Фестивали атласу адрас

Баргузории озмуни  фестивали «Атласу адраси Хуҷанд- 2017» идомаи мантиқии ҳамаи ташаббусҳо дар ҷодаи баландбардории ҳуввияту  ифтихор аз урфу одат ва анъанаҳои миллӣ мебошад.  Ин чорабинии мӯҳташам дар кохи «Суғдиён»-и шаҳри Хуҷанд доир шуда, беҳтарин дӯзандагон ва тарроҳонро сарҷамъ намуд.

Муовини Раиси вилояти Суғд Назира Ғаффорӣ, Раиси шаҳри Хуҷанд Маъруф Муҳаммадзода ва занону духтарони фаъоли шаҳр  дар фестивал ширкат варзиданд.  

Фестивал аз рӯйи номиннатсияҳои либосҳои “Миллии қадима”, “Кӯдакона”, “Расмӣ”, Идона” ва “Арӯсию домодӣ” баргузор гардид ва ҳайати ҳакамон бо назардошти зебоӣ, дизайни либос, нотакрорӣ, ғайримуқаррарӣ, ҳалли тобиш, обуранг, истифодаи ҳунарҳои гулдӯзии дастӣ, қуроқдӯзӣ, интихоби ашёҳои ороишӣ, пардоз ва ғайра онро баҳогузорӣ намуданд.
Дар қатори ғолибону ҷоизадорон дар бахши "Либоси қадима" Анӯша Тошхӯҷаева, донишҷӯи курси 3, факултети муҳандисӣ- технологӣ сазовори ҷойи дуюм гардид. Тарроҳи варзида, ғолиби чандинкаратаи фестивал-озмунҳо Ганҷинаи Шӯҳрат, устоди кафедраи дизайн ва меъморӣ дар номгӯи "Либоси идона" мақоми сеюмро соҳиб шуд. Тарроҳ Манзура Ниёзова барои иштироки фаъол сазовори сипосномаи Раиси шаҳр гардид.

 Назира Ғаффорӣ ва Раиси шаҳри Хуҷанд Маъруф Муҳаммадзода ба ғолибон аз рӯйи номинннатсияҳои номбурда тӯҳфаҳо ва дипломҳоро супориданд.

 

 

«Навоварон»-и донишкада меҳмони пойтахт гардиданд

Бахшида ба Соли ҷавонон  бо ташаббуси Вазорати маориф ва илми кишвар дар пойтахти ҷумҳурӣ озмунии телевизионии «Маҳзар» бо иштироки донишҷӯёни макотиби олии кишвар идома дорад. Донишҷӯёни донишкада низ таҳти унвони «Навовар» дар қасри Филармонияи давлатии ба номи Акашариф Ҷӯраев бо барномаи рангин баромад намуданд. Онҳо дар бахшҳои саломнома, суруди ҳаҷвӣ, саҳначаи ҳаҷвӣ, тақлид ва саволу ҷавоб ҳунару малакаи шӯхтабъии худро нишон доданд. Ба ҳайати ҳакамон ва аҳли нишаст ҳунарнамои донишҷӯён хеле писанд афтод.

 

 

Хурӯши ҷавонӣ

Фестивал-озмуни «Хурӯши ҷавонӣ», ки бахшида ба соли 2017- Соли ҷавонон  бо иқдоми Мақомоти Иҷроияи Ҳокимияти давлатии шаҳри Хуҷанд рӯйи кор омадаву ҳадафаш дарёфти чеҳраҳои нав, баланд бардоштани мавқеъ ва мақоми ҷавонон дар ҷомеа мебошад, аз Донишкадаи политехникии Донишгоҳи техникии Тоҷикистон дар шаҳри Хуҷанд оғоз ёфт.  

Чорабиниро директори донишкада Саидӣ Дилафрӯз Раббизода ҳусни ифтитоҳ бахшида, баргузории чунин чорабиниро барои рушд ва такомули зеҳнӣ ва ҳунарии  ҷавонон амри зарурӣ шуморид.

