Паёми имсола ва Паёми соли гузаштаи Асосгузори сулҳу ваҳдати миллӣ -Пешвои миллат Президенти Ҷумҳурии Тоҷикистон муҳтарам Эмомалӣ Раҳмонро, дар маҷмӯъ, метавон Паёми илму маориф,  ҳидоят ва роҳнамо барои пешбурди илму маорифу фарҳанг, бахусус дар сохаи фанхои дақиқ ва техникӣ номид.  Зеро дар ин Паёмҳо,  Пешвои миллат муҳтарам Эмомалӣ Раҳмон соҳаи илму маорифро ҳамчун як масъалаи марказӣ, меҳварӣ ва мубрами рӯз дар сиёсати давлату Ҳукумати мамлакат ба қалам дода, иброз намуданд, ки  ин соҳа пайваста дар маркази диққати Президент ва Ҳукумати мамлакат  қарор дорад.  Қайд гардид, ки барои ҳарчи бештару беҳтар кардани сатҳу сифати таълим дар саросари ҷумҳурӣ, дар ҳамаи зинаҳои таҳсилот бояд тамоми шароитҳои зарурӣ муҳайё гарданд. Масъулияти падару модар, аҳли ҷомеа ва омӯзгоронро мебояд, дар ҳалли ин масъалаи меҳварӣ ва мубрами рӯз, бо роҳҳои гуногун, баланд бардошт. Бо мақсади боз ҳам беҳтар кардани сифати таълим дар Паёми соли гузаштаи Президент ба Маҷлиси Олӣ солҳои 2020-2040 “Солҳои омӯзиш ва рушди фанҳои риёзӣ, дақиқ ва табиӣ даро соҳаи илму маориф” эълон гардида буд.  Ҷиҳати татбиқи ин ташаббус ва ибтикори Ҷаноби олӣ, аз ҷониби Ҳукумати мамлакат нақшаи чорабиниҳо барои солҳои 2020-2025 қабул карда шуд. Дар Паёми имсола бошад, Пешвои миллат муҳтарам Эмомалӣ Раҳмон иброз намуданд: “Зарур мешуморам, ки ба хотири боз ҳам бештар ба омӯзиши илмҳои риёзиву дақиқ ва табиӣ ҷалб кардани наврасону ҷавонон олимону муҳаққиқон ва устодону омӯзгорон ҳамасола озмуни ҷумҳуривӣ зери унвони “Илм- фурӯғи маърифат” гузаронида шавад”.

 Дар идомаи суханронӣ Пешвои миллат муҳтарам Эмомалӣ Раҳмон аз озмунҳои қаблӣ- аз ҷумла аз озмуни “Фурӯғи субҳи донои китоб аст” ёдоварӣ карда, сараввал дар сатҳи баланд доир гардидани ин озмунро бо изҳори қаноатмандӣ қайд карданд. В-аз он пас Пешвои миллат муҳтарам Эмомалӣ Раҳмон муҳимтарин натиҷаи баргузории ин озмунро бо суханҳои зайл ташреҳ доданд. “Ин озмунҳо як нуқтаи бисёр муҳимро собит намуданд: дар байни наврасону ҷавонони мо истеъдодҳои нодир ба воя расида истодаанд, ки мо бояд онҳоро ҳамаҷониба дастгириву ҳавасманд гардонем.

Аз ин лиҳоз доир гардидани озмуни ҷумҳуривии “Илм- фурӯғи маърифат” як иқдоми дигари бузурге барои пешрафти илм ва фарҳанг, аз он ҷумла илмҳои дақиқ ва риёзӣ маҳсуб меёбад.  Дар асри бистуяк ҳаёти босуботи аҳли ҷомеа, зиндагии ҳаррӯзаи шаҳрвандони мамлакат, бе шакку шубҳа, бо пешрафти илмҳои дақиқ,  бахусус, дастёбӣ ва дастрасии насли наврас ба илму навовариҳо ва навгониҳо дар истеҳсолоти ҷаҳонӣ дар тавъам аст”.

Ногуфта намонад, ки дар пайравии ин ғояҳо Президенти давлати абарқудрати Россия санаи дуюми феврал дар мулоқот бо лауреатҳои озмуни умумирусиягии «Муаллими сол» ба пешниҳоди ғолиби ин озмун оид ба эълон кардани соли математика дар қаламрави Россия ҷавоб дода қайд кард: соли 2023 аз ҷониби ҳукумат воқеан ҳамчун соле ҳисобида мешавад, ки онро “Соли математика” эълон кардан мумкин аст ва албатта, мо инро дастгирӣ хоҳем кард"

