Ҳамасола бо мақсади дарёфти донишҷӯёни болаёқат ва истеъдодҳо, ихтироотҳои нав дар донишкада озмуни “Лоиҳаи инноватсионӣ” гузаронида мешавад. Чун анъана дар соли таҳсили 2018-2019 низ озмуни мазкур бо иштироки донишҷӯёни фаъолу соҳибистеъдод гузаронида шуд.

Дар озмуни “Лоиҳаи инноватсионӣ” 12 нафар донишҷӯён бо лоиҳа ва наворвариҳои худ ширкат варзиданд. Аъзоёни ҳакамон муовини директор оид ба таълим Мақсудов Х.Т., муовини директор оид ба илм ва инноватсия Ахмедов У.А., декани факултети муҳандисӣ-иқтисодӣ Юсупова Г.А., декани факултети информатика ва энергетика Солиев О.М., декани факултети сохтмон ва нақлиёт Акрамов А.А. ва декани факултети муҳандисӣ-технологӣ Ваҳобов А. ба ихтирооти донишҷӯён аз рӯи меъёрҳои муқарраршуда баҳогузорӣ намуданд.

Дар озмуни мазкур лоиҳаҳои зерин муаррифӣ карда шуданд: “Лампаи каммасрафи кӯчагӣ”, “Радиои рақамии локалӣ дар мактабҳои таҳсилоти олӣ”, “Стенд барои тафтиши генератори автомобил”, “Генератори хурди бо энергияи шамол ва об коркунанда”, “Хонаи боақл”, “Коркарди таҷҳизот оид ба истеҳсоли хишт аз масолеҳҳои маҳаллӣ”, “Йогурти нӯшокаи функсионалӣ”, “Лоиҳасозии либос барои занҳои ҳомиладор то ва пас аз таваллуд”, “Шаҳрак барои 5000 нафар бо номи “Шаҳраки ҳамешасабз”, “Баланд бардоштани эътимодияти кори плуги ПОН-3-З0”, “Солнечная батарея для зарядки”, “Чат-боти ДПДТТХ дар вайбер барои донишҷӯён”.

Бо ба даст овардани  81,1 хол бо лоиҳаи “Генератори хурди бо энергияи шамол ва об коркунанда” донишҷӯи курси 2_370107та Холназаров Н., донишҷӯи курси 4_370107тб  бо лоиҳаи “Стенд барои тафтиши генератори автомобил” бо 79,6 хол Ашӯров Ҳ. ва донишҷӯи курси 2_740206mta Додоҷонов Н. бо лоиҳаи “Баланд бардоштани эътимодияти кори плуги ПОН-3-З0” бо холи 74,3 соҳиби ҷойҳои ифтихорӣ гардиданд.

Ҳамаи лоиҳаҳои  иштирокчиён аз ҷониби ҳакамон баланд баҳогузорӣ карда шуда, барои коркарди ояндаи онҳо маслиҳатҳои зарурӣ дода шуд. Ба ғолибон дар вазъияти тантанавӣ Ифтихорнома ва туҳфаҳои хотиравии Раёсати донишкада супорида шуд.

Нашр шуд: 19 июни 2019

Дида шуд: 1413 маротиба

Дар доираи лоиҳаи ҳамкории HECAFS “Таҳсилоти олӣ барои низом ва стандартҳои маҳсулоти хӯрока дар Тоҷикистон ва Қирғизистон” санаҳои 13 - 18 май дар Донишгоҳи давлатии техникии Қирғизистон ба номи И. Раззоқов  семинар дар мавзӯи “Баҳодиҳии татбиқи модулҳои таълимӣ” ва конференсияи байналхалқӣ дар мавзӯи “Модернизатсияи таҳсилоти олӣ ба манфиатҳои истеҳсолотҳои хӯрока ва коркардкунанда” доир гардид. Дар кори семинар устодони донишкада - Дилрабо Комилова, Сулҳия Баҳодурова, Дилшод Набиев ва Шӯҳрат Мақсудов  таҳти роҳбарии директори донишкада, номзади илмҳои техникӣ Саидӣ Дилафрӯз Раббизода ширкат варзиданд. 

Ҳамчунин дар семинар ҳамкорони лоиҳа Донишгоҳи аграрии Краков (Полша), Донишгоҳи илм  оиди ҳаёт ва технологияи Латвия, Донишгоҳи илм оиди ҳаёти Литва, Донишгоҳи давлатии техникии Қирғизистон, Донишгоҳи иқтисодии Қирғизистон, Донишгоҳи аграрии Тоҷикистон ва Ассотсиатсияи миллии соҳибкории хурду миёнаи Тоҷикистон иштирок доштанд.

Мутобиқ ба нақша дар се рӯзи аввали семинар  ҳамкорони лоиҳа аз тарафи мактабҳои олӣ   фаъолияти  се солаи худро дар доираи лоиҳа натиҷагирӣ намуданд.

Дар ҷараёни кори семинар мудири кафедраи маҳсулоти хӯрокаи Донишкадаи политехникии Донишгоҳи техникии Тоҷикистон Дилрабо Комилова оиди корҳои иҷрошуда дар доираи лоиҳаи HECAFS  ба ҳозирин ҳисобот дод. Қайд шуд, ки  ҳамкории кафедра бо истеҳсолкунандагон дар доираи лоиҳа қавитар гардида,  талабот ва хоҳиши истеҳсолкунандагон ба мактаби олӣ дар мадди аввал гузошта шуд. Ҳамчунин таъкид шуд, ки дар доираи лоиҳаи ҳамкории HECAFS устодони кафедра такмили ихтисос намуда, дар семинарҳо, сафарҳои корӣ, конференсияҳо фаъолона ширкат варзидаанд. Инчунин дар мӯҳлати муқарраршуда бо ҳамкорӣ бо устодони Донишгоҳҳои Аврупо ба мундариҷаи 20 фани таълимӣ ва 15 барномаҳои таълимии корӣ (модулҳо) тағиротҳо аз нуқтаи назари стандартҳои байналхалқии Global G.A.P. ва HACCP тағирот ворид карда шуд.