Сипас, донишҷӯёни донишкада аз рӯи шартҳои «бадеҳасароӣ», «рақс», «намоиши либосҳои муосир ва миллӣ», «сюитаи овозию рақсӣ»  баромад намуда, ҳунари баланд нишон доданд.
Ба ҳайати ҳакамон бадеҳсароии донишҷӯи курси 3 Фараҳманд Каримов ҳамроҳи сарояндаи ансамбли эстрадии «Садои Суғд»-и назди Кохи фарҳанги ба номи Рӯдакӣ Гуласал Пӯлодова, рақс бо номи «Атлас» дар иҷрои гулдухтарони донишкада ва корманди Кохи Рӯдакӣ Нодира Ёқубова,  сюитаи овозию рақси таҳти унвони «Ваҳдатсарои Ватан» хеле писанд афтод.

Дар фарҷом ҳайати ҳакамон барои ташкилкунандагони чунин маҳфили зебо ба Раёсати донишкада изҳори сипос намуда, қайд карданд, ки фестивал-озмуни «Хурӯши ҷавонӣ» дар Донишкадаи полтехникии Донишгоҳи техникии Тоҷикистон дар сатҳи баланд доир гардида, аз миёни донишҷӯён чеҳраҳои нави фарҳангӣ дарёфт гардиданд.

 

Арӯси наврӯзӣ 

 Даври ниҳоии озмуни маърифатӣ-зеҳнии «Арӯси наврӯзӣ» миёни 30 донишҷӯдухтарони муасиссаҳои олии кишвар дар Донишгоҳи миллии Тоҷикистон  баргузор гардид.

Он бо мақсади тарбияи самарабахши ҷавондухтарон дар рӯҳияи худшиносиву илмгароӣ, одоби оиладорӣ, дастгирӣ ва ҳавасмандгардонии донишҷӯдухтарон, ки ҳунарҳои хуби ҳозирҷавобӣ, кадбонуию рӯзгордорӣ ва маҳорати намоиши арӯси намунавии хонадони солимро доранд, рӯи кор омадааст.

Озмуни маърифатӣ-зеҳнии «Арӯси наврӯзӣ» аз рӯи шартҳои «Соҳибҷамоли наврӯзӣ» - маҳорати иштирокчиён бо пешниҳоди либосҳои миллии арусӣ,  «Орифа» - маҳорати иштирокчиён дар самти ҳозирҷавобӣ,   «Кадбону» - маҳорати духтарон дар самти омода намудани хуриши наврӯзӣ ва  «Соҳибҳунар» - шарти махфӣ буд ва аз ҷониби ҳакамон саволҳо дар доираи одоби муошират, шартҳои асосии оиладорӣ ва ҳунари тозаю озода нигоҳ доштани либосҳо пешниҳод гардид.

 

Аъзои ҳакамон ба маҳорати донишҷӯдухтарон баҳогузорӣ намуданд. Ҳамин тавр, донишҷӯи  курси 1 -и факултети муҳандисӣ- технологӣ, гурӯҳи 50.01.02.тб-и Донишкадаи политехникии Донишгоҳи техникии Тоҷикистон Гулина Мардикова маҳорати баланди ҳунарварӣ нишон дода, байни  30 муассисаҳои олии кишвар мақоми сеюмро ба даст овард.

Ба ғолиб дар вазъияти тантанавӣ дипломҳои Вазорати маориф ва илми Ҷумҳурии Тоҷикистон, Кумитаи кор бо занон ва оилаи назди Президенти Ҷумҳурии Тоҷикистон ва мукофоти пулӣ аз ҷониби Федератсияи Иттифоқҳои касабаи кишвар супорида шуд.

 

 

Шоми ҷавонӣ

 Бахшида ба 20- солагии Рӯзи ваҳдати миллӣ ва эълон шудани соли 2017- Соли ҷавонон тибқи ҷадвали тасдиқнамудаи мақомоти иҷроияи ҳокимияти давлатии вилояти Суғд дар боғи фарҳангӣ-фароғатии ба номи Камоли Хуҷандӣ чорабинии фарҳангии “Шоми ҷавонӣ” бо иштироки донишҷӯёни Донишкадаи политехникии Донишгоҳи техникии Тоҷикистон доир гардид.

