- Шумо дар инҷо:
-
Асосӣ
- Хабарҳо
- Дида шуд: 1005 маротиба
Ба ифтихори 76 – умин солгарди ғалабаи Ҷанги Бузурги Ватанӣ субҳи имрӯз дар майдони муҷассамаи ёдгории шаҳидони Ҷанги Бузурги Ватании солҳои 1941- 1945 маросими гулчанбаргузорӣ ва чорабинии тантанавӣ доир гардид.
Дар қатори дигар муассисаву ташкилотҳо ҷомеаи меҳнатии Донишкадаи политехникии Донишгоҳи техникии Тоҷикистон дар шаҳри Хуҷанд таҳти сарварии директори донишкада Саидӣ Дилафрӯз Раббизода дар ин чорабинӣ ширкати фаъолона дошта, бо гулгузорӣ дар пойи муҷассамаи ёдгории шаҳидони Ҷанги Бузурги Ватании солҳои 1941- 1945 қаҳрамонони ҷангро бо некӣ ёд карданд.
Маврид ба зикр аст, ки дар муҳорибаҳои Ҷанги Бузурги Ватанӣ беш аз 260 ҳазор нафар фиристодагони Тоҷикистон иштирок намуданд. Онҳо барои дифои Ватан ва шарафу номуси мардум дар сангарҳо муборизаи шуҷоатнок ва корнамоиҳои бузург нишон дода, зиёда аз 92 ҳазор нафарашон дар майдонҳои набард ҳалок шуданд. Бо нишони қадрдонии диловарию қаҳрамонӣ 54 нафар ҳамватанони мо бо унвони олии Қаҳрамони Иттиҳоди Шӯравӣ, 19 нафар бо ҳар се дараҷаи ордени «Шараф» ва зиёда аз 60 ҳазор нафар бо ордену медалҳои ҷангӣ сарфароз гаштанд.
- Дида шуд: 1072 маротиба
Бо мақсади тарғибу ташвиқи либоси миллӣ, тарбияи зебоипарастӣ ва бахшида ба эълон гардидани солҳои 2019-2021 “Солҳои рушди деҳот, сайёҳӣ ва ҳунарҳои мардумӣ” санаи 20 апрели соли 2021 дар Боғи фарҳангию фароғатии Камоли Хуҷандӣ Фестивали шаҳрии “Сад ранги чакан” баргузор гардид.
Дар Фестивали мазкур 12 нафар донишҷӯдухтарони Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд фаъолона ширкат варзида, мақомҳои шоистаро касб намуданд.
Дар ин озмун донишҷӯи курси 1 ихтисоси экологияи саноат ва истифодаи оқилонаи захираҳои табиӣ Меҳрангез Исмоилзода дар бахши “Беҳтарин либоси маросимӣ ва идона” сазовори ҷойи аввал ва донишҷӯи курси 1 ихтисоси таркиб ва технологияи маҳсулоти дӯзандагӣ Азиза Муҳиддинова дар бахши “Беҳтарин либоси рӯзмарра” сазовори ҷойи сеюм гардиданд.
- Дида шуд: 960 маротиба
Ба ифтихори эълон гардидани солҳои 2020 – 2040 «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” ва 30 – солагии Истиқлолияти давлатии Ҷумҳурии Тоҷикистон дар маҷлисгоҳи асосии Донишкадаи политехникии Донишгоҳи техникии Тоҷикистон ба номи академик Муҳаммад Осимӣ конференсияи илмӣ – амалии омӯзгорон, муҳаққиқони ҷавон, докторантони PhD, магистрантон ва донишҷӯён баргузор гардид.
Конференсияро муовини директор оид ба илм ва инноватсия Усмонҷон Ахмедов оғоз бахшида, баён дошт, ки дар доираи ҳафтаи Рӯзи илми тоҷик дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ силсилаи чорабиниҳо бахшида ба эълон гардидани солҳои 2020 – 2040 «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” ва 30 – солагии Истиқлолияти давлатии Ҷумҳурии Тоҷикистон доир гардиданд, ки имрӯз он дар конференсия натиҷагирӣ карда мешавад.
Директори донишкада, номзади илмҳои техникӣ Саидӣ Дилафрӯз Раббизода аз дастовардҳои илмиву истеҳсолии донишкада ҳарф зада, зикр намуд, ки дар донишкада дар самтҳои расидан ба ҳадафҳои стратегии мамлакат, аз ҷумла таъмин намудани амнияти озуқаворӣ, саноатикунонии босурати мамлакат, самаранок истифодабарии барқ ва технологияҳои коммуникатсионӣ, гузариш ба иқтисодиёти рақамӣ корҳои илмию тадқиқотӣ иҷро карда мешавад. Тайёр кардани кадрҳои илмию педагогӣ яке аз вазифаҳои асосии донишкада ба ҳисоб меравад. Танҳо дар зарфи 5 соли охир дар донишкада 23 рисолаҳои номзадӣ, 3 рисолаҳои докторӣ ҳимоя шудааст, ки 70%-и онҳо ба самти илмҳои дақиқ ва техникӣ равона шудааст. Дар давоми 4 моҳи соли ҷорӣ 1 рисолаи докторӣ аз тарафи Наим Рашидов ва 2 рисолаҳои номзадӣ аз тарафи омузгорон Мазбут Холиқов ва Богдан Левандовский ҳимоя карда шудааст. Дар соли 2020 ва 4 моҳи соли 2021 аз ҷониби омӯзгорон, докторантон ва муҳақиқони ҷавони донишкада зиёда аз 300 мақолаҳои илмӣ, аз ҷумла 10 мақолаҳои сатҳи байналхалқии СКОПУС, 120 мақолаҳои, дар нашрияҳои тақризшавандари КОА ФР ва ҶТ, 8 монографияҳо нашр гардидаанд. 6 шаҳодатномаҳои зёҳнӣ ва нахустпатентҳо ба даст оварда шуда, 10 санадҳои татбиқи натиҷаи корҳои илмию тадқиқотӣ дар истеҳсолот гирифта шудааст.
