Дар асоси Амри Президенти Ҷумҳурии Тоҷикистон аз 09.02.2019, таҳти №АП-1165, супориши Дастгоҳи иҷроияи Президенти Ҷумҳурии Тоҷикистон аз 19.02.2019, №16/10-43 миёни хонандагону донишҷӯёни ҳамаи зинаҳои таҳсилот ва намояндагони касбу кори гуногун озмуни ҷумҳуриявии “Фурӯғи субҳи доноӣ...” эълон гардидааст. Озмун таҳти сарпарастии Президенти Ҷумҳурии Тоҷикистон, Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон ба муносибати сазовор пешвоз гирифтани ҷашни 30-солагии Истиқлолияти давлатии Ҷумҳурии Тоҷикистон, талқин намудани китобхонӣ миёни ҳамаи қишрҳои ҷомеа  баргузор мегардад.

Мақсади асосии озмуни “Фурӯғи субҳи доноӣ” баландбардории завқи китобхонӣ, тақвияти ҳофизаи фарҳангӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, рушди қобилияти эҷодӣ, таҳкими эҳсоси худогоҳию худшиносӣ, бой гардонидани захираи луғавӣ, тақвияти ҷаҳони маънавӣ ва фаъолардонии доираи забондонӣ миёни ҳамаи зинаҳои таҳсилот мебошад. Озмун аз рӯи чор номинатсия сурат мегирад:

  1. Номинатсияи аз ёд кардану хондани осори адибони классикии тоҷик.
  2. Номинатсияи аз ёд кардану хондани осори адибони муосири тоҷик.
  3. Номинатсияи аз ёд кардану хондани осори ашъори бачагона ва афсонаву ривоятҳои халқи тоҷик.
  4. Номинатсияи аз ёд кардану хондани осори адабиёти ҷаҳон.

Тибқи тартиби баргузории озмун даври якум аз 10.03.2019 то 10.06.2019 барои тарғибу ташвиқи иштирокчиён барпо мегардад.

 Дар Донишкадаи политехникии Донишгоҳи техникии Тоҷикистон ба номи академик М.С.Осимӣ низ даври якум аллакай оғоз гардидааст. Аввалан, озмун дар сатҳи факултет доир гардид. Беҳтарин хонандаи китобҳо аз байни донишҷӯёни ҳар чор факултет интихоб шуда, ба даври донишкадавӣ омодагӣ дида истодаанд. Ҳамарӯза хоҳишмандони дар озмун иштирокмекарда бо мудири кафедраи забони давлатӣ ва ҷомеашиносӣ Бобоева Таиба бо шартҳои озмун, номинатсияҳои он шинос гардида, омодагӣ дида истодаанд.

Чунин мулоқоти тарғиботию ташвиқотӣ аввалан дар факултети сохтмон ва нақлиёт доир гардид, ки ду нафар донишҷӯён Рустамов Алишерҷон ва Мамадалиев Фарҳод ғолиб омаданд. Рӯзи гузашта вохӯрии Бобоева Таиба бо донишҷӯёни факултети муҳандисӣ-иқтисодӣ барпо гардид. Устод донишҷӯёнро бо тартиби баргузории озмуни “Фурӯғи субҳи доноӣ...” шинос намуда, маслиҳатҳои муфид доданд. Имрӯз бошад, ҷиҳати иштирок дар озмун донишҷӯёни факултети информатика ва энергетика дар кафедраи забони давлатӣ ва ҷомеашиносӣ ҷамъ омаданд.

Ҳамарӯза Бобоева Таиба бо донишҷӯёни хоҳишманд ҷамъ омада, аз китобҳои хондаи онҳо, мазмуни мухтасар, аз ёди шеъру ғазалҳо пурсон гардида, маслиҳатҳо дода истодаанд. Ҳамин тавр, донишҷӯёни хоҳишманд ҳамарӯза  баъди машғулиятҳо ҷамъ омада, ба даври донишкадавӣ бо устод омодагӣ дида истодаанд.

Аз рафти баргузории озмун боз иттилоъ хоҳем дод.

 

 

 

 

Вазорати маориф ва илми Ҷумҳурии Тоҷикистон иттилоъ медиҳад, ки Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар доираи Нақшаи чорабиниҳои «Барномаи давлатии ватандӯстӣ ва таҳкими ҳувияти миллии ҷавонони Тоҷикистон барои солҳои 2018-2022» тасмим гирифтааст, ки бо мақсади ҳавасмандгардонии муаллифони мақолаҳои публитсистӣ озмуни ҷумҳуриявиро миёни қаламкашони ҷавон дар мавзӯи «Меҳри Ватан» доир намояд. 

