Чун анъанаи дар тамоми факултетҳои ДПДТТ ба номи академик М. Осимӣ аз донишҷӯёни бахши аввал имтиҳони қобилият (IQ) гирифта шуд.
Бояд намуд, ки имтиҳони қобилият ин имтиҳоне мебошад, ки донишҷӯёни донишкада дар он қобилият (IQ) -и худро аз фанҳои математика-мантиқ месанҷанд ва аз ҷониби устодон он баҳогузорӣ карда мешавад.
Ин имтиҳон имконият медиҳад, ки донишҷӯёни қобилияти баланд доштаро ба озмунҳои инноватсионӣ, лоиҳаҳо, олимпиадаҳо ва амсоли чунин чорабиниҳои мафкуравӣ ҷалб шаванд. Ҳамчунин ин даври аввали олимпиадаи дохили донишкадавӣ ба ҳисоб рафта, он имконият медиҳад, ки донишҷӯён ба даври дуюмии олимпиадаи дохили донишкадавӣ мустақиман роҳ ёбанд.
Баргузории чунин имтиҳонот барои бештар ҷалб намудани донишҷӯён ва ба дарёфти беҳтарин роҳҳои раванди таълим ба донишҷӯён нигаронида мешавад.
Ҷоиз ба зикр аст, ки дар раванди таълим натиҷаҳои имтиҳон ба назар гирифта мешаванд ва донишҷӯёне, ки қобилияти хуб ва дониши баланд доранд, барои бештар барои аз худ намоии фанҳои мантиқ ва техниқӣ фаро гирифта мешаванд.

Нашр шуд: 25 октябри 2019

Дида шуд: 1246 маротиба

Дар толори Донишкадаи политехникии Донишгоҳи техникии Тоҷикистон бо иштироки вакили Маҷлиси намояндагони Маҷлиси Олии Ҷумҳурии Тоҷикистон Гулбаҳор Назирӣ мулоқот бо донишҷӯёну устодони ин боргоҳи маърифат , баргузор гардид, ки ҳамзамон дар ин вохӯрӣ устодони Донишкадаи иқтисод ва савдои Донишгоҳи тиҷорати Тоҷикистон, омӯзгорони муасиссаҳои таълимии шаҳр, кормандони нозироти андоз ва сокинони маҳаллаҳои шаҳр ширкат варзиданд.
Мулоқотро Фирӯза Нуруллозода, муовин Раиси шаҳри Хуҷанд оғоз намуда, ҳадафи баргузории онро шарҳ дод.

Гулбаҳор Назирӣ, вакили Маҷлиси намояндагони Маҷлиси Олии Ҷумҳурии Тоҷикистон зимни баромади худ доир ба нуктаҳои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, дастовардҳои солҳои соҳибистиқлолии мамлакат, санадҳои меъёрию ҳуқуқиеро, ки мақоми олии қонунбарори мамлакат қабул кардааст, мавзӯъҳои вобаста ба сиёсати дохилию хориҷии мамлакат, татбиқи сиёсати самараноки молиявӣ, ҷалби сармоягузориву рушди бемайлони соҳибкорӣ ва амалигардии ҳадафҳои стратегӣ, бакорандозии чархаи дуюми НБО «Роғун», аз ҷумла таъкид дошт, ки ислоҳоти иқтисодии тайи солҳои охир амалишуда ба беҳтар гардидани фазои соҳибкориву сармоягузорӣ ва ҷалби сармояи хориҷӣ, аз ҷумла сармояи мустақим мусоидат карда истодааст. Ҳоло дар кишвар татбиқи 70 лоиҳаи сармоягузории давлатӣ ба маблағи умумии 30 миллиард сомонӣ идома дорад. Дар 10 соли охир ба иқтисодиёти Тоҷикистон дар ҳаҷми зиёда аз 33 миллиард сомонӣ сармояи мустақими хориҷӣ ворид гардидааст, ки қисми зиёди он ба рушди соҳаҳои энергетика, алоқа, сохтмон, истихроҷу коркарди канданиҳои фоиданок ва бунёди инфрасохтор равона шудааст. Ҳоло дар кишвар барои беҳтар кардани фазои сармоягузорӣ ҳамаи намудҳои санҷиши фаъолияти субъектҳои хоҷагидор дар асоси арзёбии хавфҳо ба роҳ монда шудаанд.

Гулбаҳор Назирӣ гуфт, ки аз ҷониби Пешвои миллат зимни ироаи Паёми навбатӣ таъкид шуд, ки «Мо соли ҷорӣ бо мақсади бартараф намудани санҷишҳои беасосу такрорӣ ва фароҳам овардани фазои мусоид барои рушди соҳибкорӣ ба ҳама гуна санҷишҳои фаъолияти соҳибкорони истеҳсолӣ дар давоми ду сол мораторий эълон намудем, ки аз он қариб 2000 субъектҳои соҳибкорӣ дар соҳаҳои истеҳсолӣ бархурдор гардиданд. Барои тақвият бахшидан ба ин раванд, зарур мешуморам, ки солҳои 2019-2020 тамоми санҷишҳои фаъолияти субъектҳои соҳибкорӣ дар соҳаҳои истеҳсолӣ манъ карда, муқаррароти Қонуни Ҷумҳурии Тоҷикистон “Дар бораи мораторий ба санҷишҳои фаъолияти субъектҳои соҳибкорӣ дар соҳаҳои истеҳсолӣ” ба ҳамаи мақомоти санҷишу назорат ва ҳифзи ҳуқуқ, аз ҷумла Прокуратураи генералӣ, Палатаи ҳисоб, Агентии назорати давлатии молиявӣ ва мубориза бо коррупсия, Бонки миллӣ ва мақомоти андозу гумрук татбиқ карда шаванд».