Аз рӯи барноми ҳамкорӣ ба нақша гирифта шуда, аз санаи 17 сентябри соли гузашта то 3 – юми декабр устодони донишгоҳҳои Аврупо -  аз Донишгоҳи илм оиди ҳаёт ва технологияи Латвия, Донишгоҳи аграрии Краков (Полша) ва Донишгоҳи илм оиди ҳаёти Литва ба гурӯҳҳои академӣ оиди стандартҳои байналхалқии Global G.A.P ва HACCP  ба доиншҷӯёни ихтисосҳои технологияи маҳсулоти хӯрока сабақ омӯзонидаанд. Машғулиятҳо муовифиқи кредитҳои ҷудошуда бо забони русӣ ва англисӣ сурат гирифтанд. Аз тарафи устодони донишгоҳҳои авруппо ба сатҳи дониши дониҷӯён, бахусус донистани забонҳои хориҷӣ баҳои баланд дода шуд Ҳамчунин дар ҷараёни таълим  устодони донишгоҳҳои мазкур  ба ҳаҷми 32 соат ба устодони кафедра дарсҳои омӯзишиву роҳнамоӣ доири стандартҳои байналхалқӣ гузронидаанд.

Дар маҷмӯъ, муддати 3 соли ҳамкорӣ 3 барномаҳои таълимии ихтисосҳои кафедра, ки барои ҳамкорӣ интихоб шуда буданд, сифатнок гузаронида шуда,  17 нафар устодони кафедра дар машғулиятҳои дастурдиҳӣ ва роҳнамоӣ ширкат варзиданд. Дар раванди таълим 12 гурӯҳҳои кафедра, 138 нафар донишҷӯён фаъолона ширкат варзида, 88 воҳиди адабиётҳои таълимӣ аз тарафи лоиҳа харидорӣ карда шуд. Маврид ба зикр аст, ки  бо мақсади ғанӣ кардани базаи моддӣ-техникии озмоишгоҳҳои кафедра аз тарафи лоиҳа таҷҳизотҳои муосир аз қабили спектрофотометр, таҷҳизот барои муайян кардани сифати шир, истгоҳи обу ҳаво, таҷҳизотҳо барои муайян кардани хосиятҳои хок, намиченкунаҳо, таҷҳизот барои муайян кардани хосиятҳои ғалла, мева, сабзавот ва ғайраҳо харидорӣ карда шудааст, ки ҳамаи ин имкониятҳо барои тайёр кардани мутахассисони баландихтисоси соҳаи саноати хӯрока ва кишоварзӣ мусоидат мекунад.  

Ҳамин тавр муддати 3 рӯз масъалаҳои баҳодиҳии татбиқи модулҳои таълимӣ дар давлатҳои Тоҷикистон ва Қирғизистон мавриди баррасӣ қарор доштанд.

Маврид ба зикр аст, ки ҳамкорони лоиҳа моҳи августи соли равон ба Донишкадаи политехникии Донишгоҳи техникии Тоҷикистон  ташриф оварда, раванди татбиқи лоиҳа, фаъолияти озмоишгоҳҳоро хоҳанд дид. Ва дар назар аст, ки натиҷагирии раванди иҷроиши лоиҳаи ҳамаи ҳамкорон  дар ин ҷо низ баррасӣ мешавад. 

Санаҳои 16-17 май дар доираи кори лоиҳа конференсияи байналхалқӣ дар мавзӯи “Модернизатсияи таҳсилоти олӣ ба манфиатҳои истеҳсолотҳои хӯрока ва коркардкунанда” ташкил карда шуд.

Дар ин конференсия намояндаҳо аз мактабҳои олии Ҷумҳуриҳои Тоҷикистон ва Қирғизистон, намояндаҳои мақомотҳои давлатии Ҷумҳуриҳои Тоҷикистон ва Қирғизистон, ки барои бехатарии маҳсулоти хӯрока ва татбиқи стратегияҳо барои баланд бардоштани иқтидори содиротӣ ҷавобгаранд, аъзоёни консонсиуми HECAFS, агентиҳои машваратӣ, ки стандартҳои байналхалқии сифат ва бехатарии ғизоро ворид менамоянд, инчунин ташкилотҳои байналхалқӣ, ки лоиҳаҳоро дар Осиёи Миёна тадбиқ менамоянд, намояндаҳои сектори хариду фуруши маҳсулоти хӯрока фаъолона ширкат варзиданд.   

Мақсади ташкили чунин конференсия ин муҳокимаи пешравии ҷараёни татбиқи тадбирҳо оид ба такмили таҳсилоти олии касбӣ ва андешаи чораҳо барои ҳамкории минъбада байни тарафҳои манфиатдор дар беҳтар намудани мундариҷа ва сифати таҳсилоти олӣ дар соҳаи истеҳсоли маҳсулоти хӯроква дар Тоҷикисон ва Қирғизистон буд.

Дар ин конференсия масъалаҳои гуногуни таҳсилоти олӣ, ҳамкорӣ бо истеҳсолкунандагон, мушкилӣ ва талаботҳои онҳо, зарурати вориди кардани стандартҳои байналхалқӣ дар Осиёи Миёна, тарафҳои мусбӣ ва манфии он, муаммоҳои таъмини бехатарии маҳсулоти хӯрока дар Осиёи Миёна ва ғайра муҳокима гардидаанд.

Дар кори конференсия директори донишкада Саидӣ Дилафрӯз Раббизода, Дилрабо Комилова ва Сулҳия Баҳодурова оиди масъалаҳои зикргардида баромад намуда, хулосаҳои худро дар бораи рушди минбаъдаи соҳаи озуқаворӣ ва самараҳои ҳамкорӣ баён доштанд.

Ҳамин тавр дар давоми ду рӯзи кори конференсияи байналхалқӣ ҷамъбаст карда шуда, фаъолияти минбаъда тарҳрезӣ шуданд.