Аз ин рӯ, олимону муҳаққиқон ва омӯзгорони ҷавон, хонандагону донишҷӯёни муассисаҳои таълимӣ метавонанд мақолаҳои худро барои иштирок дар озмун ба Кумитаи кор бо ҷавонон ва варзиш (шахси масъул: Муродзода М.-934640440) пешниҳод намоянд.

Муаллифони ҷавони беҳтарин мақолаҳои публитсистӣ дар арафаи «Рӯзи ҷавонони Тоҷикистон» бо сипоснома ва туҳфаҳои хотиравӣ қадрдонӣ карда мешаванд.

 

 

Одами солимақл ҳам медонад, ки зиндагӣ дар Аврупо бе меҳнати машаққати сангин амрест маҳол. Муҳиддин Кабирӣ ва ҷамъи ёронаш натанҳо он ҷо кор мекунанд, балки фаъолияташон барангехтани кинаву адоват, паҳн кардани фитнаву надомат ва ниҳоят бар гардани кишвар бор кардани тӯҳмату бӯҳтонҳо мебошад.  Худ маълум, ки ӯву ҳизбаш чун зулук молу сарвати хоҷагони эронии худро макида, бар ивази ин “подошҳояшон” ба роҳбарияти олии шиамазҳабон ҳамарӯза гузориш медиҳанд.   Албатта дар ин кор аллакай Кабирӣ таҷрибаи калон дорад. Зеро бо гирифтани кӯмакҳои хоҷагон қисме аз онро барои тарғибу ташвиқи расму ойин, фарҳангу мазҳаб ва андешаҳои ғаразноки хоҷагонаш ба наҳзатиҳои намакзада тақсим намуда, қисми дигарашро барои ҳаёти шахсиаш ва қисмати боқимондаро ба фитнагарон барои барангехтани сару садо ва бофтани найрангу буҳтон тақсим менамояд. Бинобар ин Кабирӣ, ки аз хоҷагонаш маблағҳои муфт ва бедардимиёнро ҳамарӯза соҳиб мешавад, намехоҳад аз чанги хоҷагонаш раҳо шавад.

Хонандагони азиз агар нағз дар хотир дошта бошанд, ҷониби наҳзатиён дар остонаи таҷлили солгарди ҷашни  Ваҳдати миллӣ ҷор заданд, ки дар таъмини амният сулҳу суботи сартосари нақши Ҳизби наҳзати исломи кишвар калон аст.  Бале мо инро инкор намекунем, ки сулҳи деринтизор дар сурати ҳамдигарфаҳмии ду тараф Ҳукумати Ҷумҳурии Тоҷикистон ва эътилофи миллӣ рӯи даст омад. Наҳзатиёни арҷманд хуб медонанд, ки роҳбарияти олии кишвар, шахсан Президент то дами марги Саид Абдуллоҳи Нурӣ пайваста аз ҳолаш хабар мегирифтанд. Ва ҳамчунин мувофиқи бандҳои Созишнома 30 фисади вазифаҳои давлатӣ бар дӯши намояндагони эътилофи миллӣ гузошта шуда буд, аммо аксаран умедҳои мардумро бароварда карда натавонистанд. Таърих гувоҳ аст, ки  соли 1998 барои ба пешвози Сайид Абдуллоҳи Нурӣ набаромадани собиқ раиси ноҳияи Ҷаббор Расулов Собир Бегиҷонов, ки аз эътилофи миллӣ ба ин мақом расида буд, ба қатл расонида шуда буд. Зеро ин раиси ноҳия дар ҷараёни роҳбарии худ  дар ин ноҳия эҳсос кард, ки амалкарди мухолифин ва баҳои онҳо нисбати давлатдории  кунунӣ пурра нодуруст аст. Чунин қатъият ва моил шудани он ба ҷониби Ҳукумати кунунӣ ба наҳзатиён нафорид. Ин нафарон чӣ гунна Худою Расулро ба забон мегиранд, ки худ даст ба куштор мезананд ва ҷониби давлатро низ тӯҳмат мезананд, ки намояндагонро онҳоро ба қатл расониданд.

Ин аст оини ватандории наҳзатиён, ки мардумро ба инсондӯстию эҳтироми Ватан талқин мекунанд.