Сипас ғолибони олимпиадаи ҷумҳуриявӣ барои ба даст овардани “Ҷоми Академияи миллии Ҷумҳурии Тоҷикистон”, озмуни ҷумҳуриявӣ барои дарёфти “Ҷоми раёсати Донишкадаи сайёҳӣ, соҳибкорӣ ва хизмат”, даври донишкадавии озмуни ҷумҳуриявии “Илм-фурӯғи маърифат”, фестивали ҷумҳуриявии муд-2021 “Аз Наврӯз то Наврӯз”, олимпиадаи байналхалқии “Электротехника -2021”, “Ихтироъкорон” ва устодоне, ки шогирдонашон дар афзуннамои дастовардҳои донишкада саҳм гузоштанд, бо Ифтихорнома ва тӯҳфаҳои хотиравӣ аз ҷониби роҳбарияти донишкада қадршиносӣ гардиданд.
Дар идомаи кори конференсия маърӯзаҳои илмии коромӯзи кафедраи математикаи олӣ ва информатика Нилуфар Бобоҷонова, дар мавзӯи “Баланд бардоштани самаранокии корҳои мустақилонаи назоратшавандаи донишҷӯён дар машғулиятҳои математикаи олӣ дар шароити низоми кредитии таҳсил”, сармутахассиси Раёсати амнияти бехатарии озуқавории вилояти Суғд, номзади илмҳои биологӣ Камолов Н.Ш. дар мавзӯи “Таҳлили истеҳсоли маҳсулоти чорводорию паррандапарварӣ ва ҳалли муамоҳои ҷойдошта дар самти рушди соҳа”, магистранти курси 2 – юми Донишкадаи кӯҳӣ – металлургии Тоҷикистон Ёқубов Ф дар мавзӯи “Роҳҳои сарфа намудани нерӯи барқ дар манзили истиқоматӣ”, магистранти курси 1 - уми Донишкадаи иқтисод ва савдои Донишгоҳи техникии Тоҷикистон Баҳронова С.Б. дар мавзӯи “ Воздейств глобализационных процессов на деятельность кредитных организаций”, докторанти курси 1 –уми Донишкадаи политехникии Донишгоҳи техникии Тоҷикистон Нугманов Н дар мавзӯи “Алгоритмы искуссвенного интеллеккта в цифровой экономике”, магистранти курси 1 –уми Донишкадаи политехникии Донишгоҳи техникии Тоҷикистон Насруллоев У дар мавзӯи “Типовые схемы конфигураций СЭС на основе возобновляемых источников энегии на примере Согдийской области” шунида шуд.
Дар қисмати дуюми кори конференсия дар бахшҳои “Саноатикунонии босуръати мамлакат, фаъолияти иқтисодӣ, молиявӣ ва сайёҳӣ ҳамчун омилҳои рушди устувори иқтисодиёт”, “Нақши сохтмон, нақлиёт ва энергетика дар рушди иқтисодиёти миллӣ”, “ Нақши соҳаи хӯрока ва кишоварзӣ дар таъмини амнияти озуқаворӣ”, “ Нақши илмҳои риёзию табиатшиносӣ дар омода намудани кадрҳои муҳандисӣ” ва “Масъалаҳои мубрами забон ва улуми ҷомешиносӣ”беш аз 70 мақолаҳои устодон, муҳаққиқони ҷавон, докторантони PhD, магистрантон ва донишҷӯён шунида шуд.
Конфернсия дар сатҳи баланди ташкилӣ ба кори худ анҷом бахшид.
- Дида шуд: 1050 маротиба
Дар Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд вобаста ба пешгирии падидаҳои номатлуб, аз ҷумла коррупсия, шомилшавӣ ба ҳизбу ҳаракатҳои ифротӣ ва тарғиби ахлоқу одоби ҳамида, ҷалби донишҷӯён ба омӯзиши фанҳои дақиқ, китобхонӣ ва баланд бардоштани эҳсоси худшиносию худогоҳӣ, ватандӯстӣ ва меҳанпарастӣ дар байни донишҷӯён бо иштироки Тӯйчизода Темур - мудири шуъбаи маъмурию ҳуқуқии дастгоҳи Раиси вилоят, Мирзоғуфрон Ғафуров - сармутахассиси шуъбаи рушди иҷтимоӣ ва робита бо ҷомеаи Дастгоҳи раиси вилояти Суғд, Турсунов Фаррух - устоди Донишкадаи иқтисод ва савдои Донишгоҳи тиҷорати Тоҷикистон дар шаҳри Хуҷанд вохӯрии судманд баргузор гардид.