 Дар идомаи гуфтаҳои боло аз таҷрибаи давлатҳои пешрафтаи дунё мисол овардан бамаврид аст. Ҷопон дар сомонаҳои интернетӣ аз зумраи давлатҳое маҳсуб меёбад, ки низоми маорифи пешқадамтарин  дорад.  Дар олами техника ва технологияи муосир  номи ифтихории  «Шоханшоҳ»-ро касб карда, дар тамоми дунё вирди забонхо гаштааст.  Дар марҳилаи кунунӣ беҳтарин истеҳсолкунандаи васоити  техникии сатҳи баиналмиллӣ дар ҷаҳон шинохта мешавад. Аз сомонаҳои интернетӣ сабаби чунин пешрафти афсонавии ин давлати афсонавиро  метавон дарёфт. Ин дастовардхо натичаи он аст, ки пас аз  воқеаҳои фоҷеабор ва харобиовари  Хиросимаву Нагасаки ҷопониҳо тамоми ҳастӣ ва дороии худро танҳо барои пешрафти соҳаи илмҳои дақиқ ва техникӣ равона карданд.

Дар ДПДТТ бо роҳбарии сарвари он Дилафрӯз Саидӣ ва роҳбарияти донишкада ба ин озмун диққати махсус равона карда шудааст. Дар ҷаласаи илмӣ-техникии навбатӣ, ки бо роҳбарии муовини директор оид ба илм ва инноватсия Усмонҷон  Ахмедов  баргузор гардид, ин масъала мавриди баррасии дақиқ қарор гирифт. Дар ҷаласа барои шахсони муттасадӣ оид ба дар сатҳи баланд баргузор кардани ин озмун вазифаҳои мушаххас  гузошта шуданд.

Устодони  кафедраи математикаи олӣ ва информатика дар моҳи март ва аввали моҳи апрел якчанд маротиба бо донишҷӯён ҷаласа доир карданд, ки дар он низомномаи озмун мавриди баррасӣ қарор гирифт. Саволномаи озмун аз фанни математика, рӯйхати адабиётҳо, шакли электронии ҳамаи адабиётҳои дар низомнома овардашуда, нуқтаҳои муҳимтарини озмун дар шакли файли алоҳида ба донишҷӯён дастрас карда шуд.  Дар ҳафтаи ҷорӣ даври аввали озмун дар сатҳи факултетҳо баргузор гардида истодааст.

Ҷавонон, бахусус донишҷӯёнро мебояд, ки аз имтиёзҳои дар ин озмун пешниҳодгардида оқилона ва самаранок истифода бурда, дар баргузории он фаъолона ширкат варзанд.

Нашр шуд: 19 апрели 2021

Дида шуд: 775 маротиба

Ба ифтихори солгарди ҷашни Қувваҳои Мусаллаҳи Ҷумҳурии Тоҷикистон дар толори варзишии бинои факултети муҳандисӣ-иқтисодӣ байни донишҷӯёни донишкада мусобиқаи ҳарбӣ-варзишӣ таҳти унвони “Ватандор” баргузор гардид. Ҳадаф ва мақсади мусобиқа баланд бардоштани ҳисси ватандӯстӣ, ҳифз ва гиромидошти ҳуввияти миллӣ, мустаҳкам намудани алоқаи дӯстӣ байни донишҷӯён, тарғибу ташвиқи тарзи ҳаёти солим байни донишҷӯён, муайян ва интихоби варзишгарони беҳтарин, ҳавасмандгардонии донишҷӯёни бомаҳоратро дарбар мегирифт.

Мусобиқа аз рӯи 6 намуд -  тобхӯрӣ дар турник, эстафета, сангбардорӣ, давидан ба масофаи 100 м; ҷаҳидан ба дарозӣ аз ҷойи ист; бандкашӣ баргузор гардид.

Ҳамаи дастаҳои факултет фаъолона ширкат варзида, дар натиҷа факултети муҳандисӣ-технологӣ соҳиби ҷойи 1, факултети муҳандисӣ-иқтисодӣ соҳиби ҷойи 2, факултети сохтмон ва нақлиёт соҳиби ҷойи 3 гардиданд.  

Дар расми эълони ғолибони озмун муовини директор оид тарбия Зариф Довудов номаи табрикотии директори донишкада Саидӣ Дилафрӯз Раббизодаро ба аҳли иштирокдорон расонида, таъкид сохт, ки   имрӯз Қувваҳои Мусаллаҳ ба туфайли дастгирӣ ва раҳнамоии Асосгузори сулҳу ваҳдати миллӣ – Пешвои миллат, Сарфармондеҳи Олии Қувваҳои Мусаллаҳ, Президенти Ҷумҳурии Тоҷикистон муҳтарам Эмомалӣ Раҳмон дар таҳкими амнияти кишвар ва таъмини ҳаёти осудаи сокинон басо назаррас мебошад. Дар баробари афсарону сарбозони Ватан, ки имрӯзҳо ҳаёти осоиштаи мардумро сарбаландона ҳифз мекунанд, донишҷӯён низ бо хонишу рафтори содиқона дар таҳкими имкониятҳои Қувваҳои Мусаллаҳ саҳми арзанда доранд.