Баръакси ин гуфтаҳо роҳбари давлат муҳтарам Эмомалӣ Раҳмон дар кадомин шароите, ки набошад, мардумро ба сабуриву таҳаммулпешагӣ, бахшидани гуноҳи якдигар даъват мекунанд. Мо бояд фаромӯш накунем, ки расидан ба  сулҳу субот, оромиву тинҷӣ, осудагиву якдилӣ, якмаромиву иттиҳод, ҳамзистиву ҳамаромӣ ва ваҳдати ҷовидонӣ ба осонӣ ба даст наомадааст.  Мо бояд ҳамагуна бӯҳтон ва тӯҳматҳои беасоси наҳзатро, ки дар маҷмуъ бар зидди арзишҳои милливу мазҳабии мо равона гардидааст маҳкум намоем ва нагузорем, ки наҳзатиҳои разил бори дигар мисли солҳои ҷанги шаҳрвандӣ бо хоҷагонашон ҳамсолони моро гумроҳ намуда, онҳоро муқобили сулҳу оромӣ ба камол расонанд.

Бакаев М.Ҳ., устоди ДПДТТ дар шаҳри Хуҷанд

 

 

 

Ҳамкории донишкада бо лоиҳаву барномаҳои байналмиллалӣ сол то сол тақвият меёбанд. Нишонаи возеҳи чунин ҳамкориҳо мавриди истифода қарор гирифтани бинои нави озмоишгоҳ дар доираи ҳамкориҳо дар факултети муҳандисӣ - технологӣ ва  дар расми ифтитоҳи он ширкат варзидани як қатор меҳмонони баландпоя мебошад. Ба фаъолият шуруъ намудани сехи нонпазӣ дар назди парки технологӣ низ самараи чунин ҳамкориҳо аст.

Санаи 11 апрели соли равон бо ташаббуси шуъбаи робитаҳои хориҷӣ дар толори донишкада семинари маълумотии барномаи байналхалқии Erasmus+ баргузор гардид. Дар кори семинар донишҷӯён, устодон ва кормандони донишкада, танзимгарони лоиҳа дар Ҷумҳурии Тоҷикистон Нуридинова Заррина, мутахассиси Донишгоҳи давлатии Москва дар шаҳри Душанбе, ҳамчунин корманди лоиҳаи Erasmus+ Нурова Санавбар ширкат варзиданд.

Зимни баргузории чорабинӣ Нуриддинова Заррина оид ба барномаи мазкур маълумоти пурра дода, моҳият ва имкониятҳои онро маънидод намуд. Қайд карда шуд, ки Erasmus+ барномаи Иттифоқи Аврупо дар соҳаи дастгирии таҳсилот, омодакунии кадрҳо, ҷавонон ва варзиш мебошад. Боиси хушнудист, ки Ҷумҳурии Тоҷикистон низ ба сифати ҳамкор ба ин баронома дохил гардидааст. Фаъолияти молиявии барнома дар асосии маблағгузории он, лоиҳа, стипендия сурат мегирад.

Донишкадаи политехникии Донишгоҳи техникии Тоҷикистон бошад, яке аз фаъолони аъзои лоиҳа буда, тайи чанд соли охир аст, ки бо барномаи мазкур равобит ва ҳамкории мустаҳкам дорад. Чанде аз устодону донишҷӯён аллакай таҳсил ва таҷрибаомӯзиро дар бонуфузтарин муассисаҳои таҳсилоти олии  мамлакатҳои дигар идома додаанд.

Дар анҷоми қисми шиносоӣ бо барномаи Erasmus+ аз ҳамаи иштирокчиён анкета оид ба барнома ва дархосту пешниҳод гирифта шуд.

Қисмати дуюм бо иштироки устодону кормандони донишкада сурат гирифт. Нуридинова Санавбар дар мавзӯи “Системаи дохилии таъминоти сифат дар муассисаҳои Ҷумҳурии Тоҷикистон” баромад намуд. Номбурда оид ба шароити таълим дар муассисаҳои таҳсилоти олии кишвар, баландбардории сифати таҳсил дархост ва пешниҳоди худро манзури ҳамагон намуд. Ҳамчунин, зикр намуд, ки барои баландбардории сифати таълим 5 сатҳи асосӣ муҳим аст. Ин ҳам бошад, баландбардории сифати таълим дар сатҳи ҷомеа, дар сатҳи системавӣ, дар сатҳи муассисаҳои олии касбӣ, дар сатҳи малакаи устод ва дар сатҳи донишҷӯ мебошад. Баъди маъруза устодон фикру дархостҳои худро оид ба сатҳу сифати таълим дар муассисаҳои олии касбӣ баён намуданд.