Чорабиниро директори донишкада Дилафрӯз Саидӣ ҳусни ифтитоҳ намуда, зикр дошт, ки ба шарофати сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таваҷҷуҳ ба ҷавонон сол то сол зиёд гардида истодааст. Ҳадафи Роҳбари давлат ин пеш аз ҳама баланд бардоштани сатҳи саводу маърифатнокии мардум ва дар навбати аввал наврасону ҷавонон, тақвияти ҳисси миллӣ, ватандӯстиву ватанпарварӣ, ҳуввияти миллӣ, арҷгузорӣ ва омӯхтани забон, таърих фарҳанги бостонии тоҷикон, тавсеаи доираи донишу ҷаҳонбинии илмиву техникӣ ва рушди илмҳои дақиқу табиӣ дар кишвар мебошад.
Яке аз самтҳои муҳими фаъолияти донишкада ба тарбияи мутахассисони варзидаи дорои илму маърифати баланди фарҳангиву сиёсӣ нигаронида шудааст. Раёсати донишкада сиёсати пешгирифтаи Пешвои муаззами миллатро ҳамаҷониба дастгирӣ намуда, фаъолияти худро оид ба тайёр намудани мутахассисони ватанпарвар ва баландихтисоси дар бозори меҳнат рақобатпазир равона намуда аст.
Тӯйчизода Темур - мудири шуъбаи маъмурию ҳуқуқии дастгоҳи раиси вилоят дар баромади худ қайд намуд, ки терроризм ва экстремизм яке аз проблемаҳои асосии ҷомеа ҷаҳонӣ буда, ифротгароён махсусан ҷавононро бо ҳар гуна ваъдаҳои бардурӯғи диниву дунявӣ ҷалб намуда, онҳоро ба ҷараёнҳои террористӣ сафарбар менамоянд. Яке аз омилҳои асосии гумроҳии ҷавонон ва пайваст шуданашон ба ҳизбу ҳаракатҳои ғайриқонунӣ паст будани дониши сиёсӣ, бетарафии аҳли ҷомеа, огоҳ набудан аз шароити иқтисодиву ҳолати равонии ҷавонон мебошад. Аз ҷониби мавсуф барои бедор намудани ҳушёрии сиёсӣ ва боз ҳам қавитар намудани дониши сиёсии донишҷӯён даъват ба амал оварда шуд.
Дар баромади Мирзоғуфрон Ғафуров, сармутахассиси шуъбаи рушди иҷтимоӣ ва робита бо ҷомеаи Дастгоҳи раиси вилояти Суғд зикр шуд, ки ҳар яки мо – сокинони кишвар новобаста аз синну сол, фарқияти ҷинсиву вазъи иҷтимоиро зарур аст, ки алайҳи терроризму экстремизм муборизаи ҳамҷоя барем. Нагузорем, ки ҷавонони мо ба гурӯҳу ҳаракатҳои гуногун шомил шаванд. Зеро ватани моро ба ҷуз худи мо каси дигар обод намекунад. Якпорчагии Тоҷикистони азиз, фазои осудаву ором ва рушди иқтисодиёташ боиси ҳаёти хурраму обод ва дастархони пурнозу неъмат мебошад. Номбурда аз ҷавонон даъват ба амал овард, ки ҳушёрии сиёсиро аз даст надиҳанд.
Турсунов Фаррух, устоди Донишкадаи иқтисод ва савдои Донишгоҳи тиҷорати Тоҷикистон дар шаҳри Хуҷанд оид ба баланд бардоштани руҳияи худшиносию худогоҳӣ, маърифати ҳуқуқӣ, ширкати фаъолона дар ҳаёти сиёсӣ ва ҷамъиятӣ, пешгирии ҳуқуқвайронкунӣ ва ҷинояткорӣ, махсусан шомилшавӣ ба ҳизбу ҳаракатҳои ифротгаро, эҳтироми арзишҳои миллӣ сухан намуд. Илова бар ин нисбати дастовардҳои ҷумҳурӣ дар замони соҳибистиқлолӣ сухан карда шуда, қайд гардид, ки ҳар як донишҷӯ бояд пеш аз ҳама тамоми кушишу ғайрати худро барои ободӣ ва пешрафти ватан равона намояд.
Дар хотимаи чорабинӣ директори донишкада иброз дошт, ки ҷомеаи меҳнатии Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд минбаъд низ барои бедор намудани ҳушёрии сиёсӣ ва боз ҳам қавитар намудани дониши сиёсии донишҷӯён кӯшиш ба харҷ дода, дар ташвиқу тарғиби дастовардҳои даврони истиқлолият ва ҳадафҳои созандаи Асосгузори сулҳу Ваҳдати миллӣ, Пешвои миллат, Президенти ҶТ муҳтарам Эмомалӣ Раҳмон пайваста кӯшиш ба харҷ медиҳанд.
Мулоқоти мазкур аз ҷониби телевизиони вилоят сабт гардида, донишҷӯёни донишкада дар навбати худ фикру андешаҳои худро оид ба баланд бардоштани маърифати ҳуқуқӣ, аз даст надодани зиракии сиёсӣ иброз намуданд. Аз ҷониби онҳо қайд гардид, ки тамоми саъю талоши хешро ба донишандӯзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан, рушди илму техника, бунёдкорӣ ва созандагӣ равона намуда, барои шукуфоии кишвар, пойдории сулҳу субот ҳамвора кӯшиш хоҳанд кард.