Нашр шуд: 25 майи 2019

Дида шуд: 1487 маротиба

14-15 июни соли 2019 дар шаҳри Душанбе Ҳамоиши панҷуми Машварати ҳамкорӣ ва тадбирҳои боварӣ дар Осиё таҳти раёсати Ҷумҳурии Тоҷикистон баргузор гардид. Барои иштирок дар саммити Душанбе роҳбарони 11 кишвар – Руссия, Тоҷикистон, Чин, Эрон, Озорбойҷон, Узбекистон, Қазоқистон, Қирғизистон, Туркманистон, Туркия, Бангладеш ва Шри-Ланка тайи ду рӯз меҳмони Тоҷикистон гардиданд. Машварати ҳамкорӣ ва тадбирҳои боварӣ дар Осиё (МҲТБО) – ин анҷумани байналмилалии муттаҳидкунандаи давлатҳои қитъаи Осиё аст, ки ҳадафаш таҳкими ҳамкориҳо барои таъмини амнияту субот дар Осиё мебошад. 

Машварати ҳамкорӣ ва тадбирҳои боварӣ дар Осиё (МҲТБО) анҷумани байнидавлатӣ ва созмони минтақавиест, ки соли 1992 бо дастгирии СММ таъсис ёфтааст. Ба МҲТБО 27 кишвар, аз ҷумла Тоҷикистон, Русия Чин, Эрон, Озорбойҷон, Узбекистон, Қазоқистон, Қирғизистон, Туркманистон, Миср ва ғ. шомил мебошанд.

Аъзои олии МҲТБО ин Саммити роҳбарони давлатҳо ва ҳукуматҳо мебошад, ки дар чор сол як маротиба баргузор мегардад. Имсол ин анҷуман дар Душанбе рӯзҳои 14-15 июни соли ҷорӣ баргузор гардид. Мавзуи саммити Душанбе ин “Нигоҳи ягона ба амният ва рушд дар минтақа” буд. Дар кори ҳамоиш Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо роҳбарони як қатор кишварҳои иштирокчӣ мулоқотҳо оид ба баррасии вазъ ва дурнамои муносибатҳои дуҷониба ва бисёрҷониба, баргузор карданд. Ҳамчунин Ҳамоиши панҷуми Машварати ҳамкорӣ ва тадбирҳои боварӣ дар Осиё дар шаҳри Душанбе имкони мусоидеро барои баргузории вохурии дуҷонибаи сарони давлатҳои иштирокчӣ ва нозир фароҳам овард.

Мавриди зикр аст, ки бо талошҳои арзанда ва пешниҳоди ташаббусҳои ҷаҳонии Пешвои миллат муҳтарам Эмомалӣ Раҳмон оид ба ҳалли мушкилоти глобалии сайёра дар даврони соҳибистиқлолӣ пойтахти Тоҷикистон - шаҳри Душанбе якчанд маротиба макони баргузории чорабиниҳои сатҳи баланди байналмилалию минтақавӣ гардид. Бо мақсади дар сатҳи баланди ташкилӣ доир кардани ҳамоиши навбатии сатҳи байналмилалӣ пойтахти Тоҷикистон - шаҳри Душанбе идона ороста шуда, шиору овезаҳо бо матни истиқболи самимии сарони давлатҳои иштирокчӣ ва нозир, рамзи ҳамоиш дар кӯчаву хиёбонҳои шаҳр омода ва насб гардида буд. 

Аз тарафи роҳбарияти Мақомоти иҷроияи ҳокимияти давлатии шаҳри Душанбе тамоми кӯчаву хиёбонҳои пойтахт гулрезу гулбез карда шуда, қабои тозаву идона ба бар карда буд. Гулу буттаҳои зебои ороишӣ, фаввораҳо ва чароғҳои ранга ба симои шаҳр ҳусни тозае бахшида буданд, ки аз тарафи меҳмонон хуб пазируфта шуд. Имрӯзҳо аҳли сайёра ба шаҳри Душанбе макони асосии баргузории Ҳамоиши панҷуми Машварати ҳамкорӣ ва тадбирҳои боварӣ дар Осиё таваҷҷуҳ доранд ва онро аз суханварии сарони давлатҳо ва дигар иштирокчиёни саммит бо воситаи ахбори омма дидан кардем.

Миллати тамаддунофари тоҷик бори дигар бо расму оини қадимаи меҳмоннавозии анъанавӣ меҳмонони ҳамоишро гарму самимӣ истиқбол гирифтанд.

Саммити Душанбе идомаи талошҳои давлатҳои аъзои МҲТБО, ки аз соли 2002, аз рӯзи баргузории аввалин Саммит ба харҷ дода истодаанд, мебошад. Дар ин нишаст ҳайатҳои баландпоя қабули эъломияи фарогири тамоми масоили ҳамкорӣ дар доираи МҲТБО ҷамъ омаданд ва онро пазируфтанд.

Саммити мазкур ҳамчунин барои муҳокима ва ҳалли мушкилоти мавҷуда ва бавуҷудоянда дар Осиё, инчунин барои пешбурди ташаббусҳо ва дарёфти механизмҳои самаранок дар сатҳи баланд майдони муфид буд.

Ёдовар мешавем, ки сентябри соли 2018 дар ҳошияи Иҷлоси 73-юми Маҷмаи Умумии СММ ҷаласаи вазирони корҳои хориҷии МҲТБО баргузор гардид, ки дар он раёсат дар Машварат барои солҳои 2018-2020 аз Чин ба Тоҷикистон гузашт. Ҷумҳурии Тоҷикистон бо давлатҳои аъзои МҲТБО на танҳо дар сатҳи сиёсӣ, балки дар дигар сатҳҳо низ бо мақсади ҳамгироии минтақавии батадриҷ ҳамдигарфаҳмии умумӣ дорад.

Бо дарназардошти иштироки давлатҳои аъзо дар сатҳи олӣ, аз ҷумла муносибатҳои дӯстона ва боэътимоди байни онҳо, Тоҷикистон аз Саммит натиҷаҳои хуб, ки барои иҷрои муваффақонаи уҳдадориҳои умумӣ дар доираи МҲТБО давоми ду соли раёсати Тоҷикистон роҳнамо гардиданд.