Семинари мазкур дар сатҳи баланд ташкил ва гузаронида шуда, барои пешбарии фаъолияти донишкада дар самти ҳамкориҳои дуҷониба бо барномаҳои хориҷӣ мусоидат намуд. Донишкада, аз ҷумла, Шуъбаи робитаҳои хориҷӣ минбаъд низ кӯшиш менамояд, ки пайваста робитаҳоро мустаҳкам намуда, фаъолияти пурсамарро пеш барад.  

 

 

 

 

То дирӯз барои кишварҳои пасошӯравӣ Ҷумҳурии Исломии Эрон ба ҳайси дӯст ва шарики стратегӣ ҳисоб мешуд. Зеро ин кишвар яке аз аввалин давлатҳоест, ки мустақилияти аксари  ҷумҳуриҳоро эътироф карда, робитаҳои дипломатиро барқарор намуд. Махсусан равобити ҳасанаи Ҷумҳурии Исломии Эрон бо кишварҳои Осиёи Миёна қавитар шуда, доду гирифти молу коло, равобити фарҳангӣ дар сатҳи баланд роҳандозӣ гардид. Зеро пас аз ҷанги чандинсолаи Эрон бо Ироқ, муносибати хуб надоштан бо мамлакатҳои арабӣ як навъ давлати Эронро дар вартаи танг гузошта буд. Имрӯз Эрон дар симои Русияи абарқудрат ҳомӣ ва пуштибони худро мебинад. Зеро аён аст, ки ҳар кадомин давлате, ки бо Амрико душман аст, дӯсти Русия аст. Ин сиёсат дар Амрико низ роиҷ аст. Ва ин давлати абарқудрат низ бо мамлакатҳое, ки бо  Русия душман аст, дӯстигарӣ меварзад. Дар мисоли Ҷумҳурии Украина, ки имрӯз  дар муқобили Русия истодагарӣ мекунад. Умуман чун 50 соли пешин ҷаҳон  ба ду қисмат – лагери Амрикоӣ ва лагери Русия қисмат шудааст.

Тарафдорони Амрико, ки қисмати бузури Аврупоро низ фаро гирифтаанд, кулан аз сиёсати роҳандозишудаи Русия норозиянд. Аммо чанд давлатҳои пурнуфуз аз қабили Чин, Ҳиндустон, Туркия, кишварҳои Осиёи Миёна, якчанд давлатҳои Амрикои лотинӣ дар симои сиёсати кремелӣ пуштибони худро ёфтаанд.

Тоҷикистон чун давлати навроҳ дар саргаҳи соҳибистиқлолии худ аз он сарфарозӣ мекард, ки Ҷумҳурии Исломии Эрон ба Тоҷикистон диду назари хосса дошт. Охир мо чи тавр ифтихор накунем, ки забони якдигарро ба хубӣ медонистем. Таъриху фарҳанги муштарак доштем. Ва ин наздикиҳо имкон доданд, ки тарҳои бузург дар Тоҷикистон ба сурати умум роҳандозӣ шаванд. Фавҷи шаҳрвандони эронӣ аз Тоҷикистон дидан мекарданду мо низ беибо ба Эрон сафар мекардем. Касе гумон надошт, ки пушти ин ҳама «хуб»- ҳо мақсади дигаре ниҳон аст.

Мо сад дар сад изҳороти давлати Амрикоро дар мавриди пуштибонии Эрон аз ҳаракату равияҳои террористӣ афсона мехондем, агар онро дар пӯсти нохуни худ эҳсос намекардем. Гузашти айём исбот намуд, ки Эрон на ба хотири таҳкими дӯстӣ бо Тоҷикистон робитаашро густариш бахшид, балки мехост кишвари моро ҷангзада намуда, бо баҳонаи ҷанг ғаниматҳои онро берун барораду мардумро гумроҳ созад. Онҳо хеле «маккорона » ва «боадабона» ин корро дар тӯли беш аз 20 – сол идома доданд. Фиристодаҳои онҳо дар симои фаъолони наҳзатӣ аввалан миёни омма маҳбубият пайдо карданд. Он нафароне, ки аз таърих ва фарҳанги бою ғании кишвар огаҳӣ доштанду аз кӯчаи  одаму одамшиносӣ гузаштанд ва муҳимтар аз ҳама тӯдакаш буданд, бо дасти аҳримансифатон ҷисман аз байн бардошта шуданд. Касе дар гӯшаи хаёл ҳам надошт, ки маблағгузори асосии ҲНИ, ки тору пудаш аз бадбинии ин миллат сиришта буд, маҳз эрониён буданд. Он миллионҳо долларе, ки хоҷагони эронӣ ба Нуриву Кабирӣ фиристода мешуданд, танҳо ба хотире буд, ки рӯзи ин миллат сиёҳ бошад. Ақидаву хурофотпарастии ин нафарон ба ҳадде дар зеҳни мардум таъсир кард, ки ҳар касе мусулмонии худро ба аъзогии ҲНИ исбот менамуд.  

