Кафедраи математикаи олӣ ва информатика аз моҳи январи соли 2018 бо қарори Шӯрои Олимони Донишкада, низомнома оид ба фаъолияти кафедраҳо дар назди факултети муҳандисӣ иқтисодӣ ташкил карда шуд. Вазифаи мудири кафедраро аз лаҳзаи ташкилшавӣ номзади илмҳои физика ва математика Ғуломнабиев С. Ғ. ба ӯҳда доранд. Дар кафедра 12 нафар устодон фаъолият мебаранд, ки аз онҳо 4 нафар номзадҳои илм мебошанд. Кафедра бо кадрҳои баландихтисос пурра таъмин буда, устодони кафедра барои ҳамаи ихтисосҳои донишкада аз қисмҳои гуногуни математикаи олӣ ва технологияи информатсионӣ дарс медиханд. Тамоми фанҳои кафедра бо маводҳои таълимӣ таъмин мебошанд. Дар кафедра таълими модулии қисмҳои математика ба роҳ монда шудааст. Барои таъмини методии кисмҳои математика, ин  қисмҳо ба устодон вобаста карда шудаанд. Вобаста ба ҳамаи фанҳои кафедра барномаҳои таълимӣ – силлабусҳо мавҷуд мебошанд. Маводҳои таълимӣ, аз ҷумла маҷмӯи лексияҳо, масъалаҳо, машқҳо барои корҳои мустақилонаи назоратшаванда, тестҳои имтиҳони ниҳоӣ, видеофрагментҳои воҳидҳои дидактикӣ, ҳам ба намуди чопӣ ва ҳам электронӣ омода гардида, ба ихтиёри донишҷӯён вогузор гардидаанд. Инчунин кафедра таълими барномаҳои муосири математикӣ, аз ҷумла барномаи Maple-ро хуб ба роҳ мондааст.    

Мавзӯи илмии кафедра бо номи «Такмили таълими математикаи олӣ дар шароити кредитии таълим дар мактабҳои олии техникӣ» номнавис карда шудааст. Устодони кафедра пайваста мақолаҳои илми методиро оид ба баланд бардоштани сифати таълими математика дар конфронсҳои ҷумҳуриявӣ ва байналмиллалӣ ба табъ мерасонанд.

 Вазифаи асосии кафедра.  Устодони кафедра вазифаи асосии худро дар он мебинанд, ки донишҷӯёни ҳамаи ихтисосҳо бо донишҳои муосири математикӣ, ки бевосита бо ихтисосҳои онҳо вобастаанд, таъмин бошанд. Таълими математика ҳамчун фани умумитаълимӣ низ аз тарафи устодон хеле хуб ба роҳ монда шудааст. Ба барномаҳои муосири математикӣ дар кафедра диққати махсус дода мешавад. Ҳар як устоди кафедра тибқи талабот вазифадор аст, ки дар мавзӯи илмии кафедра фаъолона иштирок карда, миқдори муайяни мақолаҳоро ба табъ расонад. Аксари ин мақолаҳо бевосита ба баланд бардоштани сифати таълими математика, аз ҷумла дуруст ба роҳ мондани корҳои мустақилона ва инчунин истифодаи барномаҳои муосир бахшида шудаанд.  Инчунин аз тарафи устодони кафедра мунтазам китобҳои дарсӣ, дастурҳои таълимӣ-методӣ таҳия ва чоп мегарданд. Барои дарсҳои фосилавӣ маводи мультимедӣ омода шуда истодаанд.

Фанҳои таълимии кафедра: асосҳои математика, технологияи информатсионӣ, математика, математика барои муҳандисон, математика дар иқтисодиёт бо барномаи таълимӣ-силлабус, маводи таълимӣ, ки дар ҷаласаҳои кафедра мавриди муҳокима қарор гирифта, дар шӯрои илмӣ-методӣ тасдиқ гардидааст, таъмин мебошад. Матни лексия барои дарсҳои лексионӣ, маҷмӯи машқҳо барои дарсҳои амалӣ, масъалаҳо, кори мустақилонаи фан, маводи имтиҳони марҳилавӣ ва тестҳои имтиҳони ниҳоӣ ҳам ба тариқи чопӣ ва ҳам электронӣ мавҷуд буда, дастраси донишҷӯён гардидааст.

Кабинетҳои таълимӣ ва се синфхонаи компютерӣ ба кафедра вобаста бо васоити муосири техникӣ: ноутбук, видеопроектор, тахтаи электронӣ, лавҳаву овезаҳои мавзӯӣ муҷаҳҳаз мебошанд.  Интишороти устодони кафедра аз 1 китоби дарсӣ, 14 дастур ва маводи таълимӣ, 58 мақолаҳои илмӣ иборат аст.

Яке аз самтҳои афзалиятноки фаъолияти кафедра ташкили чорабиниҳои фарҳангӣ ва варзишӣ вобаста ба санаҳои таърихӣ ва ҷашнвораҳои миллӣ маҳсуб мегардад. Устодони кафедра дар чорабиниҳои сиёсиву маърифатии шаҳриву вилоятӣ ширкат варзида, дар тарғиби ғояҳои олии миллӣ ва тақвияти ҳисси ватандӯстии ҷомеа ҳиссагузор ҳастанд.