Нашр шуд: 23 феврали 2021

Дида шуд: 1099 маротиба

Амалисозии тадбири “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф”, ки аз тарафи Асосгузори сулҳу ваҳдати миллӣ - Пешвои миллат, Президенти мамлакат мӯҳтарам Эмомалӣ Раҳмон пешниҳод шудааст ва бахшида ба 30-солагии Истиқлолияти давлатии Ҷумҳурии Тоҷикистон дар Донишкадаи политехникии Донишгоҳи техникии Тоҷикистон ба номи академик М.С.Осимӣ санаи 7.04.2021 конфронси байналмиллалии илмӣ-амалии якум таҳти унвони “Шабакаҳои электрикӣ: Эътимодият, бехатарӣ, энергосарфа ва ҷабҳаҳои иқтисодӣ” ба таври бархатӣ баргузор гардид. Конференсияи мазкур дар доираи созишномаи дуҷонибаи байни Донишкадаи политехникии Донишгоҳи техникии Тоҷикистон ба номи академик М.С. Осимӣ, Донишгоҳи давлатии энергетикии шаҳри Қазони Федератсияи Россия ва Донишгоҳи техникии шаҳри Орел ба номи И.С.Тургеневи Федератсияи Россия бо дастгирии ҳамаҷонибаи директори донишкада узви вобастаи Академияи муҳандисии Тоҷикистон, н.и.т. дотсент Саидӣ Дилафрӯз Раббизода барпо гашт. Конфронсро мудири кафедраи шабакаҳои электрикӣ ва системаҳои Донишгоҳи давлатии Энергетикии ш. Қазон н.и.т., дотсент Максимов Виктор Владимирович ҳусни оғоз бахшида, ба кори конфронс барор ва ба иштирокдорон саломатӣ орзу намуд. 

Маърӯзаҳо хеле пурмазмун ва актуалӣ буда, ба ҳалли муаммоҳои соҳаи электроэнергетикаи ҳар ду мамлакат бахшида шуда  буданд, аз ҷумла таъмини эътимодияти системаҳои электроэнергетикӣ дар шароити бозори рақобатнок, омода намудани кадрҳои муҳандисӣ дар низоми таҳсилоти олӣ, самаранокии фаъолиятбарии инфрасохтори электроэнергетикӣ ва иқтисодиёти минтақа ва ғ. Аз тарафи олимони соҳа  дар маҷмӯъ 11 маърӯза пешкаш карда шуд, аз ҷумла маърузаҳои Академияи муҳандисии Тоҷикистон, д.и.и., профессор Авезов А.Ҳ., д.и.и., профессор Авезова М.М., н.и.т., профессор Раҳимов О.С., н.и.т., дотсент Қаландаров Ҳ басо ҷолиб ва шоистаи омӯзиш аст.

Дар интиҳои конфрос Максимов Виктор Владимирович  қайд намуд, ки мақсади асосии конфронс ин мубодилаи афкор байни олимони донишгоҳои Ҷумҳурии Тоҷикстон бо олимони Федератсияи Россия ва таҳкими ҳамкорӣ барои рушди илмҳои дақиқ мебошад. Дар ин ҷода ба олимони ҳар ду мамлакат  бурдбориҳо таманно карда шуд.

Нашр шуд: 13 апрели 2021

Дида шуд: 1197 маротиба

Дар маҷлисгоҳи Донишкадаи политехникии Донишгоҳи техникии Тоҷикистон ба номи академик М.Осимӣ дар шаҳри Хуҷанд  дар  доираи Барномаи давлатии пешгирии зӯроварӣ дар оила барои солҳои 2019-2024 бо иштироки нависанда, равоншиноси амалӣ Нигина Мамадҷонова, мушовири оилавии раёсати кор бо занон ва оилаи Мақомоти иҷроияи ҳокимияти давлатии вилояти Суғд Рафоат Бобоева мулоқоти судманд бо донишҷӯён баргузор гардид. Мақсади асосии ҷамъомад баданд бардоштани маърифати оиладорӣ, ҳимояи ҳуқуқи оила, танзими ҳуқуқии муносибатҳои вобаста ба пешгирӣ, ошкор ва бартарафсозии зуроварӣ дар оиларо дарбар мегирифт.