Шикасти тилисми онҳо ҳанӯз дар солҳои навадум пас аз интихоби Пешвои муаззами миллат муҳтарам Эмомалӣ Раҳмон оғоз шуд. Дертар сулҳи деринтизор умедҳои онҳоро барбод дод. Аммо хоҷагони наҳзатӣ чун торҳои анкабут бар ҳар кошонаи мо роҳ ёфтанд. «Пешравону муъбадон»-и онҳо дар симои Кабирӣ бо «хушгӯ»-и ҳои  дилҳои ҷавононро тасхир сохт. Онҳо хостанд аз дарун ин миллатро забун созанд. Мубаллиғони ҳизб дар масҷидҳо, ҳатто дар ҷанозаҳо мавизахонӣ намуда, мардумро ба «исломдӯстиву»тифоқӣ даъват мекарданд. Дар ин миён чандин ҷавонони таҳти сеҳру ҷоду монда дар мисоли Илҳому Шарофиддин, Сайидюнусу дигар «сарсупурда»-ҳо рӯи сиёсат омаданд, ки имрӯз мехоҳанд бо даъватҳои беасосу дӯруғгӯиҳои хоҷаи худ Муҳиддин Кабирӣ дар зеҳну тафаккури мардуми тоҷик роҳ ёбанд. Аммо ҳар чи қадаре, ки онҳо манфиати ҳизби худу хоҷагони худро ҳимоя кунанд, ҳамон қадар аз ҷониби сокинони кишвар ҷавоби радро мешунаванд.

Эроне, ки бо ин бузургиву ҳашмат, чун меросбари бузурги фарҳанги ҷаҳонӣ маҳсуб мешавад, дар дасти исломпарастони худ бозичае беш нест. Имрӯз ин кишвар сабабгори бисёр бадбахтиҳост, ки худи миллати сарбаланди Эрон онро тамоман тарафдорӣ намекунанд.

Мо бояд ҳушёр бошем, дӯст кист, душман кистро донем, дарк кунем ва барои ҳифзу амнияти миллати хеш кӯшиш намоем.     

Нусратхон Ахмедова, устоди ДПДТТ дар шаҳри Хуҷанд

Амалҳои хайру сахо дар ҳама давру замон аз хислатҳои наҷиби одаму одамгарӣ маҳсуб ёфта, гирифтани дасти афтодае беҳтарин амали инсонист. Кӯмаку дастгирии ҳамаҷониба ба ниёзмандону муҳтоҷон  аз зумраи амалҳои неки хайру саховатмандӣ  аст, ки бояд ҳар фарди соҳибдил онро иҷро намояд.

Дар Донишкадаи политехникии Донишгоҳи техникии Тоҷикистон ба номи академик М.С.Осимӣ анъанаи хубе  солҳо идома дорад. Ҳамасола  бо иқдоми худи донишҷӯён зери роҳнамоии устодон бо дастгирии роҳбарияти донишкада номгӯи бисёри аксияҳо барои кӯмак ба хонаи кӯдакон, хонаи маъюбон, хонаи пиронсолон ва ниёзмандон ташкил ва гузаронида мешавад, ки ҳамагон дастаҷамъона дар он ширкат меварзанд. Донишҷӯёни донишкада бо роҳбарии устодони худ пайваста бо туҳфаву ҷиҳози лозима, бо барномаҳои фарҳангӣ ба дидорбинии онҳо рафта, заррае бошад ҳам, кӯмаки моддиву маънавии худро мерасонанд. Ин навбат, бо ибтикори ҲХДТ дар вилояти Суғд санаи 10 апрели соли равон дар назди «Қасри ҷавонон”-и ба номи Лоиқ Шералӣ аксия барои кӯмак намудан ба беморони дауна баргузор гардид. Дар рафти аксия қуттии хайриявӣ ташкил карда шуд, ки мувофиқи имконият ҳамагон маблағҳои хайриявиро ҷамъ намуда, ба қутии хайриявӣ партофтанд.