Зикр гардид, ки таҳким бахшидани иқтидори илмии кишвар, ҷорӣ кардани ихтироот дар истеҳсолот, устувор гардонидани пояҳои моддиву техникии муассисаҳои таълимӣ, баланд бардоштани сифати таълим дар ҳамаи зинаҳои таҳсилот, ҷалби боз ҳам васеи истеъдодҳои ҷавон ба омӯзиши технологияҳои муосир ва корҳои эҷодиву техникӣ вазифаи муҳимтарини соҳаҳои илму маориф мебошад. Аз ин рӯ, мо ба соҳаҳои илму маориф эътибори аввалиндараҷа дода, ислоҳотро дар ҳамаи зинаҳои таҳсилот бомаром идома медиҳем ва мушкилоти мавҷударо давра ба давра бартараф мекунем. Мо, пеш аз ҳама, ба инкишофи зинаи таҳсилоти томактабӣ диққати ҷиддӣ дода, бояд шумораи муассисаҳои томактабиро бамаротиб зиёд намоем ва барои рушди қобилияти зеҳнии кӯдакон шароити мусоид фароҳам созем.

Гулбаҳор Назирӣ дар анҷоми суханронии худ гуфт, ки мо ба ҷавонон эътимоди комил дорем, дастгирии самимонаи онҳоро аз сиёсати пешгирифтаи давлату Ҳукумат қадрдонӣ мекунем ва нақши арзишмандашонро дар ҳамаи ҷанбаҳои ҳаёти кишвар эҳсос менамоем.Имрӯз қисми асосии хизматчиёни ҳарбӣ ва мақомоти ҳифзи ҳуқуқро ҷавонон ташкил медиҳанд. Аз 23 ҳазор нафар бунёдкорони иншооти азими аср – нерӯгоҳи барқи обии “Роғун” чил фоизашон ҷавонони то сисола мебошанд. Ҳукумати Тоҷикистон барои ҷавонон тавассути оммавигардонии варзиш, таблиғи тарзи ҳаёти солим ва омодасозии варзишгарони касбӣ аз ҳамаи имкониятҳо истифода мекунад. Танҳо соли 2017 дар шаҳру ноҳияҳои мамлакат ба маблағи 175 миллион сомонӣ 300 иншооти соҳаи варзиш сохта, ба истифода супорида шуд. Имсол ин раванди созанда вусъати тоза пайдо карда, 230 иншооти навбунёди варзиш мавриди баҳрабардорӣ қарор дода шуд. Шумораи умумии иншооти варзишии дар зарфи даҳ соли охир, яъне солҳои 2008-2018 ба истифода додашуда ба зиёда аз 9300 расидааст.Ҳисси баланди миллӣ, худшиносиву худогоҳӣ, ватандӯстиву ватанпарастӣ ва садоқати ҷавонони мо ба Ватан, миллат ва обу хоки сарзамини аҷдодӣ гарави амнияту осоиши ҷомеа, пешрафти давлат ва ободии имрӯзу фардои Тоҷикистони соҳибистиқлол мебошад.
Сипас, Наим Маликисломӣ, раиси кумиҷроияи ҲХДТ дар шаҳри Хуҷанд андешаҳои хешро доир ба дастовардҳои муҳими Истиқлолияти давлатӣ ва саҳми Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон дар рушди давлатдории миллӣ баён дошт.