- Дида шуд: 958 маротиба
Ба ифтихори 110 - солагии Қаҳрамони Тоҷикистон, шоири тавоно, мубашири сулҳу ваҳдат Мирзо Турсунзода ва шоири халқии Тоҷикистон устод Лоиқ Шералӣ дар маҷлисгоҳи Донишкадаи политехникии Донишгоҳи техникии Тоҷикистон ба номи академик Муҳаммад Осимӣ конференсияи илмӣ – амалӣ таҳти унвони “Бузургонро бузургон зинда медоранд” баргузор гардид. Конференсияро шоири халқии Тоҷикистон Фарзона бо ҳузури мунаввараш ранги тозае бахшид.
Устоди кафедраи забонҳои давлатӣ ва ҷомеашиносӣ Шафоат Файзиева чорабиниро ҳусни оғоз бахшид.
Муовини директор оид ба илм ва инноватсия Усмонҷон Ахмедов паёми шодбошии директори донишкада Саидӣ Дилафрӯз Раббизодаро ба аҳли нишаст расонд. Зимни маъруза мавсуф таъкид дошт, ки яке аз рукнҳои муҳими соҳибистиқлолӣ ин ҳифзу нигаҳдошти арзишҳои миллӣ, фарҳангу тамаддуни кишвар ва арҷ гузоштан ба хизматҳои шоёни падарону бобоёнамон мебошад. Бузургдошт ва таҷлили 110 – солагии шоири тавонои миллат Мирзо Турунзода ва 80 – солагии Лоиқи бузургвор бозгӯи гуфтаҳои болоист. Бояд ёдовар шуд, ки дар таърихи давлатдори навини тоҷикон дар қатори чандин абармардоне чун Садриддин Айнӣ, Бобоҷон Ғафуров номи Мирзо Турсунзода ва Лоиқ Шералӣ чун муаррифгарони асили фарҳанг ва маънавиёти тоҷикон бо хати тиллоӣ сабт гардидааст.
Шоираи ширинкалом Фарзона Мирзо Турсунзодаро мубашири сулҳу дӯстӣ дар ақсои олам унвон карда, чанд хотираҳои давраи бачагиашро, ки аз сӯҳбати устод баҳравар шуда буд, нақл намуд. Мавсуф ҳамзамон қайд кард, ки устод Мирзо Турсунзода ва академик Муҳаммад Осимӣ бо ин қадар бузургиву ҳашамат дар шаҳри Маскав зимни дифои рисолаи номзадии модари шоира Бароат Ҳоҷибоева ширкат варзида, ба донишу малакаи яке аз аввалин бонуи рӯй сӯи илм ниҳода баҳои баланд додаанд. Гуфта шуд, ки Мирзо Турсунзода бо шеърҳои таълифнамудаи худ миллати моро дар арсаи ҷаҳонӣ муаррифии шоиста намуд. Шоира Лоиқ Шералиро падари маънавӣ ва аз нахустин устодаш шуморида, баён дошт, ки Лоиқ Шералӣ ба ҷомеа назари дигар дошт ва ҳамеша чун шоири хуршеду дарё ба идеяҳои миллӣ содиқ монд. Ӯ шеъре иншо мекард, ки аз дил буду ба дил рафта менишаст. Ватандӯсту миллатгаро буд ва ҷойгоҳи зан ва моддаро муқаддас мешуморид. Чандин таълифоти худро дар ҳавлии банда манзум карда, ҳавзаи хуби адабии шоирони ҷавонро созмон дода буданд.
Донишҷӯёни донишкада аз рӯзгор ва осори муаллима пурсон шуда, ба саволҳои худ посухҳои мушаххас гирифтанд. Шоира дар фарҷоми суханронии худ баён дошт, ки саоқат ба илмомӯзӣ, садоқат ба касб шахсро дар ҷомеа соҳибмартаба мегардонад. Бояд ҳар як ҷавон дар ҷомеа мавқеи худро дошта бошад. Аз хиради соҳибхирадон амсоли Мирзо Турсунзода ва Лоиқ Шералӣ қарз гиранд. Мавсуф аз ҳавдоси наздимарзӣ изҳори ташвиш намуда, қайд кард, ки ҳама кор ба салоҳ ҳал бояд шавад на ба силоҳ.
Мудири кафедраи забонҳои давлатӣ ва ҷомеашиносӣ Дилбар Ҷӯраева дар баромадаш зикр дошт, ки Воқеан ҳам кас аз осору рӯзгори ин шахсони бузурги миллат огаҳӣ пайдо мекунад, дарк месозад, ки онҳо чӣ гуна ба обу хоки кишвари азизаш муҳаббату самимият доштанд. Як давраи рушду нумӯъи илму фарҳанг ва шинохти аслии миллӣ ба замони фаъолияти доманадори ҳар ду шоир рост меояд. Устод Мирзо Турсунзода аввалин шоире буданд, ки пас аз мутоилаи “Модарнома”-и Лоиқ Шералӣ бе нашри китоб он касро ба узвияти Иттифоқи нависандагони Ҷумҳурии Тоҷикистон шомил карда буданд. Мирзо Турсунзода ба насли дуюми адибони садаи бисти тоҷик шомил буда, дар радифи Сотим Улуғзода, Ҷалол Икромӣ, Ҳабиб Юсуфӣ, Ҳаким Карим, Мирсаид Миршакар, Муҳаммадҷон Раҳимӣ, Абдусалом Деҳотӣ, Раҳим Ҷалил, Боқӣ Раҳимзода дар як давраи пур аз тазод ва муборизаҳои дохилӣ ба арсаи адабиёт қадам ниҳода буданд. Устод Лоиқ бошад бо шеъри баланди худ дар қатори дигар шоирони забардасти кишвар амсоли Муъмин Қаноат, Бозор Собир, Гулрухсор, Гулназар Келдӣ, Камол Насрулло ва Фарзонаи Хуҷандӣ шеъри тоҷикро ба оламиён муаррифӣ намуданд.