Аз ҷониби Рафоат Бобоева  қайд гардид, ки таъмини зиндагии шоистаи шаҳрвандони кишвар яке аз ҳадафҳои асосии Ҳукумати Ҷумҳурии Тоҷикистон буда, инсон ва ҳуқуқҳои шаҳрвандон ҷавҳари Конститутсияи давлати ҳуқуқбунёди моро ташкил медиҳад. Аз ин ҷост, ки пешгирии зӯроварию хушунат дар оила ва ҷомеаи шаҳрвандӣ яке аз масъалаҳои муҳим маҳсуб меёбад, ки ҳалли он дар маркази диққат ва таваҷҷуҳи Пешвои муаззами миллат қарор дорад. Ба хотири решакан намудани ин зуҳуроти номатлуб имрӯзҳо маҷмӯи қонунҳо ва чандин санадҳои меъёриву ҳуқуқӣ мавриди амал қарор доранд. Аз ҷумла, Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2014-2023 дар саросари кишвар мавриди татбиқ қарор дорад. Яке аз сабабҳои беҳимоягии занон аз зӯроварӣ дар он аст, ки аҳли ҷомеа ба моҳияти ин проблема ба қадри кофӣ сарфаҳм намеравад. Байни ҷомеа ақидаест, ки зӯроварӣ дар оила ин кори оилавӣ ва шахсист. Чунин ақида боиси он мегардад, ки шахсони зӯроварӣ содиркарда аксар вақт беҷазо мемонанд, худро озод ҳис намуда зӯровариашонро давом медиҳанд.   Зӯроварӣ нисбати занон проблемаест, ки ба бисёр омилҳои дигар дахл мекунад.   Ҳама бояд фаҳманд, ки зӯроварӣ дар оила кори шахсии ҳар як оила нест, балки проблемаи ҷамъиятист.

Нигина Мамадҷонова  оид ба масъалаи зӯроварӣ, тағйир додани қолабҳои муносибат ва рафтори номатлуб, хотима бахшидан ба паҳншавии зӯроварӣ нисбат ба занону духтарон фикру ақилаҳои худро баён намуд ва ҳолатҳои гуногуни ҳаётиро бо ҳамроҳии донишҷӯён муҳокима ва баррасӣ кард.  Ба андешаи ӯ  омода набудан ба оиладорӣ, надоштани маълумоти касбӣ, паст будани маърифати ҳуқуқӣ, огоҳ набудан аз ҳуқуқҳои худ ва одоби муошират барои хушунат дар хонавода замина муҳайё мекунад. Доштани саводи казоӣ ва одоби муошират чӣ барои духтарон ва чӣ барои писарон дар ҳаёти мустақилонаи минбаъдаи онҳо ҳамдигарфаҳмиро бо аъзоёни оилаи шавҳар ва ё зан, инчунин осудагии зиндагиро таъмин хоҳад кард.

Лаҳзае аз ҳаёти оилавӣ аз ҷониби донишҷӯён пешкаши ҳозирин гардида,  дар доираи он суҳбати судманд доир гардид.

Дар рафти вохӯри донишҷӯён фаъолнокӣ зоҳир намуда, ба саволҳои худ ҷавобҳои мушаххас гирифтанд.

Нашр шуд: 19 феврали 2021

Дида шуд: 929 маротиба

Оид ба харитаҳо, санадҳо, музокирот ва ҳодисаҳо, ки дар натиҷаи онҳо Ворух "анклав" шуд.

Собиқ мири шаҳри Исфара ва иштирокчии чандинкаратаи  музокироти байниҳукуматӣ Мирзошариф Исломидинов ба «Азия-Плюс» дар бораи таърихи низоъҳо дар сарҳад –оид ба харитаҳо, санадҳо, музокирот ва ҳодисаҳое, ки дар натиҷа Ворух "анклав" шуд, чунин нақл кард:

Нашр шуд: 07 апрели 2021

Дида шуд: 2536 маротиба

Дар паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон вобаста ба рушди соҳаи варзиш омадааст, ки агар дар соли 1991 дар кишвар ҳамагӣ 1000 майдону толорҳои варзишӣ фаъолият дошта бошанд, пас ин рақам дар соли рафта  ба беш аз 10 ҳазор адад расидааст. Яъне, таваҷҷуҳи рӯзафзуни Пешвои муаззами миллат боис шудааст, ки сокинон тарзи ҳаёти солимро пеша намояд.

Дар ҳошияи ин тадбирҳо дар корхонаву муассисаҳо бо фароҳамии майдону толорҳои варзишӣ ҳар ҳафта рӯзи шанбе баргузории машқҳои пагоҳирӯзӣ ба ҳукми анъана даромадааст.  Чунин чорабинӣ субҳи имрӯз бо иштироки устодон ва донишҷӯёни факултети муҳандисӣ – иқтисодӣ доир гардид. Иштироккунандагон бо руҳияи болида ва ифтихор аз Ватану ватандорӣ сарҷамъона ба машқҳои пагоҳирӯзӣ пардохтанд.