Шуъбаи кор бо ВАО

Нашр шуд: 18 сентябри 2019

Дида шуд: 1355 маротиба

Дар Донишкадаи политехникии Донишгоҳи техникии Тоҷикистон ба номи академик М.С.Осимӣ тибқи нақша-чорабиниҳо вобаста ба Стратегияи муқовимат бо коррупсия дар Ҷумҳурии Тоҷикистон барои солҳои 2013-2020 конфронси илмӣ – назариявӣ таҳти унвони “Мубориза бар зидди коррупсия ҳамчун вазифаи аҳли ҷомеа” доир гардид.
Конфронсро муовини директор оид ба илм ва иноватсия номзади илмҳои иқтисодӣ Усмонҷон Ахмедов ҳусни ифтитоҳ бахшида, роҳандозии чунин тадбирҳоро ҷиҳати пешгири аз ҳолатҳои коррупсиони дар ҷомеа муҳиму зарури иброз намуданд.
Сипас майори адлия, нозири калони шуъбаи муқовимат бо коррупсияи Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд Назриён Васлибек доир ба мавзӯъи “Роҳ ва усулҳои муқовимат бар зидди коррупсия” баромад намуда, аз суханони Асосгузори мулҳу ваҳдати миллӣ-Пешвои миллат, Президенти кишвар муҳтарам Эмомалӣ Раҳмон ёдовар гардид, ки “Фаромӯш набояд кард, ки мубориза бо коррупсия фақат вазифаи мақомоти ҳифзи ҳуқуқ нест. Дар ин мубориза тамоми аҳли ҷомеа, ҳар як шаҳрванд ва ҷомеаи шаҳрвандӣ низ бетараф набошад.”
Раиси Кумитаи мутаҳидаи иттифоқи касабаи донишкада Назира Бобоҷонова маърӯза дар мавзӯъи Саҳми Донишкадаи политехникии Донишгоҳи техникии Тоҷикистон ба номи академик М.Осимӣ дар самти мубориза бар зидди коррупсия масъалахои дарки худшиносии миллӣ ва дарк намудани ҳуввият, анъанахои миллӣ, арзишҳои ахлоқию фарҳангӣ бо максади комёб гаштан ба илму техника масъалаҳое ҳастанд, ки ҳар лаҳза аз тарафи устодони донишкада дар раванди таълим ба самъи донишҷӯён баррасӣ карда мешаванд.

Яке аз нишондиҳандаҳое, ки ДПДТТ-ро дар байни ҷомеа нуфуз бахшидааст – ин бартараф намудани коррупсия ва хароҷоти ғайриқонунии маблағ дар раванди таълим ва умуман, дар фаъолияти донишкада мебошад. Барои дар сатҳи имрӯза қарор доштан тўли солҳои дароз оид ба масъалаҳои коррупсионӣ корҳои зиёд ба анҷом расонида шуда, муҳити тозаи имрӯза писанди ҷомеаи донишкада мебошад. Инчунин дар баромади донишҷӯи курси 4 ихтисоси таъмини барқ Усмонхӯҷа Насрулоев бобати Пешгирии омилҳои коррупсионӣ аз нигоҳи донишҷӯ баромад намуда, қайд кард, ки мо набояд дар ҳаёти ҳаррӯзаи худ ба амалҳои коррупсионӣ роҳ дода бошем. Мо бояд талош намоем, ки амалҳои коррупсиониро дар ҷомеа бартараф намоем.
Дар охири конфронси мазкур низ Усмонҷон Ахмедов аз аҳли толор даъват ба амал овард, ки бояд дар ин мубориза ҳамдастӣ намуда, барои бартараф намудани ин камбудии ҷомеа талош намоянд.

Нашр шуд: 23 октябри 2019

Дида шуд: 1441 маротиба

Истиқлолият неъмати бебаҳо ва ниҳоят ҳам пурарзиш аст, ки миллати тоҷикро соҳиб ба сарнавишту тақдири ояндаи хеш намуд ва ҷомеаи моро ба ҷаҳони мутамаддин ҳамчун давлати демократӣ шинохта гардонд.  

Истиқлолият рамзи давлатдории миллии тоҷикон буда, он решаи қадимаву устувори маънавӣ дорад. Ва бо гузашти ҳазорсолаҳо бо шарофати Истиқлолияти давлатии кишварамон миллати куҳанбунёди тоҷик ҳамчун давлати суҳибтамаддун дар харитаи сиёсии ҷаҳон, давлати миллие бо номи мубораки Ҷумҳурии Тоҷикистон арзи ҳастӣ намуд. 

Ба ифтихори ин ҷашни фархундаву муқаддас санаи 06- уми сентябри соли равон дар толори донишкада бо иштироки бевоситаи директори донишкада номзади илмҳои техникӣ, дотсент Саидӣ Дилафрӯз Раббизода конфронси илмӣ амалӣ бахшида ба 28- умин солгарди Истиқлолияти давлатии Ҷумҳурии Тоҷикистон баргузор гардид. 

Дар оғози чорабинии идона Суруди милии Ҷумҳурии Тоҷикстон садо дода, таҳти оҳанги он Парчами миллии кишвар ба толор ворид карда шуд.  

Сипас конфронс ба кори худ оғоз намуда, роҳбарияти донишкада ба ин муносибат ҳозиринро табрик намуда, Истиқлолиятро ҳамчун неъмати дунё ва сарчашмаи ҳамаи дастовардҳои таърихи номиданд. Мавсуф дар идомаи суханронии хеш қайд намуданд, ки дар ҳақиқат Истиқлолият волотарин дастоварди миллати мост, ки зиндагонии мардуми тоҷикро нур бахшидаву саодату нусрат додааст. Ояндаи миллатро дурахшону пояҳои давлати тоҷиконро устувор гардонидааст. Дар дилу дидаҳои мардуми саодатманди кишварамон шӯълаи уммед пошида, умри миллатамонро бақо бахшидааст. 