Дар вазъияти тантанавӣ ба ғолибони озмуни даври донишкадавии “Фурӯғи субҳи доноӣ китоб аст” ва “Мавлавихонӣ” Ифтихорномаи донишкада супорида шуд.
Чорабинии фарҳангӣ, ки аз ҷониби донишҷӯён омода карда шуда буд, маҳфилро боз ҳам шукӯҳманд намуд.
- Дида шуд: 1114 маротиба
Дар толори варзишии Донишкадаи политехникии Донишгоҳи техникии Тоҷикистон дар шаҳри Хуҷанд бахшида ба пешвози ҷашни 30 - солагии Истиқлолияти давлатии Ҷумҳурии Тоҷикистон ва 10 - солагии таъсисёбии Ташкилоти ҷамъиятии ҷавонон “Созандагони Ватан” бо иқдоми Кумитаи иҷроияи Ҳизби Халқии Демократии Тоҷикистон дар шаҳри Хуҷанд дар ҳамкорӣ бо ҶСП ТАКХ “Имон Интернешнал” байни донишҷӯдухтарони муассисаҳои олӣ, коллеҷҳо ва литсейҳои шаҳри Хуҷанд мусобиқаи варзишӣ аз рӯи намуди баскетбол доир намуд, ки дар он 9 даста иштирок карданд.
Мусобиқа давоми се рӯз идома ёфта, дар натиҷа дастаи Муассисаи давлатии таълимии Коллеҷи тиббии шаҳри Хуҷанд ба номи Ю.Б.Исҳоқӣ сазовори ҷойи аввал гардида, зинаҳои баъдиро Муассисаи давлатии таълимии Донишгоҳи давлатии Хуҷанд ба номи академик Бобоҷон Ғафуров ва дастаи Донишкадаи политехникии Донишгоҳи техникии Тоҷикистон соҳиб шуданд.
Дар маросими ҷамъбасти мусобиқа роҳбарияти муассисаҳои таҳсилоти олӣ ва миёнаи касбӣ, раиси кумиҷроияи шаҳрии ҲХДТ Маликисломӣ Наим Мунаввар ширкат варзида ба ғолибону ҷоизадорон дар вазъияти тантанавӣ Ҷом, Ифтихорнома ва тӯҳфаҳои хотиравӣ супориданд.
- Дида шуд: 977 маротиба
Директори ширкати «Днепроэнергостал»-и Ҷумҳурии Украина Вадим Осипенко ва муовини ширкати мазкур профессор Сергей Семирягин дар доираи сафари кориашон ба вилояти Суғд ба Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд ташриф оварда, бо дастовард ва аз раванди таълиму тарбияи ин махзани илм ошноӣ пайдо намуданд.
Дилафрўз Саидӣ, директори ДПДТТ ба номи академик М. Осимӣ меҳмононро ба ҳузур пазируфта, нахуст доир ба донишкада ва дастовардҳои он маълумот дод.
Иттилоъ дода шуд, ки ки дар сохтори донишкада 4 факултет, 13 кафедра, 4 марказ ва 9 шуъба амал менамоянд. Дар донишкада ба миқдори умумӣ: 167 синфхонаи таълимӣ, 36 озмоишгоҳи таълиму таҳқиқотӣ, 26 синфхонаи компютерӣ, 5 синфхонаи лингафонӣ, 2 толори варзишӣ, 2 майдончаи варзишӣ, 1 технопарк, 3 толори маҷлисӣ, 3 китобхона, 3 қироатхона мавҷуд аст ва дар умум, ба як донишҷӯ 7,03 метри мураббаъ рост меояд. Пешрафти таҳсилу тадрис ва баланд бардоштани сатҳи сифати таълим яке аз ҳадафҳои стратегӣ ва вазифаи муҳими сиёсати давлатии Ҷумҳурии Тоҷикистон дар соҳаи маориф ба ҳисоб рафта, он дар радифи сохторҳои дигари марбут ба маорифи кишвар ҳамчунин тавассути муассисаҳои таҳсилоти олии Ҷумҳурии Тоҷикистон таҳия, танзим ва амалӣ сохта мешавад. Бо мақсади амалӣ намудани нақшаҳову барномаҳо шуъбаи таълим бо ҳамбастагии дигар шуъбаҳову сохторҳои донишкада якчанд чорабиниҳоро ташкил ва гузаронид, ки мақсади он баҳри баланд бардоштани сатҳу сифати таълим ва рушди таҳсилоти олии касбӣ равона карда шуда буд.