Саммит барои расидан ба ҳадафҳои нав ва дарёфти роҳҳои ҳалли масоили мавҷуда ва бавуҷудояндаи мавриди таваҷҷуҳи дастаҷамъонаи давлатҳои аъзо, пешбурди минбаъдаи раванди МҲТБО, идомаи татбиқи тадбирҳои боварӣ ва табдил додани Осиё ба минтақаи дорои сулҳу субот ва шукуфоии устувор дар асоси муколамаи фарогир ва амиқ таккони сиёсӣ бахшид. Тавре Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни суханронии худ тазаккур доданд, «Осиё хонаи умумии мост. Ҳамаи мо хоҳони онем, ки дар хонаи умумии мо сулҳу субот ҳукмфармо бошаду тафовути сатҳи рушди иқтисодиро ҳаракат бар сӯи пешрафти умумӣ ба тартиб дарорад».

Ҷумҳурии Тоҷикистон раёсат дар МҲТБО-ро дар лаҳзаи барои Осиё муҳим бар уҳда гирифт: минтақаи васеъ, ки дар он сарнавиштҳои таърихии халқу давлатҳо зич пайвастаанд, дар манзари чолишҳои нав рушди боварибахши иқтисодӣ ва саъю кӯшиш баҳри тараққию пешрафти устувори муштаракро нишон дод.

Ба таъкиди Пешвои миллат муҳтарам Эмомалӣ Раҳмон, халқҳои Осиё, ки бо таърихи ғанитарини умумӣ ва гуногунии фарҳангҳои ба худ хос байни худ алоқаи канданашаванда доранд, пурра дарк менамоянд, ки роҳи сӯи сулҳу шукуфоӣ аз фароҳам овардани муҳити бехатару суботе мегузарад, ки онро дар масоҳати васеи байни се уқёнус фақат бо саъю кӯшишҳои якҷоя метавон таъмин кард. Бояд гуфт, ки МҲТБО барои мубодилаи васеъ ва ошкорои афкор оид ба роҳҳои таҳкими ҳамкории амалӣ бо мақсади таъмини сулҳу субот ва ҳамдигарфаҳмӣ майдони муҳим буд. «Мо бояд иқтидори Машваратамонро пурра истифода намоем, то ки дар заминаи муколамаи васеъ, саъю кӯшиши умумӣ баҳри рушди устувори иқтисодӣ ва амнияти муштарак ҷомеаи босуботу шукуфони халқҳои Осиёро барпо намоем. Вақт ва саъю кӯшишҳое, ки барои расидан ба ин мақсади олӣ лозиманд, набояд моро ба изтироб оранд», — зикр намуда буданд Президенти мамлакат муҳтарам Эмомалӣ Раҳмон дар яке аз Саммити МҲТБО.

Барои иштирок дар кори ҳамоиши мазкур сарони давлатҳо ва ҳукуматҳои узв, аз қабили Тоҷикистон, Озарбойҷон, Афғонистон, Баҳрайн, Бангладеш, Ветнам, Миср, Исроил, Ҳиндустон, Урдун,  Ироқ, Эрон, Қазоқистон, Қатар, Камбоҷа, Чин, Корея,  Қирғизистон, Муғулистон, Аморатҳои Муттаҳидаи Арабӣ, Покистон, Фаластин, Россия, Таиланд, Туркия, Ӯзбекистон, Шри-Ланка ва кишварҳои нозир, аз ҷумла Беларус, Индонезия, Филиппин, Малайзия, Украина, Америка, Япония, роҳбарон ва намояндагони ташкилотҳои байналамилалии нозир, аз ҷумла Созмони Милали Муттаҳид (СММ), Созмони байналмилалии муҳоҷират, Созмони Амният ва Ҳамкорӣ дар Аврупо (САҲА), Анҷумани парламентии кишварҳои туркзабон, созмони шарик — Созмони Ҳамкории Шанхай (СҲШ) ва меҳмони ҳамоиш — Кумитаи иҷроияи Иттиҳоди Давлатҳои Мустақил дар Тоҷикистон ҷамъ омада буданд.

Ҷараёни кори Ҳамоиши панҷуми Машварати ҳамкорӣ ва тадбирҳои боварӣ дар Осиё таҳти раёсати Ҷумҳурии Тоҷикистонро 650 нафар намояндагони ВАО-и дохил ва хориҷ,  рӯзномаву маҷаллаҳо, радио, телевизион ва бунгоҳҳои хабарӣ аз кишварҳои Тоҷикистон, ИМА,Чин, Канада, Баҳрайн, АМА, Афғонистон, Эрон, Камбоҷа, Туркия, Ҳиндустон, Беларус, Ӯзбекистон, Қазоқистон, Озарбойҷон, Ветнам, Покистон, Бангладеш, Лубнон, Шри-Ланка, Қирғизистон, Русия, Ироқ Иттиҳоди Аврупо ва ғайра инъикос намуданд.

дар таҳияи Ҳ.Ҳофизов., 

     омӯзгори фанни мудофиаи шаҳрвандии

   ДПДТТХ  ба номи М.Осимӣ

Нашр шуд: 18 июни 2019

Дида шуд: 1406 маротиба

Донишҷӯёни гиромӣ!

