густурдаро бо созмонҳои байналмилаливу минтақавӣ ва кишварҳои шарик тақвият бахшем. Мо ҷонибдори низоми ҷаҳонии одилона, бидуни ҷангу низоъ, густариши ҳамкориву шарикии баробар ва судманди ҳамаи кишварҳои олам, таъмини амнияти ҷаҳониву минтақавӣ бо роҳи созишу муколамаи созанда бар асоси Ойинномаи Созмони Милали Муттаҳид мебошем».

 Дар вохӯрӣ ҷомеаи устодон ва донишҷӯён, намояндагони МИҲД вилояти Суғд  Олимҷон Мирмухамедов -  сармутахасиси Шуъбаи рушди иҷтимоӣ ва робита бо ҷомеа,  Мавлонова Муаяссара - муовини раиси Кумитаи кор бо занон ва оилаи МИҲД вилояти Суғд,  Ахмедов Шаҳзодҷон - сармутахассиси Раёсати кор бо ҷавонон ва варзиши вилояти Суғд ширкат варзиданд.

Мирмухамедов О. оид ба ҷавонони гумроҳзада, ки фирефтаи  доми макру фиреби хоинҳо гашта, ба Сурия сафарбар шудаанд, суханронӣ намуд. Зимни баромади хеш қайд намуд, ки ҷавонон ба ҳизбҳои гуногуни ғайриқонунӣ ҳамроҳ нашуда, аз пайи илмомӯзӣ гарданд. Вақтҳои холигии худро фориғ нагузаронида, амалҳои барои худ ва ҷамъият муфидро ба сомон расонанд.

Мавлонова Муяссара, муовини Раиси Кумитаи кор бо занон ва оилаи вилояти Суғд низ баромад намуда, зикр кард, ки маркази иттилотии машваратии ройгон барои занон амал мекунад. Дарҳои марказ барои занони ба дастгирӣ ниёз дошта ҳамеша боз аст. Маркази машаваратию иттилоотӣ ба занҳо маслиҳатҳои ройгон дода, кӯмаки худро барои ҳалли муаммо мерасонад.

Ахмедов Шаҳзодҷон, сармутахассиси Раёсати кор бо ҷавонон ва варзиши вилояти Суғд ҷиҳати пешгирӣ аз аъзошавӣ ба ҳизбҳои ғайриқонунӣ сухан ронда, аз ҷавонон даъват ба амал овард, ки зиракии сиёсии худро аз даст надода, ҳушёр бошанд. Пайгири сиёсати пешгирифтаи Асосгузори сулҳу ваҳдати миллӣ, Пешвои миллат, Сарвари давлат муҳтарам Эмомалӣ Раҳмон гардида, ояндаи ватан бошанд.

Дар фарҷом Аминов Ф.А. ҳамчунин қайд кард, ки барои мустаҳкам намудани заминаи ҳуқуқӣ дар ноябри соли 1999 парлумони кишвар қонун «Дар бораи мубориза бо терроризм»-ро қабул кард. Бар замми ин  Барномаи махсус таҳия ва «Консепсияи Ҷумҳурии Тоҷикистон оид ба мубориза бо терроризм» қабул карда шудааст. Инчунин 30 марти соли 2006 Судии Олии Ҷумҳурии Тоҷикистон ташкилотҳои зеринро характери террористӣ ва экстремистӣ дошта эълон ва фаъолияти онҳоро дар Тоҷикистон манъ кард. Ҳар яки мо новобаста аз синну сол, фарқияти ҷинсиву вазъи иҷтимоӣ зарур аст, ки зиди терроризму экстремизм муборизаи ҳамҷоя барем.

Нагузорем, ки ҷавонони мо ба гурӯҳу ҳаракатҳои гуногун шомил шаванд. Зеро ватани моро ба ҷуз худи мо каси дигар обод намекунад.

Мулоқоти  озоду шаффоф бо донишҷӯёну устодон  сурат гирифт.

Бо ҳамин вохӯрии судманд ба охир расида, донишҷӯёнро  бори дигар дар руҳияи худшиносӣ ва худогоҳӣ ҳушдор намуд.  

Нашр шуд: 29 ноябри 2018

Дида шуд: 1545 маротиба

Санаи 19 декабри соли ҷорӣ дар толори ДПДТТ ба номи академик М.С.Осимӣ филми “Марди роҳ” тариқи телевизиони “Сафина” намоиш дода шуд. Ҷомеаи устодону донишҷӯёни донишкада аз нақши  таърихии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон дар таҳкими сулҳу субот ва оромии ҷомеа тавассути ин филм огоҳии бештар ёфтанд.