Ба хотири дар сатҳи баланд таҷлил намудани  ин сол бо дастгирии мақомоти иҷроияи ҳокимияти давлатии вилояти Суғд чорабиниҳои гуногуН аз қабили баргузории фестивал-озмуни «Гулдухтари Суғдӣ», «Хурӯши ҷавонӣ», спартакиадаи донишҷӯён, озмунҳои гуногуни зеҳнӣ доир гардида истодаанд. 

Қисмати фарҳангии чорабинӣ бо суруди “Ватан” дар иҷрои донишҷӯи курси 1 Рустам Ғуфронов оғоз ёфт. Суруди “Ҳоло ки ман ҷавонам” аз ҷониби аҳли нишаст хуш пазируфта шуд.

 Гурӯҳи донишҷӯдухтарон рақси помирӣ, рақс бо номи “Илтиҷо”, “Дар вақти гули анор”, “Ҳаво-ҳаво”, “Атлас”-ро бо маҳорати баланд иҷро намуданд. Бадеҳаҳои  “Бозубанд” ва “Бобораҳмону Бибирайҳон” дар иҷрои Бурҳонов Эҷод, Бобомуродова Нодира,  Иброҳимов Имомназар, суруд дар иҷрои Фараҳманд Каримов хеле хуб сароида шуданд. Баромади маҳфили хушдилон ва ҳозирҷавобон табъи мухлисонро шод гардонд. Чорабинии фарҳангӣ бо сюитаи рақсии “Парчам” хотима пазируфт.

 

 

Дастони тиллоӣ

Ҷиҳати арҷгузорӣ  ба анъана ва арзишҳои миллӣ, истеъдоди фавқулодда, тарғибу  эҳёи сару либоси миллии занона бо ташаббуси Ҳизби Халқии Демократии Тоҷикистон дар вилояти Суғд ва телевизиони “Диёр”  давраи ниҳоии озмуни телевизионии «Дастони тиллоӣ» баргузор гардид.

Дар озмун тарроҳони машҳури вилояти Суғд ширкат варзиданд. То даври ниҳоӣ озмун 11 зиннаро дар бар гирифта, 15 тарроҳ ҳунару малака ва завқи зебоипарастии худро нишон доданд.  Ба даври ниҳоӣ танҳо 4 нафар роҳҳат гирифтаанд.

 Боиси хурсандист, ки донишҷӯи курси 2- и Донишкадаи политехникии Донишгоҳи техникии Тоҷикистоне дар шаҳри Хуҷанд Бобоҷонова Нигора ҳамаи давраҳои озмунро бомаҳорат гузашта, дар ҷамъбаст соҳиби шоҳҷоиза гардид. Роҳбарияти Кумитаи иҷроияи Ҳизби Халқии демократии Тоҷикистон дар вилояти Суғд ва телевизиони “Диёр” ба Бобоҷонова Нигора як мошинаи дарздӯзии муосир тақдим намуданд.

 

 Бояд қайд кард, ки дар омоданамоӣ ва пешкаши маҳсули кори Бобоҷонова Нигора саҳми кафедраи дизайн ва меъмории донишкада хеле калон аст. Дар озмун ҳамчунин силсилаи либосҳои тарроҳони ҷавони кафедра Ганҷина Шӯҳратзода, Бобоева Зебо ва Тошхӯҷаева Ануша низ намоиш дода шуд.

Кумитаи иҷроияи Ҳизби Халқии Демократии Тоҷикистон дар вилояти Суғд  барои масъулияти баланд, амалӣ гардонидани сиёсати созандаю бунёдкоронаи Ҳизби Халқии Демократии Тоҷикистон, таҳкими ваҳдат ва суботи сиёсӣ, саҳми арзанда дар баланд бардоштани эътибору нуфузи ҳизб бар байни омма, иштироки фаъолона дар тарғибу ташвиқи ғояҳои ватандӯстӣ, худшиносии миллӣ, рушди ҷомеаи шаҳрвандӣ роҳбарияти донишкадаро бо сипоснома сарфароз гардонид.