Дилафрўз Саидӣ гуфт, ки танҳо соли 2020 аз рӯйи натиҷаҳои корҳои илмӣ-тадқиқотии иҷронамудаи устодон 5 патент ва шаҳодатномаи зеҳнӣ аз он ҷумла 11 тадбиқи корҳои илмӣ-тадқиқотӣ ба даст оварда шудааст. Дар соли 2020 аз тарафи олимони донишкада зиёда аз 11 санадҳои татбиқ гирифта шуд. Соли 2020 аз тарафи омӯзгорони донишкада 259 мақола дар сатҳи гуногун чоп гардидаанд, ки аз онҳо 62 мақола дар маҷаллаҳои аз тарафи КОА эътирофгардида, 107 мақола дар маҷмӯаҳои конференсияҳои байналмилалӣ, 84 мақола дар сатҳи маҷмӯаҳои ҷумҳуриявӣ ва 7 мақола дар Scopus чоп гардидаанд.
Сипас меҳмонон аз озмоишгоҳ, китобхона ва парки технологии донишкада аз наздик шинос шуданд. Иттилоъ дода шуд, ки яке аз самтҳои муваффақи донишкада ин Парки технологӣ мебошад, ки барои ҳар чӣ бештари ҷалби донишҷӯёни соҳибзавқи донишгоҳ ба фаъолияти илмиву эҷодӣ ва ихтироъкориву инноватсионӣ нигаронида шудааст. Айни замон заминаи моддию техникии паркро, асосан озмоишгоҳҳои кафедраи маҳсулоти хӯрока ва агротехнология, ошхона, сехи дӯзандагӣ дар бинои факултети информатика ва энергетика, ки бо дастгирии донишкада сохта шудааст, устохонаи хизматрасонии компютерӣ ва устохонаи таълимии кафедраи автомобилҳо ва идоракунии нақлиёт ташкил медиҳанд. Тавассути грант барои истеҳсоли маҳсулоти нонӣ таҷҳизоти лозима ба кор дароварда шуда, истеҳсоли маҳсулоти нонӣ ба роҳ монда шуд. Ҳоло маҳсулоти истеҳсолшуда дар ошхона ва ба донишҷӯён ба фурӯш бароварда шуда истодааст. Соли 2020 дар парки технологӣ курсҳои бозомӯзӣ, ба монанди “Дӯхти либос”, “Забони англисӣ” ташкил карда шуданд, ки донишҷӯён ба ин курсҳо иштироки фаъолона доранд. Барои дастгирии бизнес-идеяҳои донишҷӯён парки технологӣ озмун ташкил намуд. Дар озмун унвонҷӯён ва донишҷӯён иштирок намуданд. Аз байни ин озмунҳо 3 лоиҳа аз тарафи парки технологӣ маблағгузорӣ карда шуд
Таъкид гарид, ки барои дастгирии идеяҳои инноватсионӣ озмуни дигар ташкил карда шуда, барои дастгирии 3 лоиҳа қарор қабул карда шуд: туҳфаҳои худсохт, таъмири трансформаторҳо ва маҳсулоти дастии бофташуда.
Директори ширкати «Днепроэнергостал»-и Ҷумҳурии Украина Вадим Осипенко ва муовини ширкати мазкур профессор Сергей Семирягин бо раёсати донишкада низ мулоқот анҷом дода, таасуроти амиқи хешро аз ин боргоҳи илму маърифат баён доштанд. Зикр гардид, ки донишкада дар муддати кўтоҳ ба як қатор дастовардҳои арзанда мушарраф гардидааст ва он шоёни таҳсин аст. Бахусус дар самти ихтирооти гуногун ва татбиқи илм дар амалия қадамҳои устувор гузошта шудааст.
Профессор Сергей Семирягин, муовини директори ширкати «Днепроэнергостал»-и Ҷумҳурии Украина зикр намуд, ки дастовардҳои донишкада ва маҳсули фаъолияти он намунаи олии таҷриба барои бархе донишгоҳҳои Украина аст. Мо ҳамзамон имкон дорем, ки устодони донишкадаро ба такмили ихтисос фаро гирифта, мубодилаи таҷрибаҳои илмӣ намоем ва дар самти таъсиси корҳои хурди муштарак замина гузорем.
Дилафрўз Саидӣ, директори ДПДТТ ба номи академик М. Осимӣ гуфт, ки сирри муваффаққияти донишкада аз иҷрои босамари дастуру супоришҳои Асосгузори сулҳу Ваҳдати миллӣ, Пешвои муаззами миллат, Президенти мамлакат муҳтарам Эмомалӣ Раҳмон дар соҳаи маориф мебошад. Ҳар як суханронӣ, баромадҳои Пешвои муаззами миллат муҳтарам Эмомалӣ Раҳмон барои мо дастури раҳнамоӣ ва нақшаи фаъолияти рӯимизӣ аст. Мо ҷонибдори рушди бештари ҳамкориҳо ҳастем ва барои густариши равобит дар ҳарду ҷониб имкониятҳои зиёд аст ва бояд аз он фаровон истифода бурд.
Сипас, аз ҷониби Дилафрўз Саидӣ, директори ДПДТТ ба номи академик М. Осимӣ Сергей Семирягин, муовини директори ширкати «Днепроэнергостал»-и Ҷумҳурии Украина Шартномаи ҳамкорӣ ба имзо расид.