Баъдан муовини директор оид ба илм ва инаватсияи донишкада, номзади илмҳои иқтисодӣ Ахмедов Усмонҷон доир ба масъалаҳои иқтисодиву иҷтимоӣ дар даврони Истиқлолияти давлатӣ баромад намуда, иброз карданд, ки дар ҳақиқат мо ба шарофати Истиқлолияти давлатиамон барои ноил шудан ба се ҳадафи асосии мамлакат дар пайравии Асосгузори сулҳу ваҳдати миллӣ, Пешвои миллат, Президенти кишвар мӯҳтарам Эмомалӣ Раҳмон талоши зиёд хоҳем кард.  

Ҳоҷиев Анвар Абдуллоевич номзади илмҳои техникӣ, дотсенти кафедраи таъминоти барқ ва автоматика зимни маърузаи худ қайд доштанд, ки миллат рӯз то рӯз шароити беҳтарро касб намудда, кам мондааст, ки ба истиқлолияти комили энергетика мушарраф гардад. Ва ин сана се рӯз пас фаро расида, бо ба истифода додани чархаи дуюми агрегати НОБ и Роғун хонадони миллати тоҷик беш аз пеш дурахшону равшантар хоҳад гардид. 

Комилова Дилрабо Абдувалиевна деканаи факултети муҳандисӣ технологӣ ба сухан баромада афзуданд, ки имрӯз дар пешорӯи мо масъалаи кишварро аз мамлакати аграрӣ саноатӣ мубаддал намудан ба мамлакати саноатӣ аграрӣ меистад ва саҳми ҳар кадоми мо шаҳрвандон, зиёиёни мамлакат дар татбиқи ин ҳадафҳои давлату Ҳукумати кишвар басо бориз аст. Мо бояд донем, ки Истиқлолият миллати тоҷикро аз вартаи таназзул наҷот бахшида, дар хонадони мардуми саодатманду соҳибфарҳанги тоҷик файзу нусрат овардааст. 

Дар идомаи конфронс аз ҷониби донишҷӯёни фаъоли донишкада, чорабинии тантанавӣ бахшида ба ин ҷашни муқаддас, яъне Истиқлолияти давлатӣ доир шуд.  

Дар оғози ин чорабинии бошукӯҳ аз ҷониби директори донишкада ба якчанд устодон барои меҳнати софдилона ва хизматҳои бенуқсон дар таълиму тарбияи насли ҷавон бо ифтихорномаҳо қадрдонӣ гардиданд. Лозим ба ёдоварист, ки маҳз дар ҳамин рӯзҳои ҳумоюни яке аз устоди фаъоли донишкада сардори маркази фасилавӣ Бобоҷонова Назира ба унвони Аълочии маорифи Ҷумҳурии Тоҷикистон мукофоонида шуданд, ки ин боиси ифтихори ҳар яки мост. 

Бахши фарҳангии чорабини иборат аз композитсияҳои адабӣ, шеърҳо дар васфи Истиқлолу Ватан, рақси мавзуну сурудҳои дилнишин аз ҷониби донишҷӯён намоиш дода шуд, ки ин хотири иштирокдоронро боз ҳам болидатар гардонд. 

Нашр шуд: 06 сентябри 2019

Дида шуд: 1508 маротиба

Бахшида ба Рӯзи забони тоҷикӣ дар толори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ бо иштироки Шоири халқии Тоҷикистон, Фарзона ва устодону донишҷӯёни ин боргоҳи маърифат конференсияи илмӣ – амалӣ таҳти унвони “Забон ва худшиносии миллӣ” доир гардид.
Конфронси илмӣ –адабиро омӯзгори кафедраи забонҳои давлатӣ ва ҷомеашиносии донишкада Шафоат Файзиева оғоз намуда, аз ҷумла таъкид дошт, ки Ҳукумати ҷумҳурӣ дар баробари рушд ва вусъати бештар пайдо намудани доираи нуфузи забони давлатӣ, ҷиҳати инкишофи забон ва фарҳанги ақаллиятҳои миллии муқими Тоҷикистон тадбирҳои зиёд амалӣ менамояд. Санадҳои меъёрии ҳуқуқие, ки дар бораи забон қабул шудаанд, ҳифзи забони давлатӣ ва дигар забонҳои ҳудуди ҷумҳуриро таъмин менамоянд. Пешвои миллат муҳтарам Эмомалӣ Раҳмон ҳамеша дар суханрониҳои хеш масъалаи поку беолоиш нигоҳ доштани забони давлатӣ, баланд бардоштани мақоми онро дар ҷомеа борҳо ба миён гузошта, дар назди донишмандону аҳли ҷомеа вазифаҳои мушаххас гузоштаанд. Дар Ҷумҳурии Тоҷикистон дар баробари забони давлатӣ барои истифодаи озоди забонҳои модарии намояндагони дигар миллату халқиятҳои сокини кишвар низ тамоми шароит ва заминаҳои ҳуқуқӣ муҳайё гардидаанд.