 

Маркази таълимию истеҳсолии адрасбофии беҳтарин

Бо иқдоми Мақомоти Иҷроияи Ҳокимияти давлатии шаҳри Хуҷанд бо мақсади рушди соҳаи саноати сабук, аз ҷумла ривоҷу равнақ бахшидан ба истеҳсоли матои атлас ва адраси дастибоф, тарғиби сару либос аз матои  табии аз ҷиҳати экологӣ безарар бо истифодаи услубҳои миллии дӯзандагӣ, рушди меҳнати хонагӣ, аз ҷумла гулдӯзӣ ва қуроқдӯзӣ, баланд бардоштани фарҳанги либоспӯшии миллӣ, зебоипарастӣ ва ғанӣ намудани ҳаёти маънавии занону бонувон озмуни шаҳрии «Маркази таълимию истеҳсолии адрасбофии беҳтарин» доир гардид.  

Озмун  аз рӯйи бахшҳои беҳтарин маркази таълимию истеҳсолии адрасбофӣ, маркази таълимию истеҳсолие, ки бештар матоъи дастибоф истеҳсол намудааст,  маркази таълимию истеҳсолии хонагие, ки аз ҳама зиёд матоъи дастибоф истеҳсол намудааст, маркази таълимию истеҳсолие, ки  шогирди зиёд омода намудааст, сифат ва нақши беҳтарин, ҳалли тобиш ва обуранги адраси дастибоф  сурат гирифта, озмоишгоҳи бофандагии назди кафедраи дизайн ва меъмории ДПДТТХ ба номи академик М.С.Осимӣ таҳти роҳбарии муаллима, коромӯзи кафедра Дадобоева Насибахон бо дипломи дараҷаи 3  ва тӯҳфа - чангкашак сарфароз гардонида шуданд.

 

 Лозим ба зикр аст, ки дастгоҳи бофандагии атласу адрас ду сол қабл аз ҷониби Раиси вилоят муҳтарам Абдураҳмон Қодирӣ ба донишкада ҳамчу армуғон тӯҳфа гардида, дар ин муддат наздики 50 донишҷӯи донишкада нозукиҳои касби атласу адрасбофиро омӯхтанд. Аз адрасҳои бофташуда ҳар сол хатмкунандагон либосҳои шинаму зебо дӯхта, дар озмунҳои дохили донишкадавӣ иштирок мекунанд.

 

 Ташрифи раиси вилоят ба донишкада

 Санаи 3- майи соли равон  Раиси вилояти Суғд Раҷаббой Аҳмадзода дар доираи чорабиниҳои моҳи ҷавонӣ, ки ба ифтихори Рўзи ҷавонон ҷараён дорад, бо устодон ва донишҷӯёни Донишкадаи политехникии Донишгоҳи техникии Тоҷикистон ба номи академик Муҳаммад Осимӣ мулоқот намуд.

Раиси вилоят Раҷаббой Аҳмадзода сараввал аз намоиши дастовардҳои илмиву истеҳсолии донишкада, ки дар он китобҳои таълифнамудаи олимони донишкада, либосҳои миллии маҳсули дасти тарроҳон, мусаввараҳо, макети биноҳо, лоиҳаҳо ва ихтирооти барномасозон ва энергетикон ба маърази тамошо гузошта шуда буд, боздид намуда, ба дастовардҳои илмӣ-истеҳсолии устодону донишҷӯёни ин муассиса баҳои баланд дод.

Дар қисмати фарҳангии чорабинӣ барномаи консертии донишҷӯёни донишкада пешниҳод гардида, либосҳои миллии минтақаҳои гуногуни Тоҷикистон намоиш дода шуд.

Раиси вилоят инчунин бо гуруҳи донишҷӯён ва профессори Донишгоҳи аграрии Қазоқистон, ки дар доираи барномаи GIZ дар Донишкадаи политехникӣ қарор доранд, суҳбат намуда, аз онҳо даъват намуд, ки барои густариши ҳамкориҳо миёни донишгоҳҳои кишварҳои дӯст - Тоҷикистону Қазоқистон саҳмгузор бошанд.