Чунин тадбир ҳар ҳафта доир карда шуда, он ба солимии ҷисму руҳ мусоидат хоҳад кард.   

Нашр шуд: 13 феврали 2021

Дида шуд: 797 маротиба

Дар Донишкадаи политехникии Донишгоҳи техникии Тоҷикистон ба номи академик М.Осимӣ дар шаҳри Хуҷанд бо мақсади амалишавии стратегияҳо ва барномаҳои давлатӣ, пешгирии наврасону ҷавонон аз омилҳои номатлуби ифротгароӣ, нашъамандӣ, муқовимат бо терроризм, экстремизм ва омилҳои коррупсионӣ, пешгирии зӯроварӣ дар оила, баланд бардоштани ҳисси ватандӯстӣ ва арҷгузорӣ ба муқаддасоти миллӣ санаи 18 феврали соли ҷорӣ бо донишҷӯёни факултети информатика ва энергетика, санаи 27 марти соли ҷорӣ бо донишҷӯёни факултети сохтмон ва нақлиёт вохӯрӣ баргузор гардид. Дар вохӯриҳо нозири калон оид ба супоришҳои махсуси Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Суғд, капитани хизмати назорати маводи нашъаовар Ҷӯразода Толиб Олим иштирок ва суханронӣ намуд.

Ҷӯразода Толиб Олим сараввал дар баромади худ нуктаҳои асосии Паёми имсолаи Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ба Маҷлиси Олии Ҷумҳурии Тоҷикистонро  ба самъи  ҳозирин расонид. Инчунин қайд намуд, ки таъмини ҳифзи амният ва сулҳу суботи кишварамон ва кишварҳои минтақа вазифаи аввалиндараҷаи ҳар як мақомоти ҳифзи ҳуқуқ ва сохторҳои қудратии Ҷумҳурии Тоҷикистон, аз ҷумла Агентии назорати маводи нашъаовар ба ҳисоб меравад. Аз ин рӯ, дар радифи мубориза бо муомилоти ғайриқонунии маводи нашъаовар, мубориза бо терроризм ва экстремизм ҳамчун самтҳои афзалиятноки фаъолияти Агентӣ боқӣ мемонад.

Дар идомаи сӯҳбат қайд карда шуд, ки истеъмоли маводи нашъадор ва оқибатҳои зараровари он чӣ ба саломатии инсон ва чӣ ба руҳияи равонӣ чигуна таъсири манфӣ мерасонад ва беҳтар аст, ки ҷавонон тарзи ҳаёти солимро интихоб  намуда, бо варзиш ва дониш омӯхтан машғул шуда, ҳатто як маротиба ҳам ба истеъмоли маводи мухаддир даст назананд.

Аз ин лиҳоз аз донишҷӯён даъват ба амал оварда шуд, ки бо боварӣ ба ояндаи дурахшон ва бо иродаи қавӣ бар зидди нашъамандӣ ва нашъаҷаллобӣ мубориза барем, то ки бемории нашъамандӣ паси дари мову шумо наояд ва зиндагии солимро барбод надиҳад.

Дар ҷамъбасти вохӯрӣ аз ҷониби донишҷӯён саволҳо дода шуда, ҷавобҳои мушаххас гирифта шуд. 

Нашр шуд: 29 марти 2021

Дида шуд: 1306 маротиба

Бо мақсади шарҳу тавзеҳи бандҳои Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон  дар толори Донишкадаи политехникии Донишгоҳи техникии Тоҷикистон дар шаҳри Хуҷанд конфренсияи илмӣ-назариявии олимони ҷавон таҳти унвони “Паёми раҳнамои ҷавонон” баргузор гардид.

Чорабиниро муовини директор оид ба илм ва инноватсия Усмонҷон Ахмедов ҳусни оғоз бахшида, саломи паёми директори донишкада, номзади илмҳои техникӣ Саидӣ Дилафрӯз Раббизодаро бар самъи ҳозирин расонид. Мавсуф  аз ҷумла дар баромадаш таъкид дошт, ки яке аз дастовардҳои асосӣ ва бузурги ҷавонон дар замони соҳибистиқлолӣ таваҷҷуҳи хоссаи Асосгузори сулҳу ваҳдати миллӣ, Пешвои миллат, мӯҳтарам Эмомалӣ Раҳмон нисбат ба ҷавонон ва ҳамчун самти афзалиятнок қабул донистани сиёсати давлатии ҷавонон мебошад. Сиёсати давлатии ҷавонон яке аз рукнӽои ҷомеаи шаӽрвандии мо маӽсуб ёфта, нақши ҷавононро дар ташаккули ҷомеаи шаӽрвандӣ муайян менамояд. Эълони озмуни “Илм фурӯғи маърифат” аз ҷониби Сарвари давлат бозгӯи он аст, ки фардои ин миллат дар дасти ҷавонон, хосса мутахассисони донандаи фанҳои дақиқ ва техника аст. 