Филми “Марди роҳ” дар ҳақиқат баёнгари таърихи навини кишвар, аз вартаи марг наҷот ёфтани давлату миллат, қаҳрамонии Пешвои миллати тоҷикон Эмомалӣ Раҳмон мебошад.

“Марди роҳ” фарогири тамоми ҷанбаҳои Ҷумҳурии Тоҷикистон маҳсуб меёбад. Филм бо инъикоси вазъи сиёсии Тоҷикистон дар солҳои 90-ум оғоз гардида, тамоми ҳодисаву рӯйдодҳои он вақтаро дар бар мегирад. Мусоҳибаҳои ходимони сиёсиву давлатӣ, адибони машҳури кишвар аз қабили Атахон Сайфуллоев, Усмонҷон Ғаффоров, Гулназар Келдӣ, Бозор Собир бори дигар собит намуд, ки Президент дар роҳи интихобкардаи худ якқавлу якмаром ҳастанд.

Дар филми мазкур порчаҳои таърихӣ  аз Иҷлосияи 16-уми Шӯрои Олии Ҷумҳурии Тоҷикистон, суханронии Раиси Шӯрои Олии Ҷумҳурии Тоҷикистон Эмомалӣ Раҳмон, харобию вайронаҳои он замон оварда шудааст.

Шахсиятҳои машҳури кишвар, ки иштирокчии Иҷлосияи 16-уми Шӯрои Олии Ҷумҳурии Тоҷикистон буда, худ шоҳиди бесару сомониҳо гардида буданд, ақидаҳои хешро муфассал баён намуданд.

Худ Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон Эмомалӣ Раҳмон суханронӣ намуда, вазъияти ҷанги бародаркуширо ёдовар гардиданд.

Замони ҷанги бародаркушӣ дар Тоҷикистон давлат бесоҳиб монда буд. Роҳбаре лозим буд, ки барои сарҷамъии миллати тоҷик ҷони худро дареғ надорад. Пешвои миллат қайд намуданд, ки замони ҷанги шаҳрвандӣ, аз лаҳзаҳои  Роҳбари Шӯрои Олии Ҷумҳурии Тоҷикистон интихоб шуданашон тамоми фикру андеша ва амалҳои худро барои осудагии кишвар равона намуда буданд. Ҳангоми Раиси Шӯрои Олӣ интихоб гардидан бисёр нафарон ҳатто таъкид намуда буданд, ки аз ин вазифа даст кашида, ҷони худро азиз доранд. Аммо тамоми фикри Эмомалӣ Раҳмон барои ба дастоварии сулҳ ва мутаҳиддии халқ равона буд.

Эмомалӣ Раҳмон зикр карданд, ки баъди ин суханон бисёр чизҳоро дарк намекарданд. Танҳо лозим буд, ки Тоҷикистонро фазои  сулҳ фарогир бошад. Он замон Пешвои миллат тамомии ҳастиии худро барои халқ бахшиданд. Дар лаҳзаҳои душвортарин ба халқ такя намуда, вазъияти мавҷударо ба ростӣ ба мардум фаҳмониданд.

Баъди суханронии пуртаъсири Эмомалӣ Раҳмон, ҷавони 40-сола, дар Иҷлосияи 16-уми Шӯрои Олии Ҷумҳурии Тоҷикистон ки барои пойдории сулҳи тоҷикон қасам ёд намуд,  82% барои роҳбарии ӯ овоз доданд.

Дар Тоҷикистон вазъият хеле ноором буд. Дар ҷанги шаҳрвандӣ 150 ҳазор нафар кушта шуданд, 50 ҳазор кӯдак ятим монда, 25 ҳазор нафар занон шавҳарони худро аз даст доданд. 1400 сарбозу афсар ба ҳалокат расиданд. Зиёда аз 1 миллион нафар аз Тоҷикистон фирор намуданд.

Ҳазорҳо мактабҳо, садҳо шаҳру деҳаҳо ба харобазор табдил ёфта буд. Гуруснагӣ кишварро фаро гирифта буд. Навбатҳои беохир барои буридаи нон ба итмом намерасид. Амнияти кишвар таъмин намуд, зеро кормандон аз вазифаҳои худ даст кашида буданд. Халқ ба ҳукумати кишвар ва осудагии давлат боварӣ надошт.