Боиси хурсандист, ки донишкадаи мо низ аз ин кори хайру сахо дар канор намонда, ҳиссаи худро барои кӯмак ба ин нафарон гузошт. Донишҷӯёну устодон, кормандони донишкада дастаҷамъона дар муддати кӯтоҳ маблағҳои хайриявиро ҷамъ намуданд. Маблағҳои ҷамъшуда  аз ҷониби  намояндагони донишкада, устоди кафедраи забони давлатӣ ва ҷомеашиносӣ Темирова Хайриниссо ва аҳли донишҷӯён ба қуттии хайриявии ташкилкардашуда партофта шуд.

Боварӣ дорем, ки минбаъд низ донишкада дар чунин аксияҳо фаъолона ширкат варзида,  кӯмаки худро барои шахсони ниёзманд дареғ нахоҳанд дошт.

 

Аминҷонова М.М

муовини декани ФИЭ оид ба тарбия

 Тавассути  сомонаи радиои BBS ташкилоти террористӣ эълон гаштани Сипоҳи посдорони инқилоби исломии Эрон аз ҷониби Амрикоро мутоила намуда, аз андешаҳои коршиносони масоили сиёсӣ, олимон дар ин мавзӯи мубрами рӯз ошно гардидам. Бояд гуфт, ки  ин изҳорот миёни омма дастгирии зиёде ёфт. Ва далелу асноди зиёде ҳам мавҷуданд, ки  сиёсати пешгирифтаи Ҷумҳурии исломии Эрон ба вазъи суботи сиёсии ҷаҳони муосир халал ворид месозад.

Аввал ин, ки Ҷумҳурии Исломии Эрон мақсад дорад, ки тариқи гурӯҳу ҳаракатҳои ҷанбаи исломидоштаи худ норозигии аҳли сайёраро нисбати дини мубини ислом зиёдтар намояд. Сониян сиёсати духӯраи ҳукуматдорони Эрон боис бар он гардад, ки худи сокинони ин кишвар аз шиддатёбии вазъ бо кишварҳои абарқудрат изҳори нигаронӣ доранд. Таҳлилҳои хадамоти махсуси ҷосусии Амрико исбот намудааст, чандин шабакаҳои террористиву экстремистии оламро маҳз ҷониби Эрон дастгирӣ мекунад.Яке аз ҷунбиши ба ном тавонои онҳо ҳизби маъруф бо номи “Ҳизубуллоҳ” мебошад, ки ба истилоҳи кӯчагӣ “бародар”- калониву ҷонии Ҳизби наҳзати ислом аст.

Саркардагони ин ҳизб ҳанӯз солҳои 80 –уми қарни гузашта маблағгузори асосии ҲНИ буданд. Чун аз як ишора хоҷагони эронӣ дӯстони тоҷики худро мефаҳмиданд, ба онҳо маблағҳои калони бебозгаштро илқо менамуданд. Маҳз мавҷи бозсозиву исломшиносӣ, бундёди масҷидҳо аз ҳамин давра шурӯъ  гардид. Аввали солҳои навадум таъсири наҳзатиҳо онқадар тавоно буд, ки волидон ба хотири “саводноккуни”-и фарзандонашон онҳоро аз муассисаҳои таҳсилоти миёнаи умумӣ гирифта, назди домуллотарошони наҳзатӣ мемонданд. Ин нодидагириҳои мактаби муосири ондавраро имрӯз мо аз иқдомҳои пешгирифтаи ҷавонон дида истодаем.

Дар шабакаи байналмилалии “Фейсбук”,  “Ҳамсинфон”  даҳхо изҳороти бесару нӯги исломпарастони ашадиро меьбинем, ки худ намедонанд, ки чӣ менависанд.Маҳз самараи ҷонбозиҳои наҳзатӣ буд, ки аксари шаҳрвандон бо нишони ихлосу садоқат ба Худованд ва пайғамбарамон ба ҲНИ пайваст мешуданд. Яъне, Нуриву Кабирӣ ва дигарон бо эҳсосот мардум бозӣ мекарданд.Аз ҳама муҳимаш он, ки насли имрӯзи ин тоифа “Ватанхоҳон” дар мисоли   Мирзои Салимпур, Кабирӣ, Саидюнус, Шарофиддин  ва Илҳом Ёқубов доир ба масоили ташкилоти террористӣ эълон гаштани сипоҳи посдорони инқилоби исломии Эрон аз ҷониби Амрико хомӯширо ихтиёр кардаанд? Дар ҳоле ҳамеша сафсатафурӯшӣ мекунанд...Чаро? Чунки онҳо ягон далел надоранд, ки худро сафед кунанд.