Сипас, дар ҷараёни кори конфронс сипас мудири кафедраи забонҳои давлатӣ ва ҷомеашиносии донишкада Таиба Бобоева ва омӯзгори калони кафедра Хайринисо Темирова оид ба таърих ва инкишофи минбаъдаи забони тоҷикӣ, бобати китоби Пешвои миллат ба унвони “Забони миллат – ҳастии миллат” маърӯзаҳои пурмӯҳтаво намуданд.
Шоири халқии Тоҷикистон, дорандаи ҷоизаи ба номи Абӯабдуллоҳи Рӯдакӣ Фарзона ба минбари сухан баромада, забони тоҷикиро бисёр шоиронаю отифона ситоиш намуда, ҳастии забони тоҷикӣ, ки забони модарии ҳар як тоҷику тоҷикистонист, онро азизу гиромӣ шуморид. Шоир Фарзона аз ашъори тозаэҷоди хеш чанд намуна ба аҳли толор қироат намуд.
Дар қисмати дуюми чорабинӣ барномаи фарҳангӣ аз ҷониби донишҷӯён манзури иштирокдорон карда шуд, ки муҳтавои он шеърҳо андар ситоиши забон, саҳначаҳои тарбиявӣ, суруду рақси дилнишин буд.

Нашр шуд: 04 октябри 2019

Дида шуд: 1336 маротиба

Рӯзи дониш ва Дарси сулҳ дар Донишкадаи политехникиии Донишгоҳи техникии Тоҷикистон дар шаҳри Хуҷанд бо шукуҳу шаҳомати хосса таҷлил карда шуд. Дар толори маҷлисгоҳи донишкада, факултетҳои информатика ва энергетика, сохтмон ва нақлиёт, муҳандисӣ – технологӣ ва муҳандисӣ – иқтисодӣ устодон ва донишҷӯён дастҷамъона гузориши мустақими ҷараёни ошноии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз Академияи идоракунии давлатии назди Президенти Ҷумҳурии Тоҷикистонро бо руҳияи болидаву ифтихор аз ватану ватандорӣ тамошо карданд.

Директори донишкада, номзади илмҳои техникӣ Саидӣ Дилафрӯз Раббизода чорабиниро ҳусни оғоз бахшида, меҳмонон, устодон ва донишҷӯёнро бо фароррасии соли нави хониш ва Дарси сулҳ табрик намуд. Мавсуф дар идомаи паёми шодбошии худ зикр дошт, ки таваҷҷуҳи рӯзафзуни Пешвои муаззами миллат нисбати мактабу маориф имкон медиҳад, ки сатҳ ва сифати таълим баланд, пояи моддиву техникии муассисаҳои таълимӣ пурқувват гардад. Нишонаи чунин ғамхорӣ он аст, ки ҳамасола оғози соли нави таҳсил ва Дарси сулҳ бо иштироки бевоситаи Роҳбари давлат ва дастуру ҳидоятҳояшон оғоз мегардад. Ҳоло тантанаҳои асосии Рӯзи дониш ва дарси сулҳ дар Академияи идоракунии давлатии назди Президенти Ҷумҳурии Тоҷикистон бо иштироки Пешвои муаззами миллат оғоз меёбад. Сарвари давлат дар баробари ошноӣ бо вазъи таълиму тарбия самтҳои асосии фаъолияти муассисаҳои олии кишварро муайяну мушаххас менамояд.  

Паёми шодбошии Раиси вилоят бахшида ба Рӯзи дониш ва Дарси сулҳ аз ҷониби  мудири шуъбаи меъморӣ ва шаҳрсозии МИҲД-и вилоят Равшан Раҳимзода, номаи муборакбодии раиси шаҳр муовини раиси шаҳри Хуҷанд Аюбҷон Раҳматзода ва табрикоти кумитаи иҷоияи Ҳизби Халқии Демократии Тоҷикистон дар шаҳри Хуҷандро Уғулой Умаралиева ба самъи ҳозирин расониданд.

Баъдан суханронии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ифтихори Рӯзи дониш, ки дар Академияи идоракунии давлатии назди Президенти Ҷумҳурии Тоҷикистон мустақиман ҷараён дошт,  ҷомеаи донишкада бо диққати том тариқи шабакаҳои телевизионӣ тамошо намуданд.

Зимни суханронӣ Пешвои муаззами миллат аз раванди ҷаҳонишавии тамаддунҳо, бархӯрди манфиатҳои сиёсии давлатҳои абарқудрат ҳарф зада, роҳҳои бартарафкунии хурофоту ифротгароӣ, тақвияти дониши сиёсии ҷавонон, дур будан аз гумроҳиву таассубгароиро бо мисолҳои возеҳ фаҳмониданд. Таъкид шуд, ки беҳтарин василаи муаррифии шоистаи миллат ин азхуд кардани донишҳои замонавӣ, рӯ овардан ба асолати миллӣ, сатҳи баланди  забондонӣ ва эҳтиром доштан ба забони модарии худ аст. Дар ин росто Сарвари давлат аз ҷумла, зикр карданд, ки “Дар ин даврони орому осоишта ва пешрафти бесобиқаи кишварамон мо ҳамаи шароиту заминаҳоро барои таҳсилу омӯзиш ва зиндагии шоистаи ҷавонон фароҳам овардаем ва ният дорем, ки дар оянда барои насли ояндасоз заминаҳои боз ҳам беҳтарро муҳайё кунем. Дар оғози соли нави таҳсил, яъне дар рӯзе, ки мо ба донишу маърифат ҳамчун калиди худогоҳиву бедорӣ ва ибтикору созандагӣ арҷ мегузорем, бори дигар таъкид менамоям, ки нерӯи ақлу хирад, донишу маърифат ва иродаву садоқат роҳи шуморо дар идома додани корномаи бузургони гузаштаи миллати тоҷик равшан хоҳад кард”.