Азбаски вилояти нисбатан оромтар ин вилояти Суғд буд, хиёнаткорон мехостанд бо ташкили “роҳи озоди иқтисодӣ” роҳро баста, намояндагони аз шаҳри Душанберо ба Иҷлосия роҳ надиҳанд...

Аммо ҳамаи ин нобасомониҳо паси сар гардид. Фарзанде, ки аз баҳри ҷони худ баромада, нестшавии халқу миллати тоҷикро аз байн бурд, ғолиб омад. Тоҷикистонро аз як мамлакати вайрону абгор ба биҳишт мубаддал гардонд. Пас, месазад, ки имрӯз ӯро Пешвои муаззами худ хонем. Арзанда аст, ки Асосгузори сулҳу ваҳдати миллӣ эътироф намоем. Дар воқеъ, сулҳи тоҷикон нишонаи якдиливу ҳамфикрӣ ва ҷонфидои халқ будани сарвараш аст.

Донишҷӯён ва устодон бо як рӯҳияи том филмро дастаҷамъона то охир тамошо карданд.

Нашр шуд: 19 декабри 2018

Дида шуд: 1478 маротиба

Мутобиқи Конститутсияи Ҷумҳурии Тоҷикистон Парчам, Нишон ва Суруди миллӣ рамзҳои асосии давлат мебошанд. Дар таърихи нави инсоният ин се падидаи ҷамъияти инсонӣ нишонаи соҳибихтиёрӣ ва соҳибистиқлолии ҳар як давлату миллат ба ҳисоб мераванд.

Эълон шудани Рӯзи Парчами Тоҷикистон воқеаест фараҳбахш ва баргузории он дар замири ҳар фарди ватандӯст ва сокини Тоҷикистони азиз эҳсоси дӯст доштан ва парастиш кардани ин марзу бумро дучанд менамояд. Ба ифтихори ин санаи сурурангез  субҳи санаи 24 ноябр зиёда аз 2000 донишҷӯёну устодони донишкада дар хиёбони ба номи Раҳмон Набиеви шаҳри Хуҷанд роҳпаймоӣ намуда, то мавзеи асосии баргузории чорабинӣ- ба пояи баландтарин парчами вилоят, назди саҳни бинои мақомоти иҷроияи ҳокимияти давлатии вилояти Суғд рафтанд. 

Раиси вилояти Суғд, муовини аввали Раиси Маҷлиси миллии Маҷлиси Олии Ҷумҳурии Тоҷикистон Раҷаббой Аҳмадзода ҳамагонро бо Рӯзи Парчами миллии Ҷумҳурии Тоҷикистон таҳният гуфта, аз ҷумла афзуд, ки “Халқи шарафманди тоҷик зери парафшонии Парчами давлатии Ҷумҳурии Тоҷикистон рӯйдоди муҳими таърихӣ - ифтитоҳи чархи якуми Нергӯгоҳи барқи обии "Роғун"-ро амалӣ намуд, ки самараи ташаббусҳо, заҳматҳои пайваста ва роҳбарии хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, таҷассумгари ваҳдату ягонагӣ, якдиливу ҳаммаромии мардуми заҳматқарини тоҷик мебошад.  Ташаббуси бунёди ин иншооти бузурги аср сароғози корномаи навини Президенти Ҷумҳурии Тоҷикистон, Пешвои миллат, Ҷаноби Олӣ, муҳтарам Эмомалӣ Раҳмон мебошад, ки дар таърихи даврони соҳибистиқлолии кишварамон бо ҳарфҳои заррин сабт хоҳад гашт”.

Таъкид шуд, ки таърихи навини давлатдории тоҷикон гувоҳи он аст, ки арҷгузорӣ ба рамзҳои миллӣ, ки Парчами давлатӣ яке аз онҳо мебошад, барои дарки амиқи ғояҳои олии марбут ба ҳуввияти миллии мардум нақши муассире дорад. Парчам мақсаду мароми созандаи миллати тоҷикро инъикос намуда, ифодагари роҳи таърихии он мебошад. Парчам яке аз рамзҳои муҳими давлати соҳибистиқлоли мо, нишонаи ҳаёти осоишта, ваҳдат, сарфарозӣ ва ифтихори миллӣ мебошад. Парчами давлатии мо таҷассуми ҳастии миллати соҳибдавлат ва тамаддунофари тоҷик, иттиҳоду сарҷамъии он ба шумор меравад. Дар тӯли солҳои соҳибистиқлолӣ мардуми шарафманди кишвари мо бо саъю талош дар роҳи ваҳдату ягонагӣ исбот намуданд, ки ворисони арзандаи гузаштагони ватанпарасту озодандеши худ ҳастанд.