Ҳамин тавр, ҷонибҳо ба мувофиқа расиданд, ки дар соҳаи шарикии дарозмуддати истеҳсолӣ ва илмӣ ба таҳия ва татбиқи технологияи муосир ҳамкорӣ намоянд. Ҳамкориҳо бо шаклҳои гуногун пиёда карда шуда, дар якҷоягӣ системаи истеҳсолӣ ва илмӣ таъсис дода, ба ин васила сатҳи шарикии ҳамаҷонибаи техникии байни ширкати «Днепроэнергостал»-и Ҷумҳурии Украина ва Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд ба сатҳи баланд зарурӣ бардошта хоҳад шуд. Минбаъд ҳарду ҷониб нерӯҳои худро барои ташкили гурӯҳи тадқиқотӣ фаъол ва ҳамоҳанг мекунанд ва барои татбиқи муштараки истеҳсолот ва таҳқиқоти технологӣ равона карда мешавад.
Дар анҷоми мулоқот Дилафрўз Саидӣ, директори ДПДТТ ба номи академик М. Осимӣ ба меҳмонон тўҳфаҳои хотиравӣ, ки маҳсули дастранҷи ин махзани илм аст, тақдим намуд.
- Дида шуд: 975 маротиба
Тантанаҳои наврӯзӣ дар Донишкадаи политехникии Донишгоҳи техникии Тоҷикистон дар шаҳри Хуҷанд бо шукуҳу шаҳомати хосса доир гардид.
Саҳни сабздомани донишкада идона оро дода шуда, устодони факултетҳо бо оростани хаймаҳои наврӯзӣ ва дастовардҳои эҷодӣ ҳузури меҳмонон – вакили Маҷлиси намояндагони Маҷлиси Олии Ҷумҳурии Тоҷикистон Гулбаҳор Назирӣ ва раиси Кумитаи иҷроияи Ҳизби Халқии Демократии Тоҷикистон Наим Маликисломӣ хайрмақдам гуфтанд.
Директори донишкада, номзади илмҳои техникӣ Саидӣ Дилафрӯз Раббизода аз номи ҷомеаи меҳнатии донишкада кулли иштирокдоронро ба ифтихори ҷашни наврӯзӣ муборакбод намуда, зикр дошт, ки Наврӯзи оламафрӯз бо қадамҳои нек ва бахосияти худ боварӣ ва эътимодро ба ояндаи дурахшони ҷомеа қавитар мегардонад, ба қалбу рӯзгори мардум суруру ангезаи муҳаббат мебахшад. Ниёгони сарбаланди мо Наврӯзро бо шодиву хуррамӣ ва тантанаи бузург истиқбол намуда, беҳтарин орзую умед ва таманниёти хешро ба он вобаста мекарданд, баҳри ояндаи дурахшон ва созандагиву бунёдкорӣ нақшаҳо тарҳрезӣ менамуданд. Наврӯзи сабздомани имсола дар чунин айёме меҳмони азизи мост, ки мардуми сарбаланди кишвар ҷиҳати истиқболи сазовори ҷашни 30 – солагии Истиқлолияти давлатии Ҷумҳурии Тоҷикистон азму талоши зиёд доранд. Аз ҷумла, ҷомеаи меҳнатии Донишкада бо армуғонҳои наву тоза, бо таҷлили 10 – солагии таъсисёбии худ, ки бо қадами файзрези меҳмонони олиқадр-сарварони муассисаҳои таҳсилоти олии касии кишвар ин шодию нишоти мо рангу ҷилои дигар гирифт ин ҷашни миллиро пешвоз хоҳанд гирифт.
Гулбаҳор Назирӣ аз номи рощбарияти олии Маҷлиси намояндагони Маҷлиси олии кишвар, Маликисломӣ Наим Мунаввар аз номи Кумитаи иҷроияи марказии ҲХДТ аҳли нишастро ба ҷашни Наврӯз табрик гуфтанд.
Фаъолону пешқадамони соҳа аз ҷониби Раёсати донишкада бо Ифтихорнома ва тӯҳфаҳои хотиравӣ тақдиронида шуданд.
Ҳайати ҳакамон ба маҳорати ҳунарварӣ, оростани хони наврӯзӣ баҳои воқеӣ доданд. Ҳамин тавр факултети муҳандисӣ – иқтисодӣ мақоми аввал, факултети муҳандисӣ – технологӣ мақоми дуюм ва факултети информатика ва энергетика ҷойи сеюмро ишғол намуданд.
Дар қисмати фарҳангӣ аз ҷониби донишҷӯён барномаи рангини консертӣ пешкаши ҳозирин гардонида шуд.
Бо ҳамин чорабинӣ хотима ёфт.
- Дида шуд: 1025 маротиба
Дар толори маҷлисгоҳи Донишкадаи политехникии Донишгоҳи техникии Тоҷикистон дар ҳошияи баргузории озмуни “Илм – фурӯғи маърифат” ҳамчунин озмуни ҳамасолаи “Ихтироъкорӣ ва навоварӣ” миёни омӯзгорон ва донишҷӯён дар сатҳи баланди ташкилӣ баргузор гардид. Дар озмун 12 лоиҳаи инноватсионӣ аз ҷониби донишҷӯён пешкаши аҳли ҳакамон гардида, ҳамзамон барои такмили лоиҳа аз ҷониби устодони дар толорнишаста низ дастурҳои судманд дода шуд.