Баъдан директори донишкада Саидӣ Дилафрӯз Раббизода зимни ҷамъбасти чорабинӣ зикр дошт, ки дастуру ҳидоятҳои Сарвари давлат  ҷиҳати ҷорӣ кардани ихтироот дар истеҳсолот, устувор гардонидани пояҳои моддиву техникии муассисаҳои таълимӣ, баланд бардоштани сифати таълим дар ҳамаи зинаҳои таҳсилот, ҷалби боз ҳам васеи донишҷӯён ба омӯзиши технологияҳои муосир ва корҳои эҷодиву техникӣ, таҳкими забономӯзӣ, донистани ду се забони хориҷӣ, хондани асарҳои бадеиро аз вазифаҳои муҳимтарини ҷомеаи меҳнатӣ арзёбӣ намуда, афзуд, ки лоиҳаи рушди стратегӣ таҳия ва дар солҳои наздик ба амалишавии он ҷомеаи аҳлу тифоқи донишкада кӯшиш ба харҷ хоҳад дод.

Нашр шуд: 01 сентябри 2019

Дида шуд: 1509 маротиба

Дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ бо сарфи маблағҳои дохилӣ ва грантӣ ба маблағи беш аз 1, 4 миллион сомонӣ якчанд намуди озмоишгоҳҳои замонавии таҳлили сифати маҳсулоти хӯрока сохта ба истифода дода шуд, ки ба талаботи замони имрӯз ҷавобгӯй аст.
Донишкада барои пешрафт ва мукаммалгардонии ихтисоси технологияи нигоҳдорӣ ва коркарди ашёи хоми ғизоӣ ҳамҷоя ва гузаронидан аз акредитатсияи байналхалқӣ бо барномаҳои байналхалқии GIZ (Ҷумҳурии Федеративии Олмон) ва НECAFS (Ҷумҳурии Латвия) ҳамкорӣ намуда, аз тарафи онҳо барои ҷиҳозонидани озмоишгоҳ микроскопҳои сретеоскопӣ, термокамераҳо, стерелизаторҳо, автоклавҳо ва ғайраҳо таъмин карда шудаанд.
Имрӯз озмоишгоҳҳо баҳри гузаронидани корҳои илмӣ дар сатҳи микроскопӣ, тадқиқоти бактериологии маводи хӯрока, муайянкунии бактериянокии маводи хӯрока, иҷро намудани корҳои фармоиши тиҷоратӣ имконияти васеъ доранд.
Масалан, озмоишгоҳи таҳлили сифати ғалла ва маҳсулотҳои ордӣ бо таҷҳизоти озмоишӣ ба монанди осиёби лабораторӣ, намченкунаки мавҷӣ, дастгоҳ барои шустани клейковинаи орд, сентрифугаҳо, тарозуҳои аналитикӣ, таҷҳизот барои муайян намудани адади афтиши озоди суспензияҳои ордӣ ва ҷевонҳои хушккунанда ҷиҳозонида шудаанд,ки имконият медиҳад, ки пешаки сифати ғалладона ва маҳсулоти он муайян карда шуда, барои кадом намудҳои маҳсулоти ордӣ таъин шудани он пешгӯӣ карда шавад.
Ҷоиз ба зикр аст, ки дар кафедраи маҳсулоти хӯрока ва агротехнологияи факултети муҳандисӣ-технологӣ дар умум нӯҳ адад чунин озмоишгоҳҳо мавҷуд аст, ки дар онҳо ҳамаи шароитҳо барои самаранок гузаронидани корҳои озмоишӣ шароитҳо фароҳам оварда шудааст.

Нашр шуд: 02 октябри 2019

Дида шуд: 1184 маротиба

Бузургони фарҳангдӯсти мо беҳуда донишро чароғи ақл, қуввати дил ва сарвати азим нагуфтаанд. Зеро шахси донишманд ва соҳиби касбу ҳунар дар ҳама давру замон сазовори обрӯю эътибори хосса буда, илму дониши азбаркарда ва касбу ҳунари азхуднамудааш дар тӯли ҳаёт кафолати зиндагии шоистаи ӯ мебошад.

Дар баробари ин, ба шумо, хонандагони азиз, таъкид менамоям, ки ба қадри ғамхориҳои давлату Ҳукумат, заҳмати устодон ва падару модарони худ расед, давраи таҳсилро самаранок истифода баред, илму дониш омӯзед ва соҳиби касбу ихтисосҳои муосир гардед, то ки дар оянда ба давлати соҳибистиқлоли худ, ҷомеа ва падару модари хеш хизмати шоиста карда тавонед.