Дар сурати сафед кардани хоҷаи худ мавҷи вокунишҳои зиёде бар сарашор бор мешавад. Ҳатто Шарофиддин, ки худро қаҳрамони миллат метарошад, ба ин изҳороти ҷониби Амрико харфе гуфта натавонист.  Сукут аломати ризост. Яъне, мушкил аст, маблағи ҳангуфти касеро хӯрдан. Мо бори дигар бовар ҳосил кардем, ки ҳамҳамаю аврупогардиҳо, инқадар вокунишҳо кардан аз ҳисоби кист. Пас иқрор шавед эй ҷанобон, ки Шумо муздурони эрониҳо ҳастед ва ҳаргиз сухани худро гуфта наметавонед. Бигзор мо дар Ватани худ мисли Шумо фохира напӯшем, мисли Шумо бо олмониҳо бо забони олмонӣ бо голландҳо бо забони ҳолландӣ сухан накунем ҳам, дили бузург дорем. Ватан дорем, ки моро дар оғӯшаш сахт доштааст. Ва мегӯем зиҳӣ эй ҳамватан, ки мақсадат беҳбудисозии кишвар аст.

Гулчеҳра Муллоусмонова, устоди кафедраи забонҳои давлатӣ

 

 

Баҳри пешгирии ҳодисаҳои номатлуб, назорати одобу рафори духтарон дар хобгоҳ, аз наздик шинос шудан бо шароитҳои хобгоҳ бо 70 нафар духтарони дар хобгоҳ буда, аз ҷумла, бо духтарони факултети информатика ва энергетика  вохӯрӣ гузаронида шуд.   

Дар вохӯрӣ муовини декани факултети информатика ва энергетика оид ба тарбия Аминҷонова Муҳиба, устодони донишкада Темирова Хайриниссо, Усмонова Маҳина, Темурова Муҳаррам, Икромова А., сардори духтарони хобгоҳ Эмомова Манижа  ширкат варзиданд. Зимни вохӯрӣ устодон оид ба одобу рафтори духтарон, оид ба пешгирии ҳодисаҳои номатлуб байни духтарон, одоби либоспӯшӣ дар ҷойҳои ҷамъиятӣ сухан ронданд. Ҳамзамон, аз шарту шароити хобгоҳ пурсон шуда, фикру ақида ва дархостҳои духтаронро низ шуниданд.

Қайд карда шуд, ки дар хобгоҳ дафтари қайди духтарон ташкил карда шуда, омаду рафти духтарон зери назорат аст. Устодон бори дигар аз қоидаҳои хобгоҳ ёдовар шуда, зикр намуданд, ки духтарон бояд дар ҳама ҷой одобу рафтори хешро дар сатҳи баланд нигоҳ доранд.

Зимни вохӯрӣ зикр гардид, ки дар хобгоҳ маҳфилҳои шеъру сухан, дӯзандагӣ, пазандагӣ ташкил карда шуда, духтарон фориғ аз дарс, дар вақтҳои холигӣ аз ин маҳфилҳо бархурдор гарданд. Бояд гуфт, ки хобгоҳи донишкада дорои шароитҳои замонавӣ буда, истиқоматкунандагони ошёнаи дуюмро духтарон ташкил медиҳанд.

Вохӯрии мазкур хеле саривақтӣ буда, дар оянда бояд чунин мулоқотҳо бо истиқоматкунандагони хобгоҳ бештар гардад, зеро робитаи устодон бо онҳо қавитар гардида, дар тарбияи онҳо нақши муассир мегузорад.

Темирова Х.

устоди кафедраи забони давлатӣ ва ҷомеашиносӣ

 

 

Барои тамоми мардуми сарбаланди тоҷик озодӣ аз ҳама чиз авлотар аст, зеро ин неъмати бебаҳоро ба мушкилӣ ба даст овардаву ба ягон неъмати дунё иваз нахоҳем кард. Албатта, ки барои ба даст овардани ин неъмати бебаҳо то кунун нафарони фидокор талош менамоянд.