Бояд қайд намуд, ки аксарияти лоиҳаҳои пешкашгардида барои хоҷагии халқи кишвар зарурӣ буда, дар сурати татбиқи амалии он метавон чанд мушкиливу муаммоҳои соҳаро ҳал намуд. Махсусан лоиҳаи пешкашнамудаи донишҷӯёни ихтисоси 4.40.01.01та Ҳакимхоҷаев Низомиддин , Султонов Беҳрӯз, Илҳомҷон Сулаймонӣ ва Холиқов Абубакр таҳти унвони “Мактаби электронии Тоҷикистон” шоистаи дастгирӣ аст. Онҳо дар қиёс ба ҳамсафони худ холҳои бештарро соҳиб гардиданд. Ҳамин тавр лоиҳаҳои Охунова Мунзифа, омӯзгор таҳти унвони “Бинои функсионалӣ”, 10 Охунов Зафар, омӯзгор таҳти унвони “исследование и разработка пенополистирольних плит и торкрет – бетона для трехслойных изделий и констррукций”, Пайрав Очилзода, донишҷӯи ихтисоси1.40.01.01 таҳти унвони “Robotics” ва Толибӣ Зулолабону Мухсинзода, донишҷӯи ихтисоси 3_74.02.06.тб таҳти унвони “Технологияи инноватсионии парвариши ҷулфинай дар гармхона” холҳои бештарро соҳиб гардиданд.
Дар назар аст, ки ғолибон дар даври вилоятиву ҷумҳуриявии озмуни навоварон ва ихтироъкорон Донишкадаи политехникии Донишгоҳи техникии Тоҷикистонро сазовор муаррифӣ мекунанд.
- Дида шуд: 938 маротиба
Ҳамасола дар Тоҷикистон бо мақсади ташвиқу тарғиби анъана ва суннатҳои ниёгон бо иқдоми бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон симпозиум, фестивал ва озмунҳои ҷумҳуриявию байналмилалӣ баргузор мегардад. Дар доираи онҳо аз ҷониби қишрҳои гуногуни ҷомеа расму оин, анъанаҳои гузаштагон ва маҳсули дастии ҳунармандон ба маърази тамошо гузошта мешаванд. Яке аз чорабиниҳое, ки миёни омма ҳамовозии гарму ҷӯшон пайдо намуд, ин баргузории фестивал – озмуни “Чакомаи гесӯ” мебошад.
Дар партави дастуру ҳидоятҳои созандаи Пешвои муаззами миллат, бо мақсади татбиқи амалии қарори Раиси вилояти Суғд муҳтарам Раҷаббой Аҳмадзода нимаи дуюми имрӯз бо мақсади тарғибу ташвиқи зебоипарастӣ миёни духтарону бонувон, ашъори баландмазмун бахшида ба ҳусну таровати рӯй, ҷозибаи гесӯ, сару либос ва ороишоти миллӣ, истифодаи маҳсулоти табиии ватанӣ дар парваришу нигоҳубини рӯй, мӯй, муҳофизати пӯсти дасту рӯй озмуни “Чакомаи гесу” байни донишҷӯёни чор факултет баргузор гардид.
Дар он донишҷӯён аз рӯи шартҳои “Намоиши гесӯи дароз” ва “Ороиш ва мӯйбофии замони муосир” бо ҳам вориди рақобат шуданд. Бо хулосабардории ҳайати ҳакамон дар бахши “Намоиши гесӯи дароз” Рисолатбону Маҳмудова, донишҷӯи курси якуми факултети информатика ва энергетика ҷойи аввалро соҳиб гардид. Зинаҳои баъдиро Мижгона Комилова, донишҷӯи курси якуми факултети информатика ва энергетика ва Навбаҳор Худойназарова, донишҷӯи курси сеюми факултети информатика ва энергетика ишғол намуданд.
Дар бахши “Ороиш ва мӯйбофии замони муосир” ҷои аввалро Севара Қодирова, донишҷӯи курси якуми факултети информатика ва энергетика, мақоми дуюму сеюмро Фарзона Фазлиддинзода, донишҷӯи курси якуми факултети муҳандисӣ – иқтисодӣ ва Зӯҳро Муротова, донишҷӯи курси якуми факултети информатика ва энергетика ишғол намуданд.
Дар ҷамъбасти чорабинӣ директори донишкада, номзади илмҳои техникӣ Саидӣ Дилафрӯз Раббизода барои иштироки фаъолонаи донишҷӯён изҳори сипос намуда, зикр дошт, ки фестивали «Чакомаи гесӯ» аз ҷумлаи ин барномаҳост, ки бо мақсади бедор кардани ҳисси зебоипарастӣ дар замири занон дар мамлакат баргузор мегардад. Яъне, ҳадафи асосии он на танҳо доштани гесӯвони дароз, балки баланд бардоштани завқи бонувон нисбат ба фарҳанги либоспӯшӣ, дур будан аз бегонапарстиву хурофот ва пос доштани арзишҳои миллӣ мебошад.
Директори Маркази ташаккули тарзи ҳаёти солими вилоят Зуфнуна Хоҷаева ба ҳунару маҳорати донишҷӯдухтарон баҳои баланд дода, қайд кард, ки озмун барои сарҷамъӣ, талқини зебоипарастӣ ва худшиносии миллӣ заминаи мустаҳакам мегузорад.
Чорабинии фарҳангӣ фестивалро рангу мазмуни дигар бахшид.
- Дида шуд: 1279 маротиба