Ҳамасола моҳи май – фасли гулшукуфтанҳо дар сар то сари кишвари азизамон   ҷавонони саодатманди диёр бо ифтихори бузургу шодмонӣ фаъолияти бурдборонаи хешро натиҷабардорӣ мекунанд. Ин нишонаи таваҷҷуҳ ва ғамхориҳои рӯзафзуни давлат ва Ҳукумати Ҷумҳурии Тоҷикистон нисбати қишри ояндасоз мебошад.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ  Раҳмон ҷавононро дар ҷомеаи навини Тоҷикистон нерӯи азиму тавоно ва навовару ташаббускор унвон карда, зикр доштаанд: «“Ба Тоҷикистон пеш аз ҳама ҷавонони соҳибмаълумот, кордону ҳунарманд, мутахассиси соҳибкасби ба талаботи замона ҷавобгӯй заруранд. Ба ин кор танҳо бо воситаи ҷустуҷӯйҳои нави эҷодӣ, тарбиявӣ, илмӣ, ҳамчунин таҷрибаю маҳорати омӯзгорони эҷодкорро истифода бурдан, бо худомӯзӣ машғул шудан дар таълиму тарбияи шогирдон муваффақ шудан мумкин аст».  Бо дарки муҳиммияти илму фарҳанг ва ҷалби ҷавонон ба китобхонию донишандўзӣ ва рушди ҳамаҷонибаи мамлакат Пешвои миллат муҳтарам Эмомалӣ Раҳмон соҳаи илм ва маорифро дар мадди аввал гузошта, барои тарбияи мутахассисони варзида чораҳои муассир меандешанд. Дар сатҳи давлат таъсиси квотаҳо ба ҷавонони дар минтақаҳои дурдаст мезиста, роҳандозии ҷоизаҳои махсуси ба номи Исмоили Сомонӣ, академик Султон Умаров ва “Дурахшандагон”, таҳти сарпарастӣ гирифтани озмуни китобхонӣ бо номи  “Фурӯғи субҳи доноӣ” далели амалишавии даҳҳо Барномаҳои давлатӣ мебошад.

Маҳз таваҷҷӯҳи хоссаи Сарвари давлат аст, ки шумораи муассисаҳои тахсилоти олии касбӣ ба 39 адад расида, дар он наздики 270 ҳазор донишҷӯ таҳсили илм мекунанд. Гузашта аз ин, беш аз 30 ҳазор нафар ҷавонони лаёқатманди Тоҷикистон аз ҳисоби давлат дар муассисаҳои таҳсилоти олии кишварҳои хориҷӣ таҳсил мекунанд. 72 мақомоти давлатии кор бо ҷавонон, беш аз 150 ташкилотҳои ҷамъиятии ҷавонон ва 63 марказҳои ҷавонон аз қайд гузашта, бо ҷавонон сару кор мегиранд ва ба ин қишри фаъоли ҷомеа хизмат мерасонанд.

Раёсати донишкада низ дар партави сиёсати ҷавонпарваронаи Роҳбари давлат ва дастуру нишондоҳои Вазорати маориф ва илми Ҷумҳурии Тоҷикистон, Донишгоҳи техникии Тоҷикистон барои фароҳам овардани шароити хуби таҳсилу тарбияи донишҷӯён кӯшиш ба харҷ медиҳад. Баланд бардоштани нерӯи зеҳнии донишҷӯён, кашфу дастгирии  истеъдодҳои навовару ҳушманд, ғамхориҳои пайваста намудан ба ҷавонони ятиму камбизоат рисолаи аслии мо мебошад.

Боиси хушнудист, ки дар остонаи моҳвораи  ҷавонон донишҷӯёни фаъоли мо Манучеҳр Музаффаров, Саидиқбол Сангинов ва Шаҳзод Толиббоев таҳти роҳнамоии устодони худ Заррина Акрамова, Сардор  Ғуломнабиев ва Одилхӯҷа Солиев дар олимпиадаи ҷумҳуриявӣ мақомҳои ифтихории дуюм ва сеюмро ишғол намуданд.

Навиди хуш боз дар он аст, ки устоди кафедраи таъминоти барқ ва автоматика Илёсхӯҷа Исломов дар Донишгоҳи давлатии Чувашия ба номи И.Н. Улянови Федератсияи Россия рисолаи номзадиро ҳимоя намуд. Умуман дар давоми 4 соли охир  19 нафар устодони донишкада рисолаи номзадӣ ва доктории худро ҳимоя карданд, ки дастоварди хуб аст.

Дастаҳои футболболбозону бакскетболбозони донишкада ғолиби мутлақи мусоибқаи вилоятӣ байни муассисаҳои таҳсилоти олӣ гардид.

Тибқи фармоиши директори донишкада дар арафаи Рӯзи Президент 614 нафар донишҷӯён, аз он ҷумла:  тариқи квота(350 сомонӣ), буҷавӣ таҳсилкунанда (310 сомонӣ), ятимон (500 сомонӣ), маъюбон (500 сомонӣ) ва тарбиятгирандагони мактаб-интернат (500 сомонӣ) бо кӯмакпулии яквақтина мукофонида шуданд. Ҳамаи донишҷӯёни ятими кулл ва тарбиятгирандагони мактаб-интернат аз пардохти маблағи таҳсил озод карда шуда, эҳтиёҷмандон бо хобгоҳ тариқи ройгон таъмин ҳастанд.

Дар ҷавоб ба ин ғамхориҳо боварии комил дорам, ки ҳар як ҷавони бонангу ор дастоварду арзишҳои миллиамонро ҳифз намуда, барои ободии диёр, содиқ мондан ба сиёсати маънавиасоси Пешвои муаззами миллат саъю талош меварзанд.

Ҷашни ҷавонӣ муборак!

Нашр шуд: 23 майи 2019

Дида шуд: 1335 маротиба

 Ба ифтихори ҷашни 30-солагии Истиқлолияти давлатӣ таҳти сарпарастии Президенти Ҷумҳурии Тоҷикистон миёни қишрҳои мухталифи ҷомеа, аз ҷумла хонандагону донишҷӯёни ҳамаи зинаҳои таҳсилот ва шаҳрвандони кишвар дар соли 2019 зери унвони «Фурӯғи субҳи доноӣ…» озмуни ҷумҳуриявӣ баргузор шуда истодааст. Ҳадаф аз роҳандозии ин тадбир баланд бардоштани завқи китобхонӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ ва таҳкими эҳсоси худогоҳию худшиносӣ маҳсуб мешавад.

Ҷомеаи устодону шогирдони Донишкадаи политехникии Донишгоҳи техники Тоҷикистон дар шаҳри Хуҷанд иқдоми Сарвари давлатро қадами қатъӣ барои таҳкими маънавиёту фарҳаниги бою қадима дониста, давоми се моҳ байни донишҷӯён муҳтавиёт ва моҳияти озмунро фаҳмониданд.