Эмомалӣ РАҲМОН,
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон

Нашр шуд: 31 августи 2019

Дида шуд: 2823 маротиба

Шукронаи чунин ободиву озодии кишвари соҳибистиқлол, ки тамоми мардуумони диёр дар фазои озоди он зисту зиндагонӣ мекунанд. Асосгузори сулҳу ваҳдати миллӣ – Пешвои миллат, Президенти кишвар, муҳтарам Эмомалӣ Раҳмон дар такя ба нерӯи созандаи ҷавонони хушиқболи замон ҳамеша таъкид менамоянд, ки ояндаи Тоҷикистон аз дасти чунин ҷавонони бохираду закӣ аз имрӯз дида дурахшонтар хоҳад шуд.

Дар кишвари мо самти сиёсати ҷавонон бениҳоят дар сатҳи баланд қарор дорад. Зеро дар ҳамаи соҳаҳои гуногун фаъолият ва интихоби озодона барои ояндаи худ барои эшон шароит муҳайё карда шудааст. Бо иқдоми хирадмандонаи сарвари давлат барои таҳсил дар донишкадаҳо Маркази миллии тестӣ ташкил гардидааст. Ва ин ҳама дастгириҳову ғамхориҳо нисбат ба ҷавонон буда, барои ояндаи дурахшони онҳо роҳандозӣ гардидааст.

Дар донишкадаи мо низ соли ҷори теъдоди зиёди довталабон тавассути ин низом дохил гардидда, таҳсили худро идома дода истодаанд.

Воқеан ҳам имрӯз барои донишҷӯёни курси якуми факултети муҳандисӣ – иқтисодии Донишкадаи политехнкии Донишгоҳи техникии Тоҷикистон бисёр ҳам як санаи фараҳбахшу  фаромӯшношуданӣ буд. Чун имрӯз дар толори донишкада Рӯзи донишҷӯ бо шукӯҳу шаҳомати хосса таҷлил гардид. Дар чорабини ҳамаи донишҷӯёни курси якуме, ки дорои маҳорати баланди овозхонию, рақосӣ, ровигию ҳаҷвгинори доштанд, баромад намуданд.

Бояд гуфт, ки чорабинии тантанавии мазкур бо иштироки васеъи донишҷӯёну устодон доир гардид. Дар оғоз директори донишкада, номзади илмҳои техникӣ, Саидӣ Дилавфрӯз Раббизода ҳамаи донишҷӯёнро бо ин рӯзи ҳумоюниву фараҳбахш табрик намуда, онҳоро барои андӯхтани донишҳои амиқи касбӣ роҳнамун сохтанд, сипас декани факултет Мирзоҳамид Бакаев низ донишҷӯёнро шодбош намуда, ба онҳо барои дарёфти донишҳои нави соҳавӣ ҳидоят намуданд.

Ҳамин тавр чорабинии мазкур ба қисми адабӣ –фарҳангӣ оғоз намуд, ки пешниҳоди шеърҳои ватандӯстона, рақсҳои мафтункунанда, таронаҳои дилошӯб, монологҳои тарбиявӣ, сурудҳои хориҷӣ ва ҳаҷвҳои гуворо хотири аҳли нишастро болидатар сохт.

Нашр шуд: 27 сентябри 2019

Дида шуд: 1347 маротиба

Устодони гиромӣ, донишҷӯёни муҳтарам!

Имрӯз шукуҳу шаҳомат ва эътибори Рӯзи Дониш – оғози соли таҳсили нав бо икдоми шоиста ва маънавибунёди Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон хеле ва хеле боло рафт. Тавре ҳар яки Шумо шоҳид гардидед, чанд лаҳза қабл Сарвари давлат туфайли ширкат ва суханронӣ дар Донишкадаи идоракунии давлатии назди Президенти Ҷумҳурии Тоҷикистон бори дигар ғамхории падарона ва сарпарастии хешро ба соҳаи маориф ифода карданд.

Бояд тазаккур дод, ки маҳз пешниҳоди Сарвари давлатамон дар бораи самти асосӣ ва стратегии сиёсати давлат донистани соҳаи маориф боиси равнақи соҳа гардид. Пешвои муаззами миллат дар Паёми худ ба Маҷлиси Олии Ҷумҳурии Тоҷикистон таҳким бахшидани иқтидори илмии кишвар, ҷорӣ кардани ихтироот дар истеҳсолот, устувор гардонидани пояҳои моддиву техникии муассисаҳои таълимӣ, баланд бардоштани сифати таълим дар ҳамаи зинаҳои таҳсилот, ҷалби боз ҳам васеи истеъдодҳои ҷавон ба омӯзиши технологияҳои муосир ва корҳои эҷодиву техникиро вазифаи муҳимтарини арзёбӣ намуда, баён дошта буданд. «Пешрафти ҷомеа, тараққиёти илму техника ва технология тақозо мекунад, ки барои баланд бардоштани сатҳи касбият ҳам устодон ва ҳам шогирдон кӯшиш кунанд».