Чорабинии фарҳангӣ ҳусн ва таровати ҷашнро боз ҳам шукӯҳмандтар намуд. Эҳсос мешуд, ки ҳар яке аз иштирокчиён бо ҳисси баланди ифтихор аз Ватану ватандорӣ ба парчами миллӣ, ки аз муқаддасоти кишвар маҳсуб мешавад, эҳтиром гузоштанд.

Нашр шуд: 26 ноябри 2018

Дида шуд: 1579 маротиба

Мақсад аз гузаронидани озмуни "Беҳтарин хонаи истиқоматӣ дар хобгоҳ" ободу зебо нигоҳ доштани дохили утоқи истиқоматӣ буда, дар рафти он ҳолати мизу курсиҳо, либосовезаку пойафзолмонак, ҷевонҳо ва рахти хоб, намуди зоҳирии катҳои хоб, тозагӣ ва ороиши деворҳои утоқ ва эҷодкорона рафтор намудани истиқоматкунандагони утоқ, қадр намудани меҳнати софдилонаи ҳамзистони хоб ба назар гирифта мешавад. 

Шартҳои асосии озмуни "Беҳтарин хонаи истиқоматӣ дар хобгоҳ":

• Дар озмун ҳамаи истиқоматкунандагони хобгоҳи донишкада иштирок намуда, маҳорати баланди тоза ва озода нигоҳдории хонаи истиқоматиро пешниҳод менамоянд;
• Инчунин, ҳолати тозаву озода нигоҳдории мизу курсиҳо, либосовезаку пойафзолмонак, ҷевонҳо, рахти хоб ва ҳолати санитарии лавозимотҳои хоб (навлочка, простинҳо, пододеялникҳо, покривалоҳо) ва ғайра аз тарафи ҳакамон аз назар гузаронида мешавад;
• Бояд зикр кард, ки аъзои ҳакамон ба тозагии долонҳо (балкон), дару тирезаҳо аҳамияти хоса медиҳанд;
• Риояи қоидаи бехатарӣ аз сӯхтор дар мавриди истифодаи гармкунакҳои барқӣ низ санҷида мешавад;
• Аъзоёни ҳакамон бо баробари омӯхтани талаботи озмун инчунин дархосту пешниҳоди истиқоматкунандагонро ба инобат гирифта, хулосабарорӣ мекунанд. 

Муҳлати гузаронидани озмуни "Беҳтарин хонаи истиқоматӣ дар хобгоҳ" аз 14 декабри соли ҷорӣ эълон шуда, дар арафаи соли нави 2019-ум аз санаи 26-28 декабри соли ҷорӣ гузаронида шуда, аъзоёни ҳакамон натиҷаи озмунро ҷамъбаст менамоянд. 

Мукофоти озмуни  "Беҳтарин хонаи истиқоматӣ дар хобгоҳ"

Аъзоёни ҳакамони озмун дар муддати эълоншуда ҳамаи хонаҳои истиқоматии хобгоҳро омӯхта, таҳлил намуда, аз рӯи шартҳои озмун баҳогузорӣ ва рӯйхати ғолибони озмунро ба маъмурияти донишкада пешниҳод менамоянд. 

Нашр шуд: 15 декабри 2018

Дида шуд: 1575 маротиба

Бо мақсади арҷ гузоштан ба заҳмату талошҳои ҷавонон, баланд бардоштани масъулияти онҳо  дар таҳкими ваҳдату ягонагӣ бо иқдоми Кумитаи иҷроияи ҲХДТ дар шаҳри Хуҷанд дар остонаи Рӯзи парчами миллӣ ба 50 нафар донишҷӯёни муассисаҳои таҳсилоти касбии олӣ ва миёнаи махсус, хонандагони муассисаҳои тахсилоти миёнаи умумӣ идрорпулии яквақта дода шуд.  Панҷ нафар донишҷӯён, докторантон ва кормандони  ДПДТТ  Ҳасанова Фаришта, докторанти курси 1-и ихтисоси менеҷмент, Мирзоев Дабир, сарлаборанти кафедраи физика ва химия, Ишанов Суҳробхон, донишҷӯи курси 3.43.01.03тб, Домлоҷонова Нодира, ассистенти кафедраи дизайн ва меъморӣ, Ҷӯраев Муҳсинҷон, донишҷӯи курси 2.430103тв, ки дар чорабиниҳо фаъол буданд, ба гирифтани идрорпулии кумиҷроияи шаҳрии ҳизб дастёб шуданд.