Рӯзи гузашта 21 нафар донишҷӯёни ғолибони факултетҳо дар толори маҷлисгоҳи донишкада аз рӯи номинатсияҳои аз ёд кардану хондани осори адибони классику муосир ва адабиёти ҷаҳон, қироати ашъори бачагона ва афсонаву ривоятҳои халқӣ байни ҳам қувваозмоӣ намуданд.

Дар оғози чорабинӣ муовини директор оид ба илм ва инноватсия Усмонҷон Ахмедов дар бораи зарурати баргузории озмуни мазкур сухан карда, баён доштанд, ки дар бораи рушди техникаву технология, бояд ҷавонон бештар рӯ ба китобу китобхонӣ орад, зеро лаззати китобхонӣ, бардошти маънавӣ аз он болотар аст аз кинофилму дигар воситаҳои ғановати маънавӣ.

Бо баҳодиҳии холисонаи ҳайати ҳакамон дар бахши назм пирӯзӣ насиби Сайфура Нозимова, донишҷӯи курси 1 ихтисоси Технологияи ришта, матоъ, нассоҷӣ ва матои бетору пуд гардид. Зинаҳои дуюму сеюмро Ибодулло Назарзода, донишҷӯи курси 1, ихтисоси Таъмини барқ ва Барно Ҳоҷибоева, донишҷӯи курси 2, ихтисоси  Технологияи ришта, матоъ, нассоҷӣ ва матои бетору пуд ишғол намуданд. Дар бахши наср мақоми аввалро Дониш Шарифов, донишҷӯи курси 1, ихтисоси Таъмини барқ, ҷойи дуюмро Фарҳод Мамадалиев, донишҷӯи курси 1, ихтисоси Сохтмони саноатӣ ва шаҳрвандӣ  ва мақоми сеюмро Алишерхон Рустамов, донишҷӯи курси 1, ихтисоси Хизматрасонии автомобилӣ касб кард.  Хуршеда Камолова, донишҷӯи курси 1, ихтисоси Иқтисодиёт ва идора дар корхонаҳо барои ширкати  фаъолона бо Ифтихорнома тақдиронида шуд.

Ба ғолибону ҷоизадорон Ифтихорномаҳои Раёсати донишкада дар вазъияти тантанавӣ супорида шуданд.

Дар қисмати фарҳанги донишҷӯёни донишкада бо суруду рақсҳои дилошӯб хотири ахли нишастро шод намуданд.

Нашр шуд: 14 июни 2019

Дида шуд: 1345 маротиба

Санаи 22 майи соли равон дар Қасри ҷавонони  ба номи Лоиқ Шералӣ Шӯрои кор бо ҷавонони назди раиси шаҳри Хуҷанд бо иштироки раиси шаҳри Хуҷанд Маъруф Муҳаммадзода, доираи васеи роҳбарони муассисаҳои таҳсилоти миёна ва олӣ, шуъбаи маориф, мақомотҳои дахлдор ва ҷавонони фаъоли шаҳри Хуҷанд доир гардид. Ҷаласаи мазкурро раиси шаҳри Хуҷанд Маъруф Муҳаммадзода оғоз намуда, бо рӯзномаи он шинос намуд. Дар ҷаласа ду масъалаи асосӣ дида баромада шуд, ки  якум дар бораи рафти дастуру супоришҳои Асосгузори сулҳу ваҳдати миллӣ, Пешвои миллат, Президенти кишвар муҳтарам Эмомалӣ Раҳмон нисбати баргузории Ҷаласаи якуми Шӯрои милли кор бо ҷавонон ва дуввум тасдиқи нақшаи кории Шӯрои кор бо ҷавононро дар бар гирифт.

Оид ба масъалаи якум мутахассиси бахши кор бо ҷавонон ва варзиши шаҳри Хуҷанд Ғафуров Абвусосид ва бобати масъалаи дигар мутахассиси бахши кор бо ҷомеа Юсуфӣ Усмонҷон баромад намуданд. Раиси шаҳри Хуҷанд Маъруф Муҳаммадзода зимни суханронии худ ҷавононро бо идашон табрик намуда, қайд намуд, ки ояндаи давлат дар дасти онҳо мебошад. Ҳамзамон Ҳукумати Ҷумҳурии Тоҷикистон ва Мақомоти иҷроияи ҳокимияти давлатии шаҳру вилоят пайваста ба ҷавонон ғамхорӣ зоҳир намуда,  барои фароҳам овардани шароити таҳсил ва зиндагии шоистаи онҳо тадбирҳои мушаххасро амалӣ месозанд.

Ҷиҳати татбиқи Қонуни Ҷумҳурии Тоҷикистон «Дар бораи ҷавонон ва сиёсати давлатии ҷавонон» бо мақсади ҳавасмандкунӣ, дастгирии моддиву маънавии ҷавонони фаъол, аз ҷумла, хонандагон, донишҷӯён, варзишгарон дар асоси қарори Раиси шаҳр  «Дар бораи муқаррар намудани стипендияи Раиси шаҳри Хуҷанд барои соли хониши 2018-2019» ба ҷавонони фаъол стипендияи Раиси шаҳри Хуҷанд супорида шуд.

Дар озмун барои дарёфти стипендияи мазкур баъди баргузории озмунҳо беҳтаринҳо муайян шуда, 100 нафар сазовори унвони гирандаи стипендияи Раиси шаҳри Хуҷанд гардиданд.

Дар вазъияти тантанавӣ аз ҷониби Раиси шаҳри Хуҷанд Маъруф Муҳаммадзода ба ҷавонони фаъол, хонандагони муассисаҳои таҳсилоти миёна ва донишҷӯён шаҳодатномаҳо тақдим карда шуд.

Боиси ифтихор аст, ки донишҷӯёни донишкада Музаффаров Манучеҳр, Ҷӯраев Мӯҳсинҷон, Темирова Мижгона ва варзишгар Тоҷибоев Баҳрулло ба гирифтани стипендияи Раиси шаҳри Хуҷанд сазовор гардиданд.