Мансурӣ Замира Мирзоализода, мудири бахши кор бо ҷавонони Раёсати кор бо ҷавонон ва варзиши вилояти Суғд  дар баромади худ қайд намуд, ки пеш аз ҳама хушбахтии мо, ҷавонон он аст, ки дар фазои сулҳу суботи  комил, тараннуми якдиливу якпорчагии ватани маҳбуб, таҳкими давлатдории навини миллӣ ва марҳилаи рушди устувор ва босуботи ҷомеа умр ба сар мебарем. Суханрониҳои  Пешвои миллат ҷавононро водор месозад, ки баҳри амалӣ намудани сиёсати дурандешона ва муваффақонаи Сарвари давлат, ки рамзи иттиҳоду сарҷамъӣ ва саодату осудагии ҳар як сокини кишвар мебошад, камари ҳиммат баста, ҳамеша дар сафи пеши соҳибватанон қадамҳои устувор гузоранд.

Раиси шӯрои олимони ҷавони донишкада Ҳусейнҷон Қаландаров зимни маърӯза таҳти унвони "Паёми Пешвои миллат - роҳнамои ҷавонони кишвар" таъкид дошт, ки Бо мақсади боз ҳам беҳтар кардани сифати таълим дар Паёми соли гузаштаи Президент ба маҷлиси олӣ солҳои 2020-2040 “Солҳои омӯзиш ва рушди фанҳои риёзӣ, дақиқ ва табиӣ дар соҳаи илму маориф” эълон гардиданд ва ҷиҳати татбиқи ин ташаббус аз ҷониби ҳукумати мамлакат нақшаи чорабиниҳо барои солҳои 2020-2025 қабул карда шуд. Олимонро зарур аст, ки корҳои илмиву таҳқиқотиро дар доираи самтҳое, ки ҳукумати мамлакат муайян кардааст, вусъат бахшида, дар рушди иқтисодии миллии кишвар фаъолона саҳм гузоранд.

Раиси бахши кор бо ҷавонони донишкада Ҷамшед Масаидов зимни баромад баён дошт, ки ба суръати умум пеш рафтани техникаву технология ва ҷойгоҳи хосаро дар рӯзгори мардум касб кардани воситаҳои муосири техникӣ, эҳтиёҷ ба кадрҳои баландихтисоси соҳаро ба назар гирифта, Пешвои муаззами миллат дар Паёмашон масъулинро вазифадор мекунанд, ки  ҷиҳати ҳарчи бештар ба хориҷи кишвар фиристодани ҷавонони боистеъдоду лаёқатманд аз рӯи равияи илмҳои дақиқ, риёзӣ ва табиӣ «Барномаи тайёр кардани кадрҳои ҷавони илмӣ барои солҳои 2021 – 2030»–ро таҳия карда, дар муддати се моҳ ба Ҳукумати мамлакат пешниҳод намоянд.

Шоира Турсунова, раиси ҷамъиятии илмии донишкада дар мавзӯи “Саноатикунонии кишвар-заминаи рушди босуботи иқтисодӣ” маърӯза намуд. Қайд гардид, ки ҳар сол дар кишвар сохта ба истифода додани корхонаҳои гуногуни хурду бузурги молистеҳсолкунанда ва таъмин гардидани сокинон бо ҷойи кори доимӣ далели рӯ ба рушд будани соҳаи саноати кишвар ва дастгириву ғамхории беназири Пешвои миллат мебошад. Гуфтан мумкин аст, ки иқдоми саноатикунонии мамлакат, ки бо ташаббуси Пешвои миллат пеш гирифта шудааст, ба таври назаррас дар амал татбиқ мешавад.

Дар идомаи кори конференсия Исматулло Норов, устоди кафедраи забони давлатӣ ва ҷомеашиносӣ дар мавзӯи “Нақши ҷавонон дар пешгирии коррупсия”,  Нигора Нӯмонова, ассистенти кафедраи иқтисодиёти рақамӣ дар мавзӯи “Роль цифровизации в развитии национальной экономики, Дабир Мирзоев, хатмкардаи докторантураи PhD дар мавзӯи “Истифодаи самараноки нерӯи барқ дар хонаҳои истиқоматӣ”, Мӯҳсинҷон Ҷӯраев , донишҷӯи курси 4, ихтисоси таъмини барқ дар мавзӯи “Таъмини истиқлолияти энергетикӣ - ҳадафи стратегии кишвар” ва Хурсандмурод Савриддинов, донишҷӯи курси 4, ихтисоси таъмини барқ дар мавзӯи “Роҳҳои бартараф намудани талафоти электроэнергия” гузоришҳои илмӣ намуданд.