Хурсандиовар он аст, ки сиёсати хирадмандонаи Асосгузори сулҳу ваҳдати миллӣ - Пешвои миллат, Президенти кишвар, муҳтарам Эмомли Раҳмон ба он оварда расонида истодааст, ки миқдори ҷавонони маърифатпарвар ва эҷодкор хеле ва хеле зиёд шуда истодааст. Мо таҷрибаи ин ҷавонони пешқадамро тариқи телевизион, радио, маҷаллаҳо ба ҳамаи дигар ҷавонон бояд расонем, то ки дигар ҷавонон аз онҳо ибрат гиранд.

Тоҷикисон диёри ободу озод аст ва барои кулли мардум давлату Ҳукумат шароити мусоидро таъмин сохтааст. Моро мебояд, ки пеш аз ҳама ба қадри сулҳу суботи кишварамон расида бошем. Зеро имрӯз ҳастанд давлатҳое, ки дар гирдбоди шадиди ҷанг ғӯтавар гашта истодаанд. Шукрона кунем, ки давлати мо соҳибистиқлолу соҳиби ваҳдат аст.

 

 

Миллати тоҷик аз азал мардумони сулҳшиору ватандӯстро ба оғӯш кашида асту ин оини неки ниёгон то кунун аз байн нарафтааст. Аслан рисолати ҳар як шаҳрванди баору номус дар он аст, ки ба ҳотири ҳифзу ҳимоя аз озодиву ваҳдати ягонагии халқ камари ҳиммат баста бошад. Мо ҳамон вақт бар зидди мухолифони миллат мубориза бурда, ғалаба менамоем, ки пеш аз ҳама меҳанпарвару адолатхоҳ бошем. Зеро ин силоҳест, ки синаи душманони бадхоҳу нохалафро сӯрох мекунад. Ҳадафҳои нопоки эшонро ба хок мезанад ва онҳоро мағлуб менамояд.

Арзишҳои милливу манфиатҳои давлатиро пос доштани ҳифозат намудан низ имрӯз вазифаи фарзияву қарзии ҳар кадоми мост. Агар мо якдилонаву сулҳҷӯёна ба зидди нафарони бадхоҳу бадкеш мубориза барем, аминам, ки онҳоро мағлуб хоҳем сохт. Зеро агар мо майдонро барои ин ташкилотҳои иртиҷоиву ифроти холи гузорем, он вақт боз муртакиби ҳодисаи садаи гузашта хоҳем гашт.

Ҷавонони арҷмманд, имрӯз давлату Ҳукумати кишвар, хосатан Пешвли миллат дар симои ҳар кадоми Шумо ҷавонони ояндасозу масъулиятшиносро мебинад. Аз ин хотир талош варзед, то ба ин бовари содиқ гардед. Кӯшшиш кунед, ки аз дасти Шумо ояндаи Тоҷикистон дурахшону нурборон гардад.

 

 

 Хушбахтона, мо имрӯз шукрона аз он мекунем, ки дар фазои сулҳу ваҳдат ва озодии афкору андеша зиндагӣ дорем. Ва ин албатта ифтихори мо ҷавонон аст, ки барои мо имрӯз шароити мусоид фароҳам оварда шудааст. Аммо ақидаи нохалафоне баъзан ин оромию суботи ҷомеаро халалдор кардан мехоҳад.

Мо якдилона тарафи онҳое, ки ба миллати мо нигоҳи ҳаразона доранд гуфтанием, ки ин қавму миллат аз худ соҳибе дорад, ки ному нишони он дифоъ хоҳад кард. Ин сарзамин фарзандонеро дар баҳал дорад, ки барои сулҳи он ҷон фидо мекунад. Ва бар зидди тамоми душманонаш бо тавону нерӯи заковаташ меҷангад. Зеро силоҳи мардуми ваҳдатшиори мо ин иродаи қавию матонат аст.

Билохира бо итминоми комил гуфта метавонам, дур нест он рӯзе, ки дар дилҳои мардуми рӯи олам танҳо шодиву сурур танинандоз гардида, қабл аз ҳама ҷавонони имрӯза аз ақлу заковати хеш кор мегиранд ва он осори пурғановати гузаштаву имрӯзаро барои ояндагон чун меросхӯри воқеъи, чун арҷгузори ба бобоёни тоҷдор ва чун вориси арзандаи қаҳрамонони халқ бо дилу нияти неку созанда ба хотири фардои дурахшони миллати азизамон Тоҷикистон ба наслҳои ояндаи миллат месупоранд.