Ёдовар бояд шуд, ки 16 нафар донишҷӯён, магистрантон ва аспирантон гирандаи Стипендияи Раиси вилояти Суғд гардида буданд.  

Нашр шуд: 22 майи 2019

Дида шуд: 1485 маротиба

Соли дуюм аст, ки бо иқдоми Раёсати донишкада ҳафтаи худидоракунӣ дар донишкада ташкилу баргузор мегардад. Ҳадаф аз баргузории чорабинии мазкур баланд бардоштани сатҳи маҳорату малакаи корбарии донишҷӯён дар самти иҷрои вазифаҳои пурмасъулият, тарбияи кадрҳои болаёқати роҳбарикунанда, ҷалби бештари ҷавонон ба омодакунии низоми идоракунии давлатӣ ба шумор меравад.  Таҷрибаҳо нишон медиҳанд, ки маҳз таввасути худидоракунӣ, донишҷӯён фаъолияти худро дар самтҳои гуногун, чорабиниҳои тарбиявии донишгоҳ зери назорат гирифта кор карда метавонанд.

Санаи 6 июни соли равон дар толори донишкада ҷамъбасти ҳафтаи худидоракунӣ ва Рӯзи ҷавонон доир гардид. Чорабинӣ бо қисми тантанавӣ оғоз ёфт. Директори донишкада, номзади илмҳои техникӣ Саидӣ Дилафрӯз донишҷӯёнро табрик намуда, аз ҷумла, афзуд: “Мақсади ниҳоии мо дар ҳафтаи худидоракунӣ ин буд, ки нерӯи зеҳнӣ, идеяву пешниҳодҳои Шумо минбаъд дар раванди идоракунии донишкада ба инобат гирифта шавад. Зеро таҷрибаҳои давлатҳои пешрафтаи дунё нишон дода истодааст, ки такя кардан ба кадрҳои соҳибистеъдоди ҷавон давлатро пойдор ва пешрав мегардонад. Имрӯз вақти он расидааст, ҷавононро ба он одат кардан зарур аст, ки мустақилона аз пайи ҳалли мушкилотҳои дар раванди таълиму тарбия пайдо шудаи хеш шаванд. Аммо дар шароити имрӯза мавқеи фаъоли мустақилияти донишҷӯён хеле кам ба назар мерасад. Ин аз як тараф камбудии мо масъулин бошад, аз ҷониби дигар ин бетарафии донишҷӯёни фаъол нисбати ҳамсолони худ аст. Мо бояд ташаббускор ва масъулиятшинос бошем. Барои хубу босифат гузаштани раванди машғулият, чорабиниҳои берун аз донишгоҳи на ба тарзи маҷбурӣ, балки сидқдилона бо амри дили худ ҷалб гардем”.

Аз ҷониби директори донишкада Саидӣ Дилафрӯз  20 нафар донишҷӯёни ҳафтаи худидоракунӣ, 5 нафар ғолибони олимпиада, 12 нафар варзишгарон, 4 нафар омӯзгорони ҷавон, дастаи “Enactus” –и донишкада, ғолибони мусобиқаи хурд оид ба футболи донишкада – факултети информатика ва энергетика қадршиносӣ гардиданд.

Қисмати фарҳангии чорабинӣ дар сатҳи баланд намоиш дода шуд. Сурудҳои “Ҷавонӣ”, “Попурӣ”, “Яблоко любви”, суруди ӯзбекӣ, “Пешвои миллат” бо маҳорати баланди донишҷӯён сароида шуд.

Бо ҳамин Рӯзи ҷавонон ва ҳафтаи худидоракунӣ дар донишкада ҷамъбаст гардид.

Нашр шуд: 06 июни 2019

Дида шуд: 1391 маротиба

Кафедраи сохтмони факултети сохтмон ва нақлиёт дар доираи моҳвораи ҷавонон бори нахуст дар ҷумҳурӣ миёни донишҷӯён озмуни геодезӣ баргузор намуд. Мутобиқ ба низомномаи озмун  донишҷӯён бо харита ва компас муҷаҳҳаз гардида, аз рӯи он 10 нуқтаи назоратиро бояд меёфтанд. Дар даҳ нуқтаи назоратӣ устодони факултет ҳозиршавии донишҷӯёнро мавриди назорат қарор гирифтанд.

Озмуни мазкур барои баланд бардоштани завқи касбияти донишҷӯи дар риштаи сохтмон таҳсилмекарда мусоидат намуд. Дар ифтитоҳи чорабинӣ директори донишкада Саидӣ Дилафрӯз Раббизода ин иқдоми кафедраро нек арзёбӣ намуда, баён дошт, ки ҳамин гуна чорабиниҳо завқ ва шавқи донишҷӯёнро ба таҳсили илм зиёдтар мекунад.

Озмун оғоз ёфт ва 24 нафар донишҷӯёни фаъол, ҳушманд ва чаққон барои ҷустуҷӯи нуқтаҳои назоратӣ, ки аз донишкада оғоз ёфта, то бозори марказии Панҷшанбе ҷойгир буд, шуруъ намуданд. Давоми беш аз 1,5 соат донишҷӯён 10 нуқтаи назоратиро ёфта, аз қайд гузаштанд. Ҳамин тавр, донишҷӯ Муслимбек Қодирқулов дар муддати 25 дақиқаю 22 сония ҳамаи 10 нуқтаи назоратиро дарёфта, ба хатти ниҳоӣ расид. Зинаҳои баъдиро Далерҷон Абдуҷабборов, дар фосилаи 25,3 ва Одил Эргашев дар фосилаи 26,24 тай намуданд. Дар ҷамъбасти мусобиқа аз ҷониби Кумитаи иттифоқи касаби донишкада мукофотҳои пулӣ ба ғолибон дар ҳаҷми аз 400 то 200 сомонӣ тақдим карда шуд. Маврид ба зикри хос аст, ки ҳар яке аз иштирокдорони мусобиқа бо либоси махсуси рамзи донишкада дар мусобиқа ширкат варзида, фаъолнокии худро нишон доданд. Дар назар аст, ки чунин мусобиқаҳо дар остонаи ҷашни Ваҳдат боз гузаронида мешавад.  