Усмонҷон Ахмедов  кори конференсияро ҷамъбаст намуда, зикр дошт, ки Паёми Сарвари давлат ба Маҷлиси Олии кишвар ҳуҷҷати раҳнамоист, ки моро ба сӯи созандагиву бунёдкорӣ раҳнамоӣ мекунад.

Нашр шуд: 13 феврали 2021

Дида шуд: 881 маротиба

Дар пешрафт ва солимии ҷомеа нақши табибон хеле калон буда, махсусан дар давраи пандемияи бемории сироятии КОВИД – 19 пизишкон бо ҷонфидоиву қаҳрамонии худ барои саломатии мардум шабу рӯз меҳнати садоқатмандона кашиданд. Боиси хушнудист, ки дар Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон заҳмати табибон алоҳида зикр шуда, Сарвари давлат баён доштанд, ки ба ҳамаи кормандони соҳаи тандурустӣ, махсусан, ба табибон ва ҳамшираҳои шафқат, ки дар шабу рӯзҳои авҷи бемории сироятии коронавирус ба савганди касбии худ содиқ монда, барои табобати мардуми Тоҷикистон софдилона заҳмат кашиданд ва ҷони ҳазорон нафар ҳамватанонамонро аз марг наҷот доданд, бори дигар сипосу миннатдории самимӣ баён менамоям.

Воқеан ҳам бо дарназардошти он ки тандурустӣ яке аз соҳаҳои муҳимтарини иҷтимоӣ мебошад, Ҳукумати Тоҷикистон дар даврони истиқлол маблағгузории соҳаи тандурустиро ҳамасола зиёд карда, то 2,1 миллиард сомонӣ расонидааст.  

Яке аз бахшҳои афзалиятноки соҳаи тандурустӣ ин рушди бахши табибони оилавӣ мебошад, ки ин раванд метавонад барои боз ҳам беҳдошти вазъи саломатӣ таъсири мусбӣ ба бор оварад. Шуруъ аз соли 2000 –ум ин раванд вусъати тоза касб мекунад. Дар иртибот ба пешрафти соҳа ба унвонии директори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ аз ҷониби роҳбарияти Муассисаи давлатии “Маркази таълимию клиникавии тибби оилавии вилояти Суғд” М. Содиқова номаи сипос даррасид. Дар номаи сипос омадааст, ки муассисаи мазкур ҳарчанд соли 2000 -ум бо фармони Вазорати тандурустии кишвар таъсис дода шуда бошад ҳам, соҳиби бинои алоҳидаи худро надошт. Бо эҳтимом ва дастгирии мақомоти иҷроияи ҳокимияти давлатии вилояти Суғд як қисми бинои Маркази саломатии №6-и шаҳри Хуҷанд ба ихтиёри Марказ вогузор шуда, бо саҳмгирии Маркази ҳамоҳангсозии Лоиҳаи “Тандурустии замимавӣ ва ҷомеавӣ”-и Бонки умумиҷаҳонӣ аз таъмири куллӣ бароварда шуда буд, аммо схемаи ҷойгиркунии утоқҳои кориву ёрирасон бо мурури вақт таҷдиди назарро тақозо мекард. Бо дастгирии Шумо ва роҳбаладии устоди кафедраи сохтмони донишкада Фаррух Аминов донишҷӯёни ихтисоси 70.02.01.08 Умматов Ш, Абдуллоев А., Шарипов П ва Зайниддинзода И. дар муддати хеле кӯтоҳ схемаи ҷойгиркунии утоқҳои кориву ёрирасонро бо сифати баланд анҷом доданд.  Барои ҳисси масъулият пеш аз ҳама ба Шумо муҳтарама Саидӣ ДилафРӯз Раббизода ва дониши баланду маҳорати хуби донишҷӯён аз номи 1214 нафар табибон ва 3022 нафар ҳамшираҳои шафқати оилавӣ миннадорӣ изҳор медорам”.

Нашр шуд: 26 марти 2021

Дида шуд: 834 маротиба

Санаи 12 феврали соли 2021 тибқи нақшаи вохӯрии намояндагони мақомоти иҷроияи ҳокимияти давлатии вилояти Суғд бо донишҷӯёни муассисаҳои таҳсилоти олӣ ва миёнаи касбӣ дар мавзӯи “Пешгирии таълимоти ғайрирасмии динӣ, ҳодисаҳои номатлуб, шомилшавӣ ба ҳизбу ҳаракатҳои иртиҷоӣ, ҳуқуқвайронкунӣ ва ҷинояткорӣ дар байни ҷавонон ва тарбияи онҳо дар рӯҳияи ватандӯстӣ, тартибу одоби ҳамидаи инсонӣ” дар маҷлисгоҳи Донишкадаи политехникии Донишгоҳи техникии Тоҷикистон бо иштироки Шавкат Шарипов, устоди Донишгоҳи давлатии Хуҷанд ба номи академик Б.Ғафуров, Шӯҳрат Саидзода, устоди Донишгоҳи давлатии ҳуқуқ, бизнес ва сиёсати Тоҷикистон ва Уғулой Умаралиева, устоди Донишкадаи политехникии Донишгоҳи техникии Тоҷикистон ба номи академик М.Осимӣ вохӯрӣ баргузор гардид.