Дар расми тақдими идрорпулӣ  Раиси Кумитаи иҷроияи ҲХДТ дар филояти Суғд, номзади илмҳои филологӣ Сарфароз Фаттоҳзода, Раиси Кумитаи иҷроияи ҲХДТ дар шаҳри Хуҷанд Маликисломӣ Наим Мунаввар,  ректори ДДХ, доктори илмҳои таърих, профеесор Ҷамшед Ҷӯразода, муовинону масъулони яқ қатор муассисаҳои олии вилоят ширкат варзиданд.

Маликисломӣ Наим Мунаввар зимни ифтитоҳи чорабинии  мазкур  аз ҷумла зикр дошт, ки  дар тамоми кишварҳои дунё ҷавонон ба ҳайси як нерӯи бузурги бунёдкор ва пешбарандаи ҳаёт эътироф гардидаанд ва таҳкими нерӯи иқтисодиву сиёсӣ ва иҷтимоии мамлакатро бе иштироки фаъолони ҷавонон тасаввур намудан душвор аст, бешубҳа афзалиятҳои стратегӣ насиби он давлат ва ҷомеа мегардад, ки истифодаи самарабахши афкори пешрафта, пеш аз ҳама он нерӯи навоварро, ки густаришдиҳандаи асосии он ҷавонон мебошанд, аз худ менамоянд. Дар Тоҷикистони соҳибистиқлол бо ҳидояту роҳнамоиҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон масъалаҳои марбут ба ҷавонон яке аз омилҳои асосӣ ва афзалиятнок ба ҳисоб меравад. Зеро дар ҳамаи марҳалаҳо давлат кӯшиш намуда истодааст, ки дар маърифати зеҳниву ақлонии насли ҷавон тарбияи ғоявӣ, миллӣ, сиёсиву ҳуқуқӣ, ахлоқиву ватандӯстӣ, инсондӯстӣ, ташаккули тарзи ҳаёти солим, зебоипарастӣ, тарбияи меҳнатӣ, таҳаммул ва тоқатпазирӣ, масъулиятшиносӣ ва амсоли инҳо ҷой дошта бошад, то ҷавонони мо мутобиқи талаби замон ва ҳамчун мутахассисони баландихтисос ба воя расида, ба ҳаёти осоишта роҳёб гарданд. Таъсиси квотаи президентӣ барои ҷавонони шаҳру деҳоти дурдаст, роҳандозӣ шудани идрорпулӣ бо номи «Дураxшандагон», ҷоизаҳои ба номи «Исмоили Сомонӣ» ва «Султон  Умаров» нишонаи ғамхории давлат ва Ҳукумати кишвар нисбати ҷавонон маҳсуб меёбад.  Ҳизби Халқии Демократии Тоҷикистон низ аз оғози фаъолияти хеш ба ҷавонон назару таваҷҷуҳи хосса дошта, барои боз ҳам бештар равона намудани ин нерӯи солим баҳри ободии диёр,  баланд бардоштани ифтихори миллӣ ташкилоти ҷамъиятии ҷавононро бо номи «Созандагони Ватан» таъсис дод, ки имрӯз фаъолияти бомаром дорад. Дар остонаи Рӯзи парчами миллии кишвар тақдиронидани ҷавонони фаъол бесабаб нест. Мо итминони комил дорем, ки ҷавонони мо минбаъд низ бо масъулияти бештар пайи бунёди қасри муҳташами Истиқлол кӯшиш варзида, дар баланд бардоштани сатҳ ва эътибори ин миллати фарҳангпаноҳ ва орому озод саҳм мегузоранд.

Аз номи гирандагони идрорпулӣ аъзои ташкилоти ибтидоии «Ливои зафар» Зайнаби  Ғуфрон миннатдории худро ба кумиҷроияи шаҳрӣ  расонида, шеъри ба тозагӣ эҷодкардаашро ба самъи ҳозирин расонид.

Раиси кумиҷроияи вилоятии ҳизб Сарфароз Фаттоҳзода дар ҳузури ҷавонони фаъол элон дошт, ки Кумиҷроияи вилоятӣ ҳамчун армуғон ва дастгирии ҷавонони соҳибистеъдод сарпарасти нашри китоби ин шоираи навроҳ мегардад.

Бо ҳамин чорабинӣ хушу хотирмон ҷамъбаст гардид.   

Нашр шуд: 26 ноябри 2018

Дида шуд: 1514 маротиба