Имруз бошад, Пешвои муаззами миллат ба шарофати иштироку суханронӣ дар дарси умумиҷумҳуриявии сулҳ диққати масъулинро ба он равона намуданд, ки ҷавонон ба омӯзиши касбҳои нави мутобиқи талаби замон машғул гарданд ва мактаб ҷавобгӯи меъёрҳои имрузаи ҷаҳонӣ шавад. Сарвари давлатамон моро вазифадор мекунанд, ки ҳамқадами замон бошем, бояд насли ҷавонро дар руҳияи ватандӯстиву ватанпарастӣ, худшиносиву худогоҳии миллӣ тарбия намуда, онҳоро бештар ба донишандӯзӣ, омӯзиши фанҳои дақиқ, забонҳои хориҷӣ ва илму техникаи муосир раҳнамоӣ намоем.

Бояд гуфт, ки Рӯзи дониш ва оғози соли нави таҳсилро мо дар қайди таассуротҳои наҷиби ташрифи хотирмони Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон  муҳтарам Эмомалӣ Раҳмон ба вилояти Суғд истиқбол мегирем. Боиси хушбахтии мост, ки ҳар як сафари Сарвари давлат ба вилояти Суғд аз худ паёмадҳои неку хуб боқӣ мемонад. Мо инро дар сафари навбатиашон ба хуби эҳсос намудем, ки чи тавр мардум бо руҳбаландии бузург Пешвои муаззами миллатро истиқбол ва ҷараёни ободкориву созандагиҳо ба ин васила вусъат гирифтанд.

Мо дар фаъолияти ҳаррӯзаи худ дастгирии мақомоти иҷроияи ҳокимияти давлатии вилоят ва шаҳри Хуҷандро эҳсос менамоем. Ташрифи Раиси вилоят муҳтарам Раҷаббой Аҳмадзода зимни ифтитоҳи бинои нави озмоишгоҳи донишкада боиси руҳбаландии мо гардида, моро ба меҳнати садоқатмандона роҳнамоӣ мекунад. Рӯзи гузашта дар остонаи соли нави хониш мулоқотии самими Раиси вилоят  ва маросими ҷоизасупориҳо ба нафарони хизматнишондода доир гардид, ки устоди донишкадаи мо Одилхӯҷа Солиев ба гирифтани Ифтихорномаи Раиси вилоят сарфароз гардид.      

Пас аз чанд рӯз агрегати дуюми нерӯгоҳи барқии обии «Роғун», ки сарчашмаи нуру иқтидори истеҳсолии кишвар маҳсуб меёбад, мавриди истифода қарор мегирад  ва ин рӯйдоди  муҳим боиси боз ҳам дар атрофии Сарвари давлат муттаҳид шудани халқи азизи кишвар мегардад.

Иҷозат диҳед, ин рӯйдодҳои муҳимро ба кулли устодон ва донишҷӯён, хосса онҳое, ки имрӯз қадамҳои аввалини донишҷӯиро гузошта истодаанд, сидқан муборакбод гӯям. Боварии комил дорам, ки анъанаҳои хуби мактаби устоду шогирдро донишҷӯёни соли аввал муваффақона идома хоҳанд дод. Зеро дар қиёс ба солҳои пешин шумораи ғолибони олимпидадаи байналмилаливу ҷумҳурӣ аз ҳисоби донишҷӯёни соли аввал ба маротиб зиёд аст. Миёни шумо донишҷӯёне низ ҳастанд, ки бо холи баланд сазовори номи донишҷӯи гардидед. Ба Шумо – донишҷӯёни азиз аз ин минбари баланд гуфтаниам, ки дар интихоби касб ва донишкада хато накардед. Зеро Шумо давоми 4 сол аз устодони соҳибтахассус бо истифода аз шароити хуби таълимӣ донишатонро тақвият дода, ба хоҷагии халқи кишвар хизмати шоиста анҷом хоҳед дод.

Соли таҳсили наве, ки имрӯз оғозашро тантана мекунем, барои ҳар як узви ҷомеаи меҳнатии донишкада бояд соли татбиқи дастуру ҳидоятҳои созандаи Пешвои муаззами миллат муҳтарам Эмомалӣ Раҳмон бошад .

Барои ин бояд  танҳо таҳсили аълою интизоми намунавиро ба роҳ монем, ҳар як донишҷӯ  барои фатҳи қуллаҳои баланди дониш беш аз пеш ҷадал варзад.   

Бо зикри ин нуктаҳо изҳори умеду боварӣ менамоям, ки дар соли таҳсили нав барои боз ҳам афзунтар намудани комёбиҳо ва ба яке аз муассисаҳои беҳтарини таҳсилоти олии кишвар табдил додани Донишкадаи политехникии Донишгоҳи техникии Тоҷикистон тамоми ҷидду ҷаҳдатонро равона менамоед.

Бо ҳамин орзу ва ниятҳои нек иҷозат фармоед, ҳар яки Шумо, дар шахси Шумо наздикону пайвандонатонро бо фаро расидани иди саид – Рӯзи дониш ва оғози соли таҳсили нав аз номи раёсат ва шахсан аз номи худам сидқан табрику таҳният гуфта дар кору таҳсил ва фаъолияти илмию омӯзгориатон равнақу барорҳо таманно намоям.

 Ҷашн муборак, дӯстони азиз!

Нашр шуд: 31 августи 2019

Дида шуд: 2478 маротиба