Нашр шуд: 22 майи 2019

Дида шуд: 1431 маротиба

Бо мақсади бештар огоҳӣ пайдо намудани донишҷӯён аз кору фаъолияти донишкада, аз наздик шинос шудан бо ҳамаи шуъбаҳои Раёсат ҳамасола дар донишкада ҳафтаи худидоракунӣ аз ҳисоби донишҷӯёни фаъол баргузор мегардад.

Чун анъана ба муносибати моҳвораи ҷавонон бо икдоми директори  Донишкадаи политехникии Донишгоҳи техникии Тоҷикистон ба номи Муҳаммад Осимӣ дар шахри Хуҷанд, номзади илмҳои техникӣ  Саидӣ Дилафрӯз Раббизода  дар донишкада ҳафтаи худидоракунӣ эълон карда шуд.

Санаи 28 майи соли равон барои ҷалби донишҷуён ба вазифаҳои роҳбарони воҳидҳои сохтории Раёсати донишкада озмун гузаронида шуд. Дар озмун муовини директор оид ба таълим Мақсудов Хуршед, муовини директор оид ба тарбия Довудов Зариф, муовини директор оид ба илм Ахмедов Усмонҷон ва ҳамаи сардорони шуъбаҳо ширкат варзида, аз донишу маҳорати иштирокчиён воқиф гардиданд. Аъзоёни комиссия  бо донишҷуён сӯҳбат гузаронида, ҳамчунин, аз дониши сиёсии онҳо бохабар гардиданд.

 Донишҷӯёне, ки ба вазифаҳои мувофиқ соҳиб шудаанд, бояд аз санаи 29 май мувофиқи интизоми меҳнатӣ ба вазифаи худ шуруъ намуда, фикру ақидаи худро нисбати фаъолияти шуъба баён намуда, малакаи роҳбарии хешро нишон диҳанд. Ҳамаи донишҷӯён бо сардорони шуъбаҳо,  нақша ва самти асосии фаъолияти онҳо аз наздик шинос гардиданд ва бояд  нақшаи якҳафтинаи худро ҳамчун сардорони шуъба таҳия намоянд.

Доир ба рафти ҳафтаи худидоракунӣ дар донишкада аз ҷониби донишчуён боз маълумот хоҳем дод.

Нашр шуд: 28 майи 2019

Дида шуд: 1457 маротиба

Дар доираи моҳвораи ҷавонон дар сар то сари кишвари азизамон чорабиниҳои гуногуни фарҳангиву варзишӣ доир шуда истодаанд. Дар ҳошияи ин чорабиниҳо бо иқдоми Кумитаи иҷроияи Ҳизби Халқии Демократии Тоҷикистон дар шаҳри Хуҷанд бахшида ба 25- солагии таъсисёбии Ҳизби Халқии Демократии Тоҷикистон байни омӯзгорони (бонувони) муассисаҳои олӣ ва коллеҷҳои шаҳри Хуҷанд барои дарёфти Ҷоми Кумитаи иҷроияи Ҳизби Халқии Демократии Тоҷикистон дар шаҳри Хуҷанд мусобиқаи варзишӣ оид ба баскетбол аз 13 май то 16 май дар толори варзишии Донишкадаи политехникии Донишгоҳи техникии Тоҷикистон баргузор гардид.

Дар мусобиқаи варзишӣ бонувони донишгоҳҳои олӣ ва коллеҷҳо фаъолона ширкат варзида маҳорати худро нишон доданд.

Мусобиқаи мазкур бо мақсади баланд бардоштани завқи худшиносии миллӣ, тараннуми тарзи ҳаёти солим, дӯст доштани варзиш гузаронида шуда, дар натиҷа дастаи Донишкадаи политехникии Донишгоҳи техникии Тоҷикистон ғолиб гардид ва Ҷоми кумиҷроияро соҳиб шуд. Зинаи дуюмро вазишгарбонувони дастаи  Донишгоҳи давлатии Хуҷанд ва зинаи сеюмро дастаи Донишгоҳи давлатии ҳуқуқ, бизнес ва сиёсати Тоҷикистон ишғол карданд.

Дар расми ҷамъбасти мусобиқа, муовини Раиси кумитаи иҷроияи вилоятии ҳизб Шарифҷон Аминзода қайд кард, ки баргузории чунин мусобиқаҳо байни бонувон дӯстиву якдигарфаҳмиро тақвият бахшида, ҷамъиятро ба ташаккули тарзи ҳаёти солим раҳнамун месозад.

Раиси кумиҷроияи ҲХДТ дар шаҳри Хуҷанд Наим Маликисломӣ зимни суханронӣ иброз дошт, ки таваҷҷӯҳи Президенти Ҷумҳурии Тоҷикистон, Асосгузори сулҳу ваҳдати миллӣ мӯҳтарам Эмомалӣ Раҳмон ба рушди варзиш хоса аст.  Зеро давоми чанд соли охир дастоварди варзишгарони мо дар мусобиқаҳои сатҳи байналмиллалӣ бозгӯи он аст, ки аз ҷониби давлату ҳукумати кишвар барои пешрафти ин соҳа эътибори хоса зоҳир мегардад. Намунаи барҷастаи ин таваҷҷӯҳ ғолибияти гурзандоз Дилшод Назаров ҳаст, ки ӯ аввалин варзишгарест, ки дар солҳои соҳибистиқлолӣ ба кишварамон медали тиллоии олимпиро овард ва ҳамчунин Қаҳрамони Осиё гардид. Раиси кумиҷроия аз иштирокчиёни мусобиқа ва ҷавонони дар толор буда даъват ба амал овард, ки ба варзиш бештар машғул гардида, ҳамсолони худро низ ба корҳои муфид ҷалб намоянд.

Дар расми тантанавӣ аз ҷониби раиси кумиҷроияи шаҳрӣ ба ғолибон ҷом ва тӯҳфаҳои хотиравии кумиҷроия супорида шуд.

Нашр шуд: 16 майи 2019

Дида шуд: 1434 маротиба