Вохӯриро муовини директор оид ба тарбия Гулшан оғоз намуда, меҳмононро ба аҳли толор муаррифӣ намуд.  Аз ҷониби мавсуф ҳамзамон мақсади вохӯрӣ баррасӣ гардид. Қайд карда шуд, ки дар ҷаласаи ҷамъбастии хоҷагии халқи вилояти Суғд Раиси вилояти Суғд, муовини аввали Раиси Маҷлиси миллии Маҷлиси Олии Ҷумҳурии Тоҷикистон Раҷаббой Аҳмадзода аз он изҳори нигаронӣ намуд, ки теъдоди ҷалби наврасону ҷавонон  ба таълимоти ғайрирасмии динӣ дар шаҳру ноҳияҳои вилоят рӯ ба афзоиш ниҳодааст. Аз ин рӯ, бояд  бештар бо наврасону ҷавонон ва волидайни онҳо дар ин самт корбарӣ намоянд. 

Шавкат Шарипов дар баромади худ қайд намуд, ки Паёми имсолаи Президент чавононро дар пешгирии ҳама гуна амалҳои номатлуби иҷтимоӣ, дар роҳи созандагию бунёдкорӣ ва инсондӯстӣ, инчунин эҳтиром гузоштан ба муқаддасоти миллӣ ва забони давлатӣ ҳидоят менамоянд. Мавсуф аз  бандҳои Стратегияи миллии Ҷумҳурии Тоҷикистон оид ба экстремизм ва терроризм барои солҳои 2021-2025 сухан ронда, баён дошт, ки Тоҷикистон яке аз давлатҳои фаъоле аст, ки дар мубоиза бо ин амалҳои номатлуб мубориза мебарад. Зеро фарҷоми ҳама бадбахтиҳо дар Шарқи наздик, ҷумҳурии ҳамсояи Афғонистон маҳз реша давонидани терроризму ифротгароӣ мебошад.

Дар баромади Ӯғулой Умаралиева оид ба нуқтаҳои асосии Паём сухан намуда, қайд карданд, ки ҷавонон бояд ҳувияти миллии худро бештар аз пештар дарк намоянд, ҳамеша чашми бедор дар ҳифзи ватану халқу миллат дошта бошанд. Зеро фазои холиро душманони миллат, хоса ташкилотҳои террористиву экстремистии ҳизби наҳзати ислом моҳирона истифода бурда,  бо воситаи сомонаи иғвоангез мафкураи ҷавононро вайрон мекунанд.

Шуҳрат Саидзода зимни маърӯза иброз дошт, ки имрӯз барои ҷавонон аз ҷониби Сарвари кишвар таваҷҷӯҳи хосса зоҳир карда  мешавад. Ҳадафи Роҳбари давлат баланд бардоштани сатҳи саводу маърифатнокии мардум ва дар навбати аввал, наврасону ҷавонон, тақвияти ҳисси миллӣ, ватандӯстиву ватанпарварӣ, ҳувияти миллӣ, арҷгузорӣ ва омӯхтани забон, таърих, фарҳанги бостонии тоҷикон, тавсеаи доираи донишу ҷаҳонбинии илмиву техникӣ ва рушди илмҳои дақиқу табиӣ дар кишвар мебошад. Бо мақсади сазовор дастгирӣ намудани ҷавонон ва талқини истифодабарии технологияҳои муосир бо пешниҳоди Пешвои муаззами миллат дар радифи озмунҳои “Фурӯғи субҳи доноӣ китоб аст”, “Тоҷикистон Ватани азизи ман” озмуни “Илм фурӯғи маърифат”- ро эълон намуданд, ки барои пешрафти соҳа мусоидат мекунад.

Дар ҷамъбаст муовини директор оид ба тарбия барои баромадҳои пурмуҳтаво ба меҳмонон миннатдорӣ баён намуд.

Қайд карда шуд, ки аҳли донишкада бо нерӯи шикастнопазир ва қавӣ дар раванди корҳои ободониву шукуфоннамоии Тоҷикистони соҳибистиқлол ба хотири истиқболи сазовор аз 30 – солагии истиқлоли кишвар саҳмгузорӣ хоҳем намуд.

Нашр шуд: 13 феврали 2021

Дида шуд: 